1 အယ်ကြောန့် နို့လေဟှာ လွဲချော်သွားဘဲနေအောန် ကြားရဟှူ ဒေသနာတော်လေဟှို စိနှလောင်းထဲမာ မှတ်မိစွဲလန်းမှုရှိဂေ့ရမယ်။ 2 ကောန်းဂန်တမန်လေအားဖြင့် ထားတော်မူဟှူ ဗျာဒိတ်တော်ဟှာ မှန်ကန်ဘီး ပြစ်မှားကျူးလွန်ဟှူမှု မျိုးမျိုးလေဟှာ ခံထိုက်ဟှူပြစ်ဒန်လေဟှို ခံရဟှို့မှန်မယ် ဆိုဟှာ၊ 3 စဦးဟှနေဘီး သခင်ဘုရားဟောတော်မူဟှူ တရားစကားတော်ဟှို ကြားရဟှူသူလေဟှ ယောင်လော့-က်ဟှူသတ်သေအားဖြင့် နို့လေဟှို ဟောပြောဟှူ အယ်မျှလော့-က်ကီးမားဟှူ ကယ်တန်ရှင်းတရားဟှို နို့လေနားထောန်ဘဲနေဟှာ ပြစ်ဒန်န ဖယ်မျိုးလွတ်ဂေ့လေ့မယ်နူး။ 4 အယ်မူသတ်သေခံဟှူ သူလေနတူးဒူ ဘုရားသခင်ဟှာ နိမိတ်လတ်ခဏာနဖြစ်ဖြစ်၊ အံ့ဩဘွယ်ဟှူ မှုလေနဖြစ်ဖြစ်၊ ထူးဆန်းဟှူတဂိုး ဘောန်းဇောင်နဘဲ့ဖြစ်ဖြစ်၊ သန့်ရှင်းဟှူဝိညာဉ်တော်ဟှာ သူ့ရဲ့ လိုတော်ရှိဟှူတိုင်း ဝီမျှပေးဟှူ ဆုကျေးဇူးလေနဖြစ်ဖြစ် သတ်သေခံတော်မူဟှယ်။

5 နို့လေပြောဆိုဟှူ နော့-က်ကပ်ကမ္ဘာဟှို အောက်စိုးရဟှူခွမ့်ဟှို ကောန်းဂန်တမန်လေရဲ့ လတ်မာ အပ်ပေးဟှားဇာ မှုဟှ။ 6 ကျမ်းစာတချစ်မာ၊

"လူဟှာ ဖယ်မျိုးသူဖြစ်ဟှူကြောန့် ကိုယ်တော်ဟှာ အော့-က်မေ့လေးထားရပါနူး။ လူသားဟှာ ဖယ်မျိုးသူဖြစ်ဟှူကြောန့် ကေ့ရှုရပါနူး။

7 ကိုယ်တော်ဟှာ သူ့ဟှို ကောန်းဂန်တမန်လေထတ် နဲနဲဟှား နိက္လစေတော်မူဘီးဟှာ

သူ့ရဲ့ ခေါန်းဟှို ဖောင်းသရေတော်န ပတ်ရစ်တော်မူဘီး၊*

8 ရှိမျှဂူလောင်းဟှို ကိုယ်တော်ရဲ့ ခေဖွားအော့-က်မာ ခ္လဟှားတော်မူဟှယ်" ဆိုဘီး ဖော်ပြဟှားလေဟှယ်။

"ဂူလောင်းဟှို ခ္လဟှားတော်မူဟှယ်" ဆိုဘီး သတ်သေခံဟှားဇာဟှာ ခ္လဟှားဘဲန ကျန်ရစ်ဟှူ ဇာလေ ဖြားဇာလည်း မှေ့ဟှ။ ခုဆိုဟှာ ဂူလောင်းဟှို ခ္လဟှားဇာလေဟှို နို့လေဗြင်ရသေးဟှ။ 9 အယ်ဘေမဲ့ ယေရှုဟှာ ဘုရားသခင်ရဲ့ ကျေးဇူးတော်အားဖြင့် လူလေ ဂူလောင်းတွပ် သေခံရဟှူခွမ့် ရှိစေဟှို့ ကောန်းဂန်တမန်လေထတ် နဲနဲဟှား နိက္လခံရဘီးမှ သေခံရဟှူကြောန့် ခေါန်းတော်မာ ဖောင်းသရေတော်န ပတ်ရစ်ဘီး ရှိနေဇာဟှို နို့လေဗြင်ရဂေ့ဟှယ်။ 10 ဖြားဖြစ်ကြောန့်နူးဆိုဟှာ သားမီးလေ ဘောင်ဂီးဟှို ကယ်တန်ဘီး ဖောင်းစည်းဇိမ် စံစားရာဟှို ပို့ဆောန်ဟှူ သခင်ဟှာ ဒေါက်ခဝေဒနာလေအားဖြင့် စောင်လင်ရှင်းဟှို ရော့-က်ရဟှို့တွပ် ရှိမျှဂူလောင်းဟှို ဖန်ဆင်းဘီး အောက်စိုးတော်မူဟှူ ဘုရားသခင်ဟှာ စီရင်တော်မူလေဟှယ်။

11 သန့်ရှင်းပေးဟှူသူန သန့်ရှင်းခံရဟှူ သူဟှာ ဖတယော့-က်ဒဲဘဲ့ ရှိဟှယ်။ အယ်ကြောန့် သန့်ရှင်းပေးဟှူ ယေရှုဟှာ သန့်ရှင်းခံရဟှူ သူလေဟှို ညီကို မောန်နှမလေ ဆိုဘီး ခေါ်ဟှူဇာဟှို ယှစ်ကြော့-က်တော်မူဟှ။ 12 ယေရှုဟှ၊

"ကျွန်တော်ဟှာ ကိုယ်တော်ရဲ့ နာမတော်ဟှို ကျွန်တော့်ရဲ့ ညီကို မောန်နှမလေဟှို ကြားပြောပါမယ်။

ပရိသတ်စည်းဝေးလယ်မာ ကိုယ်တော့်ဟှို ချီးမွမ်းဘီး ချင်းဆိုပါမယ်" ဆိုဘီး မိန့်တော်မူလေဟှယ်။

13 နော့-က်တချစ်ဟှ "ငါဟှာ ဘုရားသခင်ဟှို အားကိုးမယ်" ဆိုဘီး လာဟှယ်။ နော့-က်ဘီး "ငါဟှနေစဘီး ငါ့ဟှို ဘုရားသခင်ပေးဟှားဟှူ သားမီးလေရှိဟှယ်" ဆိုဘီး လာလေဟှယ်။

14 အယ်သားမီးလေဟှာ သွီးသားဇာတိန ဆစ်ဆံဟှူ သူလေဖြစ်ဟှူကြောန့် ကိုယ်တော်ဟှာ သွီးသားဟှို ခံယူဘီး သေခံတော်မူဟှူ ဇာအားဖြင့် သေရှင်းတရားဟှို စိုးရဟှူသူဖြစ်ဟှူ မာရ်နတ်ရဲ့ တဂိုးဟှို ခ္လိုးဖဲ့ဖျစ်ဆီးဟှို့တွပ်န၊ 15 တသတ်လောင်း သေဘေးဟှို ကြော့-က်ဘီး ကျွန်ခံနေရဟှူ သူလေဟှို လွှတ်ရှင်းပေးဟှို့တွပ် ဖြစ်ဟှယ်။ 16 တကယ်ဘဲ့ ကိုယ်တော်ဟှာ ကောန်းဂန်တမန်လေဟှို မဇဟှူဇာမှုဘဲ အာဗြဟံမျိုးနွယ်ဟှို မဇတော်မူဟှူဇာ ဖြစ်ဟှယ်။ 17 အယ်ကြောန့် ကိုယ်တော်ဟှာ လူလေရဲ့ ပြစ်လေဟှို ဖြေလွှတ်ဟှို့တွပ် သစ်စာ၊ ကရုဏာနပ္လဲ့ဝဟှူ ယဇ်ပုရောဟိတ်မန်းဖြစ်န ဘုရားသခင်ရဲ့ မှုတော်ဟှို လောက်ဆောန်နိုင်ဟှို့တွပ် ရာရာမာ သူ့ရဲ့ ညီကိုလေန တူရဟှို့ကြောန်း ရှိလေဟှယ်။ 18 အယ်ကြောန့် ကိုယ်တော်ဟှာ အယ်မျိုး စောင်ဇမ်းနှော့-က်ယှစ်ရှင်းလေဟှို ကိုယ်တိုင်ခံဘီး ဆင်းရဲဒေါက်ခလေန ကျင်လည်ဖူးဟှူကြောန့် စောင်ဇမ်းနှော့-က်ယှစ်ရှင်းမှုရာလေန တွိကြောင်ရဟှူသူလေဟှို ကူညီမဇဟှို့တွပ် တတ်နိုင်တော်မူလေဟှယ်။