လုကာ 20

ယေရှုရဲ့ ခွမ့်အာဏာနဆိုင်ဟှူ မေးခွန်းကြောန်း

1 တနေ့မာ ယေရှုဟှာ ဗိမာန်တော်ထဲမာ လူလေဟှို သွန်သန်တော်မူဘီးဟှာ ဒန်းကောန်းဟှို ဟောတော်မူနေဟှူ ခီမာ ယဇ်ပုရောဟိတ်ဂီးလေန ကျမ်းတတ်ဆရာလေဟှာ သတ်ကီးဝါဂီးလေနတူးဒူ ရော့-က်လာဘီး 2 ကိုယ်တော့်ဟှို "အယ်မူဇာလေဟှို ဖြားခွမ့်အာဏာန လောက်နေနူး။ အယ်ခွမ့်အာဏာဟှို ဖယ်သူဟှ ပေးဟှားနူး။" ဆိုဘီး မေးလျှော့-က်လေဟှယ်။

3 ယေရှုဟှာ "အယ်ဆိုဟှာ ငါလည်း နန်းနို့ဟှို မေးခွန်းတခု မေးအူးမယ်။ ငါ့ဟှို ဖြေပေးဂေ့။ 4 ယောဟန်ရဲ့ ဗတ္တိဇံဟှာ ကောန်းဂန်ဟှနေ လာဇာလော။ လူလေဟှနေ လာဇာလော။" ဆိုဘီး သူးနို့ဟှို မေးတော်မူလေဟှယ်။

5 သူးနို့ဟှာ "နို့လေဖြားမျိုး ဖြေရမယ်နူး။ ‘ကောန်းဂန်ဟှနေ လာဟှယ် ဆိုဘီး ဖြေလိုက်မယ် ဆိုဟှာ ယောဟန်ဟှို နန်းနို့လေ ဖြားဖြစ်ကြောန့် ယောင်ကြည်ဂေ့ဟှနူး။ ဆိုဘီး ပ္လန်မေးလေ့အူးမယ်။ 6 လူလေဟှနေ လာဟှယ် ဆိုဘီး နို့လေဟှ ဖြေလိုက်မယ် ဆိုဟှာလည်း ယောဟန်ဟှို ပရောဖက်တပါး ဖြစ်ဟှယ် ဆိုဇာဟှို လူလေဟှ ယောင်ကြည်ဂေ့ဟှူကြောန့် နို့လေဟှို က္လော့ခဲန ပစ်လေ့မယ်’ " ဆိုဘီး ရှင်းရှင်းဆွေးနွေးဂေ့ဟှယ်။ 7 အယ်ကြောန့် သူးနို့လေဟှာ "အယ်ခွမ့်အာဏာဟှာ ဖယ်ဟှနေလာဟှယ် ဆိုဇာဟှို ကျွန်တော့်ဟှားလေ သိဂေ့ဟှ" ဆိုဘီး ပ္လန်ဖြေလေဟှယ်။

8 ယေရှုဟှာ "အယ်မူဇာလေဟှို ဖြားခွမ့်အာဏာန ငါလောက်ဟှယ် ဆိုဇာဟှိုလည်း နန်းနို့ဟှို ငါပြောဟှ" ဆိုဘီး သူးနို့ဟှို မိန့်တော်မူလေဟှယ်။

စဗျစ်ခြံလောက်မားလေရဲ့ ပေါင်ဥပမာကြောန်း

9 အယ်ဘီးန ယေရှုဟှာ အယ်ပေါင်ဥပမာန လူလေဟှို "လူတယော့-က်ဟှာ စဗျစ်ခြံဟှို စိုက်ဘီး ခြံစောန့်မားလေဟှို ငှားရစ်ဘီးန ခီကြာဂီး ခရီးထွပ်ဟှားလေဟှယ်။ 10 စဗျစ်သီး ဆွတ်ခီရော့-က်ဟှူ ခီမာ စဗျစ်ခြံထွပ် သီးတချို့ဟှို ယူဟှို့တွပ် ခြံစောန့်မားလေနားဟှို ကျွန်တယော့-က်ဟှို စေလွှတ်လေဟှယ်။ အယ်ဘေမဲ့ ခြံစောန့်မားလေဟှ အယ်ကျွန်ဟှို ရိုက်နှက်ဘီး လတ်ခဲခဲန ပ္လန်လွှတ်လေဟှယ်။ 11 အယ်ကြောန့် ဇရှင်ဟှ ကျွန်တယော့-က်ဟှို ထပ်လွှတ်လေဟှယ်။ အယ်ဘေမဲ့ ခြံစောန့်မားလေဟှ အယ်ကျွန်ဟှိုလည်း ရိုက်နှက်ဘီး၊ ရှက်ခွဲဘီး လတ်ခဲခဲန ပ္လန်လွှတ်လေဟှယ်။ 12 အယ်ဘီးန ဇရှင်ဟှ တတိယကျွန်ဟှို ထပ်ဘီး စေလွှတ်လေဟှယ်။ ခြံစောန့်မားလေဟှ အယ်ကျွန်ဟှိုလည်း ဒန်ရာရစေဘီးဟှာ ပ္လန်ဟှို နှန်ထုဂေ့ဟှယ်။ 13 စဗျစ်ခြံ ဇရှင်ဟှ ‘ငါဖယ်မျိုးလောက်ရမယ်နူး။ ငါ့ရဲ့ ရှစ်ဟှူသားဟှို စေလွှတ်မယ် ဆိုဟှာ ခြံစောန့်မားလေဟှာ သူ့ဟှို ရိုသေကောန်း ရိုသေဂေ့လေ့မယ်!’ ဆိုဘီး ပြောလေဟှယ်။ 14 အယ်ဘေမဲ့ ခြံစောန့်မားလေဟှ သူ့ရဲ့သားဟှို ဗြင်ဟှူ ခီမာ ‘အယ်သူဟှာ ဇရှင်ရဲ့ သားဖြစ်ဟှယ်။ သူ့ဟှို သတ်ဂေ့ဇို့။ အယ်ဆိုဟှာ သူ့ဖရဲ့ အောက်စာဟှာ နို့လေရဲ့အောက်စာ ဖြစ်ဟှားလေ့မယ်!’ ဆိုဘီး သူးနို့လေ ယော့-က်နယော့-က် ပြောဂေ့ဟှယ်။ 15 အယ်ကြောန့် သူးနို့လေဟှာ ဇရှင်ရဲ့ သားဟှို စဗျစ်ခြံပ္လန်ဟှို ထုဘီးဟှာ သတ်ဂေ့လေဟှယ်။"

"အယ်မျိုးဆိုဟှာ စဗျစ်ခြံဇရှင်ဟှ ခြံစောန့်မားလေဟှို ဖြားဇာလောက်မယ်နူး။" ဆိုဘီး ယေရှုဟှ မေးတော်မူလေဟှယ်။ 16 "ဇရှင်ဟှာ လာဘီး အယ်လူလေဟှို သတ်ဘီးဟှာ စဗျစ်ခြံဟှို တခြားခြံစောန့်မားလေဟှို အပ်ပေးလေ့မယ်" ဆိုဘီး မိန့်တော်မူလေဟှယ်။

လူလေဟှ အယ်မျိုး ကြားရဟှူ ခီမာ "အယ်မျိုး ဖြစ်ပါစေန!" ဆိုဘီး ပြောဂေ့ဟှယ်။

17 ယေရှုဟှာ သူးနို့ဟှို ကေ့ဘီး

" ‘အီဆော့-က်မားလေဟှ သောင်းဇားရဘဲဟှူကြောန့် ဖယ်ဟှားဟှူ က္လော့-က်ဟှာ

ဂူလောင်းထဲမာ ရေးကီးဆောန်း ဖြစ်လာရဂေ့ဟှယ်’ ဆိုဘီး ရေးဟှားဇာဟှာ ဖြားဓိပါယ်နူး။"

18 "အယ်က္လော့-က်ထတ်ဟှို က္လဟှူလူတိုင်းဟှာ ပိုင်းပိုင်းက္လိုးလေ့မယ်။ အယ်ဘီးဟှာ အယ်က္လော့-က်ဟှာ ယော့-က်ယော့-က်ထတ်ဟှို က္လမယ် ဆိုဟှာ အယ်သူဟှာ ညစ်ညစ်ကြေဟှားလေ့မယ်" ဆိုဘီး မိန့်တော်မူလေဟှယ်။

ခွန်ဆောန်ရှင်းန ဆိုင်ဟှူမေးခွန်းကြောန်း

19 ကျမ်းတတ်ဆရာလေန ယဇ်ပုရောဟိတ်ဂီးလေဟှာ အယ်ပေါင်ဥပမာဟှ သူးနို့ဟှို စောန်းခိဘီး ပြောနေဟှယ် ဆိုဇာဟှို သိဂေ့ဟှူကြောန့် ရှစ်ရှင်းဘဲ့ ယေရှုဟှို ဖမ်းဟှို့တွပ် ရှာကြံဂေ့ဟှယ်။ အယ်ဘေမဲ့ လူလေဟှို ကြော့-က်ဂေ့ဟှယ်။ 20 အယ်ကြောန့် သူးနို့လေဟှ ခွမ့်ကောန်းဟှို ရှာနေဂေ့ဟှယ်။ သူးနို့လေဟှာ လူတချို့ဟှို ရိုးသားဟန်ဆောန်ဟှို့တွပ် လာဘ်ထိုးဟှားဟှယ်။ အယ်ဘီးဟှာ သူးနို့လေဟှ ကိုယ်တော်ရဲ့ စကားထဲမာ မှားရှာဟှို့တွပ် အယ်လူလေဟှို စေလွှတ်လေဟှယ်။ အယ်ဆိုဟှာ သူးနို့လေဟှာ ကိုယ်တော့်ဟှို ခွမ့်အာဏာန တဂိုးရှိဟှူ ရောမ ဗြို့ဝန်းမန်း နားဟှို အပ်ဂေ့လေ့မယ်။ 21 အယ်သူလျှိုလေဟှ "ဆရာ၊ ဆရာဟောနေဇာလေရော၊ သန်ကြားနေဇာလေရော မှန်ဟှယ် ဆိုဇာဟှို ကျွန်တော့်ဟှားလေ သိဟှယ်။ ဆရာဟှာ မျစ်နှာလိုက်ဘဲန လူလေတွပ် ဘုရားသခင်ရဲ့ လိုတော်န ဆိုင်ဟှူ သမ္မာတရားဟှို သန်ကြားပေးဟှယ်။ 22 ကဲသာ မန်းဂီးဟှို ခွန်ဆောန်ရှင်းဟှာ ပညတ်တော်န ညီဟှယ်လော။ ညီဟှလော။" ဆိုဘီး ယေရှုဟှို မေးလျှော့-က်လေဟှယ်။

23 အယ်ဘေမဲ့ ယေရှုဟှာ သူးနို့ရဲ့ ပရိယာယ်ဟှို သိတော်မူဟှူကြောန့် 24 "ငါ့ဟှို ငွေဒန်းဂါးတပ္လား ပြဂေ့။ အယ်ဒန်းဂါးမာ ဖယ်သူ့ရောက်ပေါင်န နာမယ်ရှိဟှယ်နူး။" ဆိုဘီး မေးတော်မူလေဟှယ်။

သူးနို့လေဟှ "ကဲသာမန်းဂီး ပေါင်န ကဲသာမန်းဂီး နာမယ်ရှိဟှယ်" ဆိုဘီး ဖြေဂေ့ဟှယ်။

25 အယ်ကြောန့် ယေရှုဟှ "အယ်မျိုးဆိုဟှာ ကဲသာမန်းဂီး ပိုင်ဟှူဇာဟှို ကဲသာမန်းဂီးဟှို ပေးဂေ့။ ဘုရားသခင် ပိုင်ဟှူဇာဟှို ဘုရားသခင်ဟှို ပေးဂေ့" ဆိုဘီး မိန့်တော်မူလေဟှယ်။

26 သူးနို့လေဟှာ လူလေရှေ့မာ ကိုယ်တော်ရဲ့ စကားလေထဲမာ မှားရှာတွိနိုင်ဘဲ ဖြစ်နေဂေ့ဟှယ်။ အယ်ဘီးဟှာ ကိုယ်တော်ရဲ့ ပ္လန်မိန့်တော်မူဟှူ စကားဟှို အံ့ဩဟှားဂေ့ဘီး တိဆိဟှားဂေ့လေဟှယ်။

ရှင်ပ္လန်ထမြော့-က်ရှင်းန ဆိုင်ဟှူမေးခွန်းကြောန်း

27 ✝ ၂၀.၂၇ တ ၂၃.၈ အယ်ဘီးန ရှင်ပ္လန်ထမြော့-က်ရှင်းမှေ့ဟှ ဆိုဘီး ပြောဂေ့ဟှူ ဇဒ္ဒုကဲတချို့ဟှာ ယေရှုနားဟှို လာဘီးဟှာ၊ 28 "ဆရာ၊ မောရှေဟှ ‘လူတယော့-က်ဟှာ သားမီးလေမှေ့ဘဲ့န သေဟှားမယ် ဆိုဟှာ ကျန်ရစ်ဟှူ မယားဟှို သူ့ရဲ့ညီဟှ ပ္လန်ဘီး လတ်ထပ်ရဟှယ်။ အယ်ဘီးဟှာ သူးနို့မာရလာဟှူ သားမီးလေဟှို သေဟှားဟှူသူရဲ့ သားမီးလေဖြစ် သတ်မှတ်ရမယ်’ ဆိုဘီး ကျွန်တော့်ဟှားလေတွပ် အယ်ပညတ်တရားဟှို ရေးဟှားဟှယ်။ 29 တခါဒူးဟှ ညီကို ခွန်နစ်ယော့-က် ရှိဟှယ်။ နောန်ဂီးဆောင်းဟှာ အီထောန်ပြုဘီး သားမီးလေ မှေ့ဘဲန သေဟှားဟှယ်။ 30 အယ်ဘီးန အယ်မီးမဟှို ဒုတိယညီဟှ ယူလေဟှယ်။ 31 အယ်ဘီးန တတိယညီဟှ ယူလေဟှယ်။ အယ်မျိုးနဘဲ့ ညီကို ခွန်နစ်ယော့-က်လောင်းဟှာ သားမီးလေ မှေ့ဘဲန သေဟှားဂေ့ဟှယ်။ 32 နော့-က်ဆောင်းမာ အယ်မီးမလည်း သေဟှားဟှယ်။ 33 အယ်မျိုးဆိုဟှာ ရှင်ပ္လန်ထမြော့-က်ဟှူ နေ့မာ အယ်မီးမဟှာ ဖယ်သူ့ရဲ့ မယား ဖြစ်လေ့မယ်နူး။ ညီကို ခွန်နစ်ယော့-က်လောင်းဟှ အယ်မီးမဟှို ယူဟှားပီးဘီ ဆိုဘီး သူးနို့ဟှ လျှော့-က်လေဟှယ်။"

34 ယေရှုဟှာ "အယ်ဘဝမာ ယော့-က်ကျားလေန မီးမလေဟှာ အီထောန်ပြုဂေ့ဟှယ်။ 35 အယ်ဘေမဲ့ သေရာဟှနေ ပ္လန်ရှင်ဟှို့ ထိုက်တန်ဟှူ ယော့-က်ကျားလေန မီးမလေဟှာ နောန်ဘဝမာ အီထောန်ပြုရှင်းလေ မှေ့ဟှ။ 36 သူးနို့လေဟှာ ကောန်းဂန်တမန်လေမျိုး ဖြစ်ဟှားဘီး သေဂေ့ဟှမ်း။ သူးနို့လေဟှာ သေရာဟှနေ ပ္လန်ရှင်လာဟှူကြောန့် ဘုရားသခင်ရဲ့ သားမီးလေ ဖြစ်ဂေ့ဟှယ်။ 37 အယ်ဘီးဟှာ သေရာဟှနေ ပ္လန်ရှင်ဟှယ် ဆိုဇာဟှို မောရှေဟှ ရှင်းရှင်းလန်းလန်း သတ်သေပြဟှားဟှယ်။ မောရှေဟှာ မီးလောန်နေဟှူချောင်ကြောန်းန ပတ်သတ်ဘီး ဘုရားသခင်ဟှို ‘အာဗြဟံရဲ့ ဘုရားသခင်၊ ဣဇာက်ရဲ့ ဘုရားသခင်၊ ယာကုပ်ရဲ့ ဘုရားသခင်’ ဆိုဘီး ဖော်ပြဟှားလေဟှယ်။ 38 ဘုရားသခင်ဟှာ သေဟှားဟှူ သူလေရဲ့ ဘုရား မှုဟှ။ သတ်ရှင်ဟှူ သူလေရဲ့ ဘုရား ဖြစ်ဟှယ်။ ဖြားဖြစ်ကြောန့်နူးဆိုဟှာ လူလေ ဂူလောင်းဟှာ ကိုယ်တော့်အားဖြင့် သတ်ရှင်ဂေ့ဟှယ်" ဆိုဘီး သူးနို့လေဟှို မိန့်တော်မူလေဟှယ်။

39 ကျမ်းတတ်ဆရာ တချို့ဟှ "ဆရာ၊ ကောန်းဟှူဖြေ ဖြစ်ဟှယ်!" ဆိုဘီး လျှော့-က်ဂေ့လေဟှယ်။ 40 အယ်ကြောန့် သူးနို့လေဟှာ ကိုယ်တော့်ဟှို နော့-က်ထပ် မေးခွန်းလေ မေးရဲဂေ့ဟှမ်း။

မေရှိယန ဆိုင်ဟှူမေးခွန်းကြောန်း

41 ယေရှုဟှာ "မေရှိယဟှာ ဒါဝိဒ်ရဲ့ မ္လေးမ္လစ်ဖြစ်ဟှယ် ဆိုဇာဟှို ဖယ်မျိုးပြောနိုင်ဂေ့နူး။ ဆိုဘီး သူးနို့လေဟှို မေးတော်မူလေဟှယ်။ 42 ဒါဝိဒ်ကိုယ်တိုင်ဟှ ဆာလံကျမ်းမာ"

"‘သခင်ဘုရားဟှ ငါ့သခင်ဟှို၊

43 နန့်ရဲ့ ရန်သူလေဟှို နန့်ရဲ့ ခေတန်ခေါင်ဖြစ် ငါခ္လဟှားခီထိ ငါ့ရဲ့ ညာဖတ်မာ ထိုင်နေပါ ဆိုဘီး ပြောဟှယ်’ ဆိုဘီး ရေးဟှားဟှယ်။"

44 "ဒါဝိဒ်ဟှ ကိုယ်တော့်ဟှို ‘သခင်’ ဆိုဘီး ခေါ်လေဟှယ်။ အယ်ဆိုဟှာ ဖယ်မျိုးဖြစ်ဘီးဟှာ မေရှိယဟှာ ဒါဝိဒ်ရဲ့ မ္လေးမ္လစ် ဖြစ်ဟှားရနူး။" ဆိုဘီး မေးတော်မူလေဟှယ်။

ကျမ်းတတ်ဆရာလေဟှို ရှောန်ဟှို့ ဒိပေးဟှူကြောန်း

45 လူလေ ဂူလောင်းဟှာ နားထောန်နေဟှူ ခီမာ ယေရှုဟှ တဗဲ့တော်လေဟှို 46 "ကျမ်းတတ်ဆရာလေဟှို ဒိထားဂေ့။ သူးနို့လေဟှာ ဝတ်လောင်ရှယ်လေန ရှော့-က်သွားဘီး ဆေးလေထဲမာ နှောက်ဆစ်ခံရဇာဟှို နှစ်သက်ဂေ့ဟှယ်။ သူးနို့လေဟှာ ဝါလယ်ဇရပ်လေမာ သီးသန့်ခေါင်လေန စားသော့-က်ဗွဲလေမာ ကောန်းဆောင်းနေရာဟှို ဝီးကော့-က်ဂေ့လေဟှယ်။ 47 သူးနို့လေဟှာ မောက်ဆိုးမလေရဲ့ အီလေဟှို အဓမ္မသီးယူဟှယ်။ အယ်ဘီးဟှာ လူလေထန်ကီးအောန် ခီကြာဂီး ဆုတောန်းဂေ့ဟှယ်! သူးနို့လေဟှာ ရရာတိုင်း ဆိုးဟှူ ပြစ်ဒန်ဟှို ခံရလေ့မယ်!" ဆိုဘီး မိန့်တော်မူလေဟှယ်။