1 Akumedung, rabe leune de nlum so, dede rabedung Tinggwang dade gwang mi mebi kecu kedak pielo, kedanemene kenret caihakecime kekiee ge kideube ga ladi delu. 2 Aide gade nnui Tinggwang Rabe de cilu zie: rabe Jisu Khrista mina pumteih mmi eh gwang delie kerang leune au Tinggwang dade gwang, 3 nah rabe keheibe de Jisu de mlai kelabe Tinggwang dade gwang ma. Aipaude au Khrista ngauraube da, cide gwang la delie nnui siu da, nah cu au kideu ga la dida. 4 Anamedung, nnui au Tinggwang dade gwang, nah nnui penuide ngam luda, kedanemene nnuida kelabe de au kideu ga kelabe de swade diki lu. 5 Penui au kideube dade gwang. Aide ziemne, penui kerang de au kideube gu, nah kideube penui kwa kingnei la. 6 Anui au Tinggwang dade gwang. Tinggwang de ci kelabe anui kwa kingnei la. Tinggwang dade gwang kemakbe anui kwa kingnei lama. Aide gade anui kesang rabe nah kemau rabe de cilu la.

7 Akumedung, hangge gede kereku lugo, kedanemene keku au Tinggwang dade gwanglu, nah keheibe de mide ku kelabe au Tinggwang dade lungh gwang nah Tinggwang de cila. 8 Keheibe de mide kula kemakbe au Tinggwang de ci ma, kedanemene Tinggwang au keku lu. 9 Aide gade Tinggwang keku anui kakga liagai da, cide Tinggwang pe Na kepumlibe de kideu gage langgai beu, iciu eh anui pe dade ringlu kerane. 10 Aide ga keku bam, anui Tinggwang de kekune ma, dede pa anuide kekune pe Na de peu anui maudung ziemne ratak tei kerane langgai. 11 Akumedung, Tinggwang anuide ainzwa ku liecai, anui de hangge gede kereku kerabe. 12 Migede Tinggwang de madaude ngau ma. Anui hangge ge de ku cai, Tinggwang anui da bam, nah pe keku anui lung gade yicang lula. 13 Aikade anui peda kebam nah pa anui da kebam ci lula: kedanemene Tinggwang pe Rabe anuide peudi delu. 14 Nah anui ngau da nah Peibe pe Na de kideube de kelikelube lie eh lang kegaide zierang teila. 15 Keheibede Jisu au Tinggwang Nabe lie rang kelabe da Tinggwang la nah pa Tinggwang da la. 16 Nah Tinggwang anui ziemne keku kebam de anui ci nah nlumla. Tinggwang au keku, nah keku ga kebambe Tinggwang dala, nah Tinggwang pe dala. 17 Ainzwa eh keku anuida tei mmicang lula, iciu eh tutiak benai anui kekuu bamlu kerane, kedanemene anuide kideu aika Khrista nzwa kelane. 18 Keku ga kengngi gah, dede keku yicang siak kecube kengngi de gwa dila, kedanemene kengngi saja sila. Cine ngngi kelabe keku ga yicang siaklu mereu. 19 Anui Tinggwang de kula kedanemene pa anuide ku rai kecune. 20 Mige, "Ih Tinggwang de ku la," de eh rangla, dede pe sinabe de ngaurau la liecai, pa au kenretme ge. Kedanemene, mige pa ngau kebam pe sinabe de ku mecai, pa ngau kemakbe Tinggwang de ku gailak. 21 Nah Tinggwang aja aide anuide kaibeu da: Tinggwang de ku kelabe pekatei pe sinabe de kulu maisia.