1 तेवी यीशु गेरदीह एने तान चेलाह केयो, 2 देरेमगुरू एने फरिसी मुसान गादि पोर बोह रेनाह; 3 तानकेरता ता तुमूह जो काय केती, तो किरज्‍यो, एने मानज्यो, पुण तान गेत काम मा किरहो; काहाकाय ता केतेह, पुण केरते नाह। 4 ता एक उहलो बारो बांदिन माणहान खादा पोर मेल देतेह, पुण जीवे तान आंगली केरीन बी हेरकावणे नाह होदते। 5 *23:5 तान फाड़कान कुर बोगवानान प्रती तान बुरहो देखाड़ेहता तान सोब काम माणहाह देखाड़णेन केरता केरतेह: ता तान ता बिजाह चोवड़ो केरनु, एने तान फाड़कान कुर वोदाड़तेह!✝23:5 मत्ती 6:1; गिनती 15:38; व्यवस्था 6:8 6 खाणे बुखेत खास खास जागो एने बोक्ती केरन्या गेरा माय ओंगाण खास खास जागी बोहणो। 7 आटा माय नमस्‍कार, एने माणहा माय रब्बी केवाड़णेन ताह हाजो लागणे। 8 पुण तुमू रब्बी मा केवाड़हो, काहाकाय तुमरो एकुस मालीक हे, एने तुमू सोब बाय बोणहा हेते। 9 एने देरती पोर कुणीह बी आपणो आबोख मा किहो, काहाकाय तुमरो एकुच आबोख हे; जो हेरगा माय हे। 10 एने मालीक बी मा, केवाहो, काहाकाय तुमरो एकुच मालीक हे, मतलब मसी। 11 ✝23:11 मत्ती 20:26,27; मरकुस 9:35; 10:43,44; लुका 22:26जो तुमरे माय मुठो हे, तो तुमरो पावोर बोणी। 12 ✝23:12 लुका 14:11; 18:14जो कुण सोताह मोठो बाणावी, तो आत्यो एय जाय एने जो कुण सोताह बोलो बाणावी, तो मोठो केवाय।

13 एय कोपटी देरेमगुरू एने फरिसी तुमरे पोर हाय। तुमू माणहान केरता हेरगान राज ने बायणो बोंद केरतेह, नाहते सोता ता माय रिगतेह, नाहते ता माय रिगणाराह रिगणे देतेह। 14 *23:14 थोड़ाक लेख माय ज्यो वचन नाह सोतो, मरकुस 12:40। "एय कोपटी देरेमगुरू एने फरिसी, तुमरे पोर हाय! तुमू रांडायेल बायकुन गेराह खाय जातेह, एने देखाड़णेन केरता मोकतीस वार वोर विन्ता किरते रेतेह, तान केरता तुमूह होवटोह डेंड जुड़ी।"

15 एय कोपटी देरेमगुरू एने फरिसी तुमू पोर हाय। तुमू एक जाणाह तुमरी उगे लावणेन केरता आखो पाणी एने बुय माय फिरतेह, एने जेवी तो तुमरी उगे आव जाथे, ते ताह तुमूह रेन दुय गुणा नेरगान लायेक बाणाव देतेह।

16 एय आंदला वाट देखाड़नारे, तुमरे पोर हाय! जा केतेह काय केदी कुण बी मोंदिराम सुगोण खाय ते काय नाह, पुण कुण बी मोंदिरान होनान सुगोण खाय ते, ता हेऱ्यो बांदाय जाय। 17 "एय फोगा एने आंदला, कुण मोठो हे; होनो काय ती मोंदिर जा माय होनो चोखो रिथे। 18 पोशा केतेह काय केदी कुण बी वेदीन सुगोण खाय ते काय नाह, पुण जो बेट चेड़ायेल ता पोर हे, केदी कुण तान सुगोण खाथे ताहार बांदाय जाथे। 19 एय आंदला कुण मोठो हे; बेट काय वेदी जाह रेन बेट चोखो रिथे। 20 ज्यानकेरता जो वेदीन सुगोण खाथे तो तान, एने जो काय ता पोर हे, तान बी सुगोण खाथे। 21 जो मोंदिरान सुगोण खाथे, तो तान एने ता माय रेणारा बोगवानान बी सुगोण खाथे। 22 जो हेरगान सुगोण खाथे, तो बोगवानान राजगादिन एने ता पोर बी सुगोण खाथे।✝23:22 यशाया 66:1; मत्ती 5:34

23 "एय कोपट्या देरेमगुरू एने फरिसी तुमरे पोर हाय। तुमू पुदीना, बड़ीशोब एने जिरान दाहवो ईसो आपतेह पुण तुमू कायदान हाजाली वातुह मतलब नियाव एने किव, एने बोरहाह सोड़ दियेल हेते; जोवतालो काय ज्यु वातुह बी मानता एने नाय सोड़ता।✝23:23 लेव्यवस्था 27:30 24 एय आंदला जाणकारे तुमू चाचड्याह मोहदेल देतेह, पुण उटड़ाह गिल जातेह।

25 "एय कोपट्या देरेमगुरू, एने फरिसी तुमरे पोर हाय। तुमू वाटकी एने तेलीह उपेर उपेर रेन चोलतेह, पुण माय रेन त्यी आदाऱ्य एने सोतान लालुच माय बोरायेल हेत्यु। 26 एय आंदला फरिसी पेल वाटकी एने तेलीह माय रेन उजालो, ते त्यु बाहेर रेन बी साप रेती।

27 ✝ 23:27 प्रेरितान काम 23:3 "एय देरेमगुरू, एने फरिसी कोपट्या तुमरे पोर हाय, तुमू चुनो लागाड़ील माहणान गेत हेते, जो उपेर रेन ते हाजो देखाथे, पुण माय मुरेल माणहान आड़े एने आखी बातीन गाण माय बुरेल हे। 28 ज्‍यीस रिती माय तुमू बी उपेर रेन माणहाह खेरला देखातेह, पुण माय रेन कोपेट एने खाराबपोणा माय बोराय रेनाह।

29 "एय देरेमगुरू एने फरिसी कोपट्या तुमरे पोर हाय। तुमू जाणकारान माहाण हिगारणु एने खेरला माणहान माहणे बोणावणु, 30 एने केतेह, काय केदी आमु आमरा डायडायान दिह्या माय रेता ताहार जाणकारान खुना माय तान हाती नाय रेता। 31 इहकेरीन ते तुमू सोता पुरावो देतेह, काय तुमू जाणकारान खुनीन बेठहेक हेते। 32 तुमू तुमरा डायडायान पापान कुंडो आखो बोर दिवो। 33 ✝23:33 मत्ती 3:7; 12:34; लुका 3:7एय गेड़हान सोरा, तुमू नेरगान डेंडाह रेन किहीक वोचहो? 34 तानकेरता दिखो, मी तुमू फाय जाणकाराह एने ईकेलवालाह एने देरेमगुरूह मोकेलथु; एने तुमू ता माय रेन थोड़ाक जाणाह खुरूसखाम पोर चेड़ावहो, एने थोड़ाक जाणाह मार दिहो, एने थोड़ाक जाणाह तुमरा मोंदिरा माय चापका दिहो, एने एक गावा माय रेन दिहरा गावा माय दोवड़ावते ली फिरहो। 35 ज्यानकेरता देरमी हाबीलाह रेन ते बिरीक्यान बिटोख जकरीया वोर, जाह तुमू मोंदिर एने वेदीन विची माय मार दियेल एता, जोला खेरलान लुय देरती पोर वोय जायेल हे, ती सोब तुमरी मुंडी पोर पोड़ी।✝23:35 उत्पत्ती 4:8; 2 इतिहास 24:20-21 36 मी तुमूह खेरीच केथु, ज्‍यु सोब वातु ज्या कालान माणहा पोर आव पोड़ती।

37 "एय यरूशलेम, एय यरूशलेम; तु जो जाणकाराह मार टाकेह, एने जाह तुवा फाय मोकलेल, ताह देगड़ाठेल, जोली बी वार मी विचार किरेल काय जीहे कुकड़ी तीन पिलाह फाका बुंदे टुलो किरेह, तिहेस मी बी तारा सोराह टुलो केर लेव, पुण तुमू नाह विचार केऱ्या। 38 दिखो, तुमरो गेर तुमरी केरता उजाड़ सुड़ेल हे।✝23:38 यिर्मया 22:5 39 काहाकाय मी तुमूह खेरीच केथु काय एवी रेन जाह वोर तुमू किहो नाय, ‘बोरकेतवालो हे, जो मालीक ने नाव माय आवीह,’ ताह वोर तुमू माहु पोशा केदी नाय दिखहो।"✝23:39 बजन 118:26