1 နန်းနို့လေ ရှင်းရှင်းပြဿနာဖြစ်ဟှူ ခီမာ ဘုရားသခင်ရဲ့ သန့်ရှင်းသူလေနားဟှနေဘီး စီရင်ဆောန်းဖြတ်ပေးဇာဟှို ခံယူဘဲန ယောင်ကြည်ဘဲဟှူသူလေရှေ့မာ ခံရဲဟှူသူ ယော့-က်ယော့-က်ရှိလော။ 2 ဘုရားသခင်ရဲ့ သန့်ရှင်းသူလေဖြစ်ဟှူ နို့လေဟှာ အယ်လောကဟှို တရားစီရင်ရမယ်ဆိုဇာဟှို နန်းနို့လေသိဂေ့ဟှလော။ အယ်လောကဟှို တရားစီရင်ရဟှို့သူလေဟှာ အယ်မူ မှုကိစသေးငယ်ဟှားဟှိုမှ စီရင်ဆောင်းဖြတ်နိုင်ဟှလော။ 3 နို့လေဟှာ ကောန်းဂန်တမန်လေဟှို တရားစီရင်ဂေ့ရဟှို့ကြောန်းဟှို နန်းနို့သိဂေ့ဟှလော။ အယ်မျိုးဖြစ်ဟှယ် ဆိုဟှာ အယ်လောကီမှုရာလေဟှို ပိုဘီး စီရင်သင့်ဟှယ် မှုဟှလော။ 4 အယ်ကြောန့် နန်းနို့လေဟှာ လောကီမှုပြဿနာလေဟှို စီရင်ဟှို့တွပ် သင်းတော်ဟှ အသရေနဲဟှူသူလေဟှို တရားသူကြီးနေရာမာ ခန့်ဟှားဂေ့ဟှို့လော။ 5 နန်းနို့လေဟှို ယှစ်ရအောန် အယ်မျိုး ငါပြောဟှူဇာဖြစ်ဟှယ်။ ခရစ်ယာန်ညီကို မောန်နှမလေရှင်းရှင်း ပြဿနာဖြစ်ဟှူ ခီမာ သင်းတော်မာ စီရင်ဆောင်းဖြတ်ပေးနိုင်ဟှူ ပညာရှိ ယော့-က်လည်းမှေ့ဟှလော။ 6 ခုဟှ ညီကိုရှင်းရှင်း တရားစီရင်ဟှူဇာနမကဟှ အယ်မှုဟှို ယောင်ကြည်ဘဲဟှူသူလေရှေ့မာ ပြုမူနေဂေ့ပါလား!

7 အယ်မျိုး ရှင်းရှင်းတရားစွဲဂေ့ဟှူဇာဟှာ နန်းနို့လေတွပ် ရရာတိုင်း ဆောင်းရှောင်းဟှူဇာ ဖြစ်ဟှယ်။ အယ်မျိုး တရားစွဲဂေ့မယ့်စား ညှဉ်းဆဲဟှူဇာဟှို ဖြားဖြစ်ကြောန့် ခံဟှိရဲဂေ့ဟှနူး။ လီလည်လုယူဟှူဇာဟှို ဖြားဖြစ်ကြောန့် ခံဂေ့ဟှနူး။ 8 နန်းနို့လေဟှာ အယ်မျိုးခံမယ့်စား ညီကိုရှင်းရှင်းဟှို တရားဘဲဇာဟှို လောက်ဘီး လီလည်လုယစ်ဂေ့ဟှယ်! 9 တရားဘဲဟှူ လူလေဟှာ ဘုရားသခင်ရဲ့ နိုင်ငံတော်ဟှို မွီခံရဟှို့ မှုဟှ ဆိုဇာဟှို နန်းနို့သိဂေ့ဟှလော။ တလွဲယူဂေ့န။ ကာမဂေါင် လိုက်စားဟှူသူလေ၊ ရောက်ထုဟှို ကိုးကွယ်ဟှူသူလေ၊ အီထောန်ရေး ဖော့-က်ပ္လန်ဟှူသူလေ၊ ယော့-က်ကျားရှင်းရှင်း မေထုန်ပြုဟှူသူလေ၊ အယ်မျိုးဇာဟှိုခံဟှူသူ၊ 10 ခိုးဟှူသူလေ၊ လောဖကီးဟှူသူလေ၊ သော့-က်စား မောယစ်ဟှူသူလေ၊ သူများ အသရေဖျစ်ဟှူသူလေ၊ လီလည်လုယူသူလေဟှာ ဘုရားသခင်ရဲ့ နိုင်ငံတော်ဟှို မွီခံရဟှို့ မှုဟှ။ 11 စဒူးဟှ နန်းနို့လေထဲဟှ တချို့လူလေဟှာ အယ်မျိုးသူလေဖြစ်ဂေ့ဟှူလည်းဘဲ့ ခု သခင်ယေရှု ခရစ်တော်ရဲ့ နာမတော်န ဘုရားသခင်ရဲ့ ဝိညာဉ်တော်အားဖြင့် ပြစ်ဟှနေ ဆေးကြောရှင်း၊ သန့်ရှင်းရှင်းခံရဘီး ဖြောန့်မတ်ရာဟှို ရော့-က်ဂေ့ဘီ။

12 ✝ ၆.၁၂ ၁ ကော ၁၀.၂၃ နန်းနို့လေဟှ "ငါဟှာ ဂူလောင်းဟှို လောက်ခွမ့်ရှိဟှယ်" ဆိုဘီး ပြောဂေ့လေ့မယ်။ နန်းနို့ပြောဟှူတိုင်း မှန်ဟှယ်။ အယ်ဘေမဲ့ ရှိမျှဂူလောင်းဟှာ နန်းနို့တွပ် ကျိုးရှိဟှူဇာ မှုဟှ။ ငါဟှာ ဂူလောင်းဟှို လောက်ပိုင်ခွမ့်ရှိဟှယ်။ အယ်ဘေမဲ့ ဖယ်မှုရာလေရဲ့ စိုးမိုးဟှူဇာဟှိုမှ ငါခံဟှ။ 13 "စားဇာဟှာ ဝန်းတွပ်ဖြစ်ဟှယ်။ ဝန်းဟှလည်း စားဇာတွပ်ဖြစ်ဟှယ်" ဆိုဘီး ပြောလေ့မယ်။ အယ်ဘေမဲ့ ဘုရားသခင်ဟှာ အယ်နှေ့ပါးလောင်းဟှို ဖျစ်ဆီးလေ့မယ်။ ကိုယ်ခန္ဓာဟှာ ကာမဂေါင်ခံစားဟှို့တွပ်မှုဘဲန သခင်ဘုရားတွပ်ဖြစ်ဟှယ်။ သခင်ဘုရားဟှာလည်း ကိုယ်ခန္ဓာတွပ် ဖြစ်တော်မူဟှယ်။ 14 ဘုရားသခင်ဟှာ တဂိုးတော်အားဖြင့် သခင်ဘုရားဟှို ရှင်ပ္လန်ထမြော့-က်စေဟှူမျိုး နို့လေဟှိုလည်း တဂိုးတော်အားဖြင့် ထမြော့-က်စေတော်မူလေ့မယ်။

15 နန်းနို့လေရဲ့ကိုယ်ခန္ဓာဟှာ ခရစ်တော်ရဲ့ ကိုယ်အင်္ဂါလေဖြစ်ဟှယ် ဆိုဇာဟှို သိဂေ့ဟှလော။ အယ်မျိုးဆိုဟှာ ခရစ်တော်ရဲ့ ကိုယ်အင်္ဂါဟှို ယူဘီးဟှာ ပြည်တန်ဆာမရဲ့ ကိုယ်အင်္ဂါဖြစ်စေရဟှို့လော။ လောင်းဝဖြစ်စေဟှ! 16 ပြည်တန်ဆာမန ပေါန်းဖော်ဟှူလူဟှာ အယ်ပြည်တန်ဆာမန တသားတကိုယ်ဒဲ ဖြစ်ဟှားဟှယ် ဆိုဇာဟှို နန်းနို့သိဂေ့ဟှလော။ ကျမ်းစာဟှ "အယ်သူနှေ့ယော့-က်ဟှာ တသားတကိုယ်ဒဲ ဖြစ်ရဂေ့လေ့မယ်" ဆိုဘီး လာဟှယ်။ 17 အယ်ဘေမဲ့ သခင်ဘုရားနှိုက် မှီဝဲသူဟှာ အယ်သခင်န တစိတဝိညာဉ်ဒဲ ဖြစ်ဟှယ်။

18 တရားဘဲဟှူ မေထုန်ပြုဟှူဇာဟှို ရှောန်ဂေ့ပါ။ လူပြုတတ်ဟှူ တခြားပြစ်လေဟှာ ကိုယ်ခန္ဓာ ပ္လန်ဖတ်မာဘဲ့ရှိဟှယ်။ တရားဘဲဟှူ မေထုန်ပြုဟှူသူဟှာ ကိုယ့်ရဲ့ ကိုယ်ခန္ဓာဟှို ပြစ်မှားဟှူဇာ ဖြစ်ဟှယ်။ 19 ✝၆.၁၉ ၁ ကော ၃.၁၆; ၂ ကော ၆.၁၆ဖြားဖြစ်ကြောန့်နူးဆိုဟှာ နန်းနို့လေရဲ့ ကိုယ်ခန္ဓာဟှာ ဘုရားသခင်ပေးသနားဟှူ ဝိညာဉ်တော်ဖြစ်ဟှူ နန်းနို့ထဲမာ ကီးဝပ်ဟှူ သန့်ရှင်းဟှူဝိညာဉ်တော်ရဲ့ ဗိမာန်တော်ဖြစ်ဟှူကြောန်းန နန်းနို့လေဟှာ ကိုယ့်ကိုယ်ကိုယ် ပိုင်ဘဲဟှူကြောန်းဟှို သိဂေ့ဟှလော။ 20 ကိုယ်တော်ဟှာ နန်းနို့လေဟှို ဖိုးခပေးဘီး ဝယ်ဟှားကြောန့် နန်းနို့လေရဲ့ကိုယ်ခန္ဓာအားဖြင့် ဘုရားသခင်ရဲ့ ဖောင်းသရေတော်ဟှို ထန်ရှားစေဂေ့ပါ။