2 थेस्सलनी 2

पापी माटी मोन्ज्ये आरवाअनारु बेटुह्हू

1 विश्वासी पाव्हीइला, ओमे आपू आपाअ प्रभु ईसु ख्रिस्ताआ फाशोअ आविइलाअ, आन तियाअरी हुंबाहूंब आपाआ टोलू वोलीइलाअ बाप्तिमेहें आंय तुमुहूं रावणी कोअहो:

2 तुमू ओं विसार कोइत के जिहीं मेहें कोयोय के, प्रभुउ दिही आवित पोत्युहू कोत हेलमेहें सकराअहा मा. आन एखा विसारो वाईं नेत एखू भविश्यवाणी नेत, संदेश, नेताहां आमू लेखल्या पत्रावाईं बी मा काबराअहा. 3 तुमू सोताहा किबी कोइत कोडा वाअहीं बी ठोगाअहा मा. काहाके तिया दिहोअ आविइलोअ पेल विश्वास निहींत जाय आन तो खाराब नितीइ माटी मोन्जे आरवाअनारु बेटुह्हू प्रगट ओवे. 4 जो विरोद कोअहे आन जियाहा देव नेत महाराज कोतेहे, एहेला आखा रोत सोताहा वोडु ठरवेहे, तेतोज नाहां पोन तो देवोअ मंदिरोमेहें बोहीत कोइत सोताहा देव होमजेहे.

5 केहें तुमुहूं ओर कायने के जेहेलाम आंय तुमाअहीं ओतू, ताहां तुमुहूं ए आखी गोठी कोया कोअतुतो? 6 तुमू तोम जांअतेहे के, तो पापी माटी तियाआज ठरवीइल्यी वेले पोअ प्रगट ओवे, बिहीरी वेले पोअ नाहां, तिहीं वाईं ते गोठ तियाहा ओमे रुकीत होये. 7 काहाके पापोअ रहस्य पेल रोतुज काम कोअतो जाहे, पोन ओमे एक रुकनारु होय. आन जाअहूं जाआं तो सेटे ने ओत जाय ताअहूं जाआं तो रुकीत रोये. 8 ताहां तो पापी प्रगट ओवे, जाहां प्रभु ईसु आवे आन तो तियाआ सोबी वाअहीं फुकीत माइत टाके, आन तियाआ दर्शनोवाईं आरवी देये.

9 तो पापी सैतानोअ सेक्ती वाईं आवे आन आखी जातीइ ठोग सेक्ती, आन निशाणी, आन समत्कारोअ कामें कोए, 10 आन तो पापी आखी जातीइ खाराब कामें लेतुज आवे, काहाके तियां सत्यापोअ मेर ने कोअयी जिहीं वाअहीं तियांआं तारण ओवेहे. 11 ठोगोपोअ विश्वास कोए तेहें कोअते देव तियांमेहें एक भटकावी देनारी सेक्तीही मोकले, 12 याअ काजे के जेते माअहें सत्यापोअ विश्वास नाहां कोअते, पोन ठोगोअ गोठी मेहें खुस ओवतेहे, तियां आखाहा डोंड जोड़ुहूं जोवे.

तुमुहूं सुटकाअ कोअते निवड्येहे

13 विश्वासी पाव्हीइला, आन प्रभुउ मेराला माअहों, आमू तुमाअ बाप्तिमेहें हादाफल देवोअ धन्यवाद कोअते रोअहूं जोवे, काहाके आत्मा वाअहीं पवित्र बोणीत कोइत, आन सत्यापोअ विश्वास मेकीत कोइत तारण जोड़े तेहें काजे देवे तुमुहूं पेहलो फल कोत निवड़ीत लेदेहे. 14 जियाअ कोअते देवे तुमुहूं आमाअ हाजी बातमी वाअहीं आपाअ प्रभु ईसु ख्रिस्ताआ महिमा जोड़ुहूं जोवे काजे हाद्येहे. 15 ताहरेए, माआं पाव्हीइला, मजबुत रोवा; आन जो संदेश आन जे गोठी आमाआं पत्रा वाअहीं सिकाअयेहे, ते वातड़ी तोइत रोवा.

16 आपाअ प्रभु ईसु ख्रिस्त सोताहा, आन जिये आपापोअ मेर कोइत मेरवानी वाईं कायम उत्साह आप्यो आन हाजी आशा आप्यीही तो आपाअ देव बाह्हू, 17 तुमाआं मोनोहो प्रोत्साहन आपे, आन तुमुहूं हारेक हाजा काम आन वसनोमेहें मजबुत कोअहूं जोवे.