တမန်တော် 21

ပေါလုဟ ယေရုရှလင်မြို့ဟို သွားရောက်ခြင်း

1 ငါလို့ဟ အေးသူလို့ဟို နှုတ်ဆက် ထွက်ခွာပင်းနောက် တန်းတန်း ရွက်လွင့်ယွေ့ ကောသကျွန်းဟို ငါလို့ သွားကြအယ်။ နောက်တနေ့နှိုက် ရောဒုကျွန်းဟို ရောက်ယွေ့၊ အေးကျွန်းမှ ပါတရမြို့ဟို ငါလို့ သွားကြအယ်။ 2 ဖိနိတ်ပြေဟို သွားမဲ့ သင်္ဘောတစီးဟို မျော်သဖြင့် အေးသင်္ဘောပေါ်ဟို တက်ယွေ့ ခရီးပြုကြအယ်။ 3 ငါလို့ဟ ကုပရုကျွန်းဟို မျော်ရသောအခါ အေးကျွန်းရဲ့ တောင်ဖက်မှ သွားပင်း ရှုရိပြေဟို ရွက်လွင့်ကြအယ်။ တုရုမြို့တွင် ကုန်ပစ္စည်းများဟို ချရမယ် ဖြစ်ယွေ့ အေးမြို့တွင် သင်္ဘောဟို ဆိုက်ကပ်ကြအယ်။ 4 အေးမှာ တဘဲ့တော်အချို့လို့နဲ့ တွေ့ပင်း သူလို့နဲ့အတူ တပတ်လောက် နေကြအယ်။ ဝိညာဉ်တော်ရဲ့ တန်ခိုးအားဖြင့် သူလို့ဟ ပေါလုဟို ယေရုရှလင်မြို့ဟို မသွားရန် ပြောကြအယ်။ 5 အဲလိုလဲ သူလို့နဲ့အတူ ငါလို့ရဲ့အချိန်များ ကုန်လွန်သောအခါ၊ ငါလို့ဟ ထွက်သွားပင်း ခရီးဆက်သွားခဲ့အယ်။ သူလို့အားလုံးလို့ဟ မိမိလို့ရဲ့ ပေါင်အိုမများ၊ လူပဲ့ငယ်များနဲ့အတူ မြို့ပြင် ပင်လယ်ကမ်းဟို ရောက်အောန် လိုက်ပို့ကြအယ်။ ငါလို့ဟ ပင်လယ်ကမ်းခြေမှာ ဒူးထောက်ယွေ့ ဆုတောင်းကြအယ်။ 6 အေးနောက် တယောက်နဲ့တယောက် နှုတ်ဆက်ပင်း၊ ငါလို့ဟ သင်္ဘောပေါ်ဟို တက်ယွေ့ သူလို့ဟ မိမိလို့နေအိုင်ဟို ပြန်ကြအယ်။

7 တုရုမြို့မှ ဆက်ယွေ့ ငါလို့ဟ ပတောလင်မြို့ဟို ရောက်ကြအယ်။ အေးမြို့တွင် ယုံကြည်သူလို့ဟို နှုတ်ဆက်ပင်းနောက် သူလို့ဆေမှာ တရက်နေအယ်။ 8 ✝၂၁.၈ တ ၆.၅; ၈.၅နောက်တနေ့နှိုက် ထွက်သွားယွေ့ ကဲသရိမြို့ဟို ရောက်ကြအယ်။ အေးမှာ ဧဝံဂေလိ တရားဟောဆရာ ဖိလိပ္ပုရဲ့ နေအိုင်တွင် ငါလို့ တည်းခိုကြအယ်။ သူဟ တဘဲ့တော်များဟို ကူညီရန် ယေရုရှလင်မြို့ အသင်းတော်ဟ ရွေးချယ်သော လူခုနေယောက်လို့တွင် တဦးဖြစ်အယ်။ 9 သူ့မှာ ဘုရားသခင်ရဲ့ တရားတော်ဟို ဟောပြော ကြေညာသူများ အိမ်ထောင်မကျသေးသော သမီးလေးယောက် ဆိအယ်။ 10 ✝၂၁.၁၀ တ ၁၁.၂၈အေးနေအိုင်တွင် ငါလို့ တည်းခိုယွေ့ ရက်အတော် အတန်ကြာသောအခါ အာဂဗု နာမယ်ဆိသော ပရောဖက်ဟ ယုဒပြေမှ ရောက်ဆိလာအယ်။ 11 သူဟ ငါလို့ဆေဟို လာယွေ့ ပေါလုရဲ့ ခါးကြိုးဟို ယူပင်းရင် မိမိရဲ့ ခြေနဲ့လက်လို့ဟို တုတ်ချေပင်းနောက် "ဟေ ခါးကြိုးပိုင်ဆှင်အား ယုဒလူများလို့ဟ ယေရုရှလင်မြို့တွင် ဟေလို့ တုတ်ချေယွေ့ လူမျိုးခြားလို့ရဲ့ လက်ဟို အပ်နှံကြလိမ့်မယ်လို့ သန့်ဆှင်းသော ဝိညာဉ်တော် မိန့်အယ်" ဟု ပြောလေအယ်။

12 အေးအရာဟို ငါလို့ ကြားသောအခါ ငါလို့နဲ့ အေးမှာ ဆိသောသူလို့ဟ ယေရုရှလင်မြို့ဟို မသွားရန် ပေါလုအား တောင်းပန်ကြအယ်။ 13 အဲလိုလဲ ပေါလုဟ "ပစာကျောန့် ဟေလို့ ငိုကကာ စိတ်နေလုံး ကြေကွဲနေကြလုန်း၊ ငါဟ သခင် ယေရှုနာမအားဖြင့် ယေရုရှလင်မြို့တွင် တုတ်ချေခံရန် သာမက အေးမှာ အသေခံရန်ပင် အသင့်ဆိပါအယ်" လို့ ပြန်ဖြေအယ်။

14 ငါလို့ဟ သူဟို ဖျောင်းဖျယွေ့ မရသောကျောန့် "သခင်ဘုရားရဲ့ အလိုအတိုင်း ဖြစ်ပါစေ" ဟု ဆိုကာ လက်လျော့လိုက်ကြအယ်။

15 အေးမှာ ရက်အနည်းငယ် ကြာပင်းနောက် ငါလို့ ပစ္စည်းများဟို ထုတ်ပိုးပင်း ယေရုရှလင်မြို့ဟို တက်သွားကြအယ်။ 16 ကဲသရိမြို့မှ တဘဲ့တော် တချို့လို့ဟ ငါလို့နဲ့အတူ လိုက်ခဲ့ပင်းရင် ငါလို့အား ကုပရုကျွန်းသား အစောပိုင်းဟ ယုံကြည်သူဖြစ်သူ မနာသုန်ရဲ့ နေအိုင်မှာ တည်းခိုရန် ခေါ်သွားကြအယ်။*၂၁.၁၆ ငါလို့အား ကုပရုကျွန်းသား အစောပိုင်းဟ ယုံကြည်သူဖြစ်သူ မနာသုန်ရဲ့ နေအိုင်မှာ တည်းခိုရန် ခေါ်သွားကြအယ်၊ အဲဟာမဟုတ်ရင် ငါလို့ နေမဲ့နေအိုင်ဟို သူလို့နဲ့အတူ ခေါ်လာခဲ့အယ်။

ပေါလု ယာကုပ်ဆေ သွားလည်ခြင်း

17 ငါလို့ ယေရုရှလင်မြို့ဟို ရောက်သောအခါ ယုံကြည်သူလို့ဟ ငါလို့အား နွေးထွေးစွာ ကြိုဆိုကြအယ်။ 18 နောက်တနေ့မှာ ပေါလုဟ ငါလို့နဲ့အတူ ယာကုပ်ဆေဟို သွားရောက် တွေ့ဆုံရင်၊ အသင်းတော်ရဲ့ လူကြီးများ အားလုံးဟလည်း သူဆေမှာ ရောက်ဆိနေကြအယ်။ 19 ပေါလုဟ သူလို့ဟို နှုတ်ဆက်ပင်း မိမိရဲ့အလုပ်အားဖြင့် လူမျိုးခြားလို့အား ဘုရားသခင် ပြုခဲ့သောအမှုအရာ အားလုံးလို့ဟို ပြေ့စုံစွာ တင်ပြလေအယ်။ 20 သူဆေဟ ကြားရပင်းနောက် သူလို့အားလုံးဟ ဘုရားဟို ချီးမွန်းကြအယ်။ အေးနောက် သူလို့ဟ "ညီအကို ပေါလု၊ ယုဒလူ ထောင်ပေါင်းများစွာဟ ယုံကြည်သူများ ဖြစ်လာကျောန်းနဲ့ သူလို့အားလုံး ပညတ်တရားဟို စိတ်အားထက်သန်သူများ ဖြစ်ကျောန်းဟို နင်လို့ မျော်နိန်အယ်။ 21 နင်ဟ လူမျိုးခြားလို့ထဲတွင် နေထိန်ကြသော ယုဒအမျိုးသားလို့အား နင်လို့ရဲ့ လူပဲ့သငယ်များဟို အရေဖျားလှီးခြင်း မပေးကြနဲ့ အဲဟာမဟုတ်ရင် ယုဒ စလေ့အတိုင်းဟို မလိုက်နာကြရန် ပြောလျက် မောရှေရဲ့ ပညတ်တရားဟို စွန့်စေရန် သင်ကြားလျက် ဆိကျောန်းဟို သူလို့ ကြားသိကြအယ်။ 22 သို့ဖြစ်ယွေ့ ငါလို့ စလို လုပ်ရမလုန်း။ နင်လို့ရောက်နေကျောန်းဟို သူလို့ဟ ကြားရမှာ သေချာပါအယ်။ 23 အေးအရာဟ ငါလို့ နင့်ဟို လုပ်စေချင်လဲ့အတိုင်း လုပ်လော့။ အေးမှာ သစ္စာကတိဟို ပြုထားသော လူလေးယောက် ဆိအယ်။ 24 အေးသူလို့ဟို ခေါ်သွားပင်း သူလို့နဲ့အတူ သန့်ဆှင်းခြင်းဟို ခံယူလျက် သူလို့ခေါင်းဟို ကတုံးရိတ်ရန်*၂၁.၂၄ သူလို့ခေါင်းဟို ကတုံးရိတ်ရန် ရှု ၁၈.၁၈။ သူလို့အတွက် စရိတ်ခံပေးပါလော့။ အေးလို့ပြုရင် နင်လို့နဲ့ ပတ်သက်ယွေ့ သူလို့ ကြားသိထားသော သတင်းဟ ကစတ်ကလတ်ဘဲ နင်လို့တတ်တိုင်း ပညတ်တရားဟို စောင့်ထိန်းလျက် လိုက်ဆှောက်ကျောန်း သူလို့အားလုံး သိကြလိမ့်မယ်။ 25 ✝၂၁.၂၅ တ ၁၅.၂၉ယုံကြည်သူများ ဖြစ်လာသော လူမျိုးခြားလို့အတွက်မှာ ရုပ်တုများဟို ပူဇော်လဲ့ အစားအစာ၊ အသွေး၊ လည်ပင်း ညှစ်ယွေ့ သတ်ထားသော အကောင်ဟို မစားရန်နဲ့ ကာမဂုဏ်လိုက်စားမှုဟို ဆှောင်ကြဉ်ရန် ငါလို့ စီရင်ဆုံးဖြတ်ယွေ့ သူလို့ဆေဟို စာရေး အကျောန်းကြားပင်းပါပီ" ဟု ဆိုကြအယ်။

26 အေးကျောန့် ပေါလုဟ နောက်တနေ့နှိုက် အေးလူလို့ဟို ခေါ်ပင်းရင် သူလို့နဲ့အတူ သန့်စင်ခြင်းဟို ပြုကြအယ်။ အေးနောက်သူဟ ဗိမာန်တော်ဟို သွားယွေ့ သန့်စင်ခြင်းဟို ပြုပင်း ပီးဆုံးမဲ့အချိန်နဲ့ မိမိလို့တဦးစီအတွက် ပူဇော်သကာ ဆက်သရမဲ့အချိန်လို့ဟို ကြိုတင် အကျောန်းကြား ထားလေအယ်။

ပေါလုဟ ဗိမာန်တော်တွင် အဖမ်းခံရခြင်း

27 ခုနေရက်စေ့ခါနီးသောအခါ အာရှပြေမှ လာသော ယုဒလူအချို့လို့ဟ ပေါလုဟို ဗိမာန်တော်တွင် မျော်ကြအယ်။ သူလို့ဟ လူအုပ်လို့အား ရုန်းရင်းဆန်ခတ် ဖြစ်စေပင်း ပေါလုဟို ဖမ်းဆီးကြအယ်။ 28 သူလို့ဟ "ဣသရေလလူများ ကူညီကြပါ၊ ဟေလူဟ နေရာတကာသွားပင်း ဣသရေလလူများဟို လည်းကောင်း၊ ဟေဗိမာန်တော်မှာ မောရှေရဲ့ ပညတ်တရားဟို လည်းကောင်း ဆန့်ကျင်ပင်း လူအားလုံးလို့ဟို သင်ကြားပေးသူ ဖြစ်အယ်။ အေးစာတင် မကဝူး အခုသူဟ လူမျိုးခြားလို့ဟို ဗိမာန်တော်ထဲဟို ခေါ်လာပင်း ဟေသန့်ဆှင်းလဲ့နေရာဟို စုတ်ပဲ့စေပီ" လို့ အော်ပြောကြအယ်။ 29 ✝၂၁.၂၉ တ ၂၀.၄ပစာကို့ သူလို့ဟ ပေါလုဟို ဧဖက်မြို့သား တရောဖိမ်ဆိုသူနဲ့အတူ မြို့ထဲတွင် မျော်ခဲ့ယွေ့ ဗိမာန်တော်ထဲဟို ပေါလု ခေါ်ခဲ့တာလို့ ထင်သောကျောန့် ဖြစ်အယ်။

30 တမြို့လုံးဟ ရုန်းရင်းဆန်ခတ် ဖြစ်ယွေ့ လူလို့ဟ ပြေးယွေ့ လာပင်း ပေါလုဟို ဖမ်းဆီးကာ ဗိမာန်တော် အပြင်ဟို ဆွဲထုတ်သွားကြအယ်။ တခါတည်း ဗိမာန်တော်ရဲ့ ထင်ခါးများဟို ပိတ်လိုက်ကြအယ်။ 31 သူလို့ဟ ပေါလုဟို သတ်ဖို့ ကြိုးစားနေခါ ယေရုရှလင်မြို့ တမြို့လုံး ရုန်းရင်းဆန်ခတ် ဖြစ်နေအယ်ဟူသော သတင်းဟ ရောမတပ်မှူးဆေ ရောက်လေအယ်။ 32 သူဟ ခုတင်ချင်း တပ်သားများနဲ့ တပ်မှူးများဟို အမြန်ခေါ်ယွေ့ လူအုပ်ကြီးဆိရာဟို ဆင်းလာအယ်။ လူလို့ဟ တပ်သားများနဲ့ တပ်မှူးဟို မျော်သောအခါ ပေါလုဟို ရိုက်ခြင်းမှ ရပ်ကြအယ်။ 33 အေးအခါ တပ်မှူးဟ ပေါလုဆေဟို သွားပင်း သူ့ဟို ဖမ်းဆီးကာ သံကြိုးနေချောင်းနဲ့ တုတ်ချေရန် အမိန့်ပေးအယ်။ အေးနောက် သူဟ "အေးသူဟ စသူလုန်း၊ သူဟ ပစာအမှုဟို လုပ်လုန်း" ဟု မေးအယ်။ 34 လူအုပ်အချို့လို့ဟ တယောက်တမျိုးစီ အော်ကြအယ်။ အေးလို့ နောန်းနင်းခတ်သံများကျောန့် တပ်မှူးဟ ပစာဖြစ်တာဟို အတိအကျ မသိနိန်သဖြင့် ပေါလုဟို ရဲတိုက်ထဲဟို ခေါ်သွားစေရန် အမိန့်ပေးလေအယ်။ 35 ပေါလုဟ လှေခါးဟို ရောက်သောအခါ လူလို့ဟ အကြမ်းဖက်မှု ပြင်းထန်လာသဖြင့် စစ်သားများဟ သူဟို မချီသွားရအယ်။ 36 ရမ်းဆာ့သော လူလို့ဟ နောက်မှလိုက်လာယွေ့ "သူ့ဟို သတ်ပါ" ဟု အော်ပင်း လိုက်ကြအယ်။

ပေါလုဟ သူ့ဟိုသူ ခုခံပြောဆိုခြင်း

37 ပေါလုဟ သူ့အား ရဲတိုက်ထဲဟို ခေါ်သွားမယ် လုပ်သောအခါ သူဟ တပ်မှူးဟို "ငါ နင့်ဟို တခု ပြောပါရစေ" ဟု ဆိုအယ်။

"နင် ဟေလသစကားဟို ပြောတတ်သလော" ဟု တပ်မှူးဟ မေးအယ်။ 38 "မကြာခင်အခါဟ ပုန်ကန်ယွေ့ သူပုန် ၄,၀၀၀ ဟို ယိုးယွေ့ တောကန္တာရဟို ခေါ်သွားသော အဲဂုတ္တုအမျိုးသားပင် မဟုတ်လော" ဟု မေးအယ်။

39 ပေါလုဟ "ငါဟ ယုဒလူ ဖြစ်အယ်၊ ကိလိကိပြေရဲ့ မြို့တော်ဖြစ်သော တာရှုမြို့နှိုက် မွေးဖွားခဲ့သူ ဖြစ်အယ်။ ကျေးဇူးပြုပင်း ငါ့လူများနဲ့ စကားပြောခွင့်ပေးပါ" ဟု ဆိုအယ်။

40 တပ်မှူးဟ သူ့ဟို အခွင့်ပေးသဖြင့် ပေါလုဟ လှေခါးထစ်ပေါ်တွင် ရပ်ယွေ့ လူလို့အား တိတ်ဆိတ်ရန် လက်ရိပ်ပြအယ်။ သူလို့ တိတ်ဆိတ်နေကြသောအခါ ပေါလုဟ ဟေဗြဲစကားနဲ့ ပြောလျက်၊