प्रगटीकरण 17

नावासी रांडी

1 जियां हांत देवदुतों पोअ जे हांत वाटका ओता, तियांमेहें रोत एके जोएं आवीत माहूं एहें कोत कोयो, "एहें आव" आंय ताहूं तियी नावासी रांडीइ डोंड केहें कोइत ओवे तो देखाड़ोहो, वोडो सेर जो जाअखिलाहा पाअयोंपोअ बोठोहो. 2 तियीइरी धरती पोर्‍याआ राजाहां सिनालो कोअयो; आन तियीइ सिनालाआ दाराक्शाआ रोहो वाअहीं साकीत गोया.

3 ताहां तो माहूं आत्माम जंगलोमेहें लेत गोयू, आन आंय रात्ला रंगोअ जनवारो पोअ, जो निंदाआ नावो वाअहीं पोआलो ओतो आन तियाआ हांत मुन्के आन दोह हिंगे ओते, एकी बोईंहीं बोहीत रोल्यी देख्यी. 4 ते बोईं जामण्या रंगोअ आन रात्ला रंगोअ साअके पोवित ओती, होनो आन मोगला मोणक्या आन किमती डायमंड यावाअहीं होतरीइल्यी ओती, आन तियीइ आथोमेहें एक होनाअ वाटकू ओतु जो आखी खाराब वस्तू वाअहीं आन तियीइ आखी सिनालो गोठी वाअहीं पोआलु पियालू ओतु. 5 तियीइ निंडाअ पोअ वोडी बाबेल, आखा रांडाआ आन खाराब कामोंअ आयही ओं नाव लेखल्यो ओतो.

6 आंय तियी बोईंहीं देवोअ माअहुंउं रक्‍तावाअहीं आन ईसुउ काजे साक्शीदारोअ रक्त पित कोइत मातीत रोल्यी देख्यी; तियीही पालित आंय बोगलाइत गोयु. 7 ताहां तिये देवदुते माहूं कोयो, "तु काहा बोगलाइत गोयू? आंय ताहूं यी बोईंइ आन तियीही डिलोपोअ बोहाड़ीत लेत फिरनारा जनवारोअ बाप्तिम आन जियाहा हांत मुनके आन दोहो हिंगे होय, तिया जनवारोअ निकाअली गोठ ताहूं कोत आपोहो. 8 जों जनवार तुमे देख्योहो, तों पेल ओतो पोन ओमे कायनाहां, आन तों उंडा खायाराम रोत निहींत कोइत आरवाइत जाय; आन धरतीपोअ तें रोनारे जियांआं नावे दुन्याआं बोणीलोअ पेल जिवनोअ पुस्तकोमेहें नाहां लेखाअये, जनवारोहो पालीत कोइत बोगलाइत जाय, काहाके तों ओतो आन ओमे कायनाहां आन फाशोअ आगाड़ी आवनारोहो.

9 "इंहीं हुशार बुद्दीइ गरज होय, ते हांत मुनके एं हांत डोगोअ होय, जियांपोअ ते बोईं बोहयीही. आन ते मुनके बी हांत राजा होय. 10 आन हांत राजा होय, पास पोड़्याहा, एक होय आन बिहीरु फाशुउ नाहांजी आयू; आन तो आवे ताहां तियाहा थोड़ीज वेल रोअहूं पोड़े. 11 तों जनवार, जों पेल ओतो आन ओमे कायनाहां, तों आंठवो होय; पोन तो हांतू राजामेहें रोत बोण्युहूं आन तो आरवाइत जाय.

12 "तुमे जियां दोहो हिंगोहो देख्ये, ते दोहो राजा होय. याहां ओमे जाआं राज्य नाहां जोड़्यो, पोन तियांहां तिया जनवारोअरी तात्पुरतू राज्य कोइलाअ आधिकार जोड़े. 13 तियांआं एकूज विसार होय, के ते तियांआं ताकत आन आधिकार तियां जनवारोहो होपी देय. 14 ते मेडाअरी लड़ाय कोए, पोन मेडू तियांहां हारवी देय, काहाके तो देवोअ देव आन राजाआं राजा होय. मेडाअरी तियाआ फासाड़ी सालनारे बी जिकीत जाय; जें हादाअयेहे आन निवड़ाअयेहे आन इमानदार बी होय."

15 देवदुते माहूं ओं कोयो, "तुमे जिया दोर्‍याहा देख्यू; जिहीं वोडी रांडी बोठीही, तिया दोर्‍याआ ओं अर्थ होय, माअहें, आखी जाती, देस आन आक्खी बाशा. 16 तुमे जियां दोहो हिंगोहो आन जनवारोहो देख्यो, तें रांडीही सीस कोए, आन तियीही नागरी कोइत एखलीहीज ओड़ीत काडे, तियीइ माहां खाये आन तियीही आगीम पेटाड़ी देय. 17 काहाके ते एक मोन ओवित कोइत देवोअ वसने पुरे ओवे ताअहूं जांआं तियाआ इश्शा पुरी कोइलाअ काजे तियांआं राज्य जनवारोहो आपे, ओं देवे तियांआं मोनोमेहें टाक्यो.

18 "तुमे जियी बोईंहीं देख्यी, तों एक वोडो होयर होय, जों धरतीइ राजहांपोअ राज कोअहे."