တမန်တော် 19

ပေါလုဟ ဧဖက်မြို့ဟို ရောက်ဆိခြင်း

1 အာပေါလုဟ ကောရိန့်မြို့ဟို ရောက်နေစဉ်၊ ပေါလုဟ အထက် ဒေသတဆှောက်ဟို ဖြတ်သွားပင်းမှ ဧဖက်မြို့ဟို ရောက်အယ်။ တဘဲ့တော် တချို့လို့ဟို အေးမှာ တွေ့သဖြင့်၊ 2 သူလို့အား "နင်လို့ ယုံကြည်သူ ဖြစ်လာကြသောအခါ သန့်ဆှင်းသော ဝိညာဉ်တော်ဟို ရဆိကြသလော" ဟု မေးအယ်။

သူလို့ဟ "သန့်ဆှင်းသော ဝိညာဉ်တော် ဆိကျောန်းဟို ငါလို့ မကြားဖူးပါ" လို့ ပြန်ဖြေကြအယ်။

3 ပေါလုဟ "အေးနောက် ကောင်းပီ၊ နင်လို့ စလို နှစ်ခြင်းမျိုးဟို ခံခဲ့လုန်း" လို့ မေးအယ်။

သူလို့ဟ "ယောဟန်ရဲ့ နှစ်ခြင်း ဖြစ်အယ်" လို့ ပြန်ဖြေအယ်။

4 ✝ ၁၉.၄ မ ၃.၁၁; မာ ၁.၄,၇,၈; လု ၃.၄,၁၆; ယော ၁.၂၆,၂၇ ပေါလုဟ "ယောဟန်ရဲ့ နှစ်ခြင်းသည် အပစ်များမှ နောင်တရ သူလို့အဖို့ ဖြစ်ပင်း၊ သူဟ မိမိနောက်မှလာမဲ့ သူဟို ယုံကြည်ရမယ်လို့ ဣသရေလူမျိုးလို့အား ပြောခဲ့အယ်။ အေးသူဟ ယေရှု ဖြစ်အယ်" ဟု ဆိုအယ်။

5 သူလို့ဟ အေးအရာဟို ကြားသောအခါ၊ သူလို့ဟ သခင် ယေရှုရဲ့ နာမနှိုက် နှစ်ခြင်း ခံကြအယ်။ 6 ပေါလုဟ သူလို့ရဲ့ ခေါင်းပေါ်မှာ လက်ဟို တင်ရင် သန့်ဆှင်းသော ဝိညာဉ်တော်ဟ သူလို့အပေါ်မှာ ဆင်းသက်လာသဖြင့်၊ သူလို့ဟ အခြားသော ဘာသာစကားဟို ပြောယွေ့ ပရောဖက်ပြုကြအယ်။ 7 သူလို့အားလုံးမှာ လူယောက်ျား ဆယ့်နေယောက်လောက် ဆိအယ်။

8 ပေါလုဟ တရားဇရပ်ဟို ဝင်ပင်း သုံးလလုံးလုံး အချေအတင် ဆွေးနွေးကာ ဘုရားသခင်ရဲ့ နိုင်ငံတော် အကျောန်းများဟို ဖြားယောင်းယွေ့ ရဲရင့်စွာ ဟောပြောလေအယ်။ 9 အဲလိုလဲ အချို့လို့ဟ ခိုင်မာသော သဘောဆိယွေ့ မယုံဘဲ နေသဖြင့်၊ လူအပေါင်းလို့ဆေ့တွင် ဘုရားသခင်ရဲ့ လမ်းစဉ်အကျောန်း မကောင်းသော စကားဟို ပြောကြအယ်။ အေးကျောန့် ပေါလုဟ တဘဲ့တော်လို့ဟို ခေါ်ယွေ့ သူလို့ဆေမှ ထွက်သွားပင်း တုရန္နုရဲ့ စာသင်ခန်းမဆောင်တွင် နေ့တိုင်း*၁၉.၉ တချို့ လက်ရေးမူကျမ်းများတွင် မနက် တဆယ့်တနာရီမှ ညနေ လေးနာရီအထိ၊ ဟို ပေါင်းထည့်ထားအယ်။ ဆွေးနွေး ပြောဆိုလေအယ်။ 10 အေးလို့ နေနှစ်တိုင်တိုင် အေးလို့ပြုကြရာ အာရှပြေတွင် နေထိန်သော ယုဒလူမျိုးများနဲ့ လူမျိုးခြားများ အပေါင်းလို့ဟ ဘုရားသခင်ရဲ့ စကားတော်ဟို ကြားနာရကြအယ်။

သကေဝရဲ့ သားများ

11 ဘုရားသခင်ဟ ပေါလုအားဖြင့် ထူးခြားသော နိမိတ်လက္ခဏာများ ပြုလုပ်ခဲ့အယ်။ 12 သူသုံးသော ပဝါနဲ့ ခါးစည်း တခုခုဟို ဖျားနာသူများနဲ့ နတ်ပူးသူများဆေဟို ယူသွားသဖြင့်၊ သူလို့ဟ ရောဂါပျောက်ကင်းယွေ့၊ နတ်ဆိုးများဟ သူလို့ဆေမှ ထွက်သွားကြအယ်။ 13 နေရာတကာ သွားလာနေလဲ့ ယုဒအမျိုးသား ပယောဂဆရာအချို့လို့ဟ နတ်ဆိုးများဟို သခင် ယေရှုရဲ့ နာမအားဖြင့် မောင်းထုတ်ရန် ကြိုးစားကြအယ်။ သူလို့ဟ နတ်ဆိုးလို့အား "ပေါလု ဟောပြောသော ယေရှုရဲ့ နာမအားဖြင့် အမိန့်ပေးအယ်" လို့ ပြောအယ်။ 14 သကေဝ နာမယ်ဆိသော ယုဒ ယဇ်ပုရောဟိတ်မင်းရဲ့ သား ခုနေယောက်လို့ဟ အေးအရာဟို ပြုကြအယ်။

15 အဲလိုလဲ နတ်ဆိုးဟ သူလို့အား "ငါဟ ယေရှုဟို သိအယ် ပင်းတော့ ပေါလု အကျောန်းဟိုလည်း သိသော်လည်း နင်လို့ဟ စသူလုန်း" ဟု ပြောလေအယ်။

16 အေးနောက် နတ်ဆိုးဝင်ပူးနေသူဟ သူလို့အပေါ်ဟို ခုန်တက်ကာ သူလို့အားလုံးဟို နှိမ်နှင်းယွေ့ အနိန်ယူသောကျောန့် သူလို့ဟ အေးနေအိုင်မှ အဝတ်မပါဘဲ ဒဏ်ရာများနဲ့ ထွက်ပြေးရကြအယ်။ 17 အေးအကျောန်းဟို ဧဖက်မြို့တွင် နေထိန်ကြသော ယုဒအမျိုးသားနဲ့ လူမျိုးခြားများလို့ဟ ကြားကြသောအခါ၊ သူလို့အားလုံးဟ ကြောက်ရွံ့ခြင်းနဲ့ ပြေ့ပင်း သခင် ယေရှုရဲ့ နာမတော်ဟို ချီးမွန်းကြကုန်အယ်။ 18 ယုံကြည်သူအများလို့ဟ လာပင်း လူသိဆှင်ကြား မိမိလို့ လုပ်ခဲ့သောအရာများဟို ဖော်ထုတ်ပြခဲ့အယ်။ 19 မှော်အတတ်ဟို ကျင့်သောသူများစွာလို့ဟ မိမိလို့ရဲ့ စာလိပ်များဟို ယူခဲ့ယွေ့ လူအပေါင်းလို့ဆေ့မှာ မီးရှို့ကြအယ်။ အေးစာလိပ်များရဲ့ တန်ဖိုးဟို တွက်ချက်ကျေ့သောအခါ ငွေဒင်္ဂါး*၁၉.၁၉ ငွေဒင်္ဂါး၊ ငွေဒင်္ဂါးတပြားဟ အလုပ်သမားများရဲ့ နေ့စဉ်လုပ်အားခနဲ့ ညီအယ် (ရှု မ ၂၀.၂)။ , မျှ ဆိကျောန်း တွေ့ဆိကြအယ်။ 20 ဟေလို တန်ခိုးတော်နဲ့ ပြေ့သောအားဖြင့် ဘုရားသခင်ရဲ့ စကားတော်များဟာ*၁၉.၂၀ ဟေလို … ဘုရားသခင်ရဲ့ စကားတော်များဟာ၊ အဲဟာမဟုတ်ရင် အဲလိုမို့ ဘုရားသခင်ရဲ့ တန်ခိုးတော်အားဖြင့် စကားများဟ။ ဆက်လက်ပင်း ပိုယွေ့ တိုးပွားလာခဲ့အယ်။

ဧဖက်မြို့တွင် ရုန်းရင်းဆန်ခတ်ဖြစ်ခြင်း

21 အေးအရာများ ဖြစ်ပျက်ပင်းနောက် မာကေဒေါနိပြေနဲ့ အခါယပြေမှတဆင့် ယေရုရှလင်မြို့ဟို သွားရန် ပေါလုဟ စိတ်ဆုံးဖြတ်အယ်။*၁၉.၂၁ ပေါလုဟ စိတ်ဆုံးဖြတ်အယ်၊ အဲဟာမဟုတ်ရင် ပေါလုဟ ဝိညာဉ်ရဲ့ ယိုးမှုဖြင့် ဆုံးဖြတ်အယ်။ သူဟ "အေးနေရာဟို ငါသွားပင်းနောက် ရောမမြို့ဟိုလည်း သွားရမယ်" ဟု ပြောအယ်။ 22 သူ့ဟို ကူညီပေးလဲ့ နေယောက်ဖြစ်သော တိမောသေနဲ့ ဧရတ္တုလို့ဟို မာကေဒေါနိပြေဟို စေလွှတ်ပင်းမှ သူဟ အာရှပြေတွင် ကာလအချိန် အနည်းငယ်နေအယ်။

23 အေးအချိန်နှိုက် ဘုရားသခင်ရဲ့ လမ်းစဉ်အတွက်ကျောန့် ဧဖက်မြို့တွင် ဆူပူလှုပ်ဆှားမှုကြီး ဖြစ်ပေါ်လာအယ်။ 24 ဒေမေတရိ နာမယ်ဆိသော ငွေပန်းထိမ်ဆရာဟ အာတေမိနတ်သမီးရဲ့ ငွေဗိမာန်ငယ်လို့ဟို လုပ်ခြင်းအားဖြင့် လက်မှုပညာသည်များစွာ ငွေဝင်လမ်း ဖြောင့်စေခဲ့အယ်။ 25 အေးသူဟ ပန်းထိန်သမားများနဲ့ တခြားလုပ်ငန်းဆိုင်ရာ အလုပ်သမားများဟို စည်းရုံးစေပင်း "ငါ့ မိတ်ဆွေလို့၊ ဟေလုပ်ငန်းဖြင့် ငါလို့ အကျိုးစီးပွားဖြစ်တာဟို နင်လို့ သိကြအယ်။ 26 အခုတွင် ပေါလုဆိုသူဟ ဧဖက်မြို့တွင် သာမက အာရှပြေတခုလုံးလိုလိုနှိုက်ပင် လူ့လက်ဖြင့် ပြုလုပ်လဲ့ ဘုရားများဟ ဘုရားလုံးဝ မဟုတ်ဟု ဆိုယွေ့ လူအပေါင်းလို့ဟို ဖြားယောင်းသွေးဆောင်တာဟို နင်လို့ မျော်လျက် ကြားလျက် ဆိကြအယ်။ 27 အေးလို့ဆိုရင် ငါလို့ရဲ့ လုပ်ငန်းဟလည်း နာမယ်ပျက်စေမယ့် အန္တရာယ်ဆိအယ်။ အဲအရာသာမက ကြီးမြတ်သော နတ်ဘုရားမ အာတေမိရဲ့ ဗိမာန်တော်ဟ ပစာအရာမှ အဓိပ္ပာယ်ဆိတော့မှာ မဟုတ်ဘဲ အာရှပြေနဲ့ ကမ္ဘာတဝန်းလုံးဆိ လူတိုင်းကိုးကွယ်သော နတ်ဘုရားမရဲ့ ကြီးမြတ်မှုဟို ဖျက်ဆီးခံရလိမ့်မယ်" ဟု ပြောဆိုလေအယ်။

28 လူအုပ်ကြီးဟ အေးစကားများဟို ကြားရင် သူလို့ဟ ရမ်းဆာ့ အူထော့ပင်း "ဧဖက်မြို့ရဲ့ အာတေမိ နတ်သမီးဟ ကြီးမြတ်ပေအယ်" ဟု စတင် အော်ဟစ်ကြအယ်။ 29 တမြို့လုံး ရုန်းရင်း ဆန်ခတ် ဖြစ်လေအယ်။ ပေါလုရဲ့ ခရီးသွားဖော်များဖြစ်လဲ့ မာကေဒေါနိပြေသား ဂါယုနဲ့ အာရိတ္တာခုလို့ဟို ဖမ်းဆီးယွေ့ ပြဇာတ်ရုံကြီးဟို တဟုန်ထိုး ပြေးဝင်သွားကြအယ်။ 30 ပေါလုဟ သူ့တတ်တိုင်း လူအုပ်ကြီးလို့ ဆိရာဟို သွားဖို့ အလိုဆိအယ် အဲလိုလဲ တဘဲ့တော်များဟ သူ့ဟို သွားဖို့ ခွင့်မပြုဝူး။ 31 သူရဲ့ မိတ်ဆွေများဖြစ်သော ပြေနယ် အာဏာဆိအချို့လို့ဟလည်း ပြဇာတ်ရုံထဲဟို မဝင်ရန် တောင်းပန်စာ တစောင် ပို့လိုက်အယ်။ 32 အေးအတောအတွင်း အစည်းအဝေး တခုလုံးဟ ရုန်းရင်းဆန်ခတ် ဖြစ်ခဲ့ပင်း၊ လူအချို့လို့ဟ အရာတခုတည်းအတွက် အော်ဟစ်ကြကာ တခြားသူများဟလည်း တခြားဟာ တခုခုအတွက် အော်ဟစ်ခဲ့ကြအယ်။ ပစာကို့ သူလို့ထဲဟ လူအများစုဟာ သူလို့ ပစာကျောန့် အတူတကွ လာရတာဆိုတာတောင် မသိကြ။ 33 ယုဒအမျိုးသားလို့ဟ အာလေဇန္ဒြုဟို လူများဆေ့ဟို သွားစေသဖြင့် လူထုအထဲမှ လူအချို့လို့ဟ အေးသူဟ ဖြစ်ပေါ်လျက်ဆိသည့် အရေးအခင်းနဲ့ ပတ်သက်သူဖြစ်မယ်ဟု ယူဆကြအယ်။ အဲပင်းရင် အာလေဇန္ဒြုဟ လူများအား တိတ်ရန် လက်ရိပ်ပြအယ်၊ ချေပပြောဆိုရန် ကြိုးစားအယ်။ 34 အဲလိုလဲ သူဟ ယုဒလူမျိုးဖြစ်တာဟို သူလို့ သတိထားမိကြသောအခါ "ဧဖက်မြို့သားလို့ရဲ့ အာတေမိဟ ကြီးမြတ်အယ်" ဟု သူလို့ဟ နေနာရီကြအောန် အတူအတွ အရာတခုတည်း သံပြိုင်အော်ကြအယ်။

35 နောက်ဆုံးနှိုက် မြို့စာရေးဟ လူအုပ်ကြီးလို့အား ငြိမ်သက်အောန် လုပ်နိန်ခဲ့အယ်။ "ဧဖက်မြို့သားလို့၊ ဧဖက်မြို့ဟ ကြီးမြတ်လဲ့ အာတေမိရဲ့ ဗိမာန်တော်နဲ့ ခေါန်းခင်ဘုံမှ ကျလာလဲ့ ရုပ်တုတည်ဆိရာ ဌာနဖြစ်ကျောန်းဟို အယောက်ဆီတိုင်း သိကြအယ်။ 36 အေးအရာများဟို စသူမှ မငြင်းဆိုနိန်။ သို့ဖြစ်ယွေ့ နင်လို့ဟ ပစာအမှုဟိုမှ မဆင်မခြင် မလုပ်ဘဲ တိတ်ဆိတ်စွာ နေသင့်အယ်။ 37 နင်လို့ဟ ဟေနေရာဟို ခေါ်ဆောင်ခဲ့ကြသော ဟေသူလို့ဟ ဗိမာန်တော်ထဲ ဝင်ယွေ့ လုယက်သောသူ မဟုတ်။ ငါလို့ရဲ့ ဘုရားများဟို မကောင်းသော စကားဟို ပြောသောသူလည်း မဟုတ်။ 38 ဒေမေတရိနဲ့ သူရဲ့အလုပ်သမားများဟ တစုံတယောက်ဟို တရားစွဲဆိုချင်ရင် တရားရုံး ဖွင့်ရက်များနဲ့ အာဏာပိုင်များဆိသဖြင့် ရုံးတော်တွင် တရားစွဲဆို နိန်အယ်။ 39 အဲလိုလဲ နင်လို့ဟ လိုချင်လဲ့အရာ တခုခုဆိရင် အေးစာဟို နိုင်ငံသားတွေရဲ့ တရားဝင် အစည်းအဝေးမှာ စီရင်ဆုံးဖြတ်ရမယ်။ 40 ခုနေ့ ဖြစ်ပျက်ပင်းတဲ့အခါ ငါလို့ဟို အထိကရုဏ်းအဖြစ် စွပ်စွဲခံရမှာဟို စိုးရိမ်စရာ ဆိအယ်။ အေးဆူပူအုံကြွမှုတွေအတွက် အကျောန်းပြချက် ဆိဝူး၊ အေးကျောန့် ငါလို့အတွက် အကျောန်းပြချက်ကောင်း မပေးနိန်ခဲ့ဘူး။" 41 အေးအရာများဟို ပြောပင်းနောက် သူဟ အစည်းအဝေးဟို ဖျက်လေအယ်။