1 အယ်ကြောန့် ဘုရားသခင်ရဲ့ ငြီဝပ်ရှင်းထဲဟှို ဝမ်ရဟှူခွမ့်ဟှို ပေးဟှူ ဂဒိတော်ဟှာ နို့လေမာရှိနေရဲ့န နန်းနို့ထဲဟှ ဝမ်စားရဘဲဟှူသူ တယော့-က်လည်း မှေ့ဘဲနေအောန် ဒိပြုဂေ့ဇို့။ 2 ဖြားဖြစ်ကြောန့်နူးဆိုဟှာ နို့လေလည်း အယ်သူလေမျိုး ဝန်းသာဇာ ဒန်းကောန်းဟှို ကြားရဂေ့ဘီ။ အယ်ဘေမဲ့ သူးနို့ကြားရဟှူ ဒန်းကောန်းဟှာ ယောင်ကြည်ရှင်းပါဘဲကြောန့် သူးနို့တွပ် ကျိုးမြဟှ။ 3 ယောင်ကြည်ဟှူ နို့လေဟှာ ဘုရားသခင် ဂဒိထားတော်မူဟှူ ငြီဝပ်ရှင်းထဲဟှို ဝမ်ရဂေ့ဟှယ်။ အယ်မူတိုင်းဘဲ့ ဗျာဒိတ်တော်ဟှ၊

"သူးနို့လေဟှာ ငါ့ရဲ့ ငြီဝပ်ရှင်းထဲဟှို ဝမ်ရဂေ့ဟှ ဆိုဘီး

မျစ်ထွပ်ဟှူကြောန့် ငါကီဆိုဟှယ်" ဆိုဘီး လာဟှယ်။

ငြီဝပ်ရှင်း ဆိုဇာဟှာ ကမ္ဘာဦးစဟှ ဖန်ဆင်းဟှူမှုရာလေ ပီးဆောင်းဘီး ငြီဝပ်နားယူဟှူ ငြီဝပ်ရှင်းဟှို ဆိုလိုဟှူဇာဖြစ်ဟှယ်။ 4 ကျမ်းစာဟှ ခွန်နစ်ရစ်မြော့-က်ဟှူ နေ့နပတ်သတ်ဘီး "ဘုရားသခင်ဟှာ ခွန်နစ်ရစ်မြော့-က်ဟှူနေ့မာ သူ့ရဲ့မှုရာလေ ရှိဟှူမျှအားလောင်း ပီးစီးဟှူကြောန့် ငြီဝပ်ဘီး နေတော်မူဟှယ်" ဆိုဘီး လာလေဟှယ်။ 5 နော့-က်ဘီး "သူးနို့လေဟှာ ငါ့ရဲ့ ငြီဝပ်ရှင်းထဲဟှို ဝမ်ရဂေ့မယ် မှုဟှ" ဆိုဘီး အယ်နေရာမာ ဆိုဟှားဟှယ်။ 6 အယ်ကြောန့် အယ်မူ ငြိမ်ဝပ်ရှင်းထဲဟှို ဝမ်ရဟှူခွမ့်ဟှာ တချို့လူလေတွပ် ရှိသေးဟှယ်။ ဝန်းသာဇာ ဒန်းကောန်းဟှို ပထမဦးဆောင်း ကြားရဟှူသူလေဟှာ ယောင်ကြည်ဂေ့ဘဲကြောန့် ဝမ်ရဂေ့ဟှ။ 7 အယ်ကြောန့် ဘုရားသခင်ဟှာ နေ့တနေ့ဟှို "အယ်နေ့" ဆိုဘီး ဆစ်ဘီး ခ္လမှတ်တော်မူဘီးဟှာ နော့-က်နှစ်ပေါန်း ကြာလာဟှူ ခီမာ စဟှ ဖော်ပြဟှားဟှူတိုင်း၊

"အယ်နေ့မာ နန်းနို့လေဟှာ ဘုရားသခင်ရဲ့ ဗျာဒိတ်တော်သံဟှို ကြားရဂေ့ဟှူကြောန့် ခိုင်မာဟှူ စိနှလောင်း ရှိဂေ့န"

ဆိုဘီး ဒါဝိဒ်အားဖြင့် မိန့်တော်မူလေဟှယ်။

8 တကယ်ဟှိ ယောရှုပေးဟှူ ငြီဝပ်ရှင်းဟှာ ဘုရားသခင် ဂဒိထားတော်မူဟှူ ငြီဝပ်ရှင်း ဖြစ်ဟှယ် ဆိုဟှာ တခြား နေ့ရစ်တရစ်ကြောန်းဟှို မိန့်တော်မူဟှို့ မှုဟှ။ 9 အယ်မျိုးဖြစ်ကြောန့် ဘုရားသခင်ရဲ့ လူမျိုးတော်တွပ် ငြီဝပ်ရှင်း တမျိုးကျန်ရှိသေးဟှယ်။ 10 ဖြားဖြစ်ကြောန့်နူးဆိုဟှာ ဘုရားသခင်ဟှာ သူ့ရဲ့ ဖန်ဆင်းဟှူမှုရာလေ ပီးစီးဟှူကြောန့် ငြီဝပ်ဘီး နေဟှူမျိုး အယ်ငြီဝပ်ရှင်းထဲဟှို ဝမ်ရဟှူသူဟှလည်း ကိုယ့်ရဲ့မှုရာလေဟှို ပီးစီးဟှူကြောန့် ငြီဝပ်ဘီး နေရလေဟှယ်။ 11 အယ်ကြောန့် သူးနို့ရဲ့ နာခံဘဲဟှူ ပေါင်ဇံဟှိုလိုက်ဘီး ဖယ်သူတယော့-က်လည်း ပြိုလဲဘဲ အယ်ငြီဝပ်ရှင်းထဲဟှို ဝမ်ရဟှို့တွပ် ကြိုးစားအားထုဂေ့ဇို့။

12 ဘုရားသခင်ရဲ့ စကားတော်ဟှာ သတ်ရှင်ရှင်း၊ တဂိုးနပြုပြင်ရှင်း၊ သန်လျက်လေထတ် ထတ်ရှင်းမှုန ပ္လဲ့ဇောင်ဟှူကြောန့် သတ်န စိဝိညာဉ်ဟှိုဖြစ်ဖြစ်၊ ရိုးဆစ်န ခြင်ဆီဟှိုဖြစ်ဖြစ် ပိုင်းခြားဘီး ထောက်ချင်းခွမ်းတတ်ဟှယ်။ စိနှလောင်း ကြံစည်လေဟှိုလည်း ထိုးထွမ်းဘီး သိဗြင်နိုင်ဟှယ်။ 13 ဘုရားသခင်ရဲ့ မျစ်မှော့-က်တော်မာ ထန်ရှားဘဲဟှူဇာ ဖြားဇာလည်း မှေ့ဟှ။ ဖန်ဆင်းဟှားဟှူ ရှိမျှဂူလောင်းဟှို မျစ်မှော့-က်တော်မာ ကွယ်ကာမှေ့ဘဲန လှန်ဟှားလေဟှယ်။ နို့လေဂူလောင်းဟှာ ကိုယ်ပြုဟှူ မှုရာလေရှိဟှူမျှ ကိုယ်တော်ရဲ့ စစ်ကြောစီရင်ဇာဟှို ခံရဂေ့လေ့မယ်။

14 အယ်ကြောန့် ကောန်းဂန်ဘောင်ထဲဟှို ကြွဝမ်တော်မူဟှူ ယဇ်ပုရောဟိတ် မန်းဂီးဖြစ်ဟှူ ဘုရားသခင်ရဲ့ သားတော်ယေရှုဟှာ နို့လေရဲ့ ယဇ်ပုရောဟိတ်မန်းဂီး ဖြစ်ဟှူကြောန့် နို့လေဟှာ ယောင်ကြည်ဝန်ခံဟှူ ရာလေဟှို စွဲစွဲမြမြဲ ကိုင်ဆွဲဟှားဂေ့ဇို့။ 15 နို့လေရဲ့ ယဇ်ပုရောဟိတ် မန်းဂီးဟှာ နို့လေခံရဟှူ ဆင်းရဲ ဒေါက်ခလေကြောန့် ကြင်နာနိုင်ဘဲဟှူသူ မှုဟှ။ နို့လေခံရဟှူမျိုး စောင်ဇမ်း နှော့-က်ယှစ်ရှင်း မျိုးမျိုးဟှို ခံစားဖူးဟှူသူ ဖြစ်ဟှယ်။ အယ်ဘေမဲ့ ကိုယ်တော်ဟှာ ဒုစရိုက်ပြစ်န လွတ်ကင်းတော်မူဟှယ်။ 16 အယ်ကြောန့် နို့လေဟှာ သနားကရုဏာတော်န မစရှင်းကျေးဇူးဟှို ခံရဟှို့တွပ် ရဲရင့်ဟှူစိန ကျေးဇူးပလ္လင်တော် ခေရင်းဟှို တိုးဝမ်ဂေ့ဇို့။