ဟေဗြဲ 6

1 အယ်ကြောန့် နို့လေဟှာ ခရစ်တော်န ဆိုင်ဟှူ ခြေခံသွန်သန်ချစ်လေဟှို ထားရစ်ဘီး စောင်လင်ရင့်ကျတ်ရှင်းဟှို တတ်လှမ်းဂေ့ဇို့။ သေရှင်းန ဆိုင်ဟှူကျင့်လေဟှ နောန်ဒရရှင်းလေ၊ ဘုရားသခင်ဟှို ယောင်ကြည်ရှင်းလေ၊ 2 ဗတ္တိဇံ*၆.၂ ဗတ္တိဇံ၊ အယ်မျိုးမှုဘဲနေဟှာ စင်ကြယ်ရှင်း ခမ်းနားလေ။န ဆိုင်ဟှူသွန်သန်ရှင်းလေ၊ လတ်တန်မင်္ဂလာလေ၊ သေဟှားဘီးသူလေ ရှင်ပ္လန်ထမြော့-က်ဟှူကြောန်းလေ၊ ထာဝရပြစ်ဒန်စီရင်ဟှူ ကြောန်းရာလေဟှို ထပ်ဘီး ခြေပြုဘဲနေဂေ့ဇို့။ 3 ဘုရားသခင် ခွမ့်ပေးမယ် ဆိုဟှာ နို့လေ အယ်မျိုးလောက်ဂေ့မယ်။

4 လန်းရောန်ထဲဟှို တခါရော့-က်ဘီး၊ ကောန်းဂန် ဆုကျေးဇူးလေဟှို ဗြဲစမ်းရဘီး၊ သန့်ရှင်းဟှူဝိညာဉ်တော်ဟှို ခံယူဘီး၊ 5 ဘုရားသခင်ရဲ့ ကောန်းမြတ်ဟှူ စကားတော်န နော့-က်ကပ်ကာလ တဂိုးလေဟှို ဗြဲစမ်းရဘီးမှ၊ 6 ရွေ့လျော့ဘီး ဖော့-က်ပ္လန်ဟှူ သူလေဟှာ ဘုရားသခင်ရဲ့ သားတော်ဟှို သူးနို့ကိုယ်တိုင် လတ်ဝါးကပ်တိုင်မာ ကွပ်မျစ်ဘီး လူလေရှေ့မာ ကဲ့ရဲ့ရှုတ်ခ္လဟှူ သူလေဖြစ်ဟှူကြောန့် နော့-က်ထပ် နောန်ဒရရှင်းဟှို ရော့-က်စေနိုင်ဟှ။

7 ဥပမာ မ္လေဂီးဟှာ သူ့ထတ်ဟှို ခါဘီးခါ က္လဟှူ မိုးရေဟှို သော့-က်ဘီး စိုက်ပျိုးဟှူသူလေတွပ် သီးနှံလေဟှို ဖြစ်ထွန်းစေတတ်ဟှယ် ဆိုဟှာ ဘုရားသခင်နားဟှ ကောန်းဂျီးမင်္ဂလာဟှို ခံစားရဟှယ်။ 8 အယ်ဘေမဲ့ အယ်မ္လေဂီးဟှာ ဆူးဗန်မျိုးမျိုးဟှို ပေါက်စေဟှယ် ဆိုဟှာ သောင်းဇားမရဘဲ့ကြောန့် ကြာခန်မာ ကီရှင်းဟှိုခံရဘီး နော့-က်ဆောင်းမာ မီးရှို့ရှင်းခံရလေဟှယ်။

9 ရှစ်ရဟှူ ညီကို မောန်နှမလေ နို့လေအယ်မျိုးပြောဟှူလည်းဘဲ့ နန်းနို့တွပ်ဟှ ကယ်တန်ရှင်းန ဆိုင်ဟှူဇာလေ၊ ပိုဘီး ကောန်းဟှူဇာလေန ဆိုင်ဟှယ် ဆိုဇာဟှို နို့လေ ယောင်ကြည်စိခ္လဂေ့ဟှယ်။ 10 ဖြားဖြစ်ကြောန့်နူးဆိုဟှာ နန်းနို့လေဟှာ သန့်ရှင်းဟှူသူလေဟှို ရင်းရင်ဒူးဟှ လောက်ကျွေးပြုစုဟှူမျိုးဘဲ ခုလည်း လောက်ကျွေးပြုစုဘီး ကိုယ်တော်ရဲ့ နာမတော်ဟှို ထော့-က်ဘီး နန်းနို့ပြဟှူ ရှစ်ရှင်းမြစ်တာလေဟှို မေ့ဟှားရလော့-က်အောန် ဘုရားသခင်ဟှာ တရားဘဲဟှူသခင် မှုဟှ။ 11 နန်းနို့ ယော့-က်စီတိုင်းဟှာ မျှော်လင့်ရှင်းနဆိုင်ဟှူ စိခ္လမှု ပ္လဲ့ပ္လဲ့ဝဝရှိဂေ့ဟှို့တွပ်န အယ်မျိုး စိအားထတ်သန်ရှင်းဟှို ဆောင်းထိ ပြနိုင်ဟှို့တွပ် နို့လေလိုရှင်ပါဟှယ်။ 12 အယ်မျိုး နန်းနို့လေဟှာ ပျင်းဂေ့ဘဲန ကြိုးစားအားထုဘီး ယောင်ကြည်ရှင်း၊ စိရှယ်ရှင်းအားဖြင့် ဂဒိတော်ဟှို မွီဆစ်ခံဟှူသူလေ ဖြစ်ဂေ့ဟှို့တွပ် ဖြစ်ဟှယ်။

စိခ္လရဟှူ ဂဒိတော်ကြောန်း

13 ဘုရားသခင်ဟှာ အာဗြဟံဟှို ဂဒိပေးဟှူ ခီမာ တိုင်တည်ကီဆိုဟှို့တွပ် သူ့ထတ်ကီးမြတ်ဟှူသူ မှေ့ဘဲဟှူကြောန့် ကိုယ့်ကိုယ်ကိုယ် တိုင်တည်ကီဆိုတော်မူဘီး၊ 14 "ငါဟှာ နန့်ဟှို မြဲဒမ်းကောန်းဂျီးပေးဘီး နန့်ရဲ့ မျိုးနွယ်ဟှို ပွားများစေမယ်" ဆိုဘီး မိန့်တော်မူဟှယ်။ 15 အယ်မျိုး အာဗြဟံဟှာ စိရှယ်ရှယ်န စောန့်နေဟှူကြောန့် ဂဒိတော်ဟှို ခံစားရလေဟှယ်။ 16 လူလေဟှာ ကိုယ့်ထတ်ကီးမြတ်ဟှူ သူလေဟှို တိုင်တည်ကီဆိုလေ့ရှိဘီး အယ်မျိုး တည်ပြုပြောဆိုဟှူ ဂဒိသစ်စာဟှာ ရှင်းရှင်း ဂြင်းခူမှုဟှို ငြီးအေးစေတတ်ဟှယ်။ 17 အယ်ကြောန့် ဂဒိတော်ဟှို မွီခံရဟှူသူလေဟှာ ဘုရားသခင်ရဲ့ ကြံစည်တော် ဖော့-က်ပ္လန်ဘဲဟှူ ကြောန်းဟှို သိရဟှို့တွပ် ဘုရားသခင်ဟှာ ကီဆိုရှင်းအားဖြင့် အာမခံတော်မူလေဟှယ်။ 18 ဖြားဖြစ်ကြောန့်နူးဆိုဟှာ ဘုရားသခင်ဟှာ မုသားသောင်းနိုင်ဘဲဟှူ ရာဖြစ်ဟှူ ဖော့-က်ပ္လန်ဘီး ပ္လောန်းလဲနိုင်ဘဲဟှူ ရာနှေ့ပါးဟှို မှီပြုဘီး ကိုယ့်ရှေ့မာ ထားဟှားဟှူ မျှော်လင့်ရာဟှို ခိုလှုံဟှို့တွပ် ပ္လေးဟှူနို့လေဟှာ သတ်သာမှု ကီးကီးမားမား ရဟှို့တွပ် ဖြစ်ဟှယ်။ 19 အယ်မျှော်လင့်ချစ်ဟှာ နို့လေရဲ့စိဝိညာဉ်တွပ် မြဲမြံ့ခိုင်ခန့်ဟှူ စိနှလောင်းရဲ့ က္လော့-က်ဆူးဟှူမျိုး နို့လေမာရှိဘီး ဗိမာန်တော်လိုက်ကာထဲဖတ်ဟှို ဝမ်ရော့-က်လေဟှယ်။ 20 မေလခိဇေဒက်ဟှူမျိုး*၆.၂၀ မေလခိဇေဒက်ဟှူမျိုး (ရှု ၅.၆)။ ထာဝရ ယဇ်ပုရောဟိတ်မန်းဖြစ်ဟှူ ယေရှုဟှာ နို့လေတွပ် အယ်ဌာနတော်ထဲဟှို ရှေ့ဆောန်ဘီး ဝမ်ဟှူသူဖြစ်လေဟှယ်။