यहुदा 1

1 ईसु ख्रिस्ताआ सेवक आन याकोबोअ पाही यहुदा याआ तरफ से पत्र; जे देव बाह्हामेहें मेराले आन ईसु ख्रिस्ताआ काजे सांबाल्ल्ये होय तियांआं नाव से.

2 दया, होक आन मेर तुमुहूं वादार जोड़ती रोअहूं जोवे.

खोटा मास्तरहों

3 माअ मेराला पाव्हीइला, जाहां आंय तुमुहूं तिया तारणोअ बाप्तिमेहें लेखीइलोअ जास्ती मेहेंनत कोअया कोअतुतो, जिहींमेहें आपू आखेज भागिदार होय, ताहां तुमुहूं ओं समजाड़ी देंव एहेलोह माहूं लागो के तिया विश्वासोअ काजे पाक्की मेहेंनत कोआ, जो देवोअ माअहोंहों एक्कुज वारी जोड़्युहू. 4 काहाके, जियांआं काजे डोंडोअ आदेश वेगु रोत लेखाअयुतो एहेलेहे वारुज जोएं आपामेहें आवित सान्बाअयेहे: एं माहें विणभक्त्ये होय, आन आपाअ देवोअ मेरवानीहीं लुसड़ायीमेहें बोदलीत टाकतेहे, आन आपाअ एकुज मालिख आन प्रभु ईसु ख्रिस्ताहा नाकारतेहे.

5 पोन, जर तुमू आखी गोठी एकवारी जाईंत सुकेहे, तेबी माहूं ए गोठी तुमुहूं ओर कोइत आपो लागेहे के, प्रभु इस्राएल माअहुंहूं मिसर देसोम रोत केहें कोइत सोड़वीत लेतायू आन तिहींइं फासाड़ी जियां विश्वास ने कोअयू, ताहां केहेलेहे पारवात गोये. 6 फाशाआ जियां देवदुतों तियांआं आधिकारपद ने सांबाल्यो, आन सोताआ ठिकाणो सोड़ी देदो, तियांहां तिये तिया वोडा हादाजल्म्याआं न्यायनिवाड़ाअ दिहोअ काजे आंदाराआ कोलीम बांदीत मिक्याहा. 7 सदोम, गोमोरा आन तिहींइं आसे-पासेए होयरोवाला माअहोंअ बाप्तिम विसार कोआ, जें यां देवदुतोंअ होस सिनालावाले ओत गोयेते आन बिहीराअ शरीरोअ फाट लागीत गोयेन ताहरेए आगीइ हादाफल्यीइ शिक्शा भोगीत आखाआ काजे नमुनो ठऱ्ये. 8 तेहेंज कोइत एं होपने पालनारें बी जिवज्योअ शरीरोहो एठो कोअतेहें, आधिकारोहो नाकारतेहें, आन देवदुतोंअ निंदा कोअतेहे. 9 पोन मुख्य देवदुत मिखाएले जाआं, जाहां मोशेए तोड़ोअ बाप्तिम सैतानोअरी दाती ओवी तेहलाम तियाहा हाजो-बाक्तो कोत कोइत दोश लागाड़ीइलोअ हिम्मत ने कोअयी पोन एतोज कोयो, "देव ताहूं बावराय." 10 पोन एं माअहें जियीं गोठीइ वाहीं मुंदू कायनाहां तियीं गोठीही हाजो-बाक्तो कोतेहे, आन जियीं गोठीहीं मुका जनवारोअ होस उदुड़ जांअतेहे तिहींम ते जिवोहो आरवीइतेहे. 11 तियांआं केतोहो खाराब ओवे! काहाके तियां काइनोअ वाट तोअयी आन पोशाअ काजे बालामोअ होस सुकी कोअयी आन कोरोहाअ होस विरोध कोइत आरवाअयेहे. 12 एं माअहें मंडड़ीइ मेरपांगातीमेहें विणलाज्या साकल्याअ होस खातेहेंन पितेहे, तें सोताआ एतोज पालतेहे. तें वाराअरी उडीत जानारा रिकामा वाद्लाआ होस होय. लागता उनालामेएं वांज्या साड़ोअ होस होय जें बेनवारी मोल्ये कोत उफड़ीत उडाड़ल्ये रोतेहे. 13 एं माहें दोऱ्याआ जिवमाऱ्याआ वोडा सेलकाअ होसऱ्येए होय जें सोताआ लाज फेब्द्राआ होस उसालतेहे. एं हादाफल्याआ जाडा आंदारामेहें भटकीइता फिरनारा ताराआ होसऱ्येए होय.

14 आदामोअ फासाड़ी हांत पिढ़ीमेऱ्युउ हनोक बी याआं बाप्तिमेहें एहलीही भविश्यवाणी कोअयिही के, "पाला, प्रभु लाखेन-लाख देवदुतोंअरी आवे. 15 आन तो आखाआ न्यायनिवाड़ु कोइलोअ काजे, आन विणभक्तीवालाहां तियांआं विणभक्तीइ आखा कामोअ बाप्तिमेहें जें तियां कोअयेहे, आन ते आक्खी गोठी जे विणभक्तीवालां पापी माअहूं तियाआ विरुद्दामेहें कोयी, तियींइं बाप्तिमेहें तो दोशी ठरवीइलोअ काजे आवेहे."

16 एं माहें हमेशा साड़ग्ये आन टुटणीइनारे होय; खाराब लालसोअ फासाड़ी सालनारे आन सोताहा बोड़ाय मारनारे आन सोताआ फायदाआ काजे बिहीराआ सामने मिठे-मिठे गोगनारे एहलेहे होय.

सेतावणी आन सुसना

17 पोन माआं मेराला पाव्हीइला, आपाअ प्रभु ईसु ख्रिस्ताआ प्रेशितहों पेल रोत कोतापल्यी गोठी ओर मिका; 18 ते तुमुहूं कोयाज कोअताते के, "आखरीइ दिहोमेहें डाणिवनारे माहें उठे, जें तियांआं विणभक्तीइ लालसोअ पुरमाणे साले." 19 एं ताम फाटा पाड़नारे शरीर सोभावोअ माअहें होय, जियांम आत्मा कायनाहां. 20 पोन माआं मेराला पाव्हीइला, तुमू तुमाआं वादार सोका विश्वासोमेहें वादते जात आन पवित्र आत्मामेहें प्रार्थना कोअते रोवा. 21 तुमू हादाफल्याआ जिवनोअ काजे आपाआ प्रभु ईसु ख्रिस्ताआ दयाआ वाट जोवतेज सोताहा देवोअ मेरेमेहें टिकीत रोवा.

22 जें सौंसाम रोतेहे तियांपोअ दया कोआ. 23 थोड़हाहां आगीम रोत ओडीत बारथे काडान वासाड़ा, बाकी जोओंपोअ बिते जात दया कोआ, पोन तियांआं आंगड़ाआ बी सीस कोआ जें पाप कामोवाईं घाण ओत गोयेहे.

प्रार्थना आन स्तुती

24 ओमे जो तुमुहूं पोड़ीइलो रोत वासाड़ीत सेकेहे, आन तियाआ महिमाअ भारपुरीइ सामने निर्दुस कोइत उबे कोइत सेकेहे, 25 तिया आपाआ तारनारा एक्काज देवोअ महिमा, बाहदिरी आन आधिकार ईसु ख्रिस्ता वाईं पिढ़ीन पिढ़ी रोत होय, आन ओमेन हादाफल रोये! आमेन.