1 တနင်္ဂနွေ နက်စာအစော မိုးလင်းစချိန်တွင် အေးမိန်းမလို့ဟ သူလို့ အသင့်ပြင်ဆင်ထားလဲ့ နံ့သာပေါင်းဟို ယူယွေ့ လုတ်တိုင်းဆေဟို သွားကြအယ်။ 2 လုတ်တိုင်းဝဟို ပိတ်ဟားသော ကျောက်တုံးဟို လှိမ့်ဖယ်ထားတာဟို မျော်သဖြင့်၊ 3 ဂူထဲသို့ ဝင်ကြအယ်။ အဲလိုလဲ ယေရှုရဲ့ အလောင်းဟို မမျော်ရကြ။ 4 အေးလို့မျိုး ရပ်ယွေ့ စိတ်များတုံ့နေစဉ် ပြောင်လက်လဲ့ အဝတ်ဟို ဝတ်ဆင်ထားလဲ့ လူနေယောက်ဟ သူလို့ဆေ့တွင် စပ်ကနဲပေါ်လာအယ်။ 5 အမျိုးသမီးများဟ ကြောက်ရွံ့ယွေ့ မြေပေါ်မှာ ပျပ်ဝပ်နေကြအယ်။ အေးသူနေယောက်ဟ "ပစာကို့ နင်လို့ဟ အသက်ဆှင်နေသူဟို သေသောသူလို့ ထားလဲ့အရပ်မှာ ဆာနေကြလုန်း။ 6 ✝ကိုယ်တော်ဟ ဟေအရပ်နှိုက် မဆိ၊ ဆှင်ပြန်ထမြောက်ပီ။ ကိုယ်တော်ဟ ဂါလိလဲပြေနှိုက် ဆိစဉ် နင်လို့အား စလို မိန့်ခဲ့တာဟို သတိရကြလော့။ 7 ‘လူသားဟ ဆိုးသွမ်းသောသူလို့ လက်နှိုက် အပ်နှံခြင်းဟို ခံရလျက် လက်ဝါးကပ်တိုင်မှာ တင်ခြင်း ခံရပင်း သုံးရက်မြောက်သောနေ့နှိုက် ထမြောက်လိမ့်မယ်’ ဟု မိန့်ခဲ့တာ မဟုတ်လော" ဟု ပြောကြအယ်။

8 အဲပင်းရင် အမျိုးသမီးများဟ ကိုယ်တော်ရဲ့ စကားများဟို သတိရယွေ့၊ 9 လုတ်တိုင်းဆေမှ ပြန်သွားပင်းရင် တဆယ့်နေပါးသော တဘဲ့တော်လို့နဲ့ အခြားသော သူအားလုံးလို့အား အေးအကျောန်းအရာ အလုံးစုံဟို ပြောပြကြအယ်။ 10 အဲအကျောန်းအရာဟို တမန်တော်လို့ဟို ပြောကြားသူများမှာ မာဂဒလရွာသူ မာရိ၊ ယောဟန္န၊ ယာကုပ်ရဲ့ အမေဖြစ်သူ မာရိမှစယွေ့ တခြားသော အမျိုးသမီးများ ဖြစ်ကြအယ်။ 11 အဲလိုလဲ သူလို့ ပြောကြားသော စကားများဟ ယုတ္တိမဆိသောကျောန့် တမန်တော်လို့ဟ မယုံကြ။ 12 အဲလိုလဲ ပေတရုဟ လုတ်တိုင်းဆေသို့ ပြေးသွားယွေ့ ငုံ့ကျေ့ပင်း ပိတ်စဟ လွဲယွေ့ ပစာမျှ မတွေ့။ အဲကျောန့် သူဟ အေးအဖြစ်ပျက်ဟို အံ့ဩယွေ့ နေအိုင်ဟို ပြန်သွားအယ်။*

13 အေးနေ့တွင် တဘဲ့တော် နေယောက်လို့ဟ ယေရုရှလင်မြို့နဲ့ ခုနေမိုင်ဝေးသော ဧမောက် နာမယ်ဆိသော ရွာသို့ သွားကြအယ်။ 14 သူလို့နေယောက်ဟ ဖြစ်ပျက်ခဲ့ပင်းသော အကျောန်းအရာဟို အချင်းချင်း ဆွေးနွေးပြောဆိုနေကြအယ်။ 15 အေးလို့မျိုး ပြောဆိုနေလုန်း ယေရှု တတ်တိုင်း သူလို့နားဟို တိုးသွားယွေ့ သူလို့နဲ့တူတူ သွားလေအယ်။ 16 အဲလိုလဲ သူလို့ရဲ့ မျက်စေ့ဟို ကာဆီးခြင်း ခံရသဖြင့် သူလို့ဟ ကိုယ်တော်ဟို မမှတ်မိကြ။ 17 ယေရှုဟ သူလို့အား "နင်လို့ဟ ခရီးသွားရင်းနဲ့ ပစာအကျောန်းအရာဟို ပြောနေကြနှင်း" ဟု မေးလေအယ်။

သူလို့ဟ မျက်နှာညှိုးငယ်စွာနဲ့ အဲနေရာတွင် တန်နေကြအယ်။ 18 အေးသူလို့ထဲတွင် ကလောဖ နာမယ်ဆိသော သူဟ "ယေရုရှလင်မြို့ဟို လာတဲ့ ဧည့်သည်လုပ်ပင်း ခုရက်ပိုင်းထဲ ဖြစ်ပျက်ခဲ့လဲ့ အကျောန်းအရာဟို နင်တယောက်ထဲ မသိသလော" ဟု ဆိုကြအယ်။

19 ကိုယ်တော်ဟ "ပစာအကျောန်းလုန်း" ဟု မေးအယ်။

သူလို့ဟ "နာဇရက်မြို့သား ယေရှုနဲ့ဆိုင်တဲ့ အကျောန်းအရာ ဖြစ်အယ်။ သူဟ ဘုရားသခင်နဲ့ လူလို့ဆေ့မှာ နှုတ်သတ္တိ၊ လက်သတ္တိနဲ့ ပြေ့စုံလဲ့ ပရောဖက် ဖြစ်အယ်။ 20 ငါလို့ ယဇ်ပုရောဟိတ်ကြီးများနဲ့ အကြီးအကဲများဟ သူ့ဟို သေဒဏ်ချမှတ်ဖို့ ပိလတ်မင်းရဲ့ လက်ဟို အပ်ခဲ့အယ်၊ ပင်းတော့ လက်ဝါးကပ်တိုင်မှာ တင်ယွေ့ သတ်ခဲ့ကြအယ်။ 21 သူဟ ဣသရေလလူမျိုးဟို လွတ်မြောက်စေမဲ့သူ ဖြစ်အယ်ဟု ငါလို့ မျော်လင့်ထားကြအယ်။ ဒါတွေအားလုံးအပြင် အခု အဖြစ်အပျက်ဖြစ်တာဟ သုံးရက်ဆိပီ။ 22 ငါလို့ရဲ့ အပေါင်းအဖော် အမျိုးသမီးတချို့ဟ ငါလို့ဟို ရမ်းဆာ့အံ့ဩစေခဲ့အယ်၊ သူလို့ဟ နက်စာအစော လုတ်တိုင်းဆေ သွားခဲ့ကြအယ်၊ 23 အားပေမဲ့ ကိုယ်တော်ရဲ့ အလောင်းဟို မျော်ခဲ့ကြဝူး။ သူလို့ဟ ပြန်လာပင်း ယေရှု အသက်ဆှင်လျက် ဆိကျောန်းဟို ခေါန်းခင်တမန်များ ပေးလဲ့ ရူပါရုံ မျော်ရတာဟို ပြောပြကြအယ်။ 24 ငါလို့ထဲမှ လူတချို့ဟ လုတ်တိုင်းဆေသို့ သွားကြရာ အမျိုးသမီးများ ပြောခဲ့လဲ့အတိုင်း ဖြစ်အယ်၊ အဲလိုလဲ သူလို့ဟ ကိုယ်တော်ဟို မမျော်ခဲ့ကြမောင့်လဲ့" ဟု ပြန်ဖြေကြအယ်။

25 အဲပင်းရင် ယေရှုဟ "ပရောဖက်များ ဟောပြောသောစကားဟို ယုံကြည်ရန် ရမ်းဆာ့ စိတ်နုံနဲ့သော လူမိုက်လို့၊ 26 ခရစ်တော်ဟ ဘုန်းအသရေဟို မခံယူခင် ဟေလို့ ဒုက္ခဝေဒနာများဟို ခံစားရန် လိုအပ်အယ် ဟုတ်ဝူးလော" ဟု ပြောလေအယ်။ 27 အဲပင်းရင် ယေရှုဟ မောရှေကျမ်းမှ အစပြုယွေ့ ပရောဖက် ကျမ်းအားလုံးတွင် ကိုယ်တော်အကျောန်းနဲ့ ပတ်သက်လဲ့ ကျမ်းစာများဟို အေးသူနေယောက်လို့ဟို ဆှင်းလင်း ပြောပြလေအယ်။

28 သူလို့သွားနေလဲ့ ရွာနားဟို ရောက်သောအခါ ယေရှုဟ ဆေ့ဟို ကျော်ယွေ့ သွားမဲ့ဟန် လုပ်အယ်၊ 29 အဲလိုလဲ သူလို့ဟ "မိုးချုပ်ခါနီးယွေ့ တနေ့တာလည်း ကုန်လုနီးပီ ဖြစ်သောကျောန့် တို့နဲ့ နေမန့်" ဟုဆိုယွေ့ ကိုယ်တော်ဟို ဖိတ်ခေါ်ကြအယ်။ ကိုယ်တော်ဟ သူလို့နဲ့အတူ တည်းရန် လိုက်သွားလေအယ်။ 30 စားပွဲတွင် သူလို့နဲ့တူတူ ထိန်လျက် မုန့်ဟိုယူယွေ့ ကျေးဇူးတော်ဟို ချီးမွန်းအယ်၊ အဲပင်းရင် မုန့်ဟိုဖဲ့ယွေ့ သူလို့ဟို ပေးလေအယ်။ 31 အဲပင်းရင် သူလို့ မျက်စေ့ ပွင့်လာကြသဖြင့် ကိုယ်တော်မှန်း သိကြအယ်၊ အဲလိုလဲ ကိုယ်တော်ဟ သူလို့ဆေ့မှ ကွယ်ပျောက် သွားလေအယ်။ 32 သူလို့ဟ "လမ်းခရီးမှာတုန်းဟ ကိုယ်တော် ငါလို့ဟို စကားပြောသောအခါနဲ့၊ ကျမ်းစာအနက်ဟို ဖွင့်ပြသောအခါတွင် ငါလို့ စိတ်နေလုံးထဲမှာ မီးလျှံထနေသလို ဖြစ်နေခဲ့တာ မဟုတ်လော" ဟု အချင်းချင်း ပြောဆိုကြအယ်။

33 သူလို့ဟ တန်းထယွေ့ ယေရုရှလင်မြို့ဟို ပြန်ကြပီးမှ၊ တဆယ့်တပါးသော တဘဲ့တော်များနဲ့ အခြားသောသူများ စုံရုံးလျက် နေကြတာဟို မျော်ကြအယ်။ 34 စုရုံးနေကြသော သူလို့ဟ "သခင်ဟ တကယ် ထမြောက်ဝါးပီ။ ကိုယ်တော်ဟ ရှိမုန်ဟို ကိုယ်ထင်ပြပီ" ဟု ပြောဆိုကြအယ်။

35 အဲပင်းရင် သူလို့နေယောက်ဟ လမ်းတွင် ဖြစ်ပျက်ခဲ့လဲ့ အကျောန်းအရာဟို လည်းကောင်း၊ မုန့်ဟို ဖဲ့စဉ်တွင် ကိုယ်တော်မှန်း သိဆိလာကျောန်းဟို သူလို့အား ဆှင်းပြကြအယ်။

36 အေးအကျောန်းအရာများဟို သူလို့နေယောက် ပြောနေတုန်း ယေရှုဟ သူလို့အလယ်တွင် စပ်ကနဲပေါ်လာယွေ့ "နင်လို့နှိုက် ငြိမ်သက်ခြင်း ဆိပါစေ"* ဟု ပြောလေအယ်။

37 သူလို့ဟ ကဆေခြောက်နေစာရီးဟု ထင်နေကြသဖြင့် ကြောက်လန့်ယွေ့ တုန်နေကြအယ်။ 38 အဲလိုလဲ သူလို့ဟို "ပစာကျောန့် ကြောက်နေလုန်း။ ပစာကျောန့် နင်လို့ စိတ်နေလုံးထဲနှိုက် သံသယဖြစ်နေဝလော။ 39 ငါ့လက်နဲ့ ငါ့ခြေဟို ကျေ့ကျေ့မန့်၊ ငါတတ်တိုင်းပင် ဖြစ်အယ်။ ငါ့ဟို စမ်းသပ်ကျေ့မန့်၊ အကျောန်းမှာ ကဆေနှိုက် အရိုးနဲ့ အသား မဆိ၊ ငါနှိုက် နင်လို့ မျော်လဲ့အတိုင်း အရိုးနဲ့ အသား ဆိအယ်" ဟု ပြောလေအယ်။

40 ကိုယ်တော်ဟ ပြောပင်း မိမိရဲ့ လက်နဲ့ ခြေလို့ဟို သူလို့အား ပြလေအယ်။* 41 သူလို့ဟ ရမ်းဆာ့ အံ့ဩဝမ်းသာ ဖြစ်ယွေ့ မယုံနိန်ကြသေးဘဲ ဖြစ်နေကြချိန်တွင် ကိုယ်တော်ဟ "နင်လို့မှာ ပစာစားဖို့ ဆိလုန်း" ဟု သူလို့အား မေးလေအယ်။ 42 သူလို့ဟ ငါးကင်တပိုင်းဟို ကိုယ်တော်အား ပေးကြအယ်၊ 43 ကိုယ်တော်ဟ ယူယွေ့ သူလို့ဆေ့မှာ စားလေအယ်။

44 အဲပင်းရင် ကိုယ်တော်ဟ သူလို့အား "နင်လို့နဲ့တူတူ ဆိနေစဉ် နင်လို့အား ငါပြောခဲ့သော စကားများမှာ မောရှေရဲ့ ပညတ်ကျမ်း၊ ပရောဖက် ကျမ်းများနဲ့ ဆာလံကျမ်းတွင် ငါရဲ့ အကျောန်းနဲ့ ပတ်သက်ယွေ့ ရေးထားသမျှလို့ဟ ပြေ့စုံခြင်းသို့ ရောက်ရမယ် ဖြစ်အယ်" ဟု ပြောလေအယ်။

45 အဲပင်းရင် ကိုယ်တော်ဟ ကျမ်းစာတော်ဟို နားလည်ကြစေရန် သူလို့အသိဉာဏ်ဟို ဖွင့်ပေးလေအယ်။ 46 ပင်းနောက် သူလို့အား မိန့်တာဟ "ကျမ်းစာတွင် မေဆှိယဟ ဒုက္ခဝေဒနာ ခံစားရယွေ့ သုံးရက်မြောက်နေ့မှာ သေခြင်းမှ ထမြောက်ရမယ်။ 47 နာမတော်ဟို အမှီပြုယွေ့ နောင်တရခြင်းတရားနဲ့ အပစ်ဖြေလွှတ်ခြင်း တရားဟို ယေရုရှလင်မြို့မှ အစပြုယွေ့ လူမျိုးအပေါင်းလို့ဟို ဟောပြောရမယ်။ 48 နင်လို့ဟ ဟေအကျောန်းအရာများနဲ့ ပတ်သက်ပင်း မျက်မြင် သက်သေများ ဖြစ်ကြအယ်။ 49 ✝ငါ့ ခမည်းတော် ကတိထားခဲ့လဲ့အရာဟို နင်လို့ပေါ် ငါ စေလွှတ်လိမ့်မယ်။ အဲလိုလဲ နင်လို့ဟ ခေါန်းခင်ဟ တန်ခိုးဟို မခံရသေးခင်ထိ ယေရုရှလင်မြို့မှာ ငံ့နေကြလော့" ဟု ပြောလေအယ်။

50 ✝အဲပင်းရင် ကိုယ်တော်ဟ သူလို့အား ဗေသနိရွာတိုင်အောန် မြို့ပြင်ဟို ယိုးသွားယွေ့ သူ့လက်ဟို မြောက်ယွေ့ ကောင်းချီး ပေးလေအယ်။ 51 ဟေသို့ ကောင်းချီးပေးနေစဉ် ကိုယ်တော်ဟ သူလို့ဆေမှ ထွက်ခွာယွေ့ ခေါန်းခင်ဘုံသို့ ဆောင်ယူခြင်းဟို ခံလေအယ်။* 52 တဘဲ့တော်လို့ဟ ကိုယ်တော်ဟို ပျပ်ဝပ်ကိုးကွယ်ပင်းရင် ရမ်းဆာ့ ဝမ်းမြောက်ဝမ်းသာ ဖြစ်လျက် ယေရုရှလင်မြို့ဟို ပြန်သွားကြအယ်။ 53 သူလို့ဟ ဗိမာန်တော်နှိုက် ဘုရားသခင်ရဲ့ ကျေးဇူးတော်ဟို အစဉ် ချီးမွန်းလျက် နေကြအယ်။