1 Paul, Silvanus, nah Timothy, ne anui Peibe Tinggwang nah Rampaube Jisu Khrista gade Thessalonia namdi ga ngqwabe dage laisiu raukegai. 2 Anui Peibe Tinggwang nah Rampaube Jisu Khrista gade peu ngaugia nah lungciep nnuida bam kelube tei lulo.

3 Sinamedung, anui nnui ziemne Tinggwang de twabam mui kera anui nsam da. Aide au petau, kedanemene nnui kenlum yi reu reu kebamne nah nnui keheibe de ket ket de kereku reu reu kebamne. 4 Cine anui nnui ha Tinggwang gu ngqwakidung kakga hegie süt eh rang bamla. Mine nnuide tei keherei kecu leuga nnui lungtie nah nnui kenlum bamkelu hade anui rang bamla. Nah nnui keherei kecu lia kelude anui rang bamla. 5 Aide Tinggwang tutiak au mzui lie kecu liakegai geda, nah aide ziemne nnui Tinggwang hegwangram ga gwanglu kebuime teilu zie, cide ziemne nnui keherei bam. 6 Tinggwang au mzui: Pa nnuide tei keherei kelame ziehi keherei le tei pwapeu zie, 7 nah nnui, anuide ngngwa keherei kelame de kerelui peu zie. Pa aide Rampaube Jisu tinggim gade pe gwame kengkiengme de ngngwalwe kegwangdau teizie. 8 Pa miheu gade Tinggwang de ci kemakme de nah anui Rampaube Jisu samliakeyi de mzai kemakme de saja peu zie. 9 Rampaube dwade nah pe kengkieng kendu* gade teuntsam lwe penuide penli kegah kekap saja peuzie. 10 Pe kemcime dade kendu ngaulu kera nah nlumkelume peciakne ngau eh penui macang kerane pa caili kegwang benai, pa aide tei zie. Kedanemene anui nnui dage zierang tei kegaide nlumlu delu. 11 Aide ziemne anui nnui ziemne kiebam muila, anui Tinggwang nnuide qugai kelu ga luulu kebuime teilu kerane. Peu pe kengkieng gade ma keyibe hengin kela leune nah kenlum ta pelane teicang kelube teilo anui kiela. 12 Anui Tinggwang nah Rampaube Jisu Khrista ngaugia de ziemne, peu nnuide Rampaube Jisu zi tei ndulu kerane, nah pe ziemne nnuide ndulu kerane anui ma aidungde kiela.