1 तिहींइं फासाड़ी आंय एका बिहीरा ताकतवाला देवदुतोहो जुगोम रोत उतरीइत्लाहा देख्यू. तो वादला वाअहीं टापाइत ओतू, आन तियाआ मुन्कापोअ बाण ओती आन तियाआ सोब दिहोअ होस सोमकीइतीते आन तियाआ गुडा आगीइ खांबाआ होस ओता. 2 तियाआ आथोमेहें एक हान्नो एवडोहो लेखल्यो पुस्तक ओतो; तिये तियाआ हाजाड़्यू गुडू दोर्‍यापोअ आन बांगाड़्यू गुडू धरतीपोअ मिक्यू, 3 तो सिहांआ होसे जाअखीलीही जोरे आअड़्यू; आन तो आअड़्यू तेहलामेहें हांत बाला तियां-तियांआं गाजीइलाआ आवाज काड्यू. 4 जेहेलाम हांतू बाला आवाज आयू, ताहां आंय लेखनारुज ओतू; पोन आंय जुगोम रोत एक आवाज एहें कोत्लाहा उनाअयू, "हांत बालाआ संदेश सिक्कु मारीत निकाड़ीत मिक; तियाहा मा लेखीही."

5 जिया देवदुतोहो दोर्‍यापोअ आन धरतीपोअ उबा रोल्याहा आंय देख्यू, तिये तियाआ हाजाड़्यू आथ जुगोअहें उसू कोअयू, 6 आन जो हादाजलम जिवतु होय, जिये जुग आन जो किबी तियामेहें होय, धरती आन जो किबी तियीपोअ होय, आन दोर्‍या आन जो किबी तियामेहें होय, तियाहा बोणावयोहो; तियाआ शप्पत खात कोइत देवदुते ओं कोयो, "ओमे जारिक बी वाआ ने लागे; 7 जेदिहीं हांतवा देवदुतोअ तुरी फुकाय, तेदिहीं देवोअ निकाअली गोठी पुरी ओत जाय, जे तिये के तिये तियाआ सेवकोहो, मोन्ज्ये भविश्यवक्ताहां सुसना कोइत आप्यीते."

8 जो आवाज आंय जुगोम रोत आवत्लाहा उनाअयुतो, तो आवाज तेहेलाम फाशुउ माहूं कोयो, "जा, जो देवदुत दोर्‍यापोअ आन धरतीपोअ उबु रोयुहू, तियाआ आथोम रोत उगाड़ल्यो पुस्तक मागीत ले."

9 तियाहा काजे आंय देवदुतोअ जागे जात कोइत तियाहा रावणी कोअयी, के तो पुस्तक माहूं आपी दे. तिये कोयो, "ले, याहा खात्ले; ओं ताआ पेटोहो कोड़वो ते लागे, पोन ताआ सोबीही मोदोअ होस गुल्यो लागे."

10 ताहरोअ आंय तो हानो पुस्तक देवदुतोअ आथोम रोत मागीत लेदो आन खात लेदो. तों माआं सोबीही मोदोअ होस गुल्यो लागो, पोन जाहां आंय तियाहा गिईंत लेदो, ताहां माआं पोटू कोड़वू ओत गोयू. 11 ताहां माहूं ओं कोयो, "ताहूं जाअखिलाहा माअहुंउं, देसोअ, हारेक बाशा गोगनारे आन राजाहांआं बाप्तिमेहें भविश्यवाणी कोअहूं पोड़े."