୨ ତିମତି 2

କ୍ରିସ୍ଟ ଜିସୁତି ପାର୍ତି ମେଲ୍ୟା

1 ନା ୱାରିନି ମାଜ଼ି, କ୍ରିସ୍ଟ ଜିସୁ ଲାହାଂ ମେହାନି କାଜିଂ ଦୟାତାଂ ଇମ୍‌ଣି ସାକ୍ତି ପାୟା ତାଦେର୍ଣ୍ଣା, ହେବେ ଏପେଙ୍ଗ୍‌ ବାଡ଼୍‍କାସ୍‌ ଆଡୁ, 2 ଆରେ ହେନି ସାକିନି ମୁମ୍‌ଦ ଆନ୍‌ ପର୍‌ଚାର୍‌ କିଜ଼ିମାନି ବିସ୍ରେକାଂ ଏପେଙ୍ଗ୍‌ ୱେଚାଦେର୍ଣ୍ଣା । ବିନ୍‌ନିକାରିଂ ହିକ୍ୟା ହିନି କାଜିଂ ଆଡ୍‌ନାଦେର୍‌ ଆରି, ପାର୍ତି କିନି ମାନାୟ୍‌ ଲାଗେ ହେ ସବୁ ହେଲାୟ୍‌ କିୟାଟ୍‌ ।

3 କ୍ରିସ୍ଟ ଜିସୁତି ରୱାନ୍‌ ହାର୍‌ଦି ମେଲ୍ୟା ଲାକେ ତା କାଜିଂ କସ୍ଟ ହୁଞ୍ଜାଟ୍‌ । 4 ଇମ୍‌ଣି ମାନାୟ୍‌ ମେଲ୍ୟା କାମାୟ୍‌ କିଜ଼ି ସଁସାର୍‌ନି ବିନ୍‌ କାମାୟ୍‌ତ ଜାର୍‌ତିଙ୍ଗ୍‌ ଚିନ୍ତା କିଉନ୍‌, ଇନେସ୍‌କି ମେଲ୍ୟା ପାଦ୍‌ତ ହିତ୍‌ତି ହାଉକାର୍‌ତିଂ ହେୱାନ୍‌ ମାନପୁରାୟ୍‌ କିଦେଙ୍ଗ୍‌ ଆଡ୍‌ନାନ୍‌ । 5 ଆରେ ପା ଜଦି ରୱାନ୍‌ ମାନାୟ୍‌ କ୍ରାଜ଼ିନିତ ବାଗ୍‌ ଆନାନ୍‌, ହେୱାନ୍‌ ନିୟମ୍‌ ଇସାବ୍ରେ ହେଦାଂ କିୱିତିସ୍ ଇନାମ୍‌ ପାୟା ଆଉନ୍‌ । 6 ଇମ୍‌ଣି କାମ୍‌ଲିୟା ନିଜେ କସ୍ଟ କାମାୟ୍‌ କିନାନ୍‌, ହେୱାନ୍‌ ପ୍ରତୁମ୍‌ ପାଡ଼୍‌ନି ବାଗ୍‌ ପାୟାନି ଲଡ଼ା । 7 ଆନ୍‌ ଇନାକା ଇଞ୍ଜ୍‌ନାଙ୍ଗା, ହେଦାଂ ବାବିକିୟାଟ୍‌; ମାପ୍ରୁ ୱିଜ଼ୁ ବିସ୍ରେ ନିଙ୍ଗେଙ୍ଗ୍‌ ବୁଦି ହିଦ୍‌ନାନ୍ ।

8 ଆନ୍‌ ସୁଣାୟ୍‍ କିତି ନେକ୍ରିକାବୁର୍‌ ଇସାବେ ହାତାକାର୍‌ ବିତ୍ରେ ନିଙ୍ଗ୍‌ନାକା ଆରି ଦାଉଦ୍‌ତି ଲାତ୍ରା ଜଲମ୍‌ ଆତାକା ଜିସୁ କ୍ରିସ୍ଟଙ୍ଗ୍‌ ଏତୁ କିୟାଟ୍‌ । 9 ହେ ନେକ୍ରିକାବୁର୍‌ କାଜିଂ ଆନ୍‌ ପାପ୍‌ପିୟା ଲାକେ ହେସ୍‌ବିତି ପାତେକ୍‌ କସ୍ଟ ବଗ୍‌ କିନାଙ୍ଗା; ମାତର୍‌ ଇସ୍ୱର୍‌ତି ବଚନ୍‌ ଗାଚ୍‌ୟାଉତ୍‌ । 10 ଇସ୍ୱର୍‌ତି ବାଚିକିତି ମାନାୟାର୍‌ କ୍ରିସ୍ଟ ଜିସୁତାଂ ପାୟାତି ମୁକ୍‌ଡ଼ାନାକା ଆରି ୱିଜ଼୍‌ୱି ଜାଜ୍‌ମାଲ୍‌ ଲାବ୍‌ କିତାର୍‌, ଇ ଉଦେସ୍‌ତ ୱିଜ଼ୁ ନିନ୍ଦା ହୁଞ୍ଜ୍‍ନାଙ୍ଗା । 11 ଇ ବଚନ୍‌ ପାର୍ତିନିକା, "ଜଦି ଆସେଙ୍ଗ୍‌

ତା ଲାହାଙ୍ଗ୍‌ ହାତାସ୍‍ନା,

ଲାଗିଂ ହେୱାନ୍‌ ହୁଦାଂ ପା ଜିନାସ୍‌;

12 ✝ ୨:୧୨ ମାତିଉ ୧୦:୩୩; ଲୁକ ୧୨:୯. ଜଦି ଆସେଙ୍ଗ୍‌ କସ୍ଟ ହୁଞ୍ଜ୍‍ନାସ୍‍,

ଲାଗିଂ ହେୱାନ୍‌ ଲାହାଙ୍ଗ୍‌ ପା ରାଜ୍‌ କିନାସ୍‌; ବାଟିଙ୍ଗ୍‌ ଆସେଙ୍ଗ୍‌

ହେୱାନିଂ ପୁନୁସ୍‌,

ବାଟିଙ୍ଗ୍‌ ହେୱାନ୍‌ ପା ମାଙ୍ଗ୍‌ ପୁଞ୍ଜୁଙ୍ଗ୍‌ ଇଞ୍ଜି ଇଞ୍ଜ୍‌ନାନ୍‌;

13 ଏଚେୱେଡ଼ାଂ ଆସେଙ୍ଗ୍‌ ପାର୍ତି କିୱାକାସ୍‌ ଆନାସ୍‌, ୱାଟିଂ ପା ହେୱାନ୍‌ ନିତ୍ରେ ପାର୍ତିନିକାନ୍, ଇନେକିଦେଂକି ହେୱାନ୍‌ ଜାର୍‌ତିଙ୍ଗ୍‌ ଇନିୱାଡ଼ାଙ୍ଗ୍‌ ପା ମାନିକିଉନ୍‌ ।"

ପାର୍ତିନି କାମ୍‌ଲିୟା

14 ଏପେଙ୍ଗ୍‌ ୱିଜ଼ୁ ପାର୍ତି କିନାକାରିଂ ଇ ବଚନ୍‌ ଏତୁ କିୟାଟ୍‌ ୱେନାକାର୍‌ତି ଉପ୍‌କାର୍‌ ହିଲ୍‌ୱାକା ଆରି ନାସ୍‌ଆନାକା ଇନ୍‌ବାୱାଦାଂ ହେୱାରିଂ ମାପ୍ରୁତି ସାକି ଆଟ୍‌ୱା କିଜ଼ି ବଲ୍‌ ହିୟାଟ୍‌ । 15 ଏପେଙ୍ଗ୍‌ ଲାଜ୍‌ ଆୱାଦାଂ ସମାନ୍‌ ସାକ୍ତି ସମାନ୍‌ ବାବ୍ରେ ଇସ୍ୱର୍‌ତି ସତ୍‌ କାବୁର୍‌ ୱେଚାଟ୍‌; ତା ଆତିସ୍‌, ରୱାନ୍‌ ପରିକ୍ୟାସିଦ୍‌ ମାନାୟ୍‌ ଲାକେ ଏପେଙ୍ଗ୍‌ ଇସ୍ୱର୍‌ତି ପୁରା ରାଜି କିନାକା ଲାବ୍‌ କିନାଦେର୍‌ । 16 ମାତର୍‌ ପଲ୍ୟା କାତାବାର୍ତାତାଂ ବିନେ ମାନାଟ୍‌; ଇନେକିଦେଂକି ଇମ୍‌ଣାକାର୍‌ ହେବେ ଲାଗାନାର୍‌, ହେୱାର୍‌ ଅଦାର୍ମିତ ଆଦିକ୍‌ ବାଡାନାର୍‌, 17 ଆରେ ହେୱାର୍‌ତି କାତା ହାପ୍‌ତି ଗାୱ୍‌ ଲାକେ ତିନ୍‌ଜି ହାନାତ୍‌ ହେୱାର୍‌ ବିତ୍ରେ ହୁମନାୟ ଆରି ପିଲିତ ରିକାର୍‌; 18 ହେୱାର୍‌ ହାତ୍‌ପା ହାଜ଼ିତିଂ ବିନେ ଆତାର୍ଣ୍ଣା ଆରି ଇ ଜିବୁନ୍‌ତ ଆରେ ନିଙ୍ଗ୍‌ତାକାର୍‌ ଗିଟାତାତ୍‌ନା ଇଞ୍ଜି ହିକ୍ୟା ହିଜ଼ି କେତେଜାଣ୍‌ତି ଦାରୁମ୍‌ ପାର୍ତି ଉଲ୍‌ଟାୟ୍‌ କିତାର୍‌ନା । 19 ଆତିସ୍‌ପା ଇସ୍ୱର୍ତି ରଚ୍‌ଚି ଆଟ୍‌ୱା କୁନାଦି ଡାଟ୍‌ ମାନାତା, ଆରେ ତା ଜପି ଇଦାଂ ଚିନ୍‌ ଇଡ଼ିକିୟାତାତ୍‌ନା, "ମାପ୍ରୁ ଜାର୍‌ ଲଗାଙ୍ଗ୍‌ ପୁନାନ୍‌, ଆରେ, ଇନେର୍‌କି ମାପ୍ରୁତି ତର୍‌ ଆହ୍‌ନାନ୍‌, ହେୱାନ୍‌ ଅଦାର୍ମିତାଂ ଦେହା ମାନେନ୍‌ ।"

20 ର ଗାଜା ଇଞ୍ଜ ଜେ କେବଲ୍‌ ହନା ଆରି ରୁପାନି ବାହା ମାନାତ୍‌, ହେଦାଂ ଆକାୟ୍‌, ମତର୍‌ ୱେଜ଼୍‌ଗୁ ଆରି ଟାଣ୍ଡିନି ବାହା ପା ମାନାତ୍‌; କେତେକ୍‌ ମାନ୍‌କିନାକା ଆରି କେତେକ୍‌ ମାନ୍‌କିୱାକା କାଜିଂ ମାନାତ୍‌ । 21 ଲାଗିଂ, ଜଦି ଇନେର୍‌ ହେ ୱିଜ଼ାକାର୍‌ତାଂ ଜାର୍‌ତିଙ୍ଗ୍‌ ନିର୍‌ମଲ୍‌ ଇଟ୍‌ନାନ୍‌, ତାଆତିସ୍‌ ହେୱାନ୍‌ ପୁଇପୁୟା କିଆତାନ୍ନା, ହାଉକାର୍‌ତି ବେବାର୍‌ କାଜିଂ ହାର୍‌, ଆରେ ୱିଜ଼ୁ ହାର୍‌ଦି କାମାୟ୍‌ କାଜିଂ ଜାଲ୍‌ଦି, ଏଲେଙ୍ଗ୍‌ ର ମାନ୍‌କିନାକା ଲକୁ ଆନାଦେର୍‌ । 22 ମାତର୍‌ ଏପେଙ୍ଗ୍‌ ବେଣ୍ଡିୟା କାଡ଼୍‌ଦାଙ୍ଗ୍‌ ଆହା ପିହାଟ୍‌, ଇମ୍‌ଣାକାର୍‌ ସକଟ୍‌ ମାନ୍ତ ମାପ୍ରୁ ଲାଗାଂ ପାର୍ତାନା କିତାର୍‌, ହେୱାର୍‌ ଲାହାଙ୍ଗ୍‌ ଦାର୍ମିର୍‌, ପାର୍ତି, ଜିଉନନାକା ଆରି ସୁସ୍ତାତ ପାଚେପାଚେ ହାଲାଟ୍‌ 23 ନିର୍‌ବୁଦିୟା ଆରି ମୁର୍‌କିୟାରିଂ ଜେ ଜିକାଟାଣା ବେରୁତାଂ ଦେହା ମାନାଟ୍‌, ଇନେକିଦେଂକି ଇ ସବୁ କାମାୟ୍‌ କେବଲ୍‌ ଗଣ୍ଡ୍‌ଗଲ୍‌ ହନାତ୍‌ । 24 ଇସ୍ୱର୍‌ତି ଲକୁ ଗଣ୍ଡ୍‌ଗଲ୍‌ କିନାକା ହାର୍‌ ଆକାୟ୍‌ । ଆଡ଼ିୟା ୱିଜ଼ାର୍‌ କାଜିଂ କୱାଣ୍‌ ଆଜ଼ି ରୱାନ୍‌ ହାର୍‌ଦି ସାସ୍‌ ଗୁରୁ ଆନାକା ଲଡ଼ା । 25 ତା ଆତିସ୍‌ ଇନେସ୍‌କି ଇସ୍ୱର୍‌ ହେୱାରିଂ ହାତ୍‌ପା ବିସ୍ରେ ଗିଆନ୍‌ ପାୟା ଆନି କାଜିଂ ମାନ୍‌ବାଦ୍‌ଲାୟ୍‌ କିନି‍ ବର୍‌ ହିଦ୍‌ନାନ୍‌, 26 ଏଚେକାଡ଼୍‌ଦ ଉଜ୍‌ ଆଜ଼ି ହେୱାରିଂ ମୁଟାତ କିଜ଼ି ଇଡ଼୍‌ଜି ସୟ୍‌ତାନ୍‌ ଡ଼ୁକାତାଂ ହେୱାର୍‌ ମୁକ୍‌ଡ଼ା ଆନାର୍‌ ।