ହାର୍ଦି ହିକ୍ୟା
1 ମତର୍ ଏନ୍ ହାତ୍ପା ହିକ୍ୟାନି ବାଲ୍ତି କାତା ଇନାଟ୍ । 2 ବଁୟିସ୍ନି ଆଣ୍ଡ୍ରାହିମ୍ଣାରିଙ୍ଗ୍ ହାର୍ଦି କାତା ଇନାକାନ୍, କାଲେତାଙ୍ଗ୍, ମାନିକିନାକା ଆରେ ପାର୍ତି, ଜିଉନନାକା ଆରି ସାସ୍ତାଂ ବାଡ଼୍କାସ୍ ଆଦେଂ, 3 ଆରେ ଆଦିକ୍ ବଁୟିସ୍ନି କଗ୍ଲେକାଂ ହେ ଲାକେ ଲକାର୍ ଲକାର୍ନିନ୍ଦା ଆରି ଅଙ୍ଗୁର୍ ରାସ୍ ଉଣିତାକେ ମାନ୍ଜେଲ୍ୟାୱାଦାଂ ହାର୍ଦି ବେବାର୍ଣି, ଆଦେଂ ଆରି ହାର୍ଦି ହିକ୍ୟା ହିଦେଂ ଗୱାରି କିୟାଟ୍ । 4 ତା ଆତିସ୍ ହେୱାର୍ ଜିପଲିକାଙ୍ଗ୍ ଜାର୍ ଆଣ୍ଡ୍ରେନିଂ ଜିଉନନି କାଜିଂ ହିକ୍ୟା ହିଦେଂ ଆଡ୍ନାର୍ । 5 ଆରେ ହେୱେକ୍ ପୁଇପୁୟା, ହାର୍ଦି ଇଲ୍ ମୁଣିକାଣି, ହୁଦାର୍, ଆରି ଜାର୍ ଜାର୍ ଆଣ୍ଡ୍ରେନିଂ ହେବାକାରିୟାଣି ଆଏକ୍, ଇନେସ୍କି ଇସ୍ୱର୍ତି ବଚନ୍ ଇନେସ୍ ନିନ୍ଦା କିୟା ଆମେତ୍ ।
6 ହେ ଲାକେ ବେଣ୍ଡିୟାରିଙ୍ଗ୍ ସବୁ ବିସ୍ରେ ହାର୍ଦିବୁଦି ଆନି କାଜିଂ ୱାରିକିୟ୍ କିୟାଟ୍; 7 ଏନ୍ ନିଜେ ଜାର୍ ବେବାର୍ତ ସତ୍କାମାୟ୍ତ ହାର୍ କିଜ଼ି ଚଚାଟ୍, ହାତ୍ପା କୁଟ୍କିନାକା ଆରି ଲାମା ବାବ୍ନା ଆରି ହାର୍ଦାକାଦ୍ଲିଙ୍ଗ୍ ନାଟ୍ୱିତି କାତା ହପାଟ୍, 8 ଇନେସ୍ ପାକ୍ୟା ହିଲ୍ୱାକାର୍ ମା ବିସ୍ରେ ଇନା ବାନ୍ୟା କାତା ଇଞ୍ଜେଙ୍ଗ୍ ଆଡ୍ୱାଦାଂ ଲାଜା ଆନାର୍ ।