फिलिप्पी 3

खोरो धर्मी जिवन

1 तियाहा काजे माआं पाव्हीइला, प्रभुमेहें खुस रोवा, आंय तुमुहूं ताल ताल लेखीइलाम उजगाय नाहां कोअतू, पोन तों तुमाआं हाजाआ काजे होय. 2 तियां हुंणा रोत, खाराब कामे कोअनारां रोत जाबालीत रोवा. जें निस्ते शरीरोअ खतना एतेज कोइत होय तियां रोत जाबालीत रोवा. 3 काहाके आपू जें देवोअ आत्मा वाअहीं देवोअ भक्ती कोअतेहे, जें ख्रिस्त ईसु पोअ वोडाय कोअतेहे, आन शरीरोपोअ भरिवसू नाहां कोअते, तें आपू आपाआ खतना ओत गोयुहू. 4 तेबी शरीरोपोअ भरिवसू मिकिइलो माहूं जागू होय. एखाहा शरीरोपोअ वोडाय कोओ लागतोय, ताहां माहूं तिया रोत जाअखो लागनारो. 5 माआं ताम आंठवा दिहोम खतना ओवलु, इस्राएल माअहूंमेएं, बिन्यामीन कुटुंबामेएं, इब्रीइ इब्री, नियमोअ बाप्तिमेहें फरिसी; 6 उरीइ बाप्तिम कोहा, ताहां मंडड़ीइ तारास देनारु आन नियम पुस्तकोअ परमाणे धार्मिकताआ नजरे वाईं निर्दुस ठरल्यु एहेलुहू ओतू.

7 तेबी जे गोठी माआं फायदाआ काजेहे ओती, ते ख्रिस्ताआ उस्ती विणकाम्यी समजीत लेदी. 8 एतोज नाहां पोन, माआं प्रभु ख्रिस्त ईसु याअ बाप्तिमेर्‍योअ ज्ञान वादार कामोअ होय, तिहीं वाअहीं बिहीरो आखो विणकामोंअ समजोहो. एताआ वाखरी आंय आखो टाकी देदो आन तियांहां कोसरो सोमजोहो, काहाके माहूं ख्रिस्त ईसुउ लाभ जोड़ुहूं जोवे. 9 आन तियाआ जागे जागु जोड़ुहूं जोवे, आन माआं तियी धार्मिकताअरी नाहां, जे नियमोंअ पुस्तकोमेहें रोत होय, पोन तियी धार्मिकताअरी जे ख्रिस्तापोअ विश्वास कोइलाअ वोतीइ होय, आन देवोअहीं रोत विश्वास मिकतेहे ताहां जोड़ेहे; 10 काहाके आंय ओं होदोहो के ख्रिस्ताहा आन तियाआ फाशोअ जिवीत उठीइलाअ सेक्तीही, आन तियाअरी दुखोमेहें भागिदार ओवीइलाआ गुप्त्यी गोठीहीं जाओं, आन तियाआ मोतोम भाग लेत तियाआ होस बोणो. 11 मोन्ज्ये केहें बी कोइत माहूं मोतोम रोत जिवीत उठीइलो जागे जाआं पोताअहूं जोवे.

निशाणीइहें गुगदीइलो

12 ओं मा समजाहा के माहूं जोड़ीत गोयोहो, नेताहां आंय पाक्कू ओत गोयुहू; पोन तो इलाम जोड़ुहूं जोवे काजे गुगदीत जाहो, जियाअ काजे सोताहा ख्रिस्त ईसु माहूं ताबाम लेदुहू. 13 माआं पाव्हीइला, माआं एहेलुहू विसार कायनाहां*3:13 थोड़हा लेख्यामेहें "ओमे जाआं नाहां" के मी तों ताबाम लेत लेदोहो; पोन फक्त ओं एक काम कोअहो, के जे गोठी फासाड़ी रोत गोयीही तियींहीं विहराइत कोइत, आगल्यीइ गोठीइहें दिहान देत, 14 याअकाजे के जिया इलामोहों ताबाम लेअलोअ काजे देवे माहूं ख्रिस्त ईसुमेहें उसे हाद्युहू तियी निशाणीइहें गुगदीइतुज जाहो.

15 आपामेहें जें पाक्के होय तें ओज विसार मिकुहूं जोवे, आन जर एखी गोठीमेहें आलांग विसार ओय, ताहां तोबी देव तुमुहूं देखाड़े. 16 तियाहा काजे ओमें जाआं जेहेंकोइत सालते आयेहे तेहेंज कोइत आगाड़ी बी साला.

17 माआं पाव्हीइला, तुमू आखे मिलीत कोइत माआं होस साला, आन जें एहेंकोइत नमुनो देखीत सालतेहे तियांआं वोल दिहान मिका. 18 काहाके, जाअखीलेहे माअहें एहलेहे सालतेहे, जियांआं गोठी आंय तुमुहूं जास्ती वारी कोत आप्यीही, आन ओमे बी रोड़ी रोड़ीइ कोहो के, तें तियांआं जिवणावाईं ख्रिस्ताआ क्रुस खांबोअ दुस्मोन होय. 19 तें नरकाआ वाटे आरवाए जातेहे, काहाके तियांआं देव तियांआं पोटू होय. तियांआं विणलाज्ये कामे तियांआं होबा होय, आन तें निस्ते दुन्यादारीइ गोठीपोअ एतेज मोन लागाड़ीत रोतेहे. 20 पोन, आपाअ देस होरगाम होय; आन आपू आपाआ तारनारा प्रभु ईसु ख्रिस्ताहा तिवोल आवत्लाहा वाट जोवतेहे. 21 तो तियाआ जियी सेक्तीवाईं आखी वस्तुहू सोताआ ताबाम कोइत सेकेहे तियी सेक्तीवाईं तो आपा आखाआ कमजोर शरीरोअ रुप बोदलीत कोइत, तियाआ महिमावाला शरीरोअ होस बोणावी देये.