1 आंय तुमाअ काजे लौदीकिया मेहें रोनारां माअहोंअ काजे आन तियां आखाआ काजे जियां माअ सोब नाहां देख्यी, बिहीराअ काजे आंय केतीही मेहेंनत कोअहो ओं तुमुहूं मुंदू पोड़ुहूं जोवे ए माआं इश्शा होय. 2 ते मेहेंनत एताआ काजे के तियाआ मोन हिम्मतो वाअहीं पोआत मेरे वाअहीं एकान बिहीराअरी बांदाइत जाय आन ते बादी ओकलेए आखी मिलती मिलवुहूं जोवे, आन देवोअ दोड़पाअली गोठ मोन्जे ख्रिस्ताहा ओलखीत लेअहूं जोवे. 3 जियाम बुद्दीइ आन ज्ञानोअ धन निकात रोयोहो.

4 ओं आंय याअकाजे कोहो के कोड्लो बी माअहुंउं तुमुहूं हाद आवनारी गोठी वाअहीं तारास ने देअहूं जोवे. 5 आंय डिलो वाअहीं तुमाअ रोत सेटे होय, तेबी आत्मा वाअहीं तुमाअ आहने होय, तुमाआं हाजी हुतायीइ जिवन आन तुमाआं ख्रिस्तापोर्‍युउ पाक्कू विश्वास देखीत कोइत खुस होय.

6 ताहां जेहेंकोइत तुमू ख्रिस्ताहा देव कोत स्विकार कोअयोहो, एहेंज कोइत सालते रोवा. 7 आन याजमेहें मुल टाकीत वातड़े बोणते जावा, आन जेहेंकोइत तुमू सिकाअयेहे तेहेंज कोइत विश्वासोम मजबुत ओवते जावा, आन वादारेन वादार धन्यवाद कोअते रोवा.

8 जे ओकलेए गोठी ख्रिस्ताआ हिकवणोअ परमाणे कायनाहां पोन माअहुंउं विसारो परमाणे आन दुन्याहां गोमे एहेलिही गोठीइ परमाणे होय, एहेलिही कावली आन ठोगोअ ओकलेए गोठीम रोत सांबालित रोवा. 9 काहाके ख्रिस्तामेहें देवोअ आखा गुण सोभाव तियाआ डिलोमेहें रोताहा. 10 आन तुमुहूं तियाआ एकीमेहें पुरो जिवन जोड़ीत गोयोहो, तोज आखा राजाआ आन आधिकारोअ मुख्य होय.

11 तियाजमेहें तुमाआं एहेलुहू खतना कोअयुहू जो आथोवाईं नाहां ओवतु, मोन्ज्ये ख्रिस्ताआ खतना, जिया वाअहीं पापी सोभाव निहींत जाहे, 12 आन ख्रिस्‍ताअरीज बाप्तिस्मा मेहें बुडीत गोये, आन तियाजमेहें देवोअ सेक्तीपोअ विश्वास कोइत, जिये तियाहा मोल्यामेहें रोत जिवाड़्यु, तियाअरीज जिवित बी उठ्ये. 13 ✝2:13 इफिस 2:1-5देवे तुमुहूं बी, जे सोताआ पापो वाअहीं आन बिगर यहुदीइ दशामेहें मोल्‍ये ओते, तियाअरी फाश्येए जिवाड़्ये, आन आपाआ आखा गुनाआं माफी कोअयी, 14 देवे आपाअ विरुद्दामेर्‍युउ लेखाअलु इसाब तियाआ यादीमेहें रोत खुड़ीत टाक्‍यू आन तियाहा क्रुसोपोअ खिलावाईं ठोकीत कोइत सामने रोत सेटे कोइ देदू. 15 आन एहें कोइत तिये ताबाम कोअनाराहां आन आधिकार्‍योहों नाड़ीत कोइत तियांआं विरुद्दाम क्रुसोपोअ जिकीत कोइत आखाआ सामने अपमान कोअयू.

16 तियाहा काजे खाअलो-पीइलोअ बाप्तिमेहें, नेत तिवार, नेत नोवाआ तिवार, नेत आरामोअ दिहोअ बाप्तिमेहें कोडाहा मा ठरवुहूं देहा. 17 काहाके ए तोम आखी आवनारी गोठीइ सावलू ओतू, पोन मुख्य गोठी तोम ख्रिस्ताआ होय. 18 तुमू सोताहा ठोगाइत देवदुतोअ हुंबर वोंदे आन तियांआं पागे पोड़े मा जाहा, आन ख्रिस्तामेर्‍यीइ देवोअ खुसी रोत सेटे मा जाहा, एहेलोह माहुंउं माहूं दर्शन जोड़ल्‍यो एहें कोत्लो, आन तियाआ दुन्‍यादारीइ मोन दुन्‍यादारीइ विसारोवाअहीं फुगवी देहे. 19 आन डिलोअ खास भाग मुनको होय, जो ख्रिस्त होय तियाहाज नाहां तोइत रोतो, जियावाअहीं पुरो डिल मोणक्‍या आन गुड़्या वाअहीं वोदतो आन देवोअ इश्शामेहें मजबुत ओवतो जाहे.

20 तुमू ख्रिस्ताअरी मोइत गोयेहे आन दुन्यापोअ राज सालाड़नारा आत्मा रोत सुटका मिलीत गोयीही, ताहां काहा यी दुन्‍यादारीइ होस जिवन जिवतेहे? एहेलिही रुढ़ी लेत काहा सालत्ले 21 "याहा ने टेकीइलो" आन "फोलाहा ने साकीइलो" आन "तियाहा आथ ने लागाड़ीइलो?" 22 ए आखी गोठी कामोमेहें लेत आवता लेत आवता आरवाइत जाये, काहाके ए माअहुंउं राजोअ गोठी आन हिकवोणोअ पुरमाणे होय. 23 यीं रुढ़ी मेहें तियांआं सोताआ मोर्जी वाअहीं भक्ती कोइलोअ रिती, देवदुतोअ आन खोतरीइ पुजा कोइलो, आन डिलोहो तारास देअलोअ ओकलेए गोठ होय कोत मानताहा खोरा, पोन डिलोअ इश्शा रुकीइलोमेहें तियां वाअहीं किज फायदू ने ओवत्लू.