လုကာ 2

ယေရှုဟှို ဗိမာန်တော်မာ ဆစ်ကပ်ကြောန်း

22 မောရှေရဲ့ ပညတ်တရားတိုင်း ယောသပ်န မာရိတွပ် စင်ကြယ်မှု ခမ်းနားလောက်ဟှို့ ခီရော့-က်လာဟှယ်။ အယ်ကြောန့် သူးနို့ဟှာ သားဂန်းဟှားဟှို ဘုရားသခင်နားမာ ဆစ်ကပ်ဟှို့ ယေရုရှလင်ဗြို့ဟှို ခေါ်ဟှားဘီး၊ 23 ဘုရားသခင်ရဲ့ ပညတ်တရားထဲမာ "သားဦးတိုင်းဟှာ ဘုရားသခင်ဟှို့ သန့်ရှင်းရမယ်" ဆိုဘီး ရေးဟှားလေဟှယ်။ 24 ခိုငှတ်ဟှားနှေ့ကောန် အယ်မျိုးမှုဘဲနေဟှာ ချိုးငှတ်ဟှားနှေ့ကောန်ဟှို ပူဇော်ရမယ် ဆိုဘီး ဘုရားသခင်ရဲ့ ပညတ်တရားတိုင်း ပူဇော်ဟှို့ သူးနို့လည်း သွားလေဟှယ်။

25 အယ်ခီမာ ယေရုရှလင်ဗြို့မာနေဟှူ ရှုမောင်နာမယ်ရှိဟှူ လူတယော့-က်ရှိဟှယ်။ သူဟှာ ဖြောန့်မတ်ဟှူလူ၊ ဘုရားသခင်ဟှို ကြော့-က်ဟှူလူန ဣသရေလလူမျိုးဟှို ကူညီဟှို့တွပ် စောန့်နေဟှူ လူဖြစ်ဟှယ်။ သန့်ရှင်းဟှူဝိညာဉ်တော်ဟှာ သူ့နတူးဒူရှိဘီး 26 သူဟှာ ဘုရားသခင်ရဲ့ ဂဒိပေးဟှားဟှူ မေရှိယဟှို သူဗြင်လိုက်ရဘဲန သေရလေ့ဟှို့ မှုဟှ ဆိုဘီး သန့်ရှင်းဟှူဝိညာဉ်တော်ဟှာ သူ့ဟှို ဖွမ့်ပြဟှားဟှယ်။ 27 ဘုရားသခင်ရဲ့ ဝိညာဉ်တော်အားဖြင့် ရှုမောင်ဟှာ ဗိမာန်တော်ထဲဟှို ဝမ်ဟှားဟှယ်။ မိဖလေဟှာ ပညတ်တရားတိုင်း သူ့တွပ်လောက်ဟှို့ သားဂန်းဟှား ယေရှုဟှို ဗိမာန်တော်ထဲဟှို ခေါ်ဟှားခီမာ 28 ရှုမောင်ဟှာ သားဂန်းဟှားဟှို သူ့ရဲ့ လတ်ထဲမာယူဘီး၊ ဘုရားသခင်ဟှို ချီးမွမ်းဘီး၊

29 "ဘုရားသခင်၊ ကိုယ်တော်ရဲ့ စကားတော်ဟှာ ပ္လဲ့ဇောင်ဟှားဘီ။

ခု ကိုယ်တော်ဟှာ ကိုယ်တော်ရဲ့ ကျွန်ဟှို ငြီသတ်မှုထဲ သွားခွမ့်ပေးလေဘီ။

30 ကိုယ်တော်ရဲ့ ကယ်တန်ရှင်းဟှို ကျွန်တော်ရဲ့ မျစ်စိန ဗြင်ရပီးဘီ။

31 ကိုယ်တော်ဟှာ အယ်ကယ်တန်ရှင်းဟှို လူမျိုးဂူလောင်းရဲ့ ရှေ့မာ ပြင်ဆင်ဟှားပီးဘီ။

32 ကိုယ်တော်ရဲ့ လိုတော်ဟှာ လူမျိုးခြားလေဟှို လန်းဖွမ့်ပြဘီး

ကိုယ်တော်ရဲ့ လူမျိုးဖြစ်ဟှူ ဣသရေလနားဟှို ဖောင်းသရေတော်ဟှို ယူလာဟှယ်" ဆိုဘီး ပြောလေဟှယ်။

33 သားဂန်းဟှားရဲ့ မိန ဖဟှာ သားဂန်းကြောန်းလေဟှို ရှုမောင် ပြောလိုက်ဟှူ ခီမာ အံ့ဩဟှားဂေ့ဟှယ်။ 34 ရှုမောင်ဟှာ သူးနို့ဟှို ကောန်းဂျီးပေးဘီးန သူ့ရဲ့မိ မာရိဟှို "အယ်သားဂန်းဟှားဟှာ ဣသရေလလူမျိုး ဘောင်ဂီးဟှို လဲက္လဟှို့န ထမြော့-က်ဟှို့တွပ် ဘုရားသခင် ဝီးကော့-က်ဟှားဇာ ဖြစ်ဟှယ်။ သူဟှာ ဘုရားသခင်နားဟှ နိမိတ်လတ်ခဏာ တခုဖြစ်ဘီး လူဘောင်ဂီးဟှာ ဆန့်ကျင်ပြောလေ့မယ် 35 အယ်ကြောန့် သူးနို့ရဲ့ လျှို့ဝှပ်ဟှားဟှူ ကြံစည်လေဟှို ဖွမ့်ပြလေ့မယ်။ ဝန်းနဲမှုဟှာ ထတ်ဟှူ သန်လျက်မျိုးဘဲ့ နန့်ရဲ့ စိနှလောင်းဟှို ထိုးဖော့-က်လေ့မယ်" ဆိုဘီး ပြောလေဟှယ်။

36 အယ်နေရာမာ အာရှာမျိုးဖြစ်ဟှူ ဖနွေလရဲ့မီး၊ အန္နနာမယ်ရှိဘီး သတ်ကီးဟှူ ပရောဖက်မ တယော့-က် ရှိဟှယ်။ သူဟှာ ပျိုရွယ်ဟှူ ခီဟှစဘီး လန်နတူးဒူ ခွန်နစ်နှစ်ဘဲ့ ပေါန်းသန်းရဘီး 37 ခု သတ် ���� နှစ်ရွယ် မောက်ဆိုးမ ဖြစ်ဟှားဘီ။*၂.၃၇ ခု သတ် ၈၄ နှစ်ရွယ် မောက်ဆိုးမ ဖြစ်ဟှားဘီ၊ အယ်မျိုးမှုဘဲ့နေဟှာ မောက်ဆိုးမဖြစ်ဟှားဇာ ၈၄ နှစ် ရှိဟှားဘီ။ သူဟှာ ဗိမာန်တော်ဟှနေ လောင်းဝ ခွာဘဲန သူဟှာ ဆုတောန်းရှင်းန စာရှောန်ရှင်းအားဖြင့် နေ့ညဉ့်မပြတ် ဘုရားသခင်ဟှို ကိုးကွယ်လေဟှယ်။ 38 အယ်ခီနာရီမာဘဲ့ သူဟှာ ရော့-က်လာဘီးန ဘုရားသခင်ဟှို ချီးမွမ်းဘီးဟှာ ယေရုရှလင်ဗြို့ လွတ်မြော့-က်ဟှို့တွပ် ဘုရားသခင်ဟှို စောန့်နေဟှူ လူလေဂူလောင်းဟှို သားဂန်းဟှားကြောန်း ပြောလိုက်ဟှယ်။