1 ईसु ख्रिस्तामेहें जों जिवन होय तिया जिवनोअ आथवसन प्रगट कोइलोअ काजे देवोअ इश्शा वाअहीं ईसु ख्रिस्ताआ प्रेशित पौलुसोअ तरफ से,

2 मेरालू पोर्‍यू तिमथ्याआ नावे: देव आब्हू आन आपाअ प्रभु ख्रिस्त ईसुउ जागे रोत ताहूं मेरवानी, दया आन शांती जोड़ुहूं जोवे.

3 जिया देवोअ आंय माआं डायहांअ होस सोका मोनो वाअहीं सेवा कोअहो तियाआ धन्यवाद कोअहो, आन आंय माआं प्रार्थनामेहें ताहूं हमेशा ओर कोअहो. 4 आन ताआ रोज्याआ ओर कोई कोईइ रात दिही ताहूं मिलीइलोअ काजे आंय जास्ती फोमवाअयुहू, काहाके ताहूं मिलीत माहूं खुसी जोड़ीत सेके. 5 माहूं ताआ तिया खोरा विश्वासोअ ओर आवेहे, जो पेल ताआ वोडी याह्ही लोइस आन ताआ आयही यूनीकेमेहें ओतू, आन माहूं भरीवसू होय के तोज विश्वास तामेहें बी होय.✝ 6 याआज काजे आंय ताहूं ओर कोइत आपोहो, काहाके तू देवोअ तिया वरदानोहों जों माआं आथ मिकीइला वाअहीं ताहूं जोड़्योहो तों फाशोअ बी पेटाड़ी दे. 7 काहाके देवे आपुहूं बिकेए नाहां, पोन ताकतोअ आन मेरेए आन संयमोअ* आत्मा आप्युहू.

8 तिहींवाअहीं आपाआ प्रभुउ साक्शी आपिलोअ काजे मा लाजवाअही, आन आंय तोआयुहू कोत बी मा लाजवाअही; पोन तियी देवोअ ताकतोअ पुरमाणे हाजी बातमीइ काजे माअरी दुख वेठ. 9 जिये आपाअ सुटका कोअयी आन तियाआ सोताआ माअहें ओवीइला काजे हाद्येहे, आन ओं आपाअ कामोअ पुरमाणे नाहां, पोन तियाआ उद्देश आन मेरवानी वाअहीं जे ख्रिस्त ईसुमेहें पेल रोत आपापोअ ओवीही. 10 पोन ओमे आपाअ तारनारा ख्रिस्त ईसुउ प्रगट ओवीइला वाअहीं उजालो ओवो. ख्रिस्ते मोतोहो आरवी देदो आन तियी हाजी बातमी वाअहीं अमर जिवनोअ उजवोड़ेम लेतायुहू.

11 जियाअ काजे आंय परसार कोअनारु, प्रेशित, आन मास्तर बी ठर्‍यु.✝ 12 तियाहा काजे आंय यां दुखोहो बी वेठोहो, आन नाहां लाजवाअतू, काहाके जियापोअ आंय विश्वास कोअयुहू, तियाहा आंय ओलखोहो; आन माहूं पाक्कू विश्वास होय के तो माआ इसाआ तिया दिहोअ दिही जाआं राखवाली कोइत सेकेहे. 13 जे खोरी गोठी तु मापोअ रोत उनाअयुहू, तियींहीं ख्रिस्त ईसुमेऱ्याआ विश्वासोअरी आन मेरेवाअहीं नमुनू बोणावीत मिक. 14 आन पवित्र आत्मा वाअहीं जो आपामेहें रोहे, तिया हाजा इसाआ राखवाली कोअ.

15 ताहूं मुंदू होय के आसियावाले आखे माहें माहूं सोड़ीत गोयेहे, जियांमेहें फुगिलुस आन हेरमोगेनेस होय. 16 उनेसिफुरुसोअ घराणापोअ प्रभु दया कोए, काहाके तिये जाअखीलिही वारी माआं जिवोहो खुस कोअयू आन आंय तोआयू तेबी तो ने लाजवाअयु. 17 पोन जेहेलाम तो रोम सेहरोमेहें आयू, ताहां जाअखीलिही मेहेंनत कोइत माहूं होद्यु आन मिल्यू. 18 प्रभु कोए के तेदिहीं तियापोअ प्रभुउ दया ओवुहूं जोवे आन जे जे सेवा तिये इफिसोमेहें कोअयिही तियींहीं बी तु हाजीहुतायी जांअहें.