1 योहान 2

ख्रिस्त आपाअ मदत कोअनारु

1 माआं मेराला पोर्‍या, आंय ए गोठी तुमुहूं याअकाजे लेखोहो के, तुमू पाप ने कोअहूं जोवे; आन जर एखू पाप कोए ताहां, देव आब्हाअ जागे एक वोग्यु होय, तो धर्मी ईसु ख्रिस्त होय; 2 आन तोज आपाअ पापोअ काजे गाराहा होये, फक्त आपाअ वोतीइ एतुज नाहां, पोने आखी दुन्याअ पापोअ काजे बी.

3 जर आपू देवोअ आदेशोअ पालन कोअताहा, ताहां या पोअ रोत आपू जांअताहा के, आपू तियाहा ओलख्युहू. 4 जो कोडू एहें कोहे के, "आंय तियाहा ओलख्युहू," पोन तियाआ गोठी नाहां मानतु, तो ठोग होय, आन तियामेहें सत्य कायनाहां. 5 पोन, जो कोडो बी तियाआ वसनोअ पुरमाणे सालेहे, तियामेहें खोराखर देवोअ मेर देखाअहे, या वाईं आमुहूं मुंदू जाहे के, आमू देवोअ हेंगातीम होय: 6 जो कोडो एहें कोतोय के, "आंय तियामेहें रोहो" ताहां तियाहा, जेहें कोइत ईसु ख्रिस्त सालतुतो तेहेंज कोइत सोताहा बी सालुहूं जोवे.

नवू आदेश

7 माआं मेराला, आंय कोड्लू नोवू आदेश नाहां लेखतू, पोन तोज जुनू आदेश जो खूब आगाड़ी रोत तुमुहूं जोड़्युहू, ओ जुनू आदेश, तों वसन होय, जों तुमू पेल रोत उनाअयेहे. 8 फाशुउ बी आंय तुमुहूं नोवू आदेश लेखोहो, आन ओ ख्रिस्तामेहें आन तुमामेहें खोरु ठरेहे; काहाके, आंदारो आरवाअतो जाहे आन सत्याआ उजालो सोमको वोल्योहो.

9 जो कोडू एहें कोहे के, आंय उजालाम होय, आन सोताआ पायहोअ सीस कोअहे, तो ओमे बी आंदाराजमेहें होये. 10 जो कोडो सोताआ पाव्हीइला पोअ मेर कोअतोय, तों उजालाम रोहे, आन तों नाहां ठोकात सेकतो. 11 पोन, जों कोडो सोताआ पाव्हीइलाहा सीस कोअतोय तों आंदाराम सालेहे, आन का जाहे तों तियाहा नाहां मुंदू, काहाके, आंदारे तियाआ डोआ आंदला कोइत टाक्याहा.

12 माआं पोर्‍यां, आंय तुमुहूं याअकाजे लेखोहो के, ख्रिस्ताआ नावोवाईं तुमाअ पापोअ माफी ओवीही. 13 ए डायहां, आंय तुमुहूं याअकाजे लेखोहो के, जो पेलरोत होय तियाआ तुमुहूं मुंदू होय. ए जुवान्या, आंय तुमुहूं याअकाजे लेखोहो के, तुमू तिया सैतानोहो हारवीइयुहू. ए पोर्‍यां, आंय तुमुहूं याअकाजे लेखोहो के, तुमू आब्हाहा ओलखीत लेदुहू.

14 ए डायहां, आंय तुमुहूं याअकाजे लेखोहो के जो पेल रोत होय, तियाहा तुमू जाईंत लेदुहू. ए जुवान्या, आंय तुमुहूं याअकाजे लेख्योहो के तुमू मजबुत होय, आन देवोअ वसन तुमाअ मांयते रोहे, आन तुमू तिया सैतानोहो जिकीत लेदुहू,

15 तुमू दुन्यापोअ आन दुन्यामेर्‍यीइ गोठीपोअ मेर मा कोअहा, जर एखु दुन्यापोअ मेर कोअतोय, ताहां तियामेहें देव आब्हाअ मेर कायनाहां. 16 काहाके, जो किबी दुन्यामेहें होय मोन्ज्ये शरीरोअ लालस, लालसी नजर आन दुन्यादारीइ वोडाय, ओं देव आब्हाअ वोलेहे रोत कायनाहां, पोन ओं आखो दुन्याअ वोलेहे रोत होये. 17 दुन्या आन तियाआ लालस बेनू आरवअते जातेहे, पोन जों देवोअ मोर्जीपोअ सालेहे तों हादाफल जिवे.

ख्रिस्ताअ दुस्मोन

18 मेराला पोऱ्या, ए दुन्याअ आखरी वेल होय; आन जेहें कोइत तुमू उनाअयेहे के, ख्रिस्ताआ दुस्मोन आवनारु होये, तेहेंज कोइत वारुज ख्रिस्ताआ दुस्मोन ओमेज उठीत पोड़्याहा. या वाईं आपू जांअतेहे के ए दुन्याआ आखरी वेल होय. 19 ते आपाजमेहें रोत निहींयात खोरा, पोन आपामेर्‍याआ ने ओता; काहाके जर ते आपामेर्‍याआ ओता, ताहां आपाअरी रोता; पोन ते याअकाजे निहींत गोया के, ते आखा आपामेर्‍याआ ने ओता ओं खोरो होय.

20 पोन तुमापोअ ताम पवित्र आत्माआं अभिशेक तिया ख्रिस्तावाईं ओवुहू आन तुमू आखाहा खोरो कि होय तों जांआंत गोयोहो. 21 आंय तुमुहूं याअकाजे नाहां लेख्यो के, तुमू सत्याहा नाहां जांअते, पोन याअकाजे के तियाहा जांअतेहे, आन याअकाजे कोड्लो बी खोटो सत्यापोअ रोत कायनाहां.

22 ठोग कोडू होय? फक्त तोज, जो ईसुहू "ख्रिस्त" एहें कोत नाहां मानतु आन तोज ख्रिस्ताआ दुस्मोन होय जो आब्हाआ आन बेटाह्हाअ नाकार कोअहे. 23 जो कोडो बेटाह्हाअ नाकार कोअहे तियाअरी बाह्हू बी कायनाहां; जो बेटाह्हाहा मानित लेहे, तियाअरी बाह्हू बी होये.

24 जो किबी सुरुवातिही रोत तुमू उनाअयेहे; तोज तुमामेहें रोअहूं जोवे; जो तुमू पेलरोत उनाअयेहे, तों जर तुमामेहें रोय ताहां तुमू बी बेटाह्हामेहें आन आब्हामेहें टिकीत रोहा, 25 आन जियाअ आथवसन तिये आपुहूं आप्योहो तों हादाफल्योअ जिवन होय.

26 जें तुमुहूं फंअसाड़तेहें, तियांआं बाप्तिमेहें, ए गोठी मी तुमुहूं लेख्यीही. 27 पोन तुमापोर्‍युउ तो अभिशेक जो ख्रिस्ते सोताआ आत्माम रोत तुमापोअ ओल्युतो, तो तुमाम रोहे; एखु तुमुहूं सिकाड़े तियाआ बी गरज कायनाहां, काहाके तियाआ आत्मामेर्‍युउ अभिशेक आखी गोठी तुमुहूं सिकाड़ेहे. तो जों सिकाड़ेहे तों खोरो होय, खोटो नाहां. आत्माआं हिकवोण मानतेहे ताहां तुमू ख्रिस्तामेहें टिकीत रोतेहे.

28 ताहां, माअ पोर्‍यां, तुमू तियाअरी जुड़ात रोवा, ताहां ख्रिस्त प्रगट ओवे तेहेलाम आपुहूं वोडी हिम्मत जोड़ुहूं जोवे आन तो प्रगट ओवे तेहेलाम आपुहूं लाज ने आवुहूं जोवे. 29 तुमुहूं ताम मुंदूज होये के ख्रिस्त धर्मी होये, आन ओं बी तुमुहूं मुंदू होये के जो कोडो हाजो काम कोअहे तों देवोअ पोर्‍यो होये.