1 पौलुसोअ वोगेहे रोत, जो देवोअ मोर्जी वाअहीं ख्रिस्त ईसुउ प्रेशित होय, आन ख्रिस्तामेहें आपाआ पाही तिमथ्याआ वोगेहे रोत,

2 ख्रिस्तामेहें तियां देवोअ माअहों आन इमानदार पाव्हीइलाआ नावे जे कलस्सेमेहें रोतेहे:

आपाआ देव आब्हाअहीं रोत तुमुहूं मेरवानी आन होक मिलतू रोये.

3 आमू तुमाआं कोअते हमेशा प्रार्थना कोइत आपाअ मालिख ईसु ख्रिस्ताआ बाह्हाआ मोन्जे देवोअ धन्यवाद कोअताहा, 4 काहाके आमू उनाअयाहा के ख्रिस्त ईसु पोअ तुमाआं विश्वास होय, आन आखा देवोअ माअहूं पोअ तुमू मेर कोअताहा; 5 तुमाआ काजे होरगाम मिकल्यी आशा बाप्तिम तुमू हाजी बातमी वाईं सत्यवसनोम उनाअये. 6 जे तुमाआं जागे पोत्यीही, आन जेहें कोइत दुन्याम बी फल लेतावेहे आन वादतो जाहे, तेहेंज कोइत जेदिहीं रोत तुमू तियाहा उनाअये आन खोरा मोनोवाअहीं देवोअ मेरवानी ओलख्यीही, तुमामेहें बी एहेंज कोइत कोअहे. 7 तियाआज शिक्शण तुमू आमाअ मेरालू हाती एपफ्रासोपोअ रोत सिकाअये, जो आमाअ काजे ख्रिस्ताआ इमानदार सेवक होय.✝ 8 तियेज तुमाआं मेरेहे जे आत्मामेहें होय आमापोअ देखाड्यी.

9 तियाहाज काजे जेदिहीं रोत ओं उनाअयाहा, आमू बी तुमाअ काजे प्रार्थना आन रावण्‍या कोइलाआ नाहां सोड़ता, के तुमू आक्खी आत्मिक ज्ञान आन बुद्दीइरी देवोअ इश्शाआ ओलखातीमेहें पाक्के ओत जावा. 10 काहाके तुमू प्रभुहू पोटे एहलोहो जिवन जिवुहूं जोवे, आन तों आखी गोठीमेहें खुस कोए एहलोहो जोवे, आन तुमामेहें हारेक जातीइ हाजा कामोंअ फल लागुहूं, आन तुमू देवोअ ओलखातीमेहें वादते जावा. 11 तियाआ महिमाअ सेक्तीइ होसे आखी जातीइ ताकतोवाअहीं मजबुत ओवते जावा, एतेहे जाआं के खुसीइरी हारेक जातीइ धिरोवाईं आन सहनसेक्ती देखाड़ीत सेकहा. 12 आन खुसी वाअहीं देव आब्हाआ धन्यवाद कोअते रोवा, जिये आपुहूं याआ लायकी बोणावया के उजवड़, पवित्र माअहुंउं आरी वाटामेहें सामील ओवे. 13 तियेज तोम आपुहूं आंदाराआ राजोम रोत सोड़वीत तियाआ मेराला बेटाह्हाआ राजोम पोताड़्याहा, 14 आन तियामेहें आपुहूं सुटका मोन्ज्ये पापोअ माफी मिल्‍यीही

15 ख्रिस्त तोम ने देखाअनारा देवोअ रुप आन आखी कोलीमेएं पेल्लूउ होय. 16 काहाके तियाजमेहें आखी वस्तु बोण्यी, होरगाआ ओय नेत धरतीइ, देखाअनारी ने देखाअनारी, तियामेहें आत्मिक सेक्ती, राजगादी, राज कोअनारा आन आधिकारी. देवे आखी दुन्या तियाज वाअहीं आन तियाआज काजे बोणावयीही. 17 तोज आखी वस्‍तुमेहें रोत पेलठू होय, आन आखी वस्तू तियामेहें टिकीत रोयीही. 18 ख्रिस्त ओज डिल, मोन्ज्ये मंडड़ीइ मुंड होय; तोज पेलठू होय, आन मोअल्यामेहें रोत जिवीत उठनाराम पेलठू आन आखी गोठीमेहें पेल्लुउ जागू तियाहाज जोड़ुहूं जोवे. 19 काहाके बाह्हाअ खुसी यामेहें होय के, बेटाह्हामेहें आखी गोठी भारपुर रोय. 20 होरगामेर्‍यीइ आन धरतीपोर्‍यीइ आखी वस्तु तियाआ वोगेहे आवुहूं जोवे, तियाहा काजे तियाआ बेटेह्हे सोताआ मोतोवाअहीं जो कोअयो तियावाअहीं एक वाट तियार कोअयी आन तियी वाटीइ वोजेसे, क्रुस पोर्‍याआ तियाआ मोतोवाअहीं आन तियाआ वोहल्‍या रक्तावाअहीं आखाआ सबंध मिठो ओत गोयो.

21 एक वेल एहेलिही ओती के तुमू देवोअरी पारके जेहें ओते, आन तुमाअ खाराब कामोअ वाखरी मोनोवाअहीं तियाआ दुस्मोन जेहें ओते. 22 पोन ओमें, देवे तियाआ बेटाह्हाअ मोतोअ गाराहा वाअहीं तुमुहूं तियाआ दोस्ती बोणावयाहा, याअकाजे के तियाआ सामने पवित्र, सोका, आन निर्दुस जेहें मिकीत सेके. 23 पोन तुमू विश्वासोम मजबुत रोअहूं जोवे: आन तियी हाजी बातमीइ आशा जे तुमू उनाअयेहे ते मा सोड़हा. आन जे हाजी बातमी जुगोअ थुड़ते पुरी कोलीइ माअहुंहूं उनाइलोअ सान्सो जोड़्योहो, तियीइ आंय पौलुस सेवक बोण्‍युहूं.

24 पोन तुमाअ काजे दुख वेठीइलोअ कोअते आंय खुस होय काहाके ख्रिस्ते तियाआ डिलोअ कोअते मोन्ज्ये मंडड़ीइ कोअते जो दुख वेठीइलोअ काजे बाकी उगरीइयोहो तों माआ डिलोमेहें पुरो कोअहो. 25 आन आंय देवोअ वोलेहे रोत मंडड़ीइ सेवक बोणावाअयुहू जिये माहूं ओं काम कोए तेहें काजे होप्योहो. 26 जे दोड़पाअली गोठ खुब वेगी रोत आन पिढ़ीन-पिढ़ी रोत निकाड़ीत मिक्यीते, पोन ओमें तियाआ माअहुंहूं उगाड़ीत देखाड़ल्यी होय, ते ओं देवोअ वसन होय. 27 देवोअ योजना एहलिही होय के तियाआ माअहें तियाआ दोड़पाअली गोठीइ किम्मत बिहीरा माअहोंअ काजे की होय ते जाईंत सेके, आन महिमाआ आशा मोन्जे ख्रिस्त ओज ते तुमामेहें दोड़पाअली गोठ होय. 28 तियाहाज काजे आमू ख्रिस्ताआ परसार आखाहा कोअताहा, कड़क जिबानी वाईं कोताहा आन हारेक जोओंहों पुरी गोठी मुंदू कोइत कोताहा, एताआ काजे के आखा माअहुंहूं पाक्के कोइत उबो कोइत सेको. 29 यींज गोठीइ काजे पाक्को मोन आन ताकत लागाड़ीत कोइत मेहेंनत कोअहो, काहाके तियाआ ताकतोअ पुरमाणे जे मामेहें सेक्तीवाईं जोर देहे.