1 बेलशस्सर राजान राज्‍यान तीसरे वोरीह, ता पेल्ला देरसेनान बाद एक उंजु वात माहु दानिएलाह देरसेनान द्‍वारा देखाड़ाय गियी। 2 मी दिख्यो काय मी शूशन नावान किल्‍ला माय रेतालो। शुशन ज्यी एलाम ईलाकान राजदानी एती। मी उले नेदीन मेराम उबरियेल इतो। 3 मी उपेर दिख्यो ते माहु एक मेंड्रो ती नेदीन मीरे उबरियेल देखानो, ता मेंड्रान दुय मोटला हिंगे एता; पुण एक हिंगाह रेन एक हिंग जुलूम लांबो एतो। लांबालो हिंग आतल्या हिंगान बाद उगेल एतो। 4 मी ता मेंड्राह दिख्यो काय तो पश्‍चिम, उत्तर एने देक्षिणान उगे हिंगा केरीन ठोकेह, ता मेंड्राह काल्लो बी जेनवार ताह रोक नाह सेकतालो; एने नाह ता फाय रेन एगदो दिहरा जेनवेराह वोचाड़ सिकेह; मेंड्रो तान मोना पारमाणे काम केरतालो, तो जुलूम ताकेतवोर एय जायेल इतो।

5 मी मेंड्रान बाराम सोचतालोच काय पश्‍चिम ने उगे रेन एक बोकड़ाह आवतालो दिख्यो, तो आखी देरती पोर दोवेड़तालो। पुण ता बोकड़ान पाय देरती पोर टेकना बी नाह, ज्या बोकड़ान एक लांबालो हिंग एतो। जो साप साप देखातालो, तो हिंग बोकड़ान दुयू डोलान विचीम एतो। 6 तो ता दुय हिंगावाला मेंड्रान आहने आवो, ज्‍यो तोस मेंड्रो एतो, जाह मी ऊले नेदीन मीरे उबरियेल दिखेल इतो; तो बुकोड़ रागाम बोराय रियेल इतो, तो मेंड्रा हिऱ्यो लेड़ानो। 7 बोकड़ाह ता मेंड्रान उगे दोवेड़तालोन मी दिख्यो, तो बुकोड़ जुलूम रागाम इतो, तो मेंड्रान दुयू हिंग मुड़ टाक्‍यो; मेंड्रो बोकड़ाह रोक नाह सेक्‍यो; तेवी बुकोड़ मेंड्राह बुई पोर पाड़ दिनो, एने ओवतो तो बुकोड़ ता मेंड्राह पाया बुंदे केच्‍यावाल दिनो। ताहरी ता मेंड्राह बोकड़ाह रेन वोचाड़णार कुण नाह एतो।

8 तेवी बुकोड़ जुलूम ताकेतवोर एय गीयो, पुण तो ताकेतवोर एताच तान लांबालो हिंग टुट गीयो, एने तान जागे चार हिंग उंजु उग आवा। ता चारू हिंग साप साप देखाताला, ता चार हिंग आलेग आलेग जुगान चार दिशान उगे वोड़ने बाज गीया। 9 ओवता ता चार हिंगाम रेन एक हिंगाम एक आत्‍योस हिंग उंजु उग आवो, तो आत्‍योस हिंग वोदणे बाज गीयो एने वोदते वोदतेन जुलूम मोठो एय गीयो। ज्‍य हिंग देक्षिण पुर्वान उगे सुंदर देरतीन उगे वोदनो। 10 ✝ओवतो ता चार हिंगाम रेन एक हिंगा माय एक आतल्‍यो हिंग उंजु उग आवो। तो आतल्‍यो हिंग वोदणे बाज गीयो एने वोदते वोदते जुलूम मोठो एय गीयो, ज्‍य हिंग देक्षिण पुर्व उगे वोदनो बाज गीयो, एने ज्‍य हिंग सुंदर देरतीन उगे ओंगाण जाणे बाज गीयो। 11 तो आतल्‍यो हिंग जुलूम मोजबुत एय गीयो, ओवतो तो तारान आदिकारीह बोगवानान विरूद एय गीयो; तो आतल्‍यो हिंग ता आदिकारी बोगवानाह दाड़ीन बेट एण्यु बोल्युह बोंद केर दिनो; एने जाहरी माणहे बोगवानान बोक्ती केरताला एने तान चोखाला जागाह उजाड़ दिनो। 12 एने माणहान पापान वोजेसे दाड़ीन बोली केरनेन काम बोंद एनो, तान सेनाह बी आरीव दिनो, एने तो आतल्‍यो हिंग खेरायीह माटड्याम मिलाव दिनो; तो आतल्‍यो हिंग जो काय किऱ्यो ता आखाम जिक गीयो।

13 ओवतो मी एक चोखाला माणहाह बोलतालो होमल्यो; ताह दिहरो हेरोगदुत जापाप आप्यो, "ज्‍य देरसेन देखाड़ेह काय दाड़ीन दिह ने बोलीन काय एय? ज्‍य ता मोटला पापान बाराम हे जो खेतेम केर दिथे। मतलब चोखाला जागान एने सेनान दुयून नास एणो केवीह वोर ईती रेय?"

14 दिहरो माणुह माहु केयो, "जाह वोर वेगोस एने हांज दुय एजार तीन होव वार नाय एय, ताह वोर तो ईती रेय; तेवी चोखालो जागो चोखो केराय जाय।"

15 ज्यी वात देरसेन माय देखीन, मी दानिएल, तान मतलब सोमेजणेन कोसीत किऱ्यो; मी ज्या देरसेनान बाराम विचार केरतालोच ने एक माणहान गेत देखाणार उचकाहुच आवीन मार सामने उबरी गीयो। 16 ✝ओवतो माहु उले नेदीन विचीम रेन एक माणहान बोल होमलानो, जो आयड़ीन केयो, "एय गब्रिएल, ज्या माणहाह ज्यान देरसेनान मतलब सोमजाड़ दे।" 17 तेवी माणहान गेत देखाणार गब्रिएल हेरोगदुत जाहरी मी उबरियेल इतो, ताहरी मार आहने आवो; जेवी तो मार आहने आवो ते मी जुलूम बिय गीयो; मी बुई पोर जाय पोड़नो। तेवी गब्रिएल हेरोगदुत माहु केयो, "एय माणुह, सोमजी ले काय ज्‍य देरसेन सेवेटल्‍या टेमान बाराम हे।" 18 जेवी गब्रिएल हेरोगदुत मार हिऱ्यो वातु केरतालो, तेवी मी बुई निही मुय केरीन निंदीम गाराय गीयो; पुण तो माहु सापलीन हुतरो उबो केर दिनो। 19 गब्रिएल केयो, "देख, मी तुवाह एवी, ता देरसेनाह सोमजाड़थो; काहाकाय बोगवानान रागान टेमाम तो आखो पुरो एय जाय।

20 "तु दुय हिंगावालो मेंड्रो दिखेल हे, तान मतलब मादि एने फारस ने दुय राज्या हेते। 21 तो लांबाला रोसकावालो बुकोड़ युनान ने राजा हे, एने तान डोलान विचीम जो लांबालो हिंग, तो पेल्लो राजा हे। 22 एने तो हिंग जो मुड़ जायेल, एने तान जागे जा चार हिंग उगेल; ता चार हिंग चार राज्य हेते, ता पेल्ला राजान राज्‍याम रेन चार राज्य बोणती; पुण पेल्ला राजान ओलाक ता ताकेतवोर नाय रेती।

23 "ज्या चार राज्‍यान सेवेटल्‍या दिह्याम, जेवी तान पाप जुलूम एय जाती, तेवी एक राजा आवी, तो जुलूम एकएट्‍यो एने खाराब सोबाव एने लाबाड़ राजा रेय। 24 ज्‍यो राजा जुलूम ताकेतवोर रेय, पुण ता पेल्ला राजान गेत नाह; एने तो माणहाह खेतेम केरी, तो जो काय केरी ता माय ताह जिक जुड़ी; तो ताकेतवोर माणहाह एने बोगवानान चोखाला माणहाह बी खेतेम केरी। 25 ज्‍यो राजा जुलूम चालाक एने लाबाड़ रेय, तो गोमेंड माय बोरायीन जुलूम माणहाह खेतेम केरी जा सान्ती से रेतेह। तो बोगवानान विरूद बी लेड़ाणेन कोसीत केरी; पुण ता लाबाड़ राजान ताकेत खेतेम एय, पुण तान खेतेम एगदा माणहान आथे नाय एय। 26 वेगोच एने हांज पोर ने बाराम जो तु दिखेल एने होमलेल हे तो खेरी हे, पुण जो काय तु देरसेन माय दिखेल हे ताह लीकाड़ मेल; काहाकाय तो जुलूम दिह्या बाद पुरो एय।"

27 ता देरसेनान बाद मी दानिएल, जुलूम कोमजोर एय गीयो, एने जुलूम दिह वोर दुखाऱ्यो पोड़ रिनो; ओवतो मी बेमारीम रेन हुदरीन राजान काम पुशो केरने बाज गीयो; पुण जो काय मी दिखेल इतो, तो देखीन मी बोंगलाय रिनो; काहाकाय मी ता देरसेनान मतलब सोमजेल नाह इतो।