1 သတ်ကီးဟှူသူဟှို ပြစ်တန်ဘီး ဆောန်းမရှင်းဟှို ပြုဘဲန ကိုယ့်ရဲ့ဖဟှူမျိုး သဘောထားဘီး တောန်းဗန်ပါ။ ကိုယ့်ထတ်သတ်ငယ်သူဟှို ညီတယော့-က်ဟှူမျိုး၊ 2 ကိုယ့်ထတ်သတ်ကီးဟှူ မီးမလေဟှို ကိုယ့်မိဟှူမျိုး၊ ကိုယ့်ထတ်သတ်ငယ်ဟှူ မီးမလေဟှို ဖ္လူစင်သန့်ရှင်းဟှူစိန ကိုယ့်ညီမဟှူမျိုး သဘောထားဘီး နှိုးဆော်ပါ။

3 မောက်ဆိုးမ တကယ်ဖြစ်ဟှူ မောက်ဆိုးမလေဟှို ရိုသေဂေ့ပါ။ 4 အယ်ဘေမဲ့ မောက်ဆိုးမ ယော့-က်ယော့-က်မာ သားမ္လေးရှိဟှယ် ဆိုဟှာ အယ်မူ သားမ္လေးလေဟှာ ဘာသာရေး ကျင့်ဝတ်ဖြစ်ဟှူ ကိုယ့်ရဲ့ မိသားစုဟှို ပြုစုဟှူဇာန မိဖဖိုးဖွားလေဟှို ကျေးဇူးဆပ်ဟှို့တွပ် ရင်ဦးဆောင်း သန်ယူပါစေ။ အယ်မျိုး လောက်ဟှူမှုဟှာ ဘုရားသခင် ရှေ့တော်မာ နှစ်သက်တော်မူဟှူ မှုဖြစ်ဟှယ်။ 5 မောက်ဆိုးမ တကယ်ဖြစ်ဘီး တယော့-က်ဒဲ ကျန်ရစ်ဟှူ မီးမဟှာ ဘုရားသခင်ဟှို မျှော်လင့်ကိုးစားဘီး နေ့ညဉ့်မပြတ် ဆုတောန်းရှင်းအားဖြင့် တည်နေတတ်ဟှယ်။ 6 ပျော်ပါးလိုက်စားဟှူ မောက်ဆိုးမဟှာ သတ်ရှင်ရဲ့န သေနေဟှူ မျိုးဘဲ့ဖြစ်ဟှယ်။ 7 အယ်ကြောန့် အယ်သူလေ ပြစ်တန်ခွမ့်န လွတ်ကင်းဟှို့တွပ် အယ်ရာလေဟှို ညွှန်ကြားပါ။ 8 ကိုယ့်ဆွေမျိုးလေဟှို ပြုစုဘဲဟှူသူ ထူးသဖြင့် ကိုယ့်ရဲ့ အီသူအီသားလေဟှို ပြုစုဘဲဟှူသူဟှာ ယောင်ကြည်ရှင်း တရားဟှို ငြင်းပယ်သူ ဖြစ်ဟှူကြောန့် ယောင်ကြည်ဘဲဟှူ သူလေထတ် ပိုဘီး ဆိုးယုတ်လေဟှယ်။

9 မောက်ဆိုးမ တယော့-က်ဟှာ သတ်ခြော့-က်ဆယ် ပ္လဲ့သေးဟှ ဆိုဟှာ မောက်ဆိုးမ စာရင်းဝမ်စေန။ အယ်မီးမဟှာ တခါဘဲ့ လတ်ထပ်ဟှားဘီး၊*၅.၉ တခါဘဲ့ လတ်ထပ်ဟှားဘီး၊ အယ်မျိုးမှုဘဲနေဟှာ လန်ဟှို သစ်စာရှိဟှူ မီးမ။ 10 ကောန်းဟှူကျင့်ဟှို ကျင့်ဟှူသူ၊ အသရေရှိဟှူသူ၊ သားဂန်းဟှားလေဟှို ကျွေးမွေးဟှူသူ၊ ဧည့်သယ်ဝတ်ဟှို ပြုဟှူသူ၊ သန့်ရှင်းသူလေဟှို ကူညီမဇဟှူသူ၊ ဆင်းရဲသားလေဟှို လောက်ကျွေးဟှူသူ၊ ကောန်းဟှူ မှုရှိဟှူမျှလေမာ ကြိုးစားလောက်ဆောန်မှုဟှို ပြုဖူးဟှူသူ ဖြစ်ဟှယ် ဆိုဟှာ မောက်ဆိုးမ စာရင်းဝမ်စေ။

11 သတ်ငယ်ဟှူ မောက်ဆိုးမလေဟှို စာရင်းသွမ်းန။ ဖြားဖြစ်ကြောန့်နူးဆိုဟှာ သူးနို့လေဟှာ ကိုယ့်ရဲ့ လိုဆန္ဒဟှို ထီးနိုင်ဘဲဟှူ ခီမာ အီထောန်ပြုရှင်ဟှူစိ ရှိလာဟှူကြောန့် ခရစ်တော်ဟှို ဥပေက္ခာပြုဘီး၊ 12 ရင်းရင်ဒူးဟှ ပြုဟှားဟှူ သစ်စာဟှို ဖျစ်ဟှူကြောန့် ပြစ်စီရင်ရှင်းဟှို ခံရလေ့မယ်။ 13 နော့-က်ဘီး အီနအီ လည်ဘီးဟှာ ပျင်းကိုးဟှူစိ ရှိလာတတ်ဟှယ်။ အယ်မျိုး ပျင်းကိုးဟှူနမကဘဲ သူများချင်းပြောဘီး ကိုယ့်န ဆိုင်ဘဲဟှူ သူတပါး ကိစလေမာ ဝမ်ရောနှောတတ်ဟှယ်။ 14 အယ်ကြောန့် သတ်ငယ်ဟှူ မောက်ဆိုးမလေဟှာ အီထောန်ပြုသားမွီးဘီး အီမှုကိစဟှို စီမံကွပ်ကဲဘီး ရန်သူဟှို ကဲ့ရဲ့ပြစ်တန်ဟှူခွမ့် ပေးဘဲနေဟှို့တွပ် ငါလိုရှင်ပါဟှယ်။ 15 ဖြားဖြစ်ကြောန့်နူးဆိုဟှာ တချို့ မောက်ဆိုးမလေဟှာ လမ်းလွဲဘီး စာတန်နော့-က်ဟှို လိုက်ဟှားဂေ့ဟှူကြောန့် ဖြစ်ဟှယ်။ 16 ယောင်ကြည်ဟှူမီးမ တယော့-က်ယော့-က်မာ ဆွေမျိုးတော်စပ်ဟှူ မောက်ဆိုးမလေ ရှိဟှယ် ဆိုဟှာ သင်းတော်တွပ် ဝန်ထောက်ဝန်ဘိုးလေ ဖြစ်ဘဲနေအောန် သူကိုယ်တိုင် ကူညီစောန့်ရှော့-က်ပေး ရမယ်။ အယ်မျိုးဆိုဟှာ အားကိုးရာမဲ့ဟှူ မောက်ဆိုးမလေဟှို သင်းတော်ဟှ ပြုစုကျွေးမွေးနိုင်လေ့မယ်။

17 ကောန်းကောန်းမွန်မွန်ဟှား အောက်ချောက်ဟှူ သင်းအောက်လေ ထူးသဖြင့် တရားဟောရှင်း၊ ဆောန်းမ သွန်သန်ရှင်းဟှို ကြိုးစားဘီး လောက်ဆောန်ဟှူ သူလေဟှာ လှူနှေ့ဆဟှို ခံထိုက်ဟှယ် ဆိုဘီး မှတ်ယူအပ်ဟှယ်။ 18 ✝၅.၁၈ မ ၁၀.၁၀; လု ၁၀.၇ဖြားဖြစ်ကြောန့်နူးဆိုဟှာ ကျမ်းစာဟှ "ဗားနန်းဟှူ နွားရဲ့ ဇပ်ပေါ့-က်ဟှို ချောက်တီးန" ဆိုဟှူဇာန "လောက်လောက်ဟှူ သူဟှာ လောက်ခဟှို ရထိုက်ဟှယ်" ဆိုဘီး ဖော်ပြဟှားကြောန့် ဖြစ်ဟှယ်။ 19 သတ်သေခံ နှေ့ယော့-က်၊ သောင်းယော့-က် မှေ့ဘဲနေဟှာ သင်းအောက်ဟှို ပြစ်တန်စွပ်စွဲရှင်းဟှို လတ်ခံန။ 20 ကျန်ဟှူ သူလေလည်း ကြော့-က်ရွံ့မှုရှိဟှို့တွပ် ပြစ်လောက်ဟှူ သူလေဟှို လူလေရှေ့မာ ဆောင်းမပါ။

21 နန်ဟှာ အယ်မူဇာလေဟှို ခွဲခြားရှင်းမှေ့ဘဲ စောန့်ရှော့-က်ဘီးဟှာ ဖြားဇာဟှိုမှ ဘက်လိုက်ဘဲန လောက်ဟှို့တွပ် ဘုရားသခင်န ယေရှုခရစ်တော် ရှေ့မာရော၊ ဝီးကော့-က်ခံရဟှူ ကောန်းဂန်တမန်လေ ရှေ့မာရော ငါနန့်ဟှို လေးလေးနတ်နတ်ဟှား တိုက်တွန်းပါဟှယ်။ 22 ဖယ်သူလေရဲ့ ထတ်မာဘဲ့ဖြစ်ဖြစ် လတ်ဟှို ဗြန်းဗြန်တန်န။ တခြားသူလေရဲ့ ပြစ်နှိုက် ဆစ်ဆံန။ ကိုယ့်ကိုယ်ကိုယ် သန့်ရှင်းစင်ကြယ်အောန် စောန့်ရှော့-က်ပါ။

23 နန့်ရဲ့ စာအီန ခါဘီးခါ ဖြစ်တတ်ဟှူ ဖျားနာမှုလေကြောန့် ရေဟှို လော့-က်ဘဲ့ သော့-က်ဘဲန ဝိုင်နဲနဲဟှိုလည်း သောင်းဆောန်ပါ။

24 တချို့လူလေရဲ့ ပြစ်လေဟှာ တရားစီရင်ခန်ဟှ သိသာထန်ရှားတတ်ဟှယ်။ တချို့လူလေရဲ့ ပြစ်လေဟှာလည်း နော့-က်မှဘဲ့ ထန်ရှားတတ်လေဟှယ်။ 25 အယ်မျိုးဘဲ့ တချို့သူလေရဲ့ သုစရိုက်ဟှာ သိသာထန်ရှားတတ်ဟှယ်။ ထန်ရှားသေးဘဲဟှူ သုစရိုက်ဟှိုလည်း ဖောင်းကွယ်ဘီး ထားနိုင်ဟှ။