လုကာ 19

အောန်ဗွဲခံဘီး ယေရုရှလင်ဗြို့ထဲ ဝမ်တော်မူဟှူကြောန်း

28 ယေရှုဟှာ အယ်မျိုးမိန့်တော်မူဘီးန သူးနို့လေရဲ့ ရှေ့ဟှနေဘီး ယေရုရှလင်ဗြို့ဟှို ကြွဟှားတော်မူဟှယ်။ 29 သံလွင်တောန်နားမာရှိဟှူ ဗက်ဖာဂေဝါန ဗေသနိဝါနားဟှို ရော့-က်လာဟှူ ခီမာ တဗဲ့တော် နှေ့ပါးဟှို ရှေ့ဟှနေစေလွှတ်ဘီး 30 "နန်းနို့ရှေ့မာရှိဟှူ ဝါဟှို သွားဂေ့။ ဝါထဲဟှို ရော့-က်ဟှူ ခီမာ ဖယ်သူလည်း စီးဖူးသေးဘဲဟှူ မြည်းသားဂန်းဟှားဟှို ခယ်ဟှားဇာဟှို နန်းနို့ဟှာ တွိလေ့မယ်။ အယ်မြည်းသားဂန်းဟှားဟှို ကြိုးဖြေဘီး ငါ့နားဟှို ခေါ်လာဂေ့။ 31 ယော့-က်ယော့-က်ဟှ ဖြားဖြစ်ကြောန့် မြည်းကြိုးဟှို ဖြေဂေ့နေနူး။ ဆိုဘီး နန်းနို့ဟှို မေးမယ် ဆိုဟှာ အယ်မြည်းဟှို သခင်*၁၉.၃၁ သခင်၊ အယ်မျိုးမှုဘဲ့နေဟှာ မြည်းဇရှင်။လိုရှိဟှယ် ဆိုဘီး သူးနို့ဟှို ပြောဂေ့" ဆိုဘီး မိန့်တော်မူလေဟှယ်။

32 စေလွှတ်လိုက်ဟှူ သူလေဟှာ ထွပ်ဟှားဘီးန ယေရှုမိန့်တော်မူမျိုးဘဲ့ ဂူလောင်းဟှို တွိရဟှယ်။ 33 သူးနို့လေဟှာ မြည်းဟှို ကြိုးဖြေပေးနေဟှူ ခီမာ မြည်းဇရှင်ဟှ "ဖြားဖြစ်ကြောန့် မြည်းဟှို ကြိုးဖြေပေးနေရနူး။" ဆိုဘီး သူးနို့ဟှို မေးလေဟှယ်။

34 သူးနို့ဟှ "အယ်မြည်းဟှို သခင် လိုရှိဟှယ်" ဆိုဘီး ဖြေဂေ့ဟှယ်။ 35 အယ်ဘီးန သူးနို့ဟှ မြည်းသားဂန်းဟှားဟှို ယေရှုနားဟှို ယူဆောန်ဟှားလေဟှယ်။ အယ်မြည်းထတ်မာ သူးနို့ရဲ့ ဝတ်ရောင်လေဟှို ခန်းဘီးန ယေရှုဟှို စီးစေဂေ့ဟှယ်။ 36 ကိုယ်တော်ဟှာ စီးဘီးလာဟှူ ခီမာ လူလေဟှ သူးနို့ရဲ့ ဝတ်ရောင်လေဟှို လမ်းထတ်မာ ခန်းပေးဂေ့ဟှယ်။

37 ကိုယ်တော်ဟှာ ယေရုရှလင်ဗြို့နီး သံလွင်တောန် ဆင်းလမ်းဟှို ရော့-က်လာဟှူ ခီမာ တဗဲ့တော် အောက်ဂီးဟှာ သူးနို့ဗြင်ရဟှူ နိမိတ်လတ်ခဏာ ဂူလောင်းတွပ် ဝန်းသာဟှူစိန ဘုရားသခင်ရဲ့ ဂေါင်တော်ဟှို၊ 38 "ဘုရားသခင်ရဲ့ နာမန ကြွလာဟှူ မန်းဂီးဟှာ မင်္ဂလာရှိပါစေ! ကောန်းဂန်ဘောင်မာ ငြီသတ်ရှင်းရှိပါစေ။ ဗြင့်ဆောင်းဟှူ နေရာမာ ဖောင်းကီးတော်မူပါစေ!" ဆိုဘီး သံက္လယ်ဂီးန ချီးမွမ်းဂေ့ဟှယ်။

39 အယ်ခီမာ လူအောက်ဂီးထဲဟှ ဖာရိရှဲတချို့ဟှ "ဆရာ၊ ကိုယ်တော်ရဲ့ တဗဲ့တော်လေဟှို တိတိဟှားနေဟှို့ ဆောင်းမပေးတော်မူပါ!" ဆိုဘီး ယေရှုဟှို လျှော့-က်လေဟှယ်။

40 ယေရှုဟှ "နန်းနို့ဟှို ငါပြောမယ်၊ သူးနို့ဟှို တိတိဟှားနေစေမယ် ဆိုဟှာ က္လော့ခဲလေဟှ အော်ဟစ်ဂေ့လေ့မယ်" ဆိုဘီး မိန့်တော်မူလေဟှယ်။