1 ମାତର୍‌ ଇଦାଂ ପୁନ୍‌ଞ୍ଜି ମାନାଟ୍‌, ଜେ, ହାରିହାରା କାଡ଼୍‌ଦ ବିପତି ସମୁ ଏକାୱାନାତ୍‌, 2 ଇନେକିଦେଂକି ମାନାୟାର୍‌ ଜିବୁନ୍‌ନିୱାରି, ଦାନ୍‌ଲବ୍‌ରା, ମାନ୍‌ଗାର୍ବି, ଆକ୍ରିୟା, ନିନ୍ଦାକିନାକାନ୍‌, ଆବାଙ୍ଗ୍‌ ଆୟାଙ୍ଗ୍‌ ଅମାନ୍ୟା, ପାଚାରିକିୱାକାନ୍‌, ରାଡ଼ା, ଲାଡ୍‌ ହିଲ୍‌କାନ୍‌, 3 ହେୱାର୍‌ ମେହାଣ୍‌ହିଲ୍‌ୱାକାନ୍‌, ଲକାର୍‌ନିନ୍ଦା, ଜାର୍‌ତିଙ୍ଗ୍‌ ଟାକ୍ରି ଆରି ବଇଁକାର୍‌ ହାର୍ଦି ବିସ୍ରେତିଂ ଗିଣ୍‌ କିନାକାର୍‌, 4 ବିସାସ୍ତ ବିସ୍‌ହିନାକାନ୍‌, ଗାଜାସାସ୍‌, ବାଡ଼୍‌ପାଣିୟା ଆରି ଇସ୍ୱର୍‌ଲାଡ୍‌ ଆୱାଦାଂ ଇଚିସ୍‌ ୱାରିନିକାର୍‌ ଆନାର୍‌; 5 ହେୱାର୍‌ ବକ୍ତିନି ବେସ୍‌ ଆହ୍‌ନାର୍‌, ମାତର୍‌ ହେବେ ସାକ୍ତିତିଂ ମାନିକିଉର୍‌, ଏଲେଙ୍ଗ୍‌ବାର୍ତି ମାନାୟାର୍‌ତାଂ ବିନେ ଆଡୁ । 6 ଇନେକିଦେଂକି ଇୱାର୍‌ ବିତ୍ରେ ଏଲେଙ୍ଗ୍‌ବାର୍ତି ମାନାୟ୍‌ ମାନାର୍‌, ଇନେର୍‌ ଇଞ୍ଜ ଇଞ୍ଜ ହଣ୍‌ଜି ପାପ୍‌ତ ବାର୍ତି ଆଜ଼ି ଆରି ବାରବିନି ବାନ୍ୟାତ ଚାଲାଆନି ବୁଦିହିଲ୍‌ୱି କଗ୍‌ଲେକାଂ ଜାର୍‌ ମୁଟିତ ଇଟ୍‌ନାର୍‌; 7 ଇ କଗ୍‌ଲେକ୍‌ ନିତ୍ରେ ହିକ୍ୟା କିଜ଼ି ମାଚିସ୍‌ ପା ହାତ୍‌ପା ପୁନି କାଜିଂ ମୁଡ଼େ ବୁଜାଆଦେଂ ଆଡୁକ୍‌ । 8 ଆରେ ଇନେସ୍‌କି ଜନ୍ନିସ୍‌ ଆରି ଜମ୍ୱିସ୍‌ ମସାଙ୍ଗ୍‌ ପିସ୍ତି ମାଚାର୍‌, ହେ ଲାକେ ଇ ଆଣ୍ଡ୍ରାଙ୍ଗ୍‌ ପା ହାତ୍‌ପାତିଂ ପିହିନାର୍‌; ଇୱାର୍‌ ବାନିୟା ଆଜ଼ି ପାର୍ତି ବିସ୍ରେ ହାତ୍‌ପା ହେୱାର୍‌ତି ଦରମ୍‌ ପାର୍ତି ପଲ୍ୟା ଆତାତ୍‌ । 9 ମାତର୍‌ ହେୱାର୍‌ ଆରେ ବେସି ଆଗେ ହାଞ୍ଜେଙ୍ଗ୍‌ ଆଡୁର୍‌ । ଦିନେକ୍‌ ୱିଜ଼ାର୍‌ ପୁନାର୍‌, ହେୱାର୍‌ କେତେକ୍‌ ବକୁଆ । ଜନ୍ନିସ୍‌ ଆରି ଜମ୍ବ୍ରିସ୍‌ତି ଜିବୁନ୍‌ତ ଇନାକା ଗିଟାଆଜ଼ି ମାଚାତ୍‌, ହେୱାର୍‌ ଜିବୁନ୍‌ତ ହେଦାଂ ନେ ଆନାତ୍‌ ।

10 ମାତର୍‌ ଏପେଙ୍ଗ୍‌ ନା ହିକ୍ୟା, ଆଚାର୍‌ ବେବାର୍‌, ଇଚା, ପାର୍ତି, ହୁଦାର୍‌, ଜିଉନନାକା, ସାସ୍‌, 11 ✝ଆନ୍ତିୟକିଆ, ଇକନିୟ ଆରି ଲୁସ୍ତ୍ରାତ ନା କାଜିଂ ହେ ଲାକେ, ଇଣ୍‌ ଗିଟାଆଜ଼ି ମାଚାତ୍‌; ଆନେଙ୍ଗ୍‌ ହେଦାଂ ହୁଞ୍ଜି ମାଚାଂ, ଆରେ ମାପ୍ରୁ ନାଙ୍ଗେଙ୍ଗ୍‌ ହେ ସବୁତାଂ ବାଚାୟ୍‌ କିଜ଼ି ମାଚାନ୍‌ । 12 ହାତ୍‌ପାତ ଇମ୍‌ଣାକାର୍‌ କ୍ରିସ୍ଟ ଜିସୁତି ଲାହାଙ୍ଗ୍‌ ଦାର୍ମି ଜିବୁନ୍‌ କାଜିଂ କିଦେଙ୍ଗ୍‌ ଇଚା କିତାର୍‌, ହେୱାର୍‌ ଇଣ୍‌ ଅୟାନାର୍‌ । 13 ମାତର୍‌ ପାପିର୍‌ ଆରି ଚାକ୍ରାୟ୍‌ କିନାକାର୍‌ତି ତାଂନାକା ନାସ୍‌ଆନି ନିପ ହେୱାର୍‌ ବିନ୍‌ନିକାରିଂ ଟକାୟ୍‌ କିଜ଼ି ହାରିହାରା ନିଜେ ଟକାୟ୍‌ କିୟାନାର୍‌ । 14 ମାତର୍‌ ଏପେଙ୍ଗ୍‌ ଇନା ଇନାକା ହିକ୍ୟା କିନାଦେରା, ଆରେ ଜେ, ହେ ସବୁ ବିସ୍ରେ ସତ୍‌ କିଜ଼ି ହାତ୍‌ପା ପାର୍ତି କିତାଦେର୍ଣ୍ଣା, ହେ ସବୁତ ତିର୍‌ ଆଜ଼ି ମାନାଟ୍, ଇନେକିଦେଂକି ଏପେଙ୍ଗ୍‌ ଗୁରୁ ଇନେର୍‌ ହେଦାଂ ଏପେଙ୍ଗ୍‌ ପୁଚାଦେର୍ଣ୍ଣା, 15 ଆରେ, ଇମ୍‌ଣି ଦରମ୍‌ ସାସ୍ତର୍‌ କ୍ରିସ୍ଟ ଜିସୁତି ତାକେ ପାର୍ତି ହୁକେ ମିଙ୍ଗେଙ୍ଗ୍‌ ମୁକ୍‌ଡ଼ାୟ୍‌ କିଦ୍‌ନି ଗିୟାନ୍‌ ହିଦ୍‌ଦେଙ୍ଗ୍‌ ଆଡ଼୍‌ଦାନାତ୍‌, ହେଦାଂ ଏପେଙ୍ଗ୍‌ ହିମ୍‌ଣା ୱେଡ଼ାଙ୍ଗ୍‌ତାଂ ପୁଚାଦେର୍ଣ୍ଣା । 16 ସବୁ ସାସ୍ତର୍‌ ଇସ୍ୱର୍‌ତାଂ ହିୟାଆତାତ୍‌ନା, ଆରି ହାତ୍‌ପା ହିକ୍ୟା, ଲେତ୍‌ନାକା, ସମାନ୍‌ କିନାକା ଆରି ସତ୍‌ ଜିବୁନ୍‌ ଜିଉଣା କିନାକା । 17 ଇନେସ୍‌ ଇସ୍ୱର୍ତି ଲକୁ ବାର୍ତି ଆଜ଼ି ସବୁ ହାର୍‌ଦି କାମାୟ୍‌ କାଜିଂ ଜାଲ୍‌ଦି ଆଡୁ ।