1 ညီကို မောန်နှမလေ၊ နန်းနို့လေဟှို ငါဟောပြောဟှူ ဒန်းကောန်းဟှို နန်းနို့လတ်ခံဟှူမျှနမှုဘဲ အယ်ထတ်မာ နန်းနို့ရပ်တည်ဂေ့ဟှယ်။ နော့-က်ထပ် အယ်ကောန်းမြတ်ဟှူ ဒန်းကောန်းဟှို နန်းနို့ဟှို သိစေရှင်ပါဟှယ်။ 2 ငါဟောပြောဟှားဟှူ အယ်ဒန်းကောန်းဟှို စွဲစွဲမြဲမြဲ ယောင်ကြည်မယ် ဆိုဟှာ အယ်ဒန်းကောန်းအားဖြင့် နန်းနို့ဟှာ ကယ်တန်ရှင်းဟှို ခံရမယ်။ အယ်မျိုး ယောင်ကြည်ဘဲဟှ ဆိုဟှာ နန်းနို့ ယောင်ကြည်ဟှားဇာဟှာ ဖြားကျိုးလည်းမှေ့ဟှ။

3 ငါဟှာ ကိုယ်တိုင်ခံယူဘီး နန်းနို့လေဟှို ဦးဆောင်းပေးအပ်ဟှူ၊ ရေးကီးဆောင်းဖြစ်ဟှူ ကြောန်းရာဟှ ခရစ်တော်ဟှာ ကျမ်းစာလာဟှူတိုင်း နို့လေပြစ်တွပ် သေခံတော်မူဟှူကြောန်း၊ 4 ✝ သင်္ဂြိုဟ်ခံဘီး ကျမ်းစာလာဟှူတိုင်း သောင်းရစ်မြော့-က်ဟှူနေ့မာ ရှင်ပ္လန်ထမြော့-က် တော်မူဟှူကြာန်း၊ 5 ✝ ကေဖဟှာ ကိုယ်တော့်ဟှို ဗြင်ရဟှူကြောန်းန ဆယ့်နှေ့ပါးဖြစ်ဟှူ တဗဲ့တော်လေ ဗြင်ရဟှူကြောန်းလေဘဲ့ ဖြစ်ဟှယ်။ 6 အယ်ဘီးန ခရစ်ယာန်ညီကို မောန်နှမ ငါးရာကျော်ဟှ တပြိုင်ဒဲ ဗြင်ရဂေ့ဟှယ်။ အယ်သူလေထဲဟှ တချို့လူလေဟှာ သေဟှားဂေ့ဘီ တော်တော်များများဟှ ခုထိရှိနေသေးဟှယ်။ 7 အယ်ဘီးန ယာကုပ်ဗြင်ရဟှယ်။ နော့-က်မှ တမန်တော်လေ အားလောင်းဗြင်ရဟှယ်။

8 ✝နော့-က်ဆောင်းမာ ခီတန်ဘဲန မွီးဟှူသူ*မျိုးဖြစ်ဟှူ ငါလည်း ဗြင်ရဟှယ်။ 9 ✝ငါဟှာ တမန်တော်လေထဲမာ ညံ့ဆောင်းဖြစ်ဟှယ်။ ဖြားဖြစ်ကြောန့်နူးဆိုဟှာ ဘုရားသခင်ရဲ့ သင်းတော်ဟှို ညှဉ်းဆဲဟှူသူဖြစ်ဘီး တမန်တော် ဆိုဘီး ခေါ်ဟှူဇာဟှိုမှ ခံထိုက်ဟှ။ 10 အယ်ဘေမဲ့ ဘုရားသခင်ရဲ့ ကျေးဇူးတော်ကြောန့် ငါဟှာ ခုခြေနေဟှို ရော့-က်ရဇာဖြစ်ဟှယ်။ ငါခံရဟှူ ကျေးဇူးတော်ဟှိုလည်း ကျိုးမှေ့ဘဲန ခံရဟှူဇာ မှုဟှ။ ငါဟှာ တခြားတမန်တော်လေထတ် ပိုဘီး ကြိုးစားလောက်ဆောန်ဟှယ်။ အယ်မျိုးလောက်ဆောန်နိုင်ဇာလည်း ငါ့ရဲ့စွမ်းစကြောန့်မှုဘဲန ငါ့နတူးဒူလောက်ဆောန်ဟှူ ဘုရားသခင်ရဲ့ ကျေးဇူးတော်ကြောန့် ဖြစ်ဟှယ်။ 11 အယ်ကြောန့် ငါဘဲ့ဖြစ်ဖြစ်၊ သူးနို့လေဘဲ့ဖြစ်ဖြစ် အယ်တိုင်းဟောပြောဂေ့ဟှယ်။ နန်းနို့လေလည်း အယ်တိုင်းဘဲ့ ယောင်ကြည်ဂေ့ဟှယ်။

12 ခရစ်တော်ဟှာ သေရှင်းဟှနေဘီး ရှင်ပ္လန်ထမြော့-က်ဟှူကြောန်းဟှို နို့လေဟောပြောနေရစ်န ဖြားဖြစ်ကြောန့် နန်းနို့လေထဲဟှ လူတချို့ဟှာ သေဘီးလူလေ ထမြော့-က်ရှင်းမှေ့ဟှဆိုဘီး ပြောဆိုနေဂေ့နူး။ 13 သေဟှားသူလေ ထမြော့-က်ရှင်းမှေ့ဘဲနေဟှာ ခရစ်တော်လည်း ထမြော့-က်ဟှားဟှို့ မှုဟှ။ 14 ခရစ်တော်ဟှာ ထမြော့-က်တော်မူဘဲနေဟှာ နို့လေဟောပြောဇာလည်း ဖြားကျိုးလည်း မှေ့ဟှ။ နန်းနို့လေ ယောင်ကြည်ဇာလည်း ဖြားကျိုးလည်း မှေ့ဟှ။ 15 အယ်လော့-က်နမကဟှ နို့လေဟှာ ဘုရားသခင်န ပတ်သတ်ဘီး မမှန်ဘဲဟှူသတ်သေခံလေ ဖြစ်ဟှားဂေ့လေ့မယ်။ ဖြားဖြစ်ကြောန့်နူးဆိုဟှာ သေဟှားသူလေဟှို ထမြော့-က်စေတော်မူဘဲနေဟှာ ဘုရားသခင်ထမြော့-က်စေတော်မူဘဲဟှူ ခရစ်တော်ဟှို ဘုရားသခင် ထမြော့-က်စေတော်မူဘီ ဆိုဘီး နို့လေ သတ်သေခံနေဟှူကြောန့် ဖြစ်ဟှယ်။ 16 ဖြားဖြစ်ကြောန့်နူးဆိုဟှာ သေဟှားသူလေ ထမြော့-က်ရှင်းမှေ့ဘဲနေဟှာ ခရစ်တော်လည်း ထမြော့-က်တော်မူဟှားမယ် မှုဟှ။ 17 ခရစ်တော်ဟှာ ထမြော့-က်ဘဲနေဟှာ နန်းနို့ယောင်ကြည်ရှင်းဟှာ ချည်းနှီးသတ်သတ်ဖြစ်ဘီး နန်းနို့လေဟှာ ပြစ်ဒုစရိုက်အော့-က်မာဘဲ့ ရှိနေသေးဂေ့ဟှယ်။ 18 အယ်မျိုးဖြစ်ဟှယ် ဆိုဟှာ ခရစ်တော်နှိုက် အိမွိဟှားသူလေလည်း ဆောင်းရှောင်းမှုဟှို ရော့-က်ဂေ့ရမယ်။ 19 ခရစ်တော်နှိုက် နို့လေရဲ့ မျှော်လင့်ရှင်းဟှာ ခုဘဝ ကျိုးတွပ်ဘဲ့ ဖြစ်ဟှယ် ဆိုဟှာ ဖြားလည်းကျိုးထူးဟှ ဆိုဟှာ အယ်လောကမာ နို့လေလော့-က် သနားဇာကောန်းဟှူလူ ရှိဟှို့မှုဟှ။*

20 မှန်ဆိုဟှာ ခရစ်တော်ဟှာ သေဟှားသူလေထဲမာ ထမြော့-က်တော်မူဘီး အိမွိဟှူ သူလေထဲမာ ဦးဆောင်းသီး ဖြစ်တော်မူဟှယ်။ 21 ဖြားဖြစ်ကြောန့်နူးဆိုဟှာ လူတယော့-က်အားဖြင့် အယ်လောကထဲမာ သေရှင်းတရားဖြစ်ပေါ်လာဟှူမျိုး လူတယော့-က်အားဖြင့်ဘဲ့ သေရှင်းဟှ ရှင်ပ္လန်ထမြော့-က်ရှင်းတရားဟှာလည်း ဖြစ်ပေါ်လာဟှယ်။ 22 လူလေ ဂူလောင်းဟှာ အာဒံအားဖြင့် သေဂေ့ရဟှူမျိုး လူလေ ဂူလောင်းဟှာ ခရစ်တော်အားဖြင့် သတ်ရှင်ရှင်းဟှို ရော့-က်ရလေ့မယ်။ 23 အယ်ဘေမဲ့ လူသီးသီးဟှာ လှည့်က္လ ထမြော့-က်ဂေ့လေ့မယ်။ ခရစ်တော်ဟှာ ရင်ဦးဆောင်း ထမြော့-က်ဟှူ ဦးဆောင်းသီး ဖြစ်ဟှယ်။ ခရစ်တော် ကြွလာဟှူ ခီမာ တဗဲ့တော်ဖြစ်ဟှူ သူလေဟှာ ထမြော့-က်ဂေ့လေ့မယ်။ 24 အယ်ဘီးမှ ကပ်ကမ္ဘာ ကူဆောင်းဟှူခီ ရော့-က်လေ့မယ်။ အယ်ခီမာ ခရစ်တော်ဟှာ အောက်ချောက်မှုရှိဟှူမျှ၊ တဂိုးန အာဏာစစ်ရှိဟှူမျှ ဂူလောင်းဟှို ဖျစ်ဆီးဘီးဟှာ နိုင်ငံတော်ဟှို ဖဘုရားသခင် လတ်ထဲဟှို အပ်တော်မူလေ့မယ်။ 25 ဖြားဖြစ်ကြောန့်နူးဆိုဟှာ ရန်သူလေ ဂူလောင်းဟှို ခရစ်တော်ရဲ့ ခေဖွားအော့-က်မာ ခ္လဟှားခန်ခီထိ ခရစ်တော်ဟှာ အောက်စိုးရမယ်။ 26 ဖျစ်ဆီးခံရမယ့် နော့-က်ဆောင်းဟှူ ရန်သူဟှာ သေမန်းဘဲ့ ဖြစ်ဟှယ်။ 27 ကျမ်းစာဟှ "ဘုရားသခင်ဟှာ ဂူလောင်းဟှို ကိုယ်တော်ရဲ့ ခေဖွားအော့-က်မာ ခ္လဟှားတော်မူဟှယ်" ဆိုဘီး ဖော်ပြဟှားဟှယ်။ "ဂူလောင်း" ထဲမာ ဘုရားသခင် ပါဟှ။ ဖြားဖြစ်ကြောန့်နူးဆိုဟှာ ဂူလောင်းဟှို ခရစ်တော်ရဲ့ ခေဖွားအော့-က်ဟှို ရော့-က်စေဟှူသူဟှ ဘုရားသခင်ဘဲ့ ဖြစ်ဟှယ်။ 28 ဂူလောင်းဟှို သားတော်ဟှာ အောက်စိုးတော်မူဟှူ ခီမာ သူ့ရဲ့ ခေဖွားအော့-က်ဟှို ဂူလောင်းဟှို ခ္လဟှားတော်မူဟှူ ဘုရားသခင်ရဲ့ အောက်စိုးရှင်းဟှို သားတော် ကိုယ်တိုင် ဝန်ခံလေ့မယ်။ ဖြားဖြစ်ကြောန့်နူးဆိုဟှာ ဘုရားသခင်ဟှာ လောင်းဇောင် ဖြစ်တော်မူဟှယ်။

29 သေဟှားဘီးသူလေ ကိုယ်စား ဗတ္တိဇံခံဟှူ သူလေဟှာ ဖြားကျိုးရှိဟှူကြောန့် အယ်မျိုးလောက်ဂေ့နူး။ သေဟှားဘီး သူလေဟှာ ရှင်ပ္လန်ထမြော့-က်ရှင်းမှေ့ဟှ ဆိုဟှာ ဖြားဖြစ်ကြောန့် သူးနို့ကိုယ်စား ဗတ္တိဇံခံနေဂေ့နူး။ 30 ဖြားဖြစ်ကြောန့် နို့လေဟှာ ဘေးအန္တရာယ်န မြဲဒမ်း တွိကြောင်ရဂေ့နူး။ 31 ညီကို မောန်နှမလေ၊ နို့လေဟှာ သခင် ယေရှုခရစ်တော်နှိုက် နန်းနို့အားဖြင့် ငါရရှိဟှူ ဝါကြွားဝန်းသာရှင်းဟှို တိုင်တည်ဘီး ငါဟှာ နေ့တိုင်းသေရဟှယ် ဆိုဘီး ငါပြောဟှယ်။ 32 တကယ်ဟှိ ငါဟှာ လူ့သဘောအားဖြင့် ဧဖက်ဗြို့မာ သားရဲလိဆန်လေန တိုက်ခိုက်ရဟှယ် ဆိုဟှာ ငါ့တွပ် ဖြားကျိုးရှိမယ်နူး။ သေဟှားဘီးသူလေ ရှင်ပ္လန်ထမြော့-က်ရှင်း မှေ့ဘဲနေဟှာ "နန့်ကီးမိုးလန်းဟှာ သေရဂေ့မယ်ဖြစ်ကြောန့် နို့လေဟှာ စားရင်း၊ သော့-က်ရင်း၊ ပျော်ပါးရင်းနေဂေ့ဇို့" ဆိုဘီး ဆိုဟှူတိုင်းဘဲ့ နေဂေ့ရအောန်။

33 တလွဲယူဂေ့န။ "ကောန်းဘဲဟှူ သူလေန ပေါန်းသင်းဟှူ ဇာအားဖြင့် ကောန်းဟှူ ကျင့်ဓလေ့ ပျစ်စီးတတ်ဟှယ်။" 34 ဗြင်မှန်ရဂေ့ပါ။ ပြစ်လောက်ဂေ့န။ ဖြားဖြစ်ကြောန့်နူးဆိုဟှာ တချို့လူလေဟှာ ဘုရားသခင်ဟှို သိဂေ့ဟှ။ နန်းနို့လေ ယှစ်ကြော့-က်အောန် အယ်မျိုးငါပြောဇာ ဖြစ်ဟှယ်။

35 အယ်ဘေမဲ့ လူတချို့ဟှ "သေဟှားသူလေဟှာ ဖယ်မျိုး ရှင်ပ္လန်ထမြော့-က်မယ်နူး။ ဖယ်မျိုး ကိုယ်ခန္ဓာန ပေါ်လာမယ်နူး" ဆိုဘီး မေးဂေ့လေ့မယ်။ 36 ဝှေ့ လူမိုက်! နန်စိုက်ဟှူ မျိုးစေ့ ရင်ဦးဆောင်း ပျစ်ဟှားဘဲနေဟှယ် ဆိုဟှာ ရှင်လာဟှို့ မှုဟှ။ 37 မျိုးစေ့ဟှို မ္လေမာ စိုက်ဟှူ ခီမာ နော့-က်မှ ဖြစ်လာဟှူ ကိုယ်ထည်ဟှို စိုက်ဟှူဇာ မှုဟှ။ ဂျောင်စေ့ဘဲ့ဖြစ်ဖြစ်၊ တခြား မျိုးစေ့ဘဲ့ဖြစ်ဖြစ် စေ့ဟှိုဘဲ့ စိုက်ဟှူဇာ ဖြစ်ဟှယ်။ 38 အယ်ဘေမဲ့ ဘုရားသခင်ဟှာ သူလိုတော်ရှိဟှူတိုင်း မျိုးစေ့ ကိုယ်ထည်ဟှို ပေးတော်မူဟှယ်။ မျိုးစေ့ သီးသီးဟှိုလည်း သူးနို့ရဲ့ မျိုးစားလိုက် ကိုယ်ထည်ဟှို ပေးတော်မူဟှယ်။

39 သတ်ရှိသတ္တဝါလေရဲ့ သားဟှလည်း တမျိုးဒဲရှိဇာ မှုဟှ။ လူလေရဲ့ သားဟှ တမျိုး၊ မဲသားဟှ တမျိုး၊ ငှတ်သားဟှ တမျိုး၊ ငါးသားဟှ တမျိုး ဖြစ်ဟှယ်။

40 ကောန်းဂန်ရဲ့ ကိုယ်ထည်လည်း တမျိုး၊ မ္လေဂီးရဲ့ ကိုယ်ထည်လည်း တမျိုး ရှိဟှယ်။ ကောန်းဂန်ကိုယ်ထည်ရဲ့ ဂေါင်သရေဟှ တမျိုး၊ မ္လေဂီးကိုယ်ထည်ရဲ့ ဂေါင်သရေဟှ တမျိုး ဖြစ်ဟှယ်။ 41 နေရဲ့ ဂေါင်သရေ၊ လရဲ့ ဂေါင်သရေ၊ ကြယ်ရဲ့ ဂေါင်သရေဟှာ တမျိုးစီ ဖြစ်ဟှယ်။ ကြယ်ဟှာ လောင်းနလောင်းဟှိုဘဲ့ ဂေါင်သရေရှင်း တူဟှ။

42 သေဟှားသူလေရဲ့ ထမြော့-က်ရှင်းဟှလည်း အယ်တိုင်းဘဲ့ ဖြစ်ဟှယ်။ ကိုယ်ခန္ဓာဟှို သင်္ဂြိုဟ်ဟှူ ခီမာ ပေါက်ပျစ်တတ်ဟှူ သဘောရှိဟှယ်။ ထမြော့-က်ဟှူ ခီမာ ဆိုဟှာ ပေါက်ပျစ်နိုင်ဘဲဟှူ ဖြစ်နတည်ဟှယ်။ 43 စိုက်ဟှူ ခီမာ ဂေါင်သရေပျစ်ဘီး ခွန်အားမှေ့ဟှ။ ထမြော့-က်ဟှူ ခီမာ ဖောင်းသရေတော်ရှိဘီး တဂိုးန ပ္လဲ့ဇောင်လေ့မယ်။ 44 စိုက်ဟှူ ခီမာ ကိုယ်ကာယခန္ဓာ ဖြစ်ဟှယ်။ ထမြော့-က်ဟှူ ခီမာ ဝိညာဏကိုယ် ဖြစ်ဟှယ်။ ရောက်ပိုင်းဆိုင်ရာ ခန္ဓာရှိဟှူမျိုး ဝိညာဉ်ပိုင်းဆိုင်ရာ ကိုယ်ခန္ဓာလည်း ရှိရဟှယ်။ 45 အယ်ကြောန့် ကျမ်းစာလာဟှူဇာဟှ "ပထမ လူအာဒံဟှာ သတ်ရှင်ဟှူ သတ္တဝါ ဖြစ်ဟှယ်" ဆိုဘီး ရေးဟှားဟှယ်။ နော့-က်ဆောင်းဖြစ်ဟှူ အာဒံဟှာ သတ်ရှင်စေတတ်ဟှူ ဝိညာဉ် ဖြစ်ဟှယ်။ 46 ဝိညာဏကိုယ်ဟှာ ရင်ဦးဆောင်း ဖြစ်လာဇာ မှုဟှ။ ရောက်ခန္ဓာ ဖြစ်ဘီးမှ ဝိညာဏကိုယ် ဖြစ်လာဟှူဇာ ဖြစ်ဟှယ်။ 47 ပထမအာဒံဟှာ မ္လေဂီးဟှ ဖန်ဆင်းဟှူကြောန့် မ္လေဂီးသား ဖြစ်ဟှယ်။ ဒုတိယ အာဒံဟှာ ကောန်းဂန်ဘောင်ဟှနေ လာဟှူသူ ဖြစ်ဟှယ်။ 48 မ္လေဂီးသားလေဟှာ အယ်မ္လေဂီးသားမျိုးဘဲ့ ဖြစ်ဂေ့ဟှယ်။ ကောန်းဂန်ဘောင်န ဆိုင်ဟှူ သူလေဟှာ ကောန်းဂန်ဘောင်န ဆိုင်ဟှူသူန တူလေ့မယ်။ 49 နို့လေဟှာ မ္လေဂီးသားရဲ့ ပေါင်သဏ္ဌာန်ဟှို ဆောန်ဟှူမျိုးဘဲ့ ကောန်းဂန်ဘောင်ဟှ ကြွလာဟှူသူရဲ့ ပေါင်သဏ္ဌာန်ဟှိုလည်း ဆောန်ဂေ့လေ့မယ်။*

50 ညီကို မောန်နှမလေ၊ လူ့ရဲ့သွီးသားဟှာ ဘုရားသခင်ရဲ့ နိုင်ငံတော်ဟှို ခံယူနိုင်ဟှ။ ပေါက်ပျစ်တတ်ဟှူဇာဟှာ ပေါက်ပျစ်တတ်ဘဲဟှူဇာဟှို ခံယူနိုင်ဟှ။

51 ✝နားထောန်ဂေ့ပါ။ လျှို့ဝှပ်နတ်နဲဟှူ ဇာတခုဟှို ငါပြောအူးမယ်။ နို့လေဂူလောင်းဟှာ သေဂေ့ရဟှို့ မှုဟှ။ 52 အယ်ဘေမဲ့ နော့-က်ဆောင်းဗှိုးမှုဟှူ ခီမာ မျစ်စိတမှိ ရှစ်ဟှားဒဲန ပ္လောန်းလဲဂေ့လေ့မယ်။ နော့-က်ဆောင်းဗှိုးမှုဟှူ ခီမာ သေဟှားဘီးသူလေဟှာ ရှင်ပ္လန်ထမြော့-က်ဘီး သေရှင်းန ထာဝရ ကင်းလွတ်လေ့မယ်။ နို့လေ အားလောင်းလည်း ပ္လောန်းလဲမှုဟှို ရော့-က်ဂေ့လေ့မယ်။ 53 ဖြားဖြစ်ကြောန့်နူးဆိုဟှာ ခုပေါက်ပျစ်တတ်ဟှူ ဇာဟှာ ပေါက်ပျစ်တတ်ဘဲဟှူ ဇာဖြစ်ဟှို ပ္လောန်းလဲရမယ်။ သေတတ်ဟှူ ဇာဟှာ သေနိုင်ဘဲဟှူ ဇာဖြစ်ဟှို ပ္လောန်းလဲရမယ်။ 54 အယ်ကြောန့် အယ်ပေါက်ပျစ်တတ်ဟှူ ဇာဟှာ ပေါက်ပျစ်နိုင်ဘဲဟှူ ဇာဖြစ်န သေတတ်ဟှူ ဇာဟှာ သေနိုင်ဘဲဟှူ ဇာဖြစ်ဟှို ပ္လောန်းလဲဟှူ ခီမာ "သေရှင်းဟှာ အောန်မြင်ရှင်းနှိုက် နှစ်မ္လောက်ဘီ!" ဆိုဘီး ပြောဟှားဟှူ ကျမ်းစကားဟှာ ပ္လဲ့ဇောင်လေ့မယ်။

55 "အို၊ မရဏနိုင်ငံ၊ နန့်ရဲ့ အောန်မြင်ရှင်းဟှ ဖယ်မာရှိနူး။

အို၊ သေမန်း၊ နန့်ရဲ့ လတ်နတ်ဟှ ဖယ်မာရှိနူး။"

56 သေမန်းရဲ့ လတ်နတ်တဂိုးဟှာ ပြစ်ဒုစရိုက် ဖြစ်ဟှယ်။ ဒုစရိုက်ပြစ်ရဲ့ တဂိုးဟှာ ပညတ်တရား ဖြစ်ဟှယ်။ 57 အယ်ဘေမဲ့ နို့လေရဲ့ သခင် ယေရှုခရစ်တော်အားဖြင့် အောန်မြင်မှုဟှို ပေးတော်မူဟှူ ဘုရားသခင်ရဲ့ ကျေးဇူးတော်ဟှာ ကီးမားလှပါဟှယ်!

58 အယ်မျိုးဖြစ်ကြောန့် ငါရှစ်ရဟှူ ညီကို မောန်နှမလေ၊ နန်းနို့လေဟှာ သခင်ဘုရားရဲ့ မှုတော်ဟှို ကြိုးစား လောက်ဆောန်ဟှူဇာဟှာ ချည်းနှီး ဖြစ်ဘဲဟှူကြောန်းဟှို သိမှတ်ဘီးဟှာ တည်ကြည်ဟှူစိန ပ္လဲ့ဇောင်ဘီး ဖော့-က်ပ္လန်ရှင်း မှေ့ဘဲန သခင်ဘုရားရဲ့ မှုတော်ဟှို မြဲဒမ်း ကြိုးစားဆောန်ရွပ်ဂေ့ပါ။