1 ओं ईसु ख्रिस्ताआ प्रगटीकरण होय. जे गोठी वेगीज ओवनारी होये, ते देवे तियाआ सेवकोहों देखाड़ीइलोअ काजे ख्रिस्ताहा आप्यी, आन ख्रिस्ते तियाआ देवदुतोहो मोकलीत कोइत ए आखी गोठी तियाआ सेवक योहानोहो कोय तेहें कोयो. 2 योहान देवोअ वसनोअ बाप्तिम आन ईसू ख्रिस्ताआ बाप्तिम मोन्ज्ये जों जों तिये देख्यो, तियाआ बाप्तिमेहें साक्शी आप्यी. 3 यी भविश्यवाणीइ वसने जो वासित देखाड़ेहे, आन जें उनाअतेहे आन जें यामेहें लेखल्यी गोठीही मानतेहे तें आशिर्वादीत होय; काहाके ए गोठी पुरी ओवीइलोअ वेल आहने आवीत लागीही.

4 ✝आसियामेर्‍यीइ हांत मंडड़ीही योहानोअ संदेश:

जो होय, जो ओतु आन जो आवनारु होय, तियाअहें रोत, तियाआ राजगादीइ आगाड़ी हजर रोनारी हांत आत्माअहें रोत, 5 ✝ जो खोरु साक्शीदार आन मोल्याम रोत जिवीत उठनारामेहें पेलठू आन धरतीइ राजहांअ पुडारी होय, तिया ईसू ख्रिस्ताअहें रोत तुमुहूं मेरवानी आन शांती जोड़ुहूं जोवे.

तो आपापोअ मेर कोअहे, आन तिये सोताआ रक्तावाअहीं आपुहूं पापोम रोत वासाड़्येहे, 6 ✝ आन आपुहूं राज्य आन आपाआ देव आब्हाआ काजे आपुहूं पुंजारा बोणावी देदा, तियाआज महिमा आन पराक्रम हादाजलम रोअहूं जोवे, आमेन.

7 ✝ पाला, तो वाद्लापोअ आवनारु होय, हारेक माहुंउं तियाहा पाले, एतोज नाहां जियां तियाहा खिला ठोक्याते, तें बी तियाहा पाले, आन धरतीपोर्‍येए आखे माअहें तियाआ वाखरी जुदे रोड़े, एहलोज ओवे! आमेन

8 ✝ जो होय, जो ओतू आन जो आवनारु होय, तोज आखाम रोत वोडी ताकतवालु यहोवा देव कोहे, "अल्फा आन ओमेगा* आंयज होय."

9 आंय तुमाआ पाही योहान होय, आन ईसुउ तारास, राज्य आन धिरोमेहें तुमाआं हेंगात्यू, देवोअ वसन आन ईसूउ बाप्तिमेहें साक्शी आपीइलाअ वाअहीं आंय पतमुस नावोअ बेटोपोअ ओतु. 10 आंय प्रभुउ दिहोमेहें आत्माम पोआत गोयु, आन माआ फासाड़ी तुरीइ होस वोडा आवाजोम एहें कोत्लाहा उनाअयु, 11 तिये एहें कोयो, "तु जो किबी पालेहे, तियाहा पुस्तकोम लेख आन तियाहा इफिस, स्मुरणा, पर्गम, थुवतीरा, सारदीस, फिलादेलफिया, आन लौदीकिया जागऱ्यीइ हांतू मंडड़ीइ जागे मोकली दे."आसियामेऱ्यीइ हांत मंडड़ीइ नाकाशु

12 माअरी कोडो गोगेहे, तियाहा पालीइलाअ काजे आंय फाटी फिरीत पाल्यो, ताहां होनाआं हांत दिवा देख्या; 13 ✝ आन तिंया दिवाआ विसमेहें माहुंउं बेटाह्हाअ होस एका माट्योहो देख्यू, तो नांबो आंगड़ो गुडाअहीं जाआं पोवित ओतू, आन तियाआ साती पोअ होनाअ पोट्टू बांदल्यु ओतू. 14 ✝तियाआ मुन्काआ सिंग्ये बर्फाआ होसर्‍येए पांडे पांडेज आसला रुंग्हांआं होस ओते, आन तियाआ डोआ आगीइ होस भोबलीइताते. 15 ✝ तियाआ गुडा बाठीम तोपवीइल्या ईसत्लेए होस समकीइताते आन तियाआ आवाज दोर्‍याअ होस हुहवीइतुतो. 16 तो तियाआ हाजाड़्या आथोमेहें हांत तारा लेत ओतू, आन तियाआ सोबिम रोत वाडाली बेन तार्‍यी तारवाअ निहींतीते, आन तियाआ सोब माजन्या दिहोअ होस समकीइतीते. 17 आंय तियाहा पालताज वाआ मोल्याआ होस तियाआ गुडाअ जागे उठ्लीत पोड़्यू. तिये मापोअ तियाआ हाजाड़्यू आथ मिकीत कोइत कोयो, "बिही मा; आंय सुरवात आन आखरी होय.✝ 18 जिवनोअ उकलू आंय होय, आंय मोइत गोयुतो तेबी पाला, आंय हादाजलम जिवतु होय! मोतोअ आन अधोलोकोअ कुसी माजपोअ होय. 19 तियाहा काजे तुमे जो देख्योहो, आन जे गोठी ओवेहे आन जे गोठी याअ फासाड़ी ओवनारी होय, तियीं आखीही लेखीत ले. 20 जियां हांत ताराहा तुमे माआं हाजाड़्या आथोम देख्या, तियांआं आन होनाअ हांत दिवाआ अर्थ एहें कोइत होय: हांत तारा ए हांत मंडड़ीइ दुत होय, आन हांत होनाअ दिवा ए हांत मंडड़ी होय."