1 एवी बुरहो आसा किरेल वोस्तुन निश्चय, एने बिगेर दिखेल वोस्तुन पुरावो हे। 2 काहाकाय ज्यास बोरहान द्‍वारे डायलाह बोगवान फाय रेन बोड़ाय जुड़नी। 3 ✝बोरहास केरीन आपु जाण लेतेह काय आखी दुनिया बोगवानान वचना केरीन बुणेल हे। पुण ज्य नाह काय जो काय देखाह, तो दिखेल वोस्तु केरीन बुणेल एय।

4 बोरहा केरीस ने हाबील केनाह रेन हाजी बेट बोगवानान केरता चेड़ायेल, एने ताच ने द्‍वारे ताह देरमी रेणेन गोवाय बी दियेल, काहाकाय बोगवान तान बेटीन बाराम गोवाय दियेल; एने तास ने द्‍वारे तो मोरीन बी एवी वोर वातु किरेह। 5 बोरहास केरीन हनोक विसाय जायेल काय मोतीह नाय देखी, एने तान पुतो नाह लागनो काहाकाय बोगवान ताह विस लियेल ईतो, एने ताह विसाय जाणेन पेल तान ज्यी गोवाय एती काय तो बोगवानाह खुस किरेल हे। 6 एने बोरहान बिगेर ताह खुस केरनो नाह एण्यो हे; काहाकाय बोगवानान आहने आवणाराह बुरहो केरने जुवे काय तु हे, एने ताह होदणाराह फोल आपेह। 7 बोरहास केरीन नुह ती वातुन बारामाय जी तुलबूखे नाह देखाताल्यु, चेतावणी लेन बोक्ती हिऱ्यो तान गेराणाह वोचाड़नेन केरता डोंडह्यो बाणायो, एने तान द्‍वारे तु दुनियाह दोसी ठेरायेल; एने ता देरमान वोस रिनो जो बोरहा केरीन ईथे।

8 बोरहास केरीन अब्राहाम जेवी आयेल ईतो ते उकुम मानेन ओहली जागे निकेल गीयो जाह मिरास माय लिण्यो ईतो; एने ज्य नाह जाणतालो काय मी का जाथु, तीबी निकेल गीयो। 9 बोरहास केरीन तो वायदो किरेल देसा माय, पारका देसा माय पारकान गेत, रेन इसहाक एने याकुब हिऱ्यो, जा ता हेऱ्या तास वायदान वोस एता, तोम्बु माय रेना। 10 काहाकाय अब्राहाम ता मोजबुत पायावाला गावान वाट जोवतालो, ताह हिचाड़णार एने बाणावणार बोगवान हे। 11 * बोरहा केरीन सारा सोता डुकेर एती तीबी पेटावाली एणेन ताकेत सापड़ावेह, काहाकाय ती वायदो केरनाराह खीरलो सोमजेल एती। 12 इहीचकेरीन एकुस जाणा पोर रेन जो मुरेलान गेत एतो, जुगान तारा एने देरीयान रेटीन गेत मोजाय नाय ओलाक वोस पायदा एना।

13 ज्या आखा बोरहास ने हाल माय मुरेल; एने ता वायदो किरेल वोस्तुह नाह सापड़ाया, पुण ताह सिटेस रेन देखीन खुस एना एने मान लेदा काय आपु देरती पोर पारका एने बाहेरल्या हेते। 14 जा ओहली वातु केणु, ता देखाड़तेह काय स्वदेसाह होदणे बाजरेनाह। 15 एने जा देसा माय रेन ता निकेल आयेल एता, केदी ताह एर केरता ते ताह वोल जाणेन टेम ईतो। 16 पुण ता एक हाजा मतलब हेरगावाला देसान अबिलाषी हेते; केरीन बोगवान तान बोगवान केवाणेन नाह लाजवाणे, काहाकाय तो तान केरता हियोर तियार किरेल हे।

17 बोरहास केरीन अब्राहाम, पारखाणे बुखेत, इसहाकाह बोली चेड़ायेल; एने तो वायदाह खेरो मानेल ईतो 18 एने जाह ज्यो कियेल एतो, "इसहाक पोर रेन तारी वोस केवाय," तोस तान एकलोताह बेट चेड़ावणेन केरता तियार ईतो। 19 काहाकाय तो जाण लियेल ईतो, काय बोगवान ताकेतवालो हे काय ताह मुरेल माय रेन जिवाड़ी; ताच माय रेन किस्सान रिती पोर तो ताह पुशो मिलानो। 20 बोरहास केरीन इसहाक याकुब एने एसावाह आवणाऱ्यु वातुन बाराम बोरकेत आप्यो। 21 बोरहास केरीन याकुब मोरने बुखेत युसूफ ने दुय बेटाख माय रेन एक एकाह बोरकेत आप्यो, एने तान डेंगीन टेका पोर आसरो लेन बोगवानान बोक्ती किऱ्यो। 22 बोरहास केरीन युसूफ, जेवी मोरनेस केरतालो, ते इस्राएल ने सोरा निकेल जाणेन वात केऱ्या, एने तान आड़ान बारा माय उकुम किऱ्यो।

23 बोरहास केरीन मुसान आहख आबोख ताह, पायदा एणेन पासाण तीन मोयना वोर लिकाड़ मेल्या, काहाकाय ता देख्या काय सोरो सुंदर हे, एने ता राजान उकुमाह नाह बिना। 24 बोरहास केरीन मुसा सियानो एन फिरोनान बेटीख ने बिटोख केवातालो केरीन नाकाऱ्यो। 25 ज्यानकेरीन काय ताह पापा माय थोड़ाक दिह्यान हुक बोगणे रेन बोगवानान माणहा हिऱ्यो दुख बोगणेन गाडोह हाजो लागनो। 26 तो मसीन कारेण निन्दीत एणेन केरता मीस्र ने बण्‍डाराह रेन मोटलो मालदेन सुमज्यो, काहाकाय तान डोला फोल सापड़ावणेन उगे लाग रियेल एता। 27 बोरहास केरीन राजान रागाह नाह बिन तो मीस्राह सोड़ दिनो, काहाकाय तो नाह दिखेल ताह सुमजो देखतीन मोजबुत रिनो। 28 बोरहास केरीन तु फसह एने लुय हितेड़नेन विदी मान्यो, काय पेल पायदा ईयेल खेतेम केरनार इस्राएल्या पोर आथ नाय टाकी।

29 बोरहास केरीन ता रातला देरीयान ती उगे इहकेरीन उतेर गीया, जिहकेरीन हुकील बुय पोर रेन; एने जेवी मीस्री तोहलोच केरने होद्या ते आखा बुड़ीन मोर गीया। 30 बोरहास केरीन यरीहो हेयरान बितड़ो, जेवी ता हात दिह वोर तान कावदेन फिर लेदा, ते तो जाय पोड़नो। 31 बोरहास केरीन राहाब वेश्या उकुम नाह माणनारा हेऱ्यी खेतेम नाह एनी, ज्यानकेरीन काय ती खोबर्‍याह होमालीन मिलेल एती।

32 एवी उंजु काय केव? काहाकाय टेम नाह सुतो काय गिदोनान, एने बाराक एने शिमशोनान, एने यिफतहान, एने दाऊद एने शमुएलान, एने जाणकारान बाराम केव। 33 न्या बोरहास ने द्‍वारे राज जिकेल; देरमान काम किरेल; वायदो किरेल वोस्तु सापड़ायेल; सिहान मुये बोंद किरेल; 34 आक्‍ठान जिराह हेलो किरेल; तेलवारीन दारीह रेन वोच निकलेल; कोमजोरी माय तेगड़ा ईयेल; लेड़ाय माय बाहदुर निकलेल; पारका देसान सिपायाह दितेन दोवड़ाया। 35 बायकु त्युन मुरेल ताह पोशु जीव उठेल देख्यु; कोलाक ते मार खाते खातेन मोर गीया एने सुटकारो नाह होद्या, ज्यानकेरीन काय हाजाला पोशा जीवणान गोवांद्या रेती। 36 कोलाक मोजाक उड़ावणेन; एने चापका खाणेन एने बांदाय जाणेन, एने जेल माय देराणेन द्‍वारे पारखाय गिल्या। 37 डेगड़ाठाय गिल्या; दाऱ्या केरीन चिराय गिल्या; ता गेरबाय माय, एने वेला माय, एने दुख बोगतीन, मेंड्रान एने बोकड्यान चामड़ा पांगरीन, न्यान ता मोऱ्या मोऱ्या फिरना; 38 एने जेंगला, माय एने बोयड़ा, माय एने गुफा माय, एने देरतीन बुयारा माय बोटेकतेन फिरना जेग तान लायेक नाह एतो।

39 बोरहास ने द्‍वारे न्या सोबान बाराम हाजी गोवाय दियेल हे, तीबी ताह वायदो किरेल वोस्तु नाह जुड़नी। 40 काहाकाय बोगवान आपणी केरता पेलुस रेन एक हाजी वात ठेरायेल ईतो। काय ता आपणी बिगेर सिद्दता फाय नाय पोची।