1 ညီကို မောန်နှမလေ၊ နော့-က်ဆောင်း ပြောရမယ် ဆိုဟှာ သခင်ဘုရားန တလောင်းတဝဒဲဖြစ်ဘီး ဝန်းသာဂေ့ပါ။ ရင်ဟှ ငါရေးဘီးဟှာ ဖော်ပြဟှားဟှူ ကြောန်းရာလေဟှို ခုလည်းထပ်ဘီးဟှာ ဖော်ပြရဟှူဇာဟှာ ဝန်လေးဟှ၊ နန်းနို့လေ ပိုဘီး ဟှာ လောင်ခြောင်ဟှို့တွပ်ဖြစ်ဟှယ်။ 2 ခွီးဖြစ်ဟှူလူ၊ ကောန်းဘဲ့ဟှူကျင့်ဟှို ကျင့်ဟှူလူ၊ ကိုယ်အင်္ဂါဟှို လှီးဖြတ်ရမယ် ဆိုဘီး ပြောဟှူလူလေဟှို ဒိနရှောန်ဂေ့ပါ။ 3 ရေဖျားလှီးရှင်းဟှို ခံရဟှူ လူလေဟှာ အယ်လူလေမှုဘဲ့န နို့လေဘဲ့ဖြစ်ဟှယ်။ ဖြားဖြစ်ကြောန့်နူးဆိုဟှာ နို့လေဟှာ ကိုယ်တော်ရဲ့ ဝိညာဉ်တော်ကြောန့် ဘုရားသခင်ဟှို ကိုးကွယ်ဝတ်ပြုဘီး ယေရှုခရစ်တော်န တလောင်းတဝဒဲ ဖြစ်ဟှူကြောန့် ရွှင်လန်းဘီး ဝန်းသာဟှူ လူလေ ဖြစ်ဟှယ်။ နို့လေဟှာ ပ္လန်ဟှ လတ်ခဏာလေဟှို ကိုးစားဟှ။ 4 အယ်ဘေမဲ့ ဇာတိနှိုက် အားကိုးဇာလည်း ငါ့မာ ရှိဟှယ်။ ယော့-က်ယော့-က်ဟှ ပ္လန်ဟှ လတ်ခဏာလေဟှို အားကိုးဇာ ရှိမယ် ဆိုဟှာ ငါ့မာလည်း သူ့ထတ် ပိုဘီး ဟှာ အားကိုးနိုင်ဟှူ ကြောန်းလေရှိဟှယ်။ 5 ✝ငါဟှာ ရှစ်ရစ်မြော့-က်နေ့မာ ရေဖျားလှီးရှင်းဟှို ခံဘီးဟှာ ဣသရေလလူမျိုး ဗင်္ယာမိန်နွယ်ဝမ်၊ ယုဒလူမျိုးဖြစ်ဟှူ မိဖလေဟှနေဘီးဟှာ မွီးလာဟှူလူ ဖြစ်ဟှယ်။ ပညတ်တရား စောန့်ထီးဟှူဇာန ပတ်သတ်ဘီး ပြောရမယ် ဆိုဟှာ ငါဟှာ ဖာရိရှဲ ဂိုဏ်းဝမ် ဖြစ်ဟှယ်။ 6 ✝ဘာသာရေး စိအားကီးဟှူ ဖတ်မာပြောမယ် ဆိုဟှာ သင်းတော်လေဟှို ညှဉ်းဆဲ နှိစစ်ဟှူလူ ဖြစ်ဟှယ်။ ပညတ်တရားဟှို လိုက်ရှော့-က်ရှင်းအားဖြင့် ဖြောန့်မတ်မယ် ဆိုဟှာ ငါဟှာ ပြစ်တန်ဇာမှေ့ဘဲ့ဟှူ လူဖြစ်ဟှယ်။ 7 အယ်ဘေမဲ့ အယ်ဇာလေဟှ ငါ့တွပ် မ္လတ်ဖြစ်ဟှယ် ဆိုဘီး ပြောနိုင်ဘေမဲ့ ခုဟှ ခရစ်တော်တွပ်ကြောန့် ရှောင်းဘဲ့ဖြစ်ဟှယ် ဆိုဘီး မှတ်လိုက်ဟှယ်။ 8 အယ်မျှလော့-က်ဘဲ့ မှုဘဲန ငါ့ရဲ့ သခင်ခရစ်တော်ဟှို သိကျွမ်းရဇာဟှာ အယ်ဇာလေနရော၊ ရှိမျှဂူလောင်းထတ် တဂိုးရှိဟှူကြောန့် အယ်ဇာလေဟှိုရော ရှောင်းဘဲ့ဖြစ်ဟှယ် ဆိုဘီး ငါမှတ်ဟှယ်။ ငါဟှာ ကိုယ်တော်တွပ် ရှိမျှဂူလောင်းဟှို ပစ်လိုက်ဟှယ်။ ယေရှုခရစ်တော်ဟှို မ္လတ်ရဟှို့ရော၊ ကိုယ်တော်န တလောင်းတဝဒဲ ဖြစ်နိုင်ဟှို့ရော အယ်ဇာလေဟှို မှိုက်လေမျိုးဘဲ့ ငါဟှာ သတ်မှတ်ဟှယ်။ 9 ငါဟှာ ပညတ်တရားဟှို စောန့်ထီးဟှူကြောန့် ဖြောန့်မတ်ဟှူဇာဟှို ရဇာမှုဟှ ခရစ်တော်ဟှို ယောင်ကြည်ကြောန့်ဘဲ့ ဖြောန့်မတ်ရှင်းဟှို ရဟှယ်။ အယ်မျိုးဘဲ့ ဘုရားသခင်ပေးသနားဟှူ ဖြောန့်မတ်ရှင်းဟှာ ယောင်ကြည်ရှင်းမာဘဲ့ ခြေခံဟှယ်။ 10 ငါဟှာ ခရစ်တော်ဟှို သိကျွမ်းဇာ၊ ရှင်ပ္လန်ထမြော့-က်ဟှူ တဂိုးတော်ဟှို ခံစားရဟှူဇာ၊ ခရစ်တော်နတူးဒူ ဆင်းရဲဒေါက်ခခံရဟှူဇာ၊ ကိုယ်တော်သေခံဟှူဇာမာ ပါဝမ်နိုင်ဟှို့တွပ် လိုရှင်တောန်းတဟှယ်။ 11 အယ်မျိုးမှုဘဲ ငါကိုယ်တိုင်သေဘီးဟှာ ရှင်ပ္လန်ထမြော့-က်ဟှူခွမ့်ဟှို ရမယ် ဆိုဇာဟှို မျှော်လင့်နိုင်ဟှယ်။

12 ငါဟှာ အောန်မြင်ဘီးဟှာ ပြစ်မှေ့ဟှ ဆိုဇာဟှို ပြောရှင်ဇာ မှုဟှ။ အယ်ဘေမဲ့ အယ်ဆုဟှို ငါ့ဟှိုပေးဟှို့တွပ် ယေရှုခရစ်တော်ဟှာ ငါ့ဟှို ဆွဲခေါ်ဘီး ရဟှားဟှူကြောန့် ငါဟှာ အယ်ဆုဟှို ရနိုင်ဟှို့တွပ် ကြိုးစားဘီးနေဟှယ်။ 13 ညီကို မောန်နှမလေ၊ ငါဟှာ အယ်ဆုဟှို ရဟှားဟှယ် ဆိုဘီး ထန်ဟှ၊* ငါလောက်ဟှူ တခုဒဲဖြစ်ဟှူဇာဟှ ငါ့နော့-က်မာ ရှိနေဟှူဇာလေဟှို မေ့ပစ်ဘီးဟှာ ငါ့ရှေ့မာ ရှိနေဟှူဇာလေနားဟှို ရော့-က်ဟှို့တွပ် စွမ်းဂူကြိုးစားဟှယ်။ 14 အယ်ကြောန့် ငါဟှာ ဆုဟှိုရဟှို့တွပ် ပန်းတိုင်ဟှို ရှေ့ရှုဘီးဟှာ ပ္လေးဟှယ်။ အယ်ဆုဟှာ ထတ်ရပ်မာ သတ်ရှင်ဟှို့တွပ် ယေရှုခရစ်တော်ကြောန့် ဘုရားသခင်ဟှ ဖိခေါ်ဇာဘဲ့ ဖြစ်ဟှယ်။

15 အယ်ကြောန့် ဝိညာဉ်ရေးရာမာ ကီးထွားလူလေဟှာ အယ်မျိုးစိသဘောလေ ရှိသင့်ဟှယ်။ တချို့လေဟှ တူဘဲဟှူ စိသဘောရှိမယ် ဆိုဟှာ ဘုရားသခင်ဟှ အယ်ဇာဟှို ရှင်းရှင်းလန်းလန်းဟှား ဖော်ပြပေးလေ့မယ်။ 16 ဖယ်မျိုးဘဲ့ဖြစ်ဖြစ် နို့လေဟှာ ခုထတ်ထိ ကိုယ်ရှော့-က်လာဟှူ ပေါင်ဇံတိုင်းဘဲ့ ကျင့်ဂေ့ဇို့။

17 ✝ညီကို မောန်နှမလေ၊ နန်းနို့လေဟှာ ငါ့နားမာ တုယူဂေ့။ နို့လေပြဟှူ စံနမူနာကောန်းလေဟှို သတ်ရှင်ဘီး လိုက်နာဂေ့ဟှူလူလေဟှို ရှုမှတ်ဂေ့ပါ။ 18 ဖြားဖြစ်ကြောန့်နူးဆိုဟှာ နန်းနို့ဟှို မကြာမကြာ ငါဟှာ ဖော်ပြဖူးဟှယ်။ ခုလည်း မျစ်ရယ်က္လဘီးဟှာ ဖော်ပြဟှယ်။ ခရစ်တော်ရဲ့ လတ်ဝါးကပ်တိုင်ထတ်မာ သေခံရှင်းတရားန ဆန့်ကျင်ဘီးကျင့်နေဟှူ လူလေဘောင်ဂီး ရှိနေဟှယ်။ 19 အယ်လူလေဟှာ ငရဲမာလမ်းဆောင်းဘီး ပျစ်စီးဂေ့လေ့မယ်။ သူးနို့လေရဲ့ ဘုရားဟှ သူးနို့ဗိုက်ဘဲ့ ဖြစ်ဟှယ်။ သူးနို့ဟှာ ရှစ်ကြော့-က်ရဟှူဇာလေဟှို ချီးမွမ်းဘီး ကြွားဂေ့ဟှယ်။ လောကဟှ ဇာလေဟှိုဘဲ့ စိစွဲလမ်းဂေ့ဟှယ်။ 20 နို့လေဟှ ကောန်းဂန်နိုင်ငံသား ဖြစ်ဟှူကြောန့် ကောန်းဂန်ဘောင်မာ နို့လေရဲ့ ကယ်တန်ရှင် သခင်ယေရှုခရစ်တော် ကြွလာဟှူဇာဟှို စောန့်မျှော်ဘီး ရှိနေဂေ့ဟှယ်။ 21 ကိုယ်တော်ဟှာ ရာအားလာင်းဂူဟှို သူ့ရဲ့ အာဏာစစ်အော့-က်မာ ရော့-က်စေဟှူ တဂိုးတော်ကြောန့် နို့လေရဲ့ သေတတ်ဟှူ ကိုယ်ခန္ဓာဟှို ဖောင်းသရေတော်န ပ္လဲ့ဇောင်ဟှူ ကိုယ်ခန္ဓာနတူအောန် ပ္လောန်းလဲပေးလေ့မယ်။