1 जाहां तिये मेडे हांतवू सिक्कु उगाड़्यु, ताहां आरदू तास जाआं होरगो सामसुम ओत गोयो. 2 तिहींइं फासाड़ी आंय तियां हांतू देवदुतोंहों देख्या, जे देवोअ सामने उबा रोताहा, आन तियांहां हांत तुरी आप्यी.

3 फाशुउ एक देवदुत होनाआं आगरबत्ती लेत कोइत आयु, आन देवान्याअ जागे उबु रोयू, तियाहा जाअखीलीही आगरबत्त्यी आप्यी, जियीं वाअहीं तो आक्खा देवोअ माअहोंअ प्रार्थनाअरी राजगादीइ सामनेवाला होनाआं देवान्यापोअ सोढ़वे. 4 तियी आगरबत्त्यीइ तुमाणू पवित्र माअहुंउं प्रार्थना नेहें देवदुतोअ आथे देवोअ सामने पोत्यु. 5 ताहरुउ देवदुते आगरबत्ती लेत कोइत तियीमेहें देवान्याअ आग पोअयी आन धरतीपोअ टाकी देदी; तिहीं वाअहीं गाजीइलोअ, आवाज आन विज पोड़्यी आन *भुकंप ओवयो.

6 ताहराअ ते हांतू देवदुत, जियांपोअ हांत तुरी ओती, ते तियींहीं फुकुहूं तियार ओवा.

7 पेलठे देवदुते तुरी फुक्यी, आन रक्तालेज गारे आन आग तियार ओवी, आन धरतीपोअ टाकी देदी;✝ आन धरतीइ बाराने भाग बोलीत गोयू, आन साड़ोअ बाराने भाग बोलीत गोयू,आन आक्खू निलू सारु पेटाइत गोयू.

8 बिहीरे देवदुते तुरी फुक्यी, तांहा आग जेहें पेटाअत्लू एक वोडू डोगोअ दोर्‍याम टाकी देदू; आन दोर्‍याअ बाराने भाग रक्त बोणीत गोयो. 9 आन दोर्‍याअ बाराने भाग जनवारे मोइत गोये, आन बाराने भाग जाहाज आरवाइत गोयी.

10 तिसरे देवदुते तुरी फुक्यी, आन ताहरुउ दिवीइ होस पेटाअत्लू एक वोडू तारु जुगोम रोत निसे टुटीत पोड़्यू, तो खाडीइ बाराने भागोपोअ आन पाअयोंअ उकलापोअ आवीत पोड़्यू. 11 तिया ताराआ नाव जेरेन जेर होय; आन बाराने भाग पाईं कोड़वो ओत गोयो, आन जाअखीलेहे माअहें मोइत गोये; काहाके तो पाईं कोड़वो ओत गोयोतो.

12 सौथे देवदुते तुरी फुक्यी, तांहा दिहोअ बाराने भाग, आन सांदोअ बाराने भाग आन ताराआ बाराने भागोपोअ पिड़ा ओवयी, आन तियांआं बाराने भाग आंदारो ओत गोयो: आन दिहोअ बाराने भागोमेहें उजालो ने ओवतोतो, आन रातीइ बी एज दशा ओती.

13 आंय फाशोअ पाल्यो, ताहां जुगोमेहें एका मोरागाहा उड्त्लाहा आन वोडा आवाजोमेहें एहें कोत्लाहा उनाअयु, "ते तीन देवदुत तुरी फुकनारा ओता, जे ओमे बाकी होय, धरतीपोअ रोनारा तुमाआं जुदी विते, विते, विते!"