1 याआ फासाड़ी एका देवदुतोहो होरगाम रोत उतरीइत्लाहा देख्यू, तियाआ आथोमेहें उंडा खायाराआ किल्ली आन एक वोडी हाकल ओती. 2 तिये अजगरोहो, जुना हापोहो मोन्ज्ये आरोप लागाड़नारा सैतानोहों तोइत कोइत हाजार वोरह्योंअ कोअते बांद्यु,✝ 3 आखा माअहुंहूं ने भटकावे तेहें काजे तिया अजगरोहो उंडा खायारामेहें टाकी देदू, आन बोंद कोइत सिक्कु मारी देदू, तिहींइं फासाड़ी थोड़ीक वेलेए कोअते तियाहा सोड़ी देएलाआ गरज होय.

4 फाशीइ आंय राजगादी देख्यी आन तियींपोअ माअहें बोठे, तियांहां न्याय कोइलाआ आधिकार आप्यू, आंय तियां माहुंउं आत्माहां बी देख्यी, जियांआं मुनके ईसुउ साक्शी आन देवोअ वसनोअ वाखरी तोड़ीत टाक्येते, आन जियां तिया जनवारोअ आन तियाआ मुर्तीइ भक्ती ने कोअयीते, आन तियांआं निंडाआपोअ आन आथोपोअ तिया जनवारोअ सापोअ आकड़ू ने लागाड़ुहूं देदूतो. तें फाशेए जिवित कोइत ख्रिस्ताअरी एक हाजार वोरह्ये जाआं राज कोए.✝ 5 ते थोड़ेक मोल्ये माअहें हाजार वोरह्ये पुरे ने ओवे ताअहूं ने जिव्ये. ओं पेहलो पुनरुत्थान होय. 6 धन्य आन सोके तें होय, जें पेहला पुनरुत्थानोमेहें सामिल होय. एहेला माअहूं पोअ दुसरा मोतोअ अधिकार ने रोय. पोन तें देवोअ आन ख्रिस्ताआ पुंजारे बोणे आन तियाअरी हाजार वोरह्ये जाआं राज कोए.

7 एक हाजार वोरह्ये पुरे ओत जाय ताहां सैतान जेलेम रोत सुटीत जाय. 8 आन तो धरतीइ शारु खुणामेहें वेराइत रोल्या देसोहों मोन्ज्ये गोग आन मागोग यांहां, जियांआं गणती दोर्‍याआ रेटाआ एतीही होय, सैतान तियांहां ठोगित कोइत लोड़ायीइ काजे एक्ठे कोइलाआ कोअते बाअथे निहे. 9 तियां आखी धरतीपोअ पसरीत कोइत देवोअ माअहोंअ पोड़ावाहा, आन मेराला होयरोहों केंडवारीत लेदो, ताहां जुगोम रोत आग उतऱ्यी आन तियांहां आरवीत टाक्ये. 10 तियां ठोगनारा सैतानोहों आगीइ आन गंधकोअ तालावोमेहें टाकी देदू; तिहींमेहें तिया जनवारोहो आन तिया ठोग भविश्यवक्ताहा बी टाकी देदा, आन ते दिहीन रात हादाजलम तड़पिइता रोय.✝

11 तिहींइं फासाड़ी आंय फाशोअ एक पांडी वोडी राजगादी आन तियीपोअ बोठ्ला एका माहुंहूं देख्यो. धरती आन जुग तियाआ सामने आरताइत गोये आन तियांहां काज जागू ने जोड़्यू. 12 आन आंय हाना-वोडा आक्खा मोल्याहां राजगादीइ सामने उबे रोल्ये देख्ये, आन पुस्तक उगाड़्यो; ताहां फाशोअ एक बिहीरो पुस्तक, तो जिवनोअ पुस्तक होय, उगाड़्यो; तियां पुस्तकोम लेखाअली गोठीइ परमाणे तियां मोल्या माअहोंअ कामोअ न्यायनिवाड़ू ओवू. 13 दोर्‍यामेहें मोअनाराहां दोर्‍ये आपी देदे, मोत आन अधोलोकोमेहें मोअयेते, तियां बी तियांम मोल्या माअहोंहों आपी देदे; आन हारेकोअ जियातियाआ कामोअ पुरमाणे न्यायनिवाड़ू ओवू. 14 तिहींइं फासाड़ी मोत आन अधोलोक, बेनुहूं आगीइ दोर्‍यामेहें टाकी देदे. ए आगीइ दोर्‍या दुसरी मोत होय; 15 आन जियांआं नावे जिवनोअ पुस्तकोमेहें ने सापड़्ये, तियांहां आगीइ दोर्‍यामेहें टाकी देदे.