याकोब 3

जिबीही ताबाम मिकीइलो

1 माआं पाव्हीइला, तुमू आखेज मास्तर मा बोणहां. काहाके आपाआ होसऱ्याआ सिकाड़नाराहां जाअखु डोंड जोड़े, ओं तुमुहूं मुंदू होय. 2 काहाके आपू जास्ती वारी सुकीत जातेहे; जों गोगीइलाम नाहां सुकतो, तों माहुंउं पाक्को होय आन पुरा डिलोहो ताबाम कोइत सेकेहे. 3 कोड़ाहा ताबाम मिकीइलोअ काजे आपू तियाआ सोबीम लगाम लागाड़तेहे, ताहां आपू पोटे तिवोल तियाआ पुरा डिल वालित सेकतेहे. 4 पाला, जाहाज बी एती वोडी रोतीही तेबी वोडा वारावाईं सालाड़तेहे, तियीही बी वाहीं एवडा पातावाईं सालाड़नाराआ इश्शाआ परमाणे वालित सेकतेहे.

5 तेहेलीज जिब एक वाहीं एवडीही रकम होय, पोन वोडी वोडी गोठी कोअहे. पाला, वाहीं एवडाहा जिंगाला वाईं केतुहू वोडू जंगल पेटात जाहे. 6 जिब एक आग होय; जिब आपाआ सोबीमेएं एक खाराब कोल होय, आन पुरा डिलोम फालतु घाण काली देहे, आन आपाआ पुरी जिंदगीमेहें आग लागाड़ी देहे, आन नरकाआ कोलीइ आग कायम पेटाअयाज कोअहे. 7 काहाके आखी जातीइ जनवारें, सिड़े, होरतींडनारे जिवजंतु आन दोर्‍यामेहें रोनारे जिवजंतु मोनव्योअ ताबाम ओत सेकतेहे आन ओत बी गोयेहे. 8 पोन जिबीही कोडोज माहुंउं ताबाम नाहां कोइत सेको. ए एक एहेलिही वस्तु होय, जे जास् खाराब आन नाहां रुकता आवती, तियीम जिवलेणीइ जेहर पोअल्यो होय. 9 यीज वाईं आपू प्रभुउ आन देव आब्हाआ स्तुती कोअतेहे; आन यीज वाईं देवोअ रुपोम बोणावल्या यां माअहुंहूं हारापतेहे. 10 एकीज सोबीम रोत आशिर्वाद आन हाराप निहींताहा. माआं पाव्हीइला एहेलोहो ने ओवुहूं जोवे. 11 केहें एकाज पांअयोंअ उकलामेहें रोत मिठो पाईं आन कड़वो पाईं निहीत्लो के? 12 माआं पाव्हीइला, अंजिरोअ साड़ोपोअ जैतुन आन दाराक्शाआ वेलाम अंजिरे लागीत नाहां सेकते. तेहेलोज खारा उकलाम रोत मिठो पाईं नाहां निकलीत सेकतो.

खोटो आन खोरो ज्ञान

13 तुमामेहें ओकलवान आन समजदार कोडु होय? जो ओय तो सोताआ कामोहों हाजु सोभाव आन नम्रता वाईं कृतीम कोइत देखाड़ुहूं जोवे. 14 पोन जर आपू जिवज्योअ मोनोम कड़वी आद्राय आन स्वार्थी विसार मिकीत रोतेय, ताहां सत्याआ विरुद्दाम वोडाय कोइत ठोगुहूं ने जोवे. 15 एहलिही ओकल उसे रोत नाहां आवती, पोन ते दुन्यादारीइ आन सैतानोपोअ रोत आवेहे. 16 काहाके जिहीं आद्राय आन विरोद ओवेहे, तिहीं होदीइ सोगदाय रोहे. 17 जे ओकल उसे रोत आवेहे ते पेल सोकी होय, होकेन मेर आपनारी, कायम मायालु आन किइमाय कोअनारी रोहे. ते दया आन हाजा फलो वाईं पोआत रोहे; ते भेदभाव नाहां कोअती आन हानाली रोहे. 18 पोन जें शांती लेतावतेहे, तें शांतीइ बीजे पेए, आन धर्मीपणोअ फल मेलवे.