လုကာ 16

သူဌေးနဲ့ လာဇရု

19 "တခါဟ သူဌေးတဦးဟ ဆေးအလွန်ကြီးသော ပိတ်ချောထည်များဟို ဝတ်ပင်း နေ့တိုင်း ဇိမ်ခံပင်း နေထိန်အယ်။ 20 သူဌေးအိုင်ရဲ့ ထင်ခါးပေါက်တွင် လာဇရု နာမယ်ဆိသော ဆင်းရဲသားတယောက်ဟ အနာစိမ်းများပေါက်ယွေ့ တုံးလုံးလဲနေအယ်။ 21 သူဟ သူဌေးရဲ့ စားပွဲမှကျသော စားကြွင်းစားကျန်များဟို စားချင်ယွေ့ စောင့်မျော်နေတတ်အယ်။ ခွေးလို့ဟ လာယွေ့ သူရဲ့ အနာစိမ်းများဟို ယက်ကြအယ်။ 22 အေးဆင်းရဲသား သေဆုံးသွားသောအခါ ခေါန်းခင်တမန်လို့ဟ သူ့အား အာဗြဟံရဲ့ နဘေးတွင် ထိန်စေရန် သယ်ဆောင်သွားကြအယ်။ သူဌေးဟလည်း သေလွန်ယွေ့ သင်္ဂြိုဟ်ခြင်းဟို ခံရအယ်၊ 23 မရဏာနိုင်ငံတွင် နာကျင်မှုဝေဒနာဟို ရမ်းဆာ့ခံရသဖြင့် မျော်ကျေ့လိုက်သောအခါ အာဗြဟံနဲ့အတူ သူ့ရဲ့ နဘေးတွင် လာဇရုဟို မျော်အယ်။*၁၆.၂၃ မရဏာနိုင်ငံ၊ သေလွန်သူများရဲ့ ကမ္ဘာ။ 24 သူဌေးဟ ခေါ်ယွေ့ ‘တို့ဖ အာဗြဟံ၊ ငါ့ဟို သနားပါအုံး။ ငါဟ ဟေမီးလျှံထဲတွင် ရမ်းဆာ့ ဝေဒနာခံစားရသောကျောန့်၊ လာဇရုဟ သူ့လက်ဖျားဟို ယေထဲနစ်ပင်း ငါ့လျှာဟို အေးစေဖို့ သူ့ဟို ငါ့ဆေဟို စေလွှတ်ပေးပါ’ ဟု အော်ယွေ့ ပြောလေအယ်။ 25 အဲလိုလဲ အာဗြဟံဟ ‘ငါ့သား၊ နင်ဟ အသက်ဆှင်တုန်းခါဟ ကောင်းသောအရာများဟို ရဆိခဲ့ယွေ့ လာဇရုဟ မကောင်းသောအရာများဟို ရဆိခဲ့ကျောန်း သတိရလော့။ အဲလိုလဲ အခုမှာ သူဟ စိတ်သက်သာဟို ခံစားရယွေ့ နင်ဟ ရမ်းဆာ့ဝေဒနာဟို ခံစားနေရအယ်။ 26 အဲပင်းရင် နင်နဲ့ ငါလို့စပ်ကြားတွင် ရမ်းဆာ့ နက်သောချောက်ကြီး တည်ဆိနေအယ်။ အေးလိုမို့ ဟေအရပ်မှ နင်လို့ဆိရာသို့ ကူးချင်သောသူ မကူးနိန်၊ နင်လို့ဆိရာအရပ်မှ အဲအရပ်ဟို ကူးချင်သောသူလည်း မကူးနိန်’ ဟု ဆိုအယ်။ 27 သူဌေးဟ ‘တို့ဖ အေးလို့ဖြစ်ရင် လာဇရုဟို ငါလို့ အဖအိုင်ဟို စေလွှတ်ပေးရန် တောင်းပန်အယ်၊ 28 ငါ့မှာ ညီ ငါးယောက်ဆိပါအယ်။ သူလို့ဟ ဟေလိုမျိုး ရမ်းဆာ့ ဝေဒနာခံစားရလဲ့ နေရာမျိုးဟို မရောက်လာဖို့တွက် သူလို့အား သတိပေးရန် လာဇရုဟို တို့ဖအိုင်ဟို စေလွှတ်ပေးမန့်’ ဟု တောင်းပန်အယ်။ 29 အာဗြဟံဟ ‘နင့်ညီတွေဟို သတိပေးဖို့ မောရှေနဲ့ ပရောဖက်များ ဆိနေဝဲ့။ သူလို့ရဲ့ စကားဟို နားထောင်ကြမန့်စေ’ ဟု ပြောအယ်။ 30 သူဌေးဟ အေးလောက်နဲ့ မရလောက်ဝူး။ ‘တို့ဖ အာဗြဟံ၊ အကယ်ယွေ့ သေဆုံးသွားပီးလဲ့ တစုံတယောက်ဟ ထမြောက်ပင်း သူလို့ဆေ သွားပြောရင် သူလို့ဟ နောင်တရကြမှာရီး’ ဟု ပြန်ပြောအယ်။ 31 အာဗြဟံဟ ‘သူလို့ဟ မောရှေနဲ့ ပရောဖက်တွေရဲ့ စကားဟို နားမထောင်ရင် တစုံတယောက်ဟ သေခြင်းဟနေ ထမြောက်လာရင်လည်း ယုံကြည်နိန်မှာ ဟုတ်ဝူး’ " ဟု ပြောအယ်။