Tiago 3

3 कोड़ाहा ताबाम मिकीइलोअ काजे आपू तियाआ सोबीम लगाम लागाड़तेहे, ताहां आपू पोटे तिवोल तियाआ पुरा डिल वालित सेकतेहे. 4 पाला, जाहाज बी एती वोडी रोतीही तेबी वोडा वारावाईं सालाड़तेहे, तियीही बी वाहीं एवडा पातावाईं सालाड़नाराआ इश्शाआ परमाणे वालित सेकतेहे.

5 तेहेलीज जिब एक वाहीं एवडीही रकम होय, पोन वोडी वोडी गोठी कोअहे. पाला, वाहीं एवडाहा जिंगाला वाईं केतुहू वोडू जंगल पेटात जाहे. 6 जिब एक आग होय; जिब आपाआ सोबीमेएं एक खाराब कोल होय, आन पुरा डिलोम फालतु घाण काली देहे, आन आपाआ पुरी जिंदगीमेहें आग लागाड़ी देहे, आन नरकाआ कोलीइ आग कायम पेटाअयाज कोअहे. 7 काहाके आखी जातीइ जनवारें, सिड़े, होरतींडनारे जिवजंतु आन दोर्‍यामेहें रोनारे जिवजंतु मोनव्योअ ताबाम ओत सेकतेहे आन ओत बी गोयेहे. 8 पोन जिबीही कोडोज माहुंउं ताबाम नाहां कोइत सेको. ए एक एहेलिही वस्तु होय, जे जास् खाराब आन नाहां रुकता आवती, तियीम जिवलेणीइ जेहर पोअल्यो होय.