1 အယ်ဘီးန ယေရှုဟှာ တဗဲ့တော်လေဟှို လောင်းဝ လတ်လျှော့ဘဲန မြဲဒမ်း ဆုတောန်းရမယ် ဆိုဘီး သူးနို့ဟှို သွန်သန်ဟှို့တွပ် ပေါင်ဥပမာန မိန့်တော်မူလေဟှယ်။ 2 "ဗြို့တဗြို့မာ ဘုရားသခင်ဟှိုလည်း ကြော့-က်ဘဲဟှူ၊ လူလေဟှိုလည်း ရိုသေဘဲဟှူ တရားသူဂီး တယော့-က်ရှိဟှယ်။ 3 အယ်ဗြို့မာရှိဟှူ မောက်ဆိုးမ တယော့-က်ဟှာ သူ့နားဟှို တခီလောင်းလာဘီး ‘ကျွန်မဟှို တရားစွဲဟှူသူဟှို မျှမျှတတ စီရင်ပေးပါ’ ဆိုဘီး တောန်းဗန်ဟှယ်။ 4 ခီကြာဂီး တရားသူဂီးဟှာ အယ်မောက်ဆိုးမရဲ့ လျှော့-က်ဟှားချစ်ဟှို ငြင်းဆန်လေဟှယ်။ အယ်ဘေမဲ့ နော့-က်ဆောင်းမာ သူဟှာ ‘ငါဟှာ ဘုရားသခင်ဟှိုလည်း ကြော့-က်ဟှ။ လူလေဟှိုလည်း ရိုသေဟှ။ 5 အယ်ဘေမဲ့လည်း အယ်မောက်ဆိုးမဟှာ ငါဟှို နှော့-က်ယှစ်ပေးနေဟှူကြောန့် သူ့မှုဟှို တရားနည်းလမ်းတိုင်း စီရင်မယ်။ အယ်မျိုးလောက်ဟှ ဆိုဟှာ သူဟှာ တခီလောင်းလာဘီး နော့က်ဆောင်းမာ ငါဟှို ပန်ဗန်းစေလေ့မယ်!’ ဆိုဘီး ကိုယ့်ကိုယ်ကိုယ် ပြောလေဟှယ်" ဆိုဘီး မိန့်တော်မူလေဟှယ်။

6 သခင်ဘုရားဟှာ ဆစ်ဘီး "တရားဘဲဟှူ တရားသူဂီး ပြောလိုက်ဇာဟှို နားထောန်ကေ့။ 7 ဘုရားသခင်လည်း သူ့နားဟှို နေ့ရောညဉ့်ပါ ကူညီဟှို့တွပ် အော်ဟစ်နေဟှူ၊ သူဝီးကော့-က်ဟှားဟှူ လူလေတွပ် စီရင်ဘဲန နေဟှို့လော။ ကိုယ်တော်ဟှာ အယ်လူလေဟှို ကူညီဟှို့တွပ် ခီဆွဲနေဟှို့လော။ 8 နန်းနို့ဟှို ငါပြောမယ်။ ကိုယ်တော်ဟှာ သူးနို့လေတွပ် ဗြန်းဗြန်ဟှား တရားစီရင်လေ့မယ်။ အယ်ဘေမဲ့ လူ့ရဲ့သား ရော့-က်လာဟှူ ခီမာ ယောင်ကြည်ရှင်းဟှို မ္လေဂီးထတ်မာ တွိရအူးမယ် ဘဲ့လော။" ဆိုဘီး မိန့်တော်မူလေဟှယ်။

9 ကိုယ့်ဖြောန့်မတ်ရှင်းဟှို အားကိုးဘီး တပါးသူဟှို ထန်သေးတတ်ဟှူ သူလေတွပ် ယေရှုဟှာ အယ်ပေါင်ဥပမာန မိန့်တော်မူလေဟှယ်။ 10 "တခါဒူးဟှ လူနှေ့ယော့-က်ဟှာ ဆုတောန်းဟှို့ ဆိုဘီး ဗိမာန်တော်ဟှို သွားဂေ့ဟှယ်။ တယော့-က်ဟှ ဖာရိရှဲ ဖြစ်ဘီး နော့-က်တယော့-က်ဟှ ခွန်ကော့-က်မား ဖြစ်ဟှယ်။ 11 ဖာရိရှဲဟှာ မတ်တတ်ရပ်ဘီး ‘ဘုရားသခင်၊ ကျွန်တော်ဟှာ တခြားသူလေမျိုး လောဘကီးဟှူသူ၊ ဖြောန့်မတ်ဘဲဟှူသူ၊ အီထောန်ရေးဖော့-က်ပ္လန်ဟှူသူ မုဘဲဟှူကြောန့် ကျေးဇူးတန်ဟှယ်။ ကျွန်တော်ဟှာ အယ်ခွန်ကော့-က်မားမျိုးလည်း မုဘဲဟှူကြောန့် ကိုယ်တော့်ဟှို ကျေးဇူးတန်ဟှယ်’ ဆိုဘီး ဆုတောန်းလေဟှယ်။ 12 ‘ကျွန်တော်ဟှာ တဘတ်မာ နှေ့ရစ်စာရှောန်ဘီး ကျွန်တော့်ဝမ်ငွေ ဂူလောင်းရဲ့ ဆယ်ဖို့တဖို့ဟှိုလည်း ပေးဟှယ်’ ဆိုဘီး ဆုတောန်းလေဟှယ်။ 13 အယ်ဘေမဲ့ ခွန်ကော့-က်မားဟှာ ဝီးမာဘဲ့ရပ်နေဘီး ကောန်းဂန်ဟှိုလည်း မော်ကေ့ရဲဘဲန ‘ဘုရားသခင်၊ ပြစ်သား ကျွန်တော့်ဟှို သနားတော်မူပါ!’ ဆိုဘီး ရင်ဖတ်ဟှို ထုဘီးဟှာ ဆုတောန်းလေဟှယ်။ 14 ✝နန်းနို့ဟှို ငါပြောမယ်၊ အယ်ခွန်ကော့-က်မားဟှာ ဘုရားသခင်ရှေ့မာ သူတော်ကောန်းဖြစ်န အီဟှို ပ္လန်ဟှားရဟှယ်။ ဖာရိရှဲဟှ အယ်မျိုးမှုဟှ။ ဖြားဖြစ်ကြောန့်နူးဆိုဟှာ သူ့ကိုယ်သူ ချီးမြှော့-က်ဟှူသူဟှာ နှိခ္လခံရဘီး သူ့ကိုယ်သူ နှိခ္လဟှူသူဟှာ ချီးမြှော့-က်ရှင်းခံရလေ့မယ်" ဆိုဘီး မိန့်တော်မူလေဟှယ်။

15 လူတချို့ဟှာ သူးနို့သားဂန်းလေထတ်မာ လတ်တန်ပေးဟှို့တွပ် ယေရှုနားဟှို ခေါ်ဆောန်လာဟှယ်။ တဗဲ့တော်လေဟှ အယ်မူဇာဟှို ဗြင်ဟှူ ခီမာ သူးနို့ဟှို ပြစ်တန်လေဟှယ်။ 16 အယ်ဘေမဲ့ ယေရှုဟှာ သားဂန်းလေဟှို သူ့နားဟှို ခေါ်လိုက်ဘီး "သားဂန်းလေဟှာ ငါနားဟှို လာပါလေစေ။ သူးနို့ဟှို တားဂေ့န။ ဖြားဖြစ်ကြောန့်နူးဆိုဟှာ ဘုရားသခင်ရဲ့ နိုင်ငံတော်ဟှာ အယ်သူလေရဲ့ နိုင်ငံဖြစ်ဟှူုကြောန့် ဖြစ်ဟှယ်။ 17 နန်းနို့ဟှို ငါ မှန်တိုင်းပြောမယ်၊ ဘုရားသခင်ရဲ့ နိုင်ငံတော်ဟှို သားဂန်းတယော့-က်မျိုး လတ်ခံဘဲဟှူ သူဟှာ နိုင်ငံတော်ဟှို ဝမ်ရလေ့ဟှို့ မုဟှ" ဆိုဘီး မိန့်တော်မူလေဟှယ်။

18 ယုဒခေါန်းဆောန်တယော့-က်ဟှ ယေရှုဟှို "ကောန်းမြတ်ဟှူဆရာ၊ ထာဝရသတ်ဟှို လတ်ခံရရှိဟှို့တွပ် ဖြားမျိုးလောက်ရဟှို့နူး။" ဆိုဘီး မေးလျှော့-က်လေဟှယ်။

19 ယေရှုဟှ "ငါ့ဟှို ကောန်းမြတ်ဟှူသူ ဆိုဘီး ဖြားဖြစ်ကြောန့် ခေါ်ရနူး။ ဘုရားသခင်မှတပါး ကောန်းမြတ်ဟှူသူ ဖယ်သူလည်း မှေ့ဟှ။ 20 ‘အီထောန်ရေးဖော့-က်ပ္လန်န၊ လူသတ်န၊ ခိုးန၊ လီညာဘီး သတ်သေခံန၊ မိဖဟှို ရိုသေရမယ်’ ဆိုဘီး ပညတ်တော်လေဟှို နန်သိဟှယ် မှုဟှလော။" ဆိုဘီး သူ့ဟှို မိန့်တော်မူလေဟှယ်။

21 အယ်သူဟှ "ကျွန်တော်ဟှာ ငဲငယ်ဂဒဲဟှ အယ်ပညတ်လေ ဂူလောင်းဟှို လိုက်ရှော့-က်ပီးဘီ" ဆိုဘီး လျှော့-က်လေဟှယ်။

22 အယ်စကားဟှို ကြားရခီမာ ယေရှုဟှ "နန်လောက်ရဟှို့ တခုကျန်သေးဟှယ်။ နန့်မာရှိဇာလေ ဂူလောင်းဟှို ရောန်းဘီး ရလာဟှူ ကပ်ဟှို ဆင်းရဲသားလေဟှို ပေးပါ။ အယ်ဆိုဟှာ နန်ဟှာ ကောန်းဂန်ဘောင်မာ ဘဏ္ဍာဟှို ရလေ့မယ်။ အယ်ဘီးမှ ပ္လန်လာဘီးဟှာ ငါ့နော့-က်ဟှို လိုက်ရမယ်" ဆိုဘီး သူ့ဟှို မိန့်တော်မူလေဟှယ်။ 23 အယ်သူဟှာ ကိုယ်တော်ရဲ့ စကားတော်ဟှို ကြားရဟှူ ခီမာ ရရာတိုင်း ဝန်းနဲဟှားဟှယ်။ ဖြားဖြစ်ကြောန့်နူးဆိုဟှာ သူ့မာအောက်စာလေ ဘောင်ဂီးရှိဟှူကြောန့် ဖြစ်လေဟှယ်။

24 ယေရှုဟှာ အယ်သူ ရရာတိုင်း ဝန်းနဲဟှားဟှူဇာဟှို ဗြင်တော်မူဟှူ ခီမာ "ဌေးသားလေဟှာ ဘုရားသခင်ရဲ့ နိုင်ငံတော်ဟှို ဝမ်ဟှို့ ရရာတိုင်း ခတ်ဟှယ်။ 25 ဌေးသားဟှာ ဘုရားသခင်ရဲ့ နိုင်ငံတော်ထဲဟှို ဝမ်ဟှို့ထတ် ကုလားအုတ်ဟှာ အပ်ပေါ့-က်ထဲဟှို ဝမ်ဟှို့ ပိုဘီး လွယ်ဟှယ်" ဆိုဘီး မိန့်တော်မူလေဟှယ်။

26 အယ်စကားဟှို ကြားရဟှူ သူလေဟှာ ကိုယ်တော့်ဟှို "အယ်မျိုးဆိုဟှာ ဖယ်သူလေ ကယ်တန်ရှင်း ခံရနိုင်ဟှို့နူး။" ဆိုဘီး မေးလျှော့-က်ဂေ့ဟှယ်။

27 ယေရှုဟှ "လူလေတွပ် ဖြစ်နိုင်ဘဲဟှူ ဇာလေဟှာ ဘုရားသခင်တွပ် ဖြစ်နိုင်ဟှယ်" ဆိုဘီး မိန့်တော်မူလေဟှယ်။

28 အယ်ဘီးန ပေတရုဟှ "ကျွန်တော့်ဟှားလေဟှာ ရှိမျှဂူလောင်းဟှို ထားဟှားရစ်ဘီး ကိုယ်တော် နော့-က်ဟှို လိုက်ဂေ့ဟှယ်" ဆိုဘီး လျှော့-က်လေဟှယ်။

29 ယေရှုဟှာ သူးနို့ဟှို "နန်းနို့ဟှို ငါ မှန်တိုင်းပြောမယ်၊ ဘုရားသခင်ရဲ့ နိုင်ငံတော်တွပ် အီ၊ မယား၊ ညီကိုလေ၊ မိဖလေ၊ သားမီးလေဟှို စွန့်ဟှူ သူဟှာ 30 ခုဘဝမာ ကျိုးဘောင်ဂီး ရရှိဘီးဟှာ နောန်ဘဝမာလည်း ထာဝရသတ်ဟှို ရလေ့မယ်" ဆိုဘီး မိန့်တော်မူလေဟှယ်။

31 ယေရှုဟှ တဗဲ့တော် ဆယ့်နှေ့ပါးဟှို နီးနားဟှို ခေါ်ဘီးဟှာ "နားထောန်ဂေ့! နို့လေဟှာ ယေရုရှလင်ဗြို့ဟှို သွားနေဂေ့ဟှယ်။ အယ်နေရာမာ လူ့ရဲ့သားန သက်ဆိုင်ဟှူ ပရောဖက်လေ ရေးဟှားဇာလေ ဂူလောင်းဟှာ ပ္လဲ့ဇောင်ရလေ့မယ်။ 32 လူ့ရဲ့သားဟှို လှောန်ပြောန်၊ သရော်ဘီး ထွီးရယ်န ထွီးမယ့် လူမျိုးခြားလေ လတ်ထဲဟှို အပ်ဂေ့လေ့မယ်။ 33 သူးနို့လေဟှာ ကီဒန်ပေးဘီး သတ်ဂေ့လေ့မယ်။ အယ်ဘေမဲ့လည်း လူ့ရဲ့သားဟှာ သောင်းရစ်မြော့-က်ဟှူ နေ့မာ ထမြော့-က်လေ့မယ်" ဆိုဘီး မိန့်တော်မူလေဟှယ်။

34 အယ်ဘေမဲ့လည်း တဗဲ့တော်လေဟှာ အယ်မူဇာလေဟှို တခုလည်း ဘောပေါ့-က်ဂေ့ဟှ။ အယ်မူဇာရဲ့ ဓိပါယ်ဟှို ဖောင်းကွယ်ဟှားဟှူကြောန့် ယေရှု မိန့်တော်မူနေဟှူ ဇာလေဟှို နားလည်ဂေ့ဟှ။

35 ယေရှုဟှာ ယေရိခေါဗြို့နားဟှို ရော့-က်လာတော်မူဟှူ ခီမာ မျစ်ကန်းတယော့-က်ဟှာ လမ်းဘေးမာ ထိုင်ဘီး တောန်းစားနေဟှယ်။ 36 သူဟှာ လူအောက်ဂီး ဖြတ်ဟှားဇာဟှို ကြားလိုက်ဟှူ ခီမာ "ဖြားဇာလေဖြစ်နေနူး" ဆိုဘီး မေးလိုက်ဟှယ်။

37 သူးနို့ဟှ "နာဇရက်ဗြို့သားယေရှု ဖြတ်ဟှားတော်မူဟှယ်" ဆိုဘီး သူ့ဟှို ပြောဂေ့ဟှယ်။

38 အယ်သူဟှ "ဒါဝိဒ်ရဲ့သားတော်! ယေရှု! ကျွန်တော့်ဟှို သနားတော်မူပါ!" ဆိုဘီး အော်ဟစ်လေဟှယ်။

39 ရှေ့မာရှိနေဟှူ လူလေဟှ သူ့ဟှို ပြစ်တန်ဂေ့ဘီး တိတိဟှားနေဟှို့ ပြောဂေ့ဟှယ်။ အယ်ဘေမဲ့လည်း သူဟှ "ဒါဝိဒ်ရဲ့သား! ကျွန်တော့်ဟှို သနားတော်မူပါ!" ဆိုဘီး ပိုဘီး အော်ဟစ်လေဟှယ်။

40 အယ်ကြောန့် ယေရှုဟှာ ရပ်နားဘီး မျစ်ကန်းဟှို သူ့နားဟှို ခေါ်လာဟှို့ မိန့်ပေးတော်မူလေဟှယ်။ အယ်သူဟှာ နီးနားဟှို ရော့-က်လာဟှူ ခီမာ ယေရှုဟှ၊ 41 "နန့်တွပ် ငါ့ဟှို ဖြားဇာလောက်စေရှင်ဟှယ်နူး။" ဆိုဘီး သူ့ဟှို မေးတော်မူလေဟှယ်။

သူဟှ "သခင်၊ ကျွန်တော်ဟှို မျစ်စိဗြင်စေတော်မူပါ" ဆိုဘီး လျှော့-က်လေဟှယ်။

42 ယေရှုဟှ "မျစ်စိဗြင်စေ! နန့်ရဲ့ ယောင်ကြည်ရှင်းဟှ နန့်ဟှို ကယ်တန်ဘီ" ဆိုဘီး သူ့ဟှို မိန့်တော်မူလေဟှယ်။

43 ရှစ်ရှင်းဘဲ့ သူဟှာ ဗြင်ဟှားလေဟှယ်။ အယ်ဘီးန ဘုရားသခင်ရဲ့ ကျေးဇူးတော်ဟှို ချီးမွမ်းဘီးဟှာ ယေရှု နော့-က်ဟှို လိုက်လေဟှယ်။ အယ်မူဇာဟှို ဗြင်လိုက်ဟှူ လူအောက်ဂီးဟှာ ဘုရားသခင်ဟှို ချီးမွမ်းဂေ့ဟှယ်။