प्रगटीकरण 7

इस्राएलोअ एक लाख शौरेशाड़ीस हाजार माअहें

1 आन तिहींइं फासाड़ी आंय धरतीइ शारु खुणापोअ शार देवदुत उबा रोल्या देख्या. ते धरतीइ शारु वाराहा रुकीत रोयाते, याअ काजे के धरतीपोअ नेताहां दोर्‍यामेहें नेताहां कोड्लाज साड़ोपोअ वारो ने सालुहूं जोवे. 2 आंय एका बिहीरा देवदुतोहो जिवता देवोअ सिक्कु लेत कोइत दिही उगताअहें रोत उसे आवत्लाहा देख्यू; तिये तियां शारु देवदुतोंहों, जियांहां धरती आन दोर्‍याहा उजाड़ीइलाअ आधिकार ओतु, आअड़ीत कोइत कोयो, 3 आमाआ देवोअ सेवकहोंअ आंगड़ाअरी सिक्कु मारुहूं ताअहूं जाआं तुमू धरतीही आन दोर्‍याहा आन साड़ोहो किज नुकसान मा कोअहा. 4 आन आंय सिक्का मारल्या माअहुंउं गणती उनाअयु– ए गणती एक लाख शौरेशाड़ीस हाजार ओती आन तें इस्राएलोअ आखा कुलोमेर्‍येए ओते: 5 यहुदाअ पारवाड़ीमेर्‍याआं बारा हाजारोपोअ सिक्का मार्‍या; रुबेनोअ पारवाड़ीमेर्‍याअ बारा हाजारोपोअ; गादोअ पारवाड़ीमेर्‍याअ बारा हाजारोपोअ; 6 आशेरोअ पारवाड़ीमेर्‍याअ बारा हाजारोपोअ; नफतालीइ पारवाड़ीमेर्‍याअ बारा हाजारोपोअ; मनश्शेए पारवाड़ीमेर्‍याअ बारा हाजारोपोअ; 7 शिमोनोअ पारवाड़ीमेर्‍याअ बारा हाजारोपोअ; लेवीइ पारवाड़ीमेर्‍याअ बारा हाजारोपोअ; इस्साखारोअ पारवाड़ीमेर्‍याअ बारा हाजारोपोअ; 8 जबुलुनोअ पारवाड़ीमेर्‍याअ बारा हाजारोपोअ; योसेफोअ पारवाड़ीमेर्‍याअ बारा हाजारोपोअ; बिन्यामीनोअ पारवाड़ीमेर्‍याअ बारा हाजारोपोअ सिक्का मार्‍या.

एक वोडी गर्दी

9 याअ फासाड़ी आंय आखा देसोहो, कुलोहो, हारेक जात आन बाशाआ एक एहलिही वोडी गर्दीही देख्यी, जियांहां कोडोज गोणीत ने सेकतोतो. ते राजगादीइ सामने आन मेडाअ सामने उबे ओते. आन ते पांडे आंगड़े पोवित आन तियांआं आथोमेहें खारक्याअ बेड्ये ओते. 10 आन वोडा आवाजोमेहें आअड़ीत कोइत कोतेहे, "राजगादीपोअ तारणोअ काजे बोठला आमाआ देवोअ, आन मेडाअ जयजयकार ओवे!" 11 आन आखा देवदुत राजगादीइ आन डायहांअ आन शारु जनवारोअ मेरेमेरे उबा रोत होय, आन ते आक्खा राजगादीइ सामने उबडा पोड़ीत देवोअ भक्ती कोअयी. 12 आमेन! आमाआ देवोहो हादाजलम जाआं भक्ती, महिमा, बुध्दी, आभार, मानपान, सेक्ती आन ताकत! आमेन.

13 ताहां डायहांमेर्‍येए एके जोएं माहूं फुश्यो, "एं पांडा आंगड़ावाले कोडे होय? आन का रोत आवयेहे?"

14 आंय तियाहा कोयो, "प्रभु, ओं ताहूंज मुंदू होय." तिये माहूं कोयो, "एं तें माहें होय, जें वोडी पिड़ामेहें रोत निहींत कोइत आवयेहे. यां मेडाआ रक्तामेहें सोताआ आंगड़े तुवीत कोइत उजालीत लेदेहे. 15 तियाहाज काजे तें देवोअ राजगादीइ सामने होय, आन ते रातेन दिही मंदिरोमेहें तियाआ सेवा कोअतेहे, आन जो राजगादीपोअ बोठुहू, तो तियांआं उपोअ तंबू ताएं. 16 ते फाश्येए फुकल्येन तिहील्ये ने रोय, आन ने तियांपोअ तोप, ने कोड्लीज जातीइ गरमी तियांपोअ पोड़े. 17 काहाके राजगादीइ विसमेहें होय तो मेडू याआं सारवाल्यु रोय, आन तियांहां जिवनोअ पाअयोंअ उकलाआ जागे लेत जाया कोए; आन देव तियांआं डोआमेर्‍येए आखे रोज्ये नुसी देय."✝7:17 यहे 34:23; प्रगटी 5:6; यश 2:13; भजन 23:2; यिर्म 25:8