1 Coríntios 10

ဒိပေးဟှူကြောန်း

1 ညီကို မောန်နှမလေ အယ်မူကြောန်းရာဟှို နန်းနို့လေသိဘဲန နေစေရှင်ဟှ။ နို့ဘိုးဘေးလေဟှာ မိုးတီအော့-က်မာရှိဘီး ပန်လယ်လယ်မာ ရှော့-က်သွားရဂေ့ဘီးဟှာ၊ 2 မိုးတီနပန်လယ်ထဲမာ မောရှေနှိုက် ဗတ္တိဇံဟှို ခံယူဂေ့ဟှယ်။ 3 သူးနို့လေ ဂူလောင်းဟှာ ဝိညာဉ်ရေးရာန ဆိုင်ဟှူ စာတမျိုးဒဲဟှိုဘဲ့ စားဂေ့ဘီး၊ 4 ဝိညာဉ်ရေးရာနဆိုင်ဟှူ ရေဟှို သော့-က်ရဂေ့ဟှယ်။ သူးနို့လေ ဂူလောင်းဘဲ့ ကိုယ့်န လိုက်ပါလာဟှူ ဓမ္မက္လော့-က်ဟှ ရေဟှို သော့-က်ရဂေ့ဟှယ်။ အယ်က္လော့-က်ဟှာ ခရစ်တော်ဘဲ့ဖြစ်ဟှယ်။ 5 အယ်ဘေမဲ့လည်း ဘုရားသခင်ဟှာ သူးနို့လေထဲဟှ လူများစုဟှို နှစ်သက်တော်မူဟှ။ အယ်ကြောန့် သူးနို့လေဟှာ တောကန္တာရထဲမာ သေကျေပျစ်စီးဂေ့ဟှယ်။

6 အယ်သူလေဟှာ ကောန်းဘဲဇာလေဟှို တတ်မတ်ဂေ့ဟှူမျိုး နို့လေ တတ်မတ်ဘဲနနေအောန် အယ်ကြောန်းရာလေဟှာ နို့လေတွပ် ပေါင်သတ်သေဖြစ်ဟှယ်။ 7 "လူလေဟှာ စားသော့-က်ဘီး ထိုင်နေဂေ့ဟှယ်။ နော့-က်တခါ ထဘီး ကခူမြူးတူးဂေ့ဟှယ်" ဆိုဘီး ကျမ်းစာလာဟှူတိုင်း တချို့လူလေဟှာ ရောက်ထုဟှို ပူဇော်ပသဟှူမျိုး နို့လေ ပူဇော်ပသဘဲနေဟှို့တွပ် ဒိပေးဟှူဇာ ဖြစ်ဟှယ်။ 8 သူးနို့ထဲဟှ တချို့လေဟှာ တရားဘဲဟှူ မေထုန်ဟှို ပြုဟှူမျိုး နို့လေပြုဘဲနေဂေ့ဇို့။ သူးနို့လေထဲဟှ လူတချို့ဟှာ တရားဘဲဟှူ မေထုန်ဟှို ပြုဟှူကြောန့် တရစ်ဒဲမာဘဲ့ လူ , လဲဘီးသေဟှားဂေ့ဟှယ်။ 9 အယ်လူလေထဲဟှ တချို့လေဟှာ စောင်ဇမ်းရှင်းဟှို လောက်ဂေ့ဟှူကြောန့် ဗွီအားဖြင့် ပျစ်စီးဟှားဂေ့ဟှူမျိုး နို့လေပြုဘဲန ခရစ်တော်*၁၀.၉ ခရစ်တော်၊ တချို့ မူရင်းလတ်ရေးမူလေမာ ဘုရားသခင်၊ ဆိုဘီး ပါရှိဟှယ်။ဟှို စောင်ဇမ်းဘဲနေဂေ့ဇို့။ 10 နန်းနို့လေဟှာ အယ်သူလေထဲဟှ တချို့ ညည်းညူဟှူမျိုး ညည်းညူဂေ့န။ အယ်မျိုး ညည်းညူဟှူ သူလေဟှာ ဖျစ်ဆီးရှင်း တမန်အားဖြင့် ဖျစ်ဆီးခံရဂေ့ဟှယ်။

11 အယ်သူလေ အယ်မျိုး ဖြစ်ရဟှူဇာဟှာ တခြားလူလေ သင်ဂန်းစာရဂေ့ဟှို့တွပ် ဖြစ်ဟှယ်။ နို့လေဟှာ ကပ်ကာလ ကူဆောန်းခါနီးမာ သတ်ရှင်ရဟှူ သူလေဖြစ်ကြောန့် နို့လေဟှို ဒိပေးဟှူနေန အယ်ကြောန်းရာလေဟှို ကျမ်းစာမာ ရေးဟှားဇာ ဖြစ်ဟှယ်။

12 အယ်ကြောန့် ကိုယ့်ကိုယ်ကိုယ် ခိုင်းခိုင်ခန့်ခန့် ရပ်တည်နေဟှယ် ဆိုဘီး ထန်ဟှူသူဟှာ ယိုင်လဲဘဲနေအောန် ဒိပြုပါစေ။ 13 လူမာ ဖြစ်တတ်ဟှူ စောင်ဇမ်း နှော့-က်ယှစ်မှုလေဟှိုဘဲ့ နန်းနို့လေ ခံစားရဂေ့ဟှယ်။ ဘုရားသခင်ဟှာ သစ်စာန ပ္လဲ့ဇောင်ဟှူကြောန့် နန်းနို့ခံနိုင်ဘဲဟှူ စောင်ဇမ်း နှော့-က်ယှစ်မှုလေဟှို နန်းနို့နားဟှို ရော့-က်ဟှို့တွပ် ခွမ့်ပေးဟှို့ မှုဟှ။ နန်းနို့လေ ခံနိုင်ဟှို့တွပ် စောင်ဇမ်း နှော့-က်ယှစ်ခံရဟှူ ကြောန်းရာန ထပ်တူ လွတ်မြော့-က်ဟှူ လမ်းဟှိုလည်း စီရင်ပြုပြင်တော်မူလေ့မယ်။

14 အယ်မျိုးဖြစ်ကြောန့် ငါရှစ်ရဟှူ သူလေ၊ ရောက်ထု ကိုးကွယ်ဇာဟှို ရှောန်ဂေ့ပါ။ 15 နန်းနို့လေဟှို ပညာရှိဟှူ သူလေနေန ငါပြောရှင်း ဖြစ်ဟှယ်။ ငါ့စကားဟှို ဆင်ခြင်စီရင်ဂေ့ပါ။ 16 ✝၁၀.၁၆ မ ၂၆.၂၆–၂၈; မာ ၁၄.၂၂–၂၄; လု ၂၂.၁၉,၂၀နို့လေဟှာ ကျေးဇူးတော် ချီးမွမ်းဟှူ မင်္ဂလာခွပ်ဖလားဟှာ၊ ခရစ်တော်ရဲ့ သွီးဟှို ဆစ်ဆံဟှူဇာ ဖြစ်ဟှယ် မှုဟှလော။ နို့လေဖဲ့ဟှူ မုဟှာ။ ခရစ်တော်ရဲ့ ကိုယ်ခန္ဓာတော်ဟှို ဆစ်ဆံဘီး ဝီမျှသောင်းဆောန်ဂေ့ဟှူဇာ မှုဟှလော။ 17 မုဟှာ တလောင်းဒဲ ဖြစ်ဟှူမျိုး ဘောင်ဂီးဖြစ်ဟှူ နို့လေဟှာလည်း ကိုယ်ခန္ဓာတခုဒဲ ဖြစ်ဟှယ်။ ဖြားဖြစ်ကြောန့်နူးဆိုဟှာ နို့လေ ဂူလောင်းဟှာ တလောင်းဒဲ ဖြစ်ဟှူမုဟှို ဆစ်ဆံဘီး သောင်းဆောန်ဂေ့ဟှူကြောန့် တလောင်းတကိုယ်ဒဲ ဖြစ်ဂေ့ဟှယ်။

18 ဇာတိအားဖြင့် ဣသရေလ လူမျိုးလေဖြစ်ဟှူ သူလေဟှို ကေ့ဘီး ဆင်ခြင်ဂေ့ပါ။ ယဇ်ပူဇော်ဟှားဟှူ ယဇ်ကောန်လေဟှို စားဟှူ သူးနို့လေဟှာ ယဇ်ပလ္လင်န ဆစ်ဆံဟှူ သူလေ ဖြစ်ဂေ့ဟှယ် မှုဟှလော။ 19 အယ်မျိုးဆိုဟှာ ရောက်ထုဟှို ပူဇော်ဟှူရာဟှာ ရေးပါဟှူဇာ ဖြစ်ဟှယ်။ အယ်မျိုးမှုဘဲနေဟှာ ရောက်ထုဟှာ ရေးပါဟှူဇာ ဖြစ်ဟှယ် ဆိုဘီး ငါဆိုလိုဟှူဇာလော။ 20 အယ်မျိုးငါဆိုလိုဇာ မှုဟှ။ သူးနို့ပူဇော်ဟှူ ယဇ်ကောန်ဟှာ ဘုရားသခင်ဟှို ပူဇော်ဇာမှုဘဲန နတ်ဆိုးလေဟှို ပူဇော်ဇာဖြစ်ဟှယ်။ နန်းနို့လေဟှို နတ်ဆိုးလေန ဆစ်ဆံဟှူဇာဟှို ငါမလိုရှင်ဟှ။ 21 နန်းနို့လေဟှာ သခင်ဘုရားရဲ့ ခွပ်ဟှို သော့-က်မယ် ဆိုဟှာ နတ်ဆိုးလေရဲ့ ခွပ်ဟှို သော့-က်နိုင်ဟှ။ သခင်ဘုရားရဲ့ စားဗွဲမာ စားမယ် ဆိုဟှာ နတ်ဆိုးလေရဲ့ စားဗွဲမာ စားနိုင်ဂေ့ဟှ။ 22 နို့လေဟှာ သခင်ဘုရားဟှို မျစ်ထွပ်အောန် ဆန့်ကျင်ဖတ် လောက်ရှင်ဂေ့ကြောန့်လော။ နို့လေဟှာ သခင်ဘုရားထတ် ပိုဘီး တဂိုးကီးဟှူကြောန့်လော။

23 ✝ ၁၀.၂၃ ၁ ကော ၆.၁၂ "နို့လေဟှာ ဖယ်မှုဟှိုမဆို ပြုလောက်ခွမ့်ရှိဟှယ်" ဆိုဘီး ပြောဟှူတိုင်းမှန်ဟှူလည်းဘဲ့ ရာအားလောင်းကျိုးရှိဟှူဇာ မှုဟှ။ "နို့လေဟှာ ဖယ်မှုဟှိုမဆို ပြုခွမ့်ရှိဟှယ်" ဆိုဘီး ပြောဟှူလည်းဘဲ့ ရှိမျှဂူလောင်းဟှာ နို့လေဟှို ကျိုးပြုပေးဇာ မှုဟှ။ 24 ဖယ်သူလည်း ကိုယ့်ကျိုးဟှိုမရှာစေန။ သူများကျိုးဟှိုဘဲ့ လူတိုင်းရှာပါစေ။

25 နန့်ရဲ့ ကိုယ့်ကိုယ်ကိုယ် သိဟှူစိဟှို ထော့-က်ရဟှူကြောန့် ဆေးမာ ရောန်းဇာလေ ဂူလောင်းဟှို စစ်ဆေးမေးမြန်းဘဲန စားဂေ့ပါ။ 26 ဖြားဖြစ်ကြောန့်နူးဆိုဟှာ "မ္လေဂီးနတူးဒူ မ္လေဂီးထတ်မာရှိဟှူ ရှိမျှဂူလောင်းဟှို ဘုရားသခင် ပိုင်တော်မူဟှယ်" ဆိုဘီး ကျမ်းစာဟှပြောဟှယ်။

27 တကယ်ဟှိ ယောင်ကြည်ဘဲသူ တယော့-က်ဟှာ နန်းနို့လေဟှို ဧည့်ခံဘီး ကျွေးမွေးဟှို့ခေါ်ဟှူ ခီမာ နန်းနို့သွားဂေ့ဘီး သိစိဟှို ထော့-က်ရဟှူကြောန့် ထဲ့ကျွေးဇာလေ ဂူလောင်းဟှို စစ်ဆေးမေးမြန်းဘဲန စားဂေ့ပါ။ 28 အယ်ဘေမဲ့ လူယော့-က်ယော့-က်ဟှ "အယ်ဇာဟှာ ရောက်ထုဟှို ပူဇော်ဟှားဟှူ သားဖြစ်ဟှယ်" ဆိုဘီး ပြောဟှာ အယ်မျိုးပြောဟှူ သူန သိစိဟှို ထော့-က်ဘီးဟှာ အယ်ဇာဟှို စားဂေ့န — 29 သိစိ ဆိုဘီး ပြောဟှူဇာဟှာ နန်းနို့ရဲ့သိစိဟှို ပြောဟှူဇာ မှုဟှ။ တခြားသူရဲ့ သိစိဟှို ပြောဟှူဇာဖြစ်ဟှယ်။

နန်းနို့လေထဲဟှ ယော့-က်ယော့-က်ဟှ "ငါ့ရဲ့လွတ်လပ်မှုဟှို ဖြားဖြစ်ကြောန့် သူများရဲ့သိစိဟှ လာဘီးစစ်ကြောစီရင်ရနူး။ 30 ငါဟှာ ကိုယ်စားဟှူစားသော့-က်တွပ် ဘုရားသခင်ရဲ့ ကျေးဇူးတော်ဟှို ချီးမွမ်းဟှယ် ဆိုဟှာ အယ်မျိုး ကျေးဇူးတော်ဟှို ချီးမွမ်းဘီး စားဟှူစားဇာန ပတ်သတ်ဘီးဟှာ ငါ့ဟှို ဖြားဖြစ်ကြောန့် ကဲ့ရဲ့ပြစ်တန်ရနူး" ဆိုဘီး မေးလေ့မယ်။

31 နန်းနို့လေဟှာ စားဟှူဇာဘဲ့ဖြစ်ဖြစ်၊ သော့-က်ဟှူဇာဘဲ့ဖြစ်ဖြစ်၊ ဖယ်မျိုးမှုဟှိုဘဲ့ပြုပြု ဘုရားသခင်ရဲ့ ဖောင်းသရေတော်ဟှို ထော့-က်ဘီး မှုရှိမျှဂူလောင်းဟှို ပြုဂေ့ပါ။ 32 ယုဒလူမျိုးဘဲ့ဖြစ်ဖြစ်၊ လူမျိုးခြားလေဘဲ့ဖြစ်ဖြစ်၊ ဘုရားသခင်ရဲ့ သင်းတော်ဝမ်ဟှူ သူလေဟှိုဘဲ့ဖြစ်ဖြစ် ကဲ့ရဲ့ဇာကြောန်း မှေ့ဘဲနေအောန် နေထိုင်ဂေ့ပါ။ 33 အယ်မျိုးဘဲ့ ငါလည်း လူလေ ကယ်တန်ရှင်းရဟှို့တွပ် ကိုယ့်ကျိုးဟှို ငဲ့ဘဲန သူများလေရဲ့ကျိုးဟှို ငဲ့ကွပ်ဘီးဟှာ မှုရှိမျှဂူလောင်းဟှို လူလေနှစ်သက်အောန် ကြိုးစားနေဟှယ်။