प्रगटीकरण 9

1 जेहेलाम पासवे देवदुते तुरी फुक्यी, ताहां आंय होरगाम रोत धरतीपोअ एका ताराहा पोड़त्लू देख्यू, आन तिया ताराहा वोडा उंडा खायाराआ किल्ली आप्यी. 2 तिये तारे खायाराहा उगाड़्यु, तांहा खायीमेहें रोत वोडी बाठीइ होस तुमाणू निहीयु, आन तिया तुमाणावाअहीं दिही आन पुरु जुग कालान कालाआ ओत गोयू. 3 तिया तुमाणामेहें रोत धरतीपोअ टिडे निहींये, आन तियांहां धरतीपोर्‍याआ विश्योअ होस सेक्ती आप्यी. 4 तियांहां ओ आदेश जोड़्यू के पुंयपोर्‍याआ खोड़ोहो आन कोड्ला निला साड़ोहो नुकसान मा कोअहा, पोन जियां माअहुंउं निंडाअपोअ देवोअ सिक्कु ने ओय; तियांहां तुमू तारास देजा. 5 टिडाहां तियां माअहुंहूं माइलाअ नाहां पोन पास मोयना जाआं पिड़ा देअलोअ आधिकार जोड़्यू; आन विसीइ टोसल्या वाअहीं जेहेलुहू तारास ओवेहे, तेहेलुहूज तियां वाअहीं तारास ओवतुतो. 6 तियां दिहोमेहें माअहें मोइलाअ वेल होदे, पोन तियांहां ने जोड़े; ते मोतोअ लालस कोए पोन मोत तियांआं आहने ने आवे.

7 तियां टिड्याआं रुप लड़ायीइ काजे तियार कोअल्या कोड़ाआ होस ओतू; एहेलेहे देखाअतेते के तियांआं मुन्कापोअ होनाअ टोपा ओता, आन तियांआं सोब माअहुंउं होस ओती. 8 आन तियांआं सिंग्ये बोईं सिंग्याअ होस आन तियांआं दात सिहां वागोअ दातोअ होस ओता. 9 तियांआं सातीपोअ लोड़ाअ आंगड़े ओते, तियांआं उडीइलाअ आवाज लड़ायीम गुगदीइनारा जाअखिलाहा कोड़ाआ गाडाअ आवाजोअ होस ओतू. 10 तियांहां विश्योअ होस सेपटे आन तियांअरी हुयटा ओता, आन माअहुंहूं पास मोयना जाआं तारास देअलोअ आधिकार जोड़्युतो, तियांआं जेहर तियांआं सेपटामेहें ओतो. 11 उंडा खायाराअ दुत ओ तियांपोअ राजा होय, इब्री बाशामेहें तियाआ नाव अबद्दोन, आन युनानी बाशामेहें तियाआ नाव अपल्लूओन*9:11 अपल्लूओन मोन्ज्ये आरवीत टाकनारु. होय.

12 पेल्लीइ पिड़ा ओत गोयी; यीइ फासाड़ी फाशीइ बेन वोडी पिड़ा आवनारी होय.

13 साहावे देवदुते तुरी फुक्यी; ताहां होनाअ देवान्याअ शारु खुणापोर्‍याअ हिंगोम रोत एक आवाज आंय उनाअयू, 14 तुरी लेत रोनारा साहावा देवदूतोहो तो आवाज एहें कोत्लाहा आंय उनाअयू, "वोडी फरात नोयीइ जागे बांदल्या शारु देवदुतोहो सोड़ी दे." 15 ताहां माअहुंउं बाराने भाग माइलाअ काजे ते ठरवीइल्यी वेल, दिही, मोयनु, आन वोरीही याअ काजे, जे शार देवदुत तियार कोअयाते तियांहां सोड़्या. 16 कोड़ा गुगदाड़नाराअ गणती विही करोड़ ओती; ए आंय तियांआं गणती उनाअयू. 17 माहूं या दर्शनोमेहें कोड़ा आन तियांपोअ बोहनारा देखाअया: सेयनिक आगीइ होस लाल, निल्ला, आन गंधकोअ होस पिवला लोड़ाआ आंगड़े पोवीत ओता, आन तियां कोड़ा मुन्के सिहां वागोअ मुन्काआ होस ओते, आन तियांआं सोबीम रोत आग, तुमाणू आन गंधक निहीतुतो. 18 तियांआं सोबीमेहें रोत निहींनारा तुमाणा वाअहीं, आगीवाअहीं आन गंधकोवाअहीं बाराने भाग माहें मोइत गोये. 19 काहाके तियां कोड़ाआ सेक्ती तियांआं सोबीम एतीज नाहां, तियांआं सेपटाम बी ओती; तियांआं सेपटे हापोअ होस ओते, तियांहां मुन्के बी ओते, आन तियां वाअहींज ते तारास देतेते.

20 बाकी रोल्ये माअहें जे यीं पिड़ा वाअहीं ने मोये, तें तियांआं आथोअ कामोअ वाखरी मोन ने फिरव्यो, तें पुतोंअ पुंजन कोअते रोये आन होना, सांदी, इसत्लेए, डोणोअ आन लाकड़ुउ देवताआ मुर्तीइ बी, जे नाहां पालीत सेकती, नाहां उनाइत सेकती, आन नाहां सालीत सेकती. 21 तियां कोअल्या खुन, जादू मंतर, सिनालो आन बांड्गायीइ बाप्तिम बी मोन ने फिरव्यो.