रोमीयो 4

अब्राहामान उदारण

1 तानकेरता आपु काय किज्यो? एने आपणा डावाला आबाख अब्राहामाह काय सापड़ेल? 2 काहाकाय केदी अब्राहाम कामा द्‍वारे देरमी ठेराय जातो, ताहार ताह गोमेंड केरनेन काह बाहानो रेतो, पुण बोगवानान नेजरीम नाह। 3 ✝4:3 गलातीयो 3:6पुस्तेक काय किथे? ज्य काय "अब्राहाम बोगवाना पोर बुरहो किरेल, एने ज्य तान बोरहान कारेण ताह देरमी ठेरायेल।" 4 काम केरनाराह मोंजरी आपणे ईनाम नाह; पुण आदिकार मानाय जाथे। 5 पुण जो बोरहा पोर निर्बय रीथे नाह काय कामा माय एने बोगवाना पोर बुरहो किरेह जो नाह किरेत, पुण ता पोर बुरहो किरेह जो विणबोक्ती देरमी ठेरावेह, तान ज्योच बुरहो देरमीपोणान कारेण बोण जाथे। 6 जा माणहाह बोगवान कामा बिगेर देरमी ठेरावेह, ताह दाऊद बी बोरकेतवालो किथे: 7 "बोरकेतवाला हेते जान गुना माफ एना, एने जान पाप डापाय गीया। 8 बोरकेतवालो हे तो माणुह जान पापान ईसाब बोगवान नाय लेय।"

9 जी बोरकेतवाली वात दाऊद केणे बाजरिनोह, काय ती खेतना वालान केरता ओलीस हे? नाह ती बिगेर खेतना वालान केरता बी काहाकाय आमु केतेह, "अब्राहाम बोगवाना पोर बुरहो किऱ्यो एने तान बोरहान वोजेसे बोगवान स्वीकार किऱ्यो।" 10 तो ज्यो कुलबुखे ईयेल काय तान खेतना एय जायेल तो नाह खेतान ईयेल केरीन नाह पुण किहीक गेणाय गीयो? खेतनान देशा माय काय बिगेर खेतनान देशा माय? खेतनान देशा माय नाह पुण बिगेर खेतनान देशा माय। 11 एने तान खेतनान एणेन ती एक निसाणी बोणनी काहाकाय देखाड़ सेकी, अब्राहाम आखा विश्वासीन आत्मिक आबोख बोणनो तानकेरता ता बी देरमी गेणाय जाती पोर सिक्को लाग जाय जो तान बिगेर खेतनान देशाम मीलेल ईतो, जाकेरीन तो ता आखान आबोख ठेराय जा बिगेर खेतनान देशाम बुरहो केरतेह काहाकाय ता बी देरमी ठेराती; 12 एने तो तान बी आबोख हे जान खेतना ईयेल हे, काहाकाय ता माणहे फोक्‍तो खेतनावालास नाह एता, पुण आमरा आबाख अब्राहामान बोरहान पद निसाणी पोर चालनारे एता, तो अब्राहाम जो खेतना एणेन पेल चालनो।

बोरहान द्‍वारा बोगवानान वायदो जुड़नो

13 ✝ 4:13 गलातीयो 3:29 जेवी बोगवान अब्राहाम एने तान वोचीह वायदो किऱ्यो काय दुनियान वारीस एती, जो वायदो नेमान पालेन केरनेन द्‍वारा नाह जुड़नो, पुण तो बुरहो किऱ्यो एने तो बोगवानान द्‍वारा देरमी ठेराय गीयो। 14 ✝4:14 गलातीयो 3:18तानकेरता केदी तुमू मानतेह काय बोगवान आपेल वायदो जो नेमान पालेन केरनाराह जुड़नो, ताहार तुमरो बुरहो कामान नाह, एने बोगवानान वायदो बी बेकार एय जाथे। 15 नेमा केरीन बोगवानान राग देखाह, एने पायदा किरेह, एने जाहरी नेम नाह ताहरी तान टालनो बी नाह।

16 ✝ 4:16 गलातीयो 3:7 ज्यास ने केरता वायदो बोरहा माय आदारीत बोगवानान फुकेट बेट हे, ज्य फोक्‍तो नेमान पालेन केरनारान नाह, पुण तानकेरता बी जा बुरहो केरतेह जिहकेरीन अब्राहाम बुरहो किऱ्यो। काहाकाय अब्राहाम आपु आखान आत्मिक आबोख हे। 17 जिहकेरीन पुस्तेक माय लिखेल हे, "मी तुवाह जुलूम देसान आबोख ठेरायेल हे," एने ज्यो वायदो बोगवानान नेजरीम हाजो हे। ज्यो तो बोगवान हे जा पोर अब्राहाम बुरहो किऱ्यो एने जो मुरेल माणहाह जीवाड़ेह, एने जो बोगवान अस्तित्वरहीत वातु तान उकुमा केरीन अस्तित्व माय लावेह। 18 जिहकेरीन वचन माय लिखेल हे तु जुलूम देसान आबोख बोणहे एने तारा वोच चांदण्यान गेत एती ज्यी वाती पोर आसा मेलनेन काय कारेण नाह एतो, तीबी अब्राहाम बुरहो एने आसा मिल्यो। अब्राहाम नाराज माय बी आसा मेलीन बुरहो किऱ्यो, ज्यानकेरता काय तान गेत जो केवाय जायेल एतो, "तारो वोस ओहलो एय," तो जुलूम होवट्यु जातीन आबोख एय। 19 काहाकाय तो कोमीत कोमी होव वोरह्यान एय जायेल ईतो पुण तान बुरहो तान सेरीरान गेत कोमजोर नाह ईयेल ईतो जिहकेरीन तान सेरीर कोमजोर एय जायेल ईतो एने खेराय ज्यी बी हे सारा वांज एती। 20 तीबी तो तान बुरहो नाह सोड्यो एने नाह बोगवानान वायदा पोर सेंका किऱ्यो एने तान बोरहाम ताकेत माय बोरानो अविश्वासी बोणीन बोगवानान वायदा पोर सेंका नाह किऱ्यो, पुण बोरहा माय मोजबुत एन बोगवानान बोड़ाय किऱ्यो; 21 एने ताह पाको बुरहो ईतो काय बोगवान किऱ्यो काय जी वातीन बोगवान वायदो किरेल हे, तो ताह पुरो केरने माय बी ताकेतवोर हे। 22 तानकेरता बोगवान अब्राहामाह तान बोरहान द्‍वारा देरमी ठेरायो, ज्य तानकेरता देरमी पोण गेणाय गीयो। 23 एने ज्य वचन, "बोरहान द्‍वारा देरमी ठेरानो फोक्‍तो तान एखालास ने केरता नाह लेखानो।" 24 ज्य आपणी केरता बी लेखायेल जा आपु आपणी केरता बी ज्यानकेरता बुरहो देरमी पोण गेणाय जाय, मतलब आपणी केरता जा ता पोर बुरहो केरतेह जो आपणो मालीक यीशुह मुरेल माय रेन जीवाड्यो। 25 काहाकाय यीशु आपणा गुनान केरता देराय गीयो, एने आपु देरमी ठेराणेन केरता जीव बी उठनो।