1 Nang, keledeu sam kesangde nzui siak eh rang lulo. 2 Kecingpeime de mcing, mriak, mrak, nah kenlum, keku, nah lia kecu gade petaube tei bam lulo ledeu beulo. 3 Cinzwa eh kecingpuidung de penui zaireli petau tei lulo, nah mide rangmsia mede zau baang tei buima, dede keyibe teu mide ledeu lulo rang beulo. 4 Iciu eh peu penui mipui henabe riade* penui nahpeime nah penui namedung de kulu kerane, 5 nah mriak, mci, kilung kekwa keyime, nah penui nahpei kangga lunghlu kerane, iciu eh Tinggwang sambe de kiidi melu kerane. 6 Cinzwa eh rehangmede de mriak eh lungh lulo kecung beulu. 7 Ma pelane gade nang bata keyidung puisaube teilu maisia. N keledeu ga nang mci nah samsang lu, 8 nah samkeyi mmaugai kelakpe ledeu beulu, iciude ngauraume anui ha ma kesia gede ranggai lak eh ngngam dizie. 9 Kilamedung de maleune gade pe mpaume kangga lungh eh pe suiyi tei kera ledeu beulu. Penui kesamlim, 10 mede penui dade rega kerabe ma, dede penui kenlum keyi pelane keulia lu maisia, iciu eh penui Tinggwang anuide Kelikelube keledeude ma pelane gade twalu kerane. 11 Kedanemene Tinggwang mina pelane de kelilu kera ziemne pe ngaugia keulia dida. 12 Ngaugia cide anuide ledeu beu, iciu eh renetlam la kemakpe nah kideube hengindung gidi eh anui kideu aika mriak nah masang, nah renet zai ga lunghlu kerane, 13 anui samlamkepung keregui de ngaulu kera nah anui ditube Tinggwang nah Kelikelube Jisu Khrista hecili eh gwang kerade kwa kebam dau. 14 Khrista Jisu anui ziemne pe pum kaibeu, iciu eh anuide kemau pelane gade rilu nah tei mcilu kerane, nah anuide peu p mina teilu eh bata keyidung teilu kerane.

15 Aidungde ledeu lu, nah kengkieng pelane teu eh mide kecung nah kesiulu. Peu migede de ncu tei helei diso.