လုကာ 20

ယေရှုရဲ့ အခွင့်အာဏာဟို မေးမြန်းကြခြင်း

1 တနေ့တွင် ယေရှုဟ ဗိမာန်တော်တွင် လူလို့အား ဆုံးမဩဝါဒပေးယွေ့ သတင်းကောင်းဟို ဟောလျက်နေစဉ် ယဇ်ပုရောဟိတ်ကြီးများ၊ ကျမ်းတတ်ဆရာများနဲ့ အသက်ကြီးသူများဟ သူ့ဆေဟို လာကြအယ်။ 2 သူလို့ဟ "ကိုယ်တော်ဟ ဟေအမှုများဟို ပစာအခွင့်နဲ့ ပြုလုန်း။ အေးအခွင့်ဟို စသူပေးလုန်း" ဟု မေးကြအယ်။

3 ယေရှုဟ "ငါဟလည်း နင်လို့ဟို မေးခွန်းတခု မေးအုံးမယ်။ 4 ယောဟန် နှစ်ခြင်းမင်္ဂလာပေးတာဟ ဘုရားသခင်ရဲ့ အခွင့်အာဏာလော၊ လူလို့ရဲ့ အခွင့်အာဏာလော ငါ့အား ဖြေကြားကြလော့" ဟု မေးလေအယ်။

5 သူလို့ဟ အချင်းချင်း ဆင်ခြင်ကြလျက် "ဘုရားသခင်ဟ ဖြစ်တာဟု ငါလို့ပြောရင် ‘ယောဟန်ဟို ပစာကို့ မယုံကြည်ကြလုန်း’ ဟု သူမေးလိမ့်မယ်။ 6 အားပင်မဲ့ လူလို့အခွင့်အာဏာဟု နင်လို့ပြောရင် လူအပေါင်းလို့ဟ ယောဟန်ဟို ပရောဖက်တပါးဟု အမန်ပင် ယုံကြည်ကြသဖြင့် ငါလို့အား ခဲနဲ့ပေါက်ကြလိမ့်မယ်" ဟု အချင်းချင်း ဆွေးနွေးကြအယ်။ 7 အဲလိုမို့ သူလို့ဟ "စသူဟ အခွင့်အာဏာပေးတာဟို ငါလို့ သိဝူး" ဟု ဖြေကြားကြအယ်။

8 အဲအခါ ယေရှုဟ "ငါပြုလဲ့အမှုအရာများဟို ပစာအခွင့်အာဏာနဲ့ ပြုတာဟိုလည်း နင်လို့အား ငါမပြော" ဟု ဆိုလေအယ်။

စပျစ်ဥယျာဉ်သီးစားများ ပုံဥပမာ

9 အဲပင်းရင် ယေရှုဟ လူလို့အား ပုံဥပမာဖြင့် ပြောသည်မှာ "လူတယောက်ဟ စပျစ်ဥယျာဉ် တခုဟို စိုက်ပျိုးယွေ့ သီးစားချအယ်။ အဲပင်းရင် နိုင်ငံရပ်ခြားသို့ ကာလအတော်ကြာ သွားယွေ့ နေအယ်။ 10 အချိန်တန်သော် ကျွန်တယောက်အား ဥယျာဉ်စောင့်များဆေသို့ စေလွှတ်ယွေ့ သီးစားခဟို တောင်းခံစေအယ်။ အားပင်မဲ့ ဥယျာဉ်စောင့်လို့ဟ အေးကျွန်ဟို ရိုက်ယွေ့ လက်ချည်းဗလာ ပြန်လွှတ်လိုက်ကြအယ်။ 11 အဲပင်းရင် ဥယျာဉ်ဆှင်ဟ တခြားကျွန်တယောက်ဟို စေလွှတ်ပြန်အယ်။ အားပင်မဲ့ ဥယျာဉ်စောင့်သမားလို့ဟ သူ့ဟိုလည်း ရိုက်ယွေ့ အဆက်ခွဲပင်းရင် လက်ချည်းဗလာ ပြန်လွှတ်လိုက်ကြအယ်။ 12 နောက်တခါ ဥယျာဉ်ဆှင်ဟ တတိယကျွန်ဟို စေလွှတ်အယ်။ အားပင်မဲ့ ဥယျာဉ်စောင့်လို့ဟ အေးကျွန်ဟိုလည်း ရိုက်နှက်ယွေ့ အပြင်သို့ မောင်းထုတ်လိုက်ကြအယ်။ 13 ဥယျာဉ်ဆှင်ဟ ‘ငါပစာလိုလုပ်ရလုန်း။ ငါ့ရဲ့တဦးထဲသော ချစ်သားဟို စေလွှတ်မယ်။ သူ့ဟို တွေ့ရင် ဥယျာဉ်စောင့်လို့ လေးစားကြလိမ့်မယ်’ ဟု ဆိုလေအယ်။ 14 အားပင်မဲ့ ဥယျာဉ်စောင့်လို့ဟ အေးသားဟိုမျော်ရင် ‘ဟေသူဟ ဥယျာဉ်ဆှင်ရဲ့ အမွေစား အမွေခံ ဖြစ်အယ်။ ငါလို့ ဥယျာဉ်ဟို အမွေရအောန် သူ့အား သတ်ပလိုက်မယ်’ ဟု အချင်းချင်း တိုင်ပင်ပီးမှ၊ 15 ဥယျာဉ်ဆှင်ရဲ့ သားဟို အပြင်ဟို ထုတ်ပင်းရင် သတ်ပစ်ကြအယ်။

"အဲအခါ ဥယျာဉ်ဆှင်ဟ ဥယျာဉ်စောင့်လို့ဟို စလို လုပ်မလုန်း" ဟု ယေရှုဟ မေးလေအယ်။ 16 "သူဟ လာယွေ့ အေးလူလို့ဟို သတ်ပင်းရင် စပျစ်ဥယျာဉ်ဟို အခြားသူများသို့ ပေးအပ်လိမ့်မယ်။"

အေးစကားဟို ကြားသောအခါ လူလို့ဟ "အေးလို့ရီး မဖြစ်ပါစေနဲ့" ဟု သူလို့အား ပြောလေအယ်။

17 ယေရှုဟ သူလို့ဟို ကျေ့လျက်

"တိုက်ဟို တည်ဆောက်သောသူများ ‘ပယ်ထားသော ကျောက်ဟ

တိုက်ထောင့်ချုပ်ကျောက် ဖြစ်လာရအယ်’ ဟူသော ကျမ်းစကားရဲ့ အဓိပ္ပာယ်ဟ စလို ဆိုလိုလုန်း။

18 အေးကျောက်ပေါ်ဟို ကျသောသူဟ အပိုင်းပိုင်း ကျိုးလိမ့်မယ်၊ တယောက်ယောက်ပေါ်သို့ အေးကျောက်ကျရင် သူဟ ဖုန်မှုန့်ဖြစ်အောန် ကြေသွားလိမ့်မယ်" ဟု ပြောလေအယ်။

အခွန်ဆက်သမှုအကျောန်း မေးခွန်းများ

19 ကျမ်းတတ်ဆရာနဲ့ ယဇ်ပုရောဟိတ်ကြီးများဟ မိမိလို့ဟို ရည်စူးယွေ့ အေးပုံဥပမာဟို ပြောကျောန်းဟိုသိသဖြင့် ခုတုံးပင် ကိုယ်တော်ဟို ဖမ်းဆီးရန် ကြံစည်ကြအယ်။ အားပင်မဲ့ လူလို့ဟို ကြောက်ကြအယ်။ 20 အေးလို့မို့ သူလို့ဟ အခွင့်အရေးဟို စောင့်နေကြအယ်။ သူလို့ဟ ယေရှုရဲ့ စကားအမားဟို ဆာပင်းရင် ကိုယ်တော်အား ဘုရင်ခံမင်းလက်ဟို အပ်ခွင့်ရနိန်ရန် သူတော်ကောင်းယောင်ဆောင်သော သူလျှိုများဟို သခင့်ဆေဟို စေလွှတ်ကြအယ်။ 21 သူလျှိုလို့ဟ ယေရှုအား "ဆရာ၊ ကိုယ်တော် သွန်သင်ချက်များဟ မန်ကန်သင့်မြတ်ပါအယ်။ ကိုယ်တော်ဟ လူ့မျက်နှာဟို မထောက်ဘဲ ဖြောင့်မတ်စွာ ဆုံးမဩဝါဒပေးယွေ့၊ ဘုရားသခင်ရဲ့ တရားလမ်းဟို ဟုတ်မန်လဲ့အတိုင်း သွန်သင်ကျောန်း ငါလို့သိပါအယ်။ 22 ငါလို့အနေဖြင့် ရောမဧကရာဇ်အား အခွန်တော်ပေးခြင်း မပေးခြင်းဟ ငါလို့ ဥပဒေနဲ့ ဆန့်ကျင်ပါသလော" ဟု မေးဆှောက်ကြအယ်။

23 အားပင်မဲ့ ယေရှုဟ သူလို့ ပရိယာယ်ဟို သိမျော်နေသဖြင့် သူလို့အား၊ 24 "ငွေဒင်္ဂါးတပြားဟို ငါ့အား ပြပါ။ ဟေငွေဒင်္ဂါးတွင် စသူရဲ့ ရုပ်ပုံ၊ စသူ့ ကမ္ပည်းလိပ်စာ ဆိပါသလုန်း" ဟု ပြောအယ်၊

သူလို့ဟ "ကဲသာဘုရင်ရဲ့ပုံ၊ ကဲသာဘုရင်ရဲ့လိပ်စာ ဆိပါလုန်း" ဟု ပြန်ဖြေကြအယ်။

25 ယေရှုဟ "ကဲသာဘုရင်ပိုင်လဲ့အရာဟို ကဲသာဘုရင်ဟို ဆက်ကြလော့။ ဘုရားသခင်ပိုင်လဲ့အရာဟို ဘုရားသခင်အား ဆက်ကြပါ" ဟု ပြောလေအယ်။

26 သူလို့ဟ လူလို့ဆေ့နှိုက် ကိုယ်တော်ရဲ့ စကားတွင် အမားဆာယွေ့ မရသဖြင့် ကိုယ်တော်ပြန်ဖြေသော စကားကျောန့်လည်း အံ့ဩယွေ့ တိတ်တိတ်နေကြအယ်။

သေခြင်းမှ ဆှင်ပြန်ထမြောက်ခြင်းအကျောန်း မေးခွန်း

27 ✝ ၂၀.၂၇ တ ၂၃.၈ အဲပင်းရင် လူလို့ဟ သေပင်းနောက် ဆှင်ပြန်ထမြောက်ခြင်း မဆိဟု ဆိုကြသော ဇဒ္ဒုကဲအချို့လို့ဟ ယေရှုဆေဟို လာယွေ့ ပြောကြအယ်။ 28 "ဆရာ၊ ‘လူတယောက်ဟ လူပဲ့သငယ်မရဘဲ သေဆုံးသွားရင် ကျန်ခဲ့လဲ့ဇနီးဟို ညီဖြစ်သူဟ ဆက်လက်ထိမ်းမြားရမယ်၊ မွေးလဲ့ လူပဲ့သငယ်များဟို သူ့အကိုရဲ့ အမျိုးအနွယ်အဖြစ် သတ်မှတ်ရမယ်’ ဟု ငါလို့အား မောရှေရဲ့ ပညတ်ချက်ဆိအယ်။ 29 တခါတုန်းဟ ညီအကို ခုနစ်ယောက်ဆိအယ်။ အကိုကြီးဟ အိုင်ထောင်ကျပင်း လူပဲ့သငယ်မရဘဲ သေဆုံးသွားခဲ့အယ်။ 30 အေးသူသေသွားသောအခါ သူ့ပေါင်အိုမဟို သူ့ညီအကြီး သိမ်းယူယွေ့ လူပဲ့မဆိဘဲ သေပြန်လေအယ်။ 31 အေးလို့မျိုးဖြင့် တတိယလူမှစယွေ့ တယောက်ပင်းတယောက် ခုနေယောက်သော ညီအကိုလို့ဟ အေးမိန်းမဟို သိမ်းယူယွေ့ လူပဲ့မဆိဘဲ သေကြအယ်။ 32 နောက်ဆုံးတွင် အေးမိန်းမလည်း သေအယ်။ 33 ညီအကို ခုနစ်ယောက်လုံးဟ သူနဲ့ စုံဖက်ခဲ့ကြတာဖြစ်ယွေ့ သေခြင်းမှ ဆှင်ပြန်ထမြောက်ရာနေ့တွင် အေးမိန်းမဟ စသူရဲ့ မိန်းမ ဖြစ်ပါမလုန်း" ဟု မေးဆှောက်ကြအယ်။

34 ယေရှုဟ သူလို့အား "ဟေဖဝါ့နှိုက် ယောက်ျားနဲ့ မိန်းမလို့ဟ လက်ထပ်ထိမ်းမြားခြင်းဟို ပြုတတ်ကြအယ်၊ 35 အဲလိုလဲ သေခြင်းမှ ဆှင်ပြန်ထမြောက်လာပင်း နောင်လာမဲ့ အသက်တာတွင် ဆှင်သန်ရန် ထိုက်တန်သော အမျိုးသားနဲ့ အမျိုးသမီးများဟ ထိမ်းမြားခြင်းဟို မပြုတတ်ကြ။ 36 သူလို့ဟ ခေါန်းခင်တမန်များလိုမျိုး သေနိန်ကြမယ် မဟုတ်။ သူလို့ဟ သေခြင်းမှ ဆှင်ပြန်ထမြောက်စေသူများ ဖြစ်သောကျောန့် ဘုရားသခင်ရဲ့ လူပဲ့သငယ်များ ဖြစ်ကြအယ်။ 37 မီးလျှံထွက်လဲ့ ချုံအကျောန်းဟို ဖော်ပြရာတွင် မောရှေဟ ‘ထာဝရဘုရားဟ အာဗြဟံရဲ့ ဘုရား၊ ဣဇက်ရဲ့ဘုရား၊ ယာကုပ်ရဲ့ဘုရား’ ဟု ခေါ်ယွေ့ သေလွန်သောသူလို့ ဆှင်ပြန်ထမြောက်ခြင်းအကျောန်းဟို ဆှင်းလင်းစွာ ဖော်ပြခဲ့ခြင်း ဖြစ်အယ်။ 38 အေးသူလို့ဟ ဘုရားဆေ့တွင် ထာဝရကာလပတ်လုံး အသက်ဆှင်သူများ ဖြစ်ကြသဖြင့် ဘုရားသခင်ဟ သေလွန်သူလို့ရဲ့ ဘုရား မဟုတ်။ အသက်ဆှင်နေသူလို့ရဲ့ ဘုရား ဖြစ်အယ်" ဟု ပြောလေအယ်။

39 ကျမ်းပြုဆရာအချို့လို့ဟ "ဆရာ ကိုယ်တော်ပြောသော စကားများဟာ ဆီလျော်လျောက်ပတ်အယ်" ဟု ပြောကြအယ်။ 40 ကျမ်းတတ်ဆရာအချို့လို့ဟ ကိုယ်တော်အား ထပ်မံယွေ့ မမေးမြန်းဝံ့ကြ။

မေရှိယ ပြဿနာ

41 ယေရှုဟ သူလို့အား "မေဆှိယဟ ဒါဝိဒ်ရဲ့ သားမြေး ဖြစ်အယ်ဟု ပစာဟို ဆိုကြလုန်း။ 42 ဒါဝိဒ်မင်း တတ်တိုင်းကပင် ဆာလံကျမ်းနှိုက်၊

" ‘ထာဝရဘုရားဟ ငါ့ရဲ့ သခင်အား နင့်ရဲ့ ရန်သူများဟို နင့်ခြေတင်ရာခုံ အဖြစ် မထားမီ ကာလတိုင်အောန်၊

43 ငါရဲ့ လက်ယာဖက်နှိုက် ထိန်နေလော့ဟု မိန့်အယ်’ ဟု ဆိုလေအယ်။

44 ဒါဝိဒ်မင်းဟ ကိုယ်တော်ဟို ‘အဆှင်’ ဟု ခေါ်တာဖြစ်ရာ အေးလို့ မေရှိယဟ ဒါဝိဒ်ရဲ့ သားမြေး ဖြစ်နိန်မလော" ဟု မေးလေအယ်။

ကျမ်းတတ်ဆရာလို့ဟို သတိနဲ့ဆောင်ကြ

45 လူအပေါင်းလို့ဟ နားထောင်လဲ့အတိုင်း၊ ယေရှုဟ သူ့တဘဲ့တော်လို့အား ပြောအယ်၊ 46 "ကျမ်းတတ်ဆရာလို့ဟို သတိနဲ့ ဆောင်ကြလော့။ သူလို့ဟ ရှည်သော ဝတ်လုံဟို ဝတ်လျက် လည်ခြင်းငှာ အလိုဆိကြအယ်။ ဆေးတွင် ရိုသေစွာ နှုတ်ဆက်ခံရခြင်းဟို လည်းကောင်း၊ ပွဲသဘင်၊ တရားဇရပ်များတွင် အကောင်းဆုံးသော နေရာထိန်ခင်းများဟို လည်းကောင်း နှစ်သက်ကြအယ်။ 47 မုဆိုးမများရဲ့ နေအိုင်များဟို မတရားသိမ်းယူပင်းရင် လူအထင်ကြီးစေရန် ရှည်လျားစွာ ဆုတောင်းတတ်ကြအယ်။ သူလို့ဟ ပိုယွေ့ ကြီးလေးသောဒဏ်ဟို စီရင်ခံရကြလိမ့်မယ်" ဟု သွန်သင်လေအယ်။