1 ए गलातीवाला फोगा माट्यों, तुमुहूं कोडे पोटावीत लेदाहा? क्रुस खांबोपोअ टांगल्यू ईसु ख्रिस्त ताम तुमाआं डोआअ सामनेज जेहें ओतू. 2 आंय तुमाप रोत एतोज जाअहूं कोअहो के तुमुहूं देवोअ आत्मा कांय कायदा पालनो वाअहीं जोड़्यू के विश्वासोअ बातमी वाअहीं जोड़्यू? 3 तुमू का एता बी फोगाज होय के! देवोअ आत्मा वाअहीं सुरुवात कोइत ओमे तुमाआं दोमोपोअ पुरो कोअहूं होदताहा? 4 ताहां कांय तुमू एतो एतो दुख वायेज भोग्य के? हुदाअलीज वाया नाहां. 5 जो तुमुहूं देवोअ आत्मा आपेहे आन तुमामेहें समत्कारोअ कामे कोअहे, तो कांय कायदा पालनो वाअहीं के हाजी बातमी उनात विश्वास कोइला वाअहीं एहलोहो कोअहे?

6 अब्राहामोअ आनुभाव पाला, वसन कोहे, "तिये देवोपोअ विश्वास मिक्यू, आन यीज गोठी वाईं देवे तियाहा धर्मी गोण्यू." 7 ताहां ओं जाईंत ल्या के, जें विश्वास कोअतेहे तेंज खोरे अब्राहामोअ कुटूंबाआ माअहें होय. 8 आन देव बिगर यहुद्याहां विश्वासो वाअहीं धर्मी ठरवे ओं जांअतीज वसनोवाईं पेलुज रोत अब्राहामोहो ए हाजी बातमी जोड़्यी के, "तावाअहीं आक्खा माअहुंहूं देव आशिर्वाद आपे." 9 तिहींज वाईं ताम विश्वास कोअनाराहां अब्राहामोअरी आशिर्वाद जोड़त्लू.

10 ताहरेए जेते बी माअहें कायदा पालनोपोअ भरिवसू कोअतेहें, तें आखे हारापोम बांदाअले होय, काहाके लेख्यो एहेलोहो होय, "जो कोडो कायदाम लेखल्यी आखी गोठीइ पालन ने कोए तों देवोअ हारापोअ निसे होये." 11 ताहां, ओमे ए गोठ खुल्ली होय के, कायदा वाअहीं कोड्लोज माहुंउं धर्मी नाहां ठरतों, काहाके वसन कोहे के, "धर्मी माहुंउं विश्वासो वाईं जिवतो रोये." 12 पोन कायदाअरी विश्वासोअ किज सबंध नाहां आवतो; काहाके पवित्रशास्राम लेख्योहो, "जों कायदाम लेखल्यी गोठी मानित साले, तों जिवतो रोये."✝

13 आपाआ उस्ती ख्रिस्त हारापवालू बोण्यू, तिये आपुहूं कायदाम लेखल्या हारापोम रोत किंमत पोइत सोड़व्ये, काहाके एहेलोह लेख्योहो, "जिया कोडाहा लाकड़ूपोअ टांगी देतेहे, तों देवोअ हारापल्यो होये."✝ 14 ओं एताआ काजेज ओवो के, अब्राहामोअ आशिर्वाद ख्रिस्त ईसुमेहें बिगर यहुद्याआं जागे जाआं पोतुहूं जोवे, आन आपुहूं विश्वासो वाअहीं तो आत्मा जोड़ुहूं जोवे, जियाआ बाप्तिम देवे आथवसन आप्योतो.

15 माआं पाव्हीइला, आंय तुमुहूं सादो उदाहरण वापरीत कोहो: जाहां बेन जोओंअ विसमेहें ठरल्यो वसन पाक्को ओत जाहे, ताहां तियाहा नाहां कोडो रद्द कोइत सेकतो के नाहां तियाम काविहीं वादाड़ीत सेकतो. 16 ताहां देवे अब्राहामोहो आन तियाआ पोऱ्याहा आथवसने आप्ये. यी जागेहे वसन "पोऱ्याहां" कोत जाअखा जोओंअ उल्लेख नाहां कोअतो, पोन एकाआ बाप्तिम कोहे, "पोऱ्याहा" आन तों ख्रिस्ताआ बाप्तिम होय. 17 पोन माआं कोअलाआ उद्देश ओ होय के, जों आथवसन देवे पेलुज रोत पाक्को कोअयोतो, तों आथवसन रद्द ओत जाय तेहें कोत शार होवेन तीस वोर्‍ह्योंअ फासाड़ी कायदु आवित तियाहा नाहां टालित सेकतु. 18 काहाके वारसू जर कायदा वाअहीं जोड़तू, ताहां आथवसनोअ गरज ने ओती, पोन देवे तो वारसू मेरवानी कोइत अब्राहामोहो आथवसनो वाईं आप्यू.

19 ताहां कायदु काहा आप्यू? तो सुकी देखाड़ीइलोअ काजे सेलवाआ आप्यू, आन जियी पारवाड़ीइ बाप्तिम आथवसन आप्यो, ते पारवाड़ आवे ताअहूं जाआं तो कायदु रोअहूं जोवे, आन तो कायदु देवदुतों वाईं एका वोग्याआ आथे नेमाअयू. 20 वोग्यु ते एकाआज नाहां रोतू, पोन देव एकुज होय.

21 ताहरुउ कायदु कांय देवोअ आथवसनोअ विरुद्दामेहें होय के? बिलकुल नाहां! काहाके जर जिवन आपे एहेलुहू कायदु जोड़तू, ताहां माहुंउं कायदा पालनो वाईं धर्मी बोणतो. 22 पोन वसन कोहे के आखे माहें पापोअ सेक्तीम बांदाइत रोयेहे; तिहीं वाईं वारसा आपीइलोअ तों आथवसन विश्वास कोअनाराआ काजे ईसु ख्रिस्तापोअ विश्वास कोइलो वाईं पुरो ओवुहूं जोवे.

23 पोन विश्वास आविइलाअ पेल, तो विश्वास आवे ताअहूं जाआं आपाआ देखबाल कायदाआ बंधनोम ओवतीते. 24 तिहींज वाईं आपू ख्रिस्ताआ जागे जाआं पोतुहूं जोवे कोत कायदु आपाआ मास्तर बोण्यू, काहाके आपू विश्वासो वाअहीं धर्मी ठरुहूं जोवे. 25 पोन ओमे विश्वास आवित लागू, तिहीं रोत आपू मास्तरोअ ताबाम कायनाहां.

26 काहाके तुमू आखे ख्रिस्त ईसुपोऱ्याआ विश्वासोअ वाअहीं देवोअ पोऱ्ये होये. 27 आन तुमाम जेते जोएं ख्रिस्ताआ नावम बाप्तिस्मा लेदोहो, तियां ख्रिस्ताहा फांगीत लेदूहू. 28 ओमे रोत नाहां कोडो यहुदी के बिगर यहुदी रोयो, नाहां कोडो बांदाअलो के सुटलो, नाहां माटी के नाहां बोईं, काहाके ख्रिस्त ईसुमेहें तुमू आखे एक होय. 29 आन जर तुमू ख्रिस्ताआ होय, ताहां अब्राहामोअ पारवाड़ीइ आन आथवसनोअ परमाणे वारिस बी होय.