1 देवोअ आन ख्रिस्त ईसुहू साक्शीदार मिकीत कोइत, जो जिवताआ आन मोल्याआं न्याय निवाड़ू कोए, आन तियाआ राज्य आवनारो होय तियाआ ओर मिकीत कोइत आंय ताहूं आदेश आपोहो. 2 के तू वसनोअ परसार कोअ, वेलेपोअ आन बिगर वेलेपोअ तियार रो, आखी जातीइ धिर आन हिकवोणो वाअहीं सुक देखाड़ आन ताबल आन समजाड़. 3 काहाके एहलिही वेल आवे, जेहलाम माअहें खोरी हिकवोण ने उनाए वोले, पोन उलटे तियांआं मोर्जी पुरी कोए एहेलाहा तियांआं पोटताज सेवक निवड़ीत लेय. 4 आन तियांआं कान सत्याअहें रोत फेरवीत बोणावटी काईंइं वोल लागाड़े. 5 पोन तू आखी गोठीमेहें तियारीम रो, दुख वेठ, हाजी बातमी परसार कोइलाआ काम कोअ, आन देवोअ सेवक या नाता वाअहीं ताआ जबाबदारी पुरी कोअ.

6 काहाके ओमे माआं गाराहा ओवीइलोअ आन यी दुन्याम रोत जाअलोअ वेल आवित लागीही. 7 आंय हाजी कुस्ती रोमीत सुकुहू, आंय माआं गुगदीइलोअ पुरो कोइत लेदोहो, आंय विश्वासोम टिकीत रोयुहू. 8 ओमे माआं काजे धर्मीपणोअ तो टोपू वाट जोवेहे, जियाहा धर्मी आन न्यायी प्रभु माहूं तेदिहीं आपे, आन माहूं एतोज नाहां, पोन तियां आखाहा बी जें तियाआ प्रगट ओवीइलाहा मेरे वाअहीं वाट जोवतेहे.

9 माआ जागे वेगु आवीइलोअ कोशित कोअ. 10 काहाके यी दुन्याअ सुख हाजो गोमत्लो कोत देमास माहूं सोड़ीत देत थेस्सलनीके जातु रोयुहू. क्रेसकेंस गलातीया जातू रोयुहू आन तितुस दलमतिया इलाखाम जातु रोयुहू. 11 निस्तु लुक एतुज माअरी होये. मार्काहा लेतुज आवेए; काहाके सेवाआ काजे तो माआ जास्ती कामोअ होय. 12 तुखिकुसोहो आंय इफिसोह मोकल्युहू. 13 जो कोट आंय त्रोआसोमेहें कार्पाअहीं मिकीत आयुहू तो आन पुस्तके खास कोइत सांबड़ाआ पत्रे नेहें जेहेलाम तू आविही तेहेलाम लेतू आवजी.सहीइ डाबड़ी आन बिड़ु वालित मिकल्ये पुस्तके

14 अलेक्झान्डर✝ ठठेरे माहूं जास्ती तारास देदुहू; पोन प्रभु तियाहा तियाआ कामोअ परमाणे फल आपे.✝ 15 तू बी सांबालीत रोजी, काहाके तिये आमाआं गोठीइ जास्ती विरोध कोअयुहू.

16 जेहेलाम माहूं पेल्लीइ वेले न्यायालयोमेहें जाबाब आपुहूं पोड़्यू, तेहेलाम कोडेज माहूं साथ नाहां देदी, आखे माहूं सोड़ी देदू. याआ तियांहां जाबाब ने आपुहूं पोड़े ताहरोअ हाजो आवे! 17 पोन प्रभु माअरी रोयू आन माहूं सेक्ती आप्यी; काहाके मावाअहीं पुरो पुरो परसार ओवित सेके, आन आखे बिगर यहुदी माहें उनाइत लेअहूं जोवे. आंय सिहांवागोअ जोड़बाम रोत वासात निहींयुहू.✝ 18 आन प्रभु माहूं हारेक खाराब कामोम रोत वासाड़े, आन होरगाआ राजोमेहें हाजीहुतायी पोताड़े. तियाआज महिमा सादाजलम ओवती रोअहूं जोवे. आमेन.

19 प्रिस्किल्ला आन अक्विलाहा✝ आन उनेसिफुरुसोअ कुटूंबाहा सलाम. 20 इरास्तुस करिन्थीमेहें रोत गोयू, आन त्रुफिमुसोहो आंय मिलेतुसोमेहें मांदवाड़्युज टाकी देत आयुहू.

21 हियालू सुरु ओवीइलोअ पेल आविइलाअ कोशित कोअ. युबुलूस, पुदेंस, लीनुस आन क्लौदिया आन ओमे आखा पाही ताहूं सलाम कोताहा.

22 प्रभु ताआ आत्माअरी रोअहूं जोवे. तुमा आखा पोअ मेरवानी ओवती रोअहूं जोवे.