၁ ကောရိန္သု 8

ရောက်ထုဟှိုပူဇော်ဟှူ စားဇာပြဿနာကြောန်း

1 ရောက်ထုဟှို ပူဇော်ဟှားဟှူရာလေနပတ်သတ်ဘီး၊

နန်းနို့လေ ပြောဟှူတိုင်း "နို့လေဂူလောင်းဟှာ သိပညာရှိဟှယ်" ဆိုဇာဟှို နို့လေသိဟှယ်။ အယ်ဘေမဲ့ သိပညာဟှာ လူဟှိုမာနထောန်လွှားစေတတ်ဟှယ်။ ရှစ်ရှင်းမြစ်တာဟှဘဲ့ တည်ဆော့-က်တတ်ဟှယ်။ 2 ကိုယ့်ကိုယ်ကိုယ် ပညာရှိဆိုဘီး ထန်မှတ်ဟှူသူဟှာ တကယ်ဘဲ့ အယ်သူဟှာ သိသင့်ဟှူတိုင်း သိသေးဟှ။ 3 အယ်ဘေမဲ့ ဘုရားသခင်ဟှိုရှစ်ဟှူသူဟှာ ဘုရားသခင် သိမှတ်တော်မူဟှူဇာဟှို ခံရဟှယ်။

4 အယ်ကြောန့် ရောက်ထုဟှို ပူဇော်ဟှားဟှူ ယဇ်ကောန်ဟှို စားဟှူဇာဟှာ ရောက်ထုဟှာ အယ်လောကမာ ချည်းနှီးသတ်သတ် ဖြစ်ဟှယ် ဆိုဟှူဇာန တပါးဒဲရှိဟှူ ဘုရားသခင်ဟှလွဲဘီး ဖယ်ဘုရားသခင်လည်း မှေ့ဟှ ဆိုဇာဟှို နို့လေ သိဂေ့ဟှယ်။ 5 ဖြားဖြစ်ကြောန့်နူးဆိုဟှာ ကောန်းဂန်န မ္လေဂီးထတ်မာ "ဘုရားလေ" "သခင်လေ" ဆိုဘီး နာမယ်မှတ်ခေါ်ဟှူ ဇာလေ ဘောင်ဂီးရှိဟှူလည်းဘဲ့ 6 အယ်မူ ဘုရားသခင်ထဲဟှဘဲ့ ရာအားလောင်းဖြစ်လာဘီး၊ အယ်မူ ဘုရားသခင်တွပ်ဘဲ့ နို့လေဖြစ်ဂေ့ဟှယ်။ အယ်မူ ဖဘုရားသခင်တပါးဒဲဟှဘဲ့ နို့လေမာရှိဟှယ်။ အယ်မူသခင်အားဖြင့် နို့လေဟှနေစဘီး ရာအားလောင်းဖြစ်လာဂေ့ဟှယ်။ အယ်သခင် ယေရှုခရစ်တော်တပါးဒဲဟှဘဲ့ နို့လေမာ ရှိတော်မူဟှယ်။

7 အယ်ဘေမဲ့လည်း လူတိုင်း အယ်မူသိပညာရှိဂေ့ဟှူ ဇာမှုဟှ။ တချို့လူလေဟှာ ခုခီထိ ရောက်ထုရှေ့မာ ပူဇော်ဟှားဟှူစားဇာဟှို စားဟှူ ခီမာ ရောက်ထုဟှို ထော့-က်ဟှူစိနစားဂေ့ဘီး ကိုယ့်ကိုယ်ကိုယ် သိဟှူ စိအားနဲဟှူကြောန့် ညစ်ညူးစေဟှယ် ဆိုဘီး ထန်ဂေ့လေဟှယ်။ 8 စားဇာဟှာ ဘုရားသခင်ရဲ့ ရှေ့တော်မာ နို့လေဟှို မျစ်နှာရစေဟှူဇာ မှုဟှ။ စားဘဲနနေဟှူလည်း ရှောင်းမှေ့ဘဲဟှူမျိုး စားဟှယ် ဆိုဟှာလည်း မ္လတ်မရဟှ။

9 အယ်ဘေမဲ့ နန်းနို့လေ အယ်မျိုး လွတ်လွတ်လပ်လပ် စားပိုင်ခွမ့်ရှိဟှူလည်းဘဲ့ ယောင်ကြည်မှုအားနဲဟှူသူလေတွပ် ထိမိဘီးလဲဇာ ဖြစ်ဘဲနေအောန် ဒိပြုဂေ့ပါ။ 10 ဖြားဖြစ်ကြောန့်နူးဆိုဟှာ သိပညာရှိဟှူနန်ဟှာ ရောက်ထုက္လောန်းထဲမာ ထိုင်ဘီး စားသော့-က်နေဟှူဇာဟှို ယော့-က်ယော့-က်ဟှ တွိဟှယ် ဆိုဟှာ အယ်သူရဲ့ အားနဲဟှူ သိစိဟှာ ရောက်ထုဟှို ပူဇော်ဟှားဟှူ ဇာလေဟှို စားဟှိရဲတန်းလာမယ် မှုဟှလော။ 11 အယ်မျိုးဖြစ်ဟှယ် ဆိုဟှာ အားနဲဟှူ ညီကိုတွပ် ခရစ်တော်ဟှာ သေခံပေးဟှူလည်းဘဲ့ နန့်ရဲ့ "သိပညာ" ကြောန့် အယ်သူဟှာ ပျစ်စီးမှုဟှို ရော့-က်ရဟှယ်။ 12 အယ်မျိုးဆိုဟှာ နန်းနို့လေဟှာ ညီကို မောန်နှမလေဟှို ပြစ်မှားဘီး သူးနို့လေရဲ့ သိစိဟှို ထိခိုက်စေရှင်းအားဖြင့် ခရစ်တော်ဟှို ပြစ်မှားရာ ရော့-က်ဟှယ်။ 13 အယ်ကြောန့် ငါ့ရဲ့ စားသော့-က်ဟှူမှုဟှာ ညီကို မောန်နှမလေဟှို မှားယွင်းစေဟှယ် ဆိုဟှာ ညီကို မောန်နှမလေဟှို မှားယွင်းစေဘဲနေအောန် မဲသားဟှို စားဘဲန မြဲဒမ်းရှောန်မယ်။