ဗိမာန်တော်ထဲဟှ ကောန်သားဟှား ယေရှုကြောန်း
41 ယေရှုရဲ့ မိဖလေဟှာ နှစ်စဉ်နှစ်တိုင်း ပသခါပွဲတော်တွပ် ယေရုရှလင်ဗြို့ဟှို သွားဂေ့ဟှယ်။ 42 ယေရှုဟှာ သတ်ဆယ့်နှေ့နှစ် ရော့-က်လာဟှူ ခီမာ သူးနို့ဟှာ ရင်းရင်ဒူးဟှ သွားနေမျိုးဘဲ့ ပွဲတော်ဟှို သွားဂေ့ဟှယ်။ 43 ပွဲတော်ပီးဟှားဟှူ ခီမာ သူးနို့ဟှာ အီဟှို ပ္လန်ဂေ့ဟှယ်။ အယ်ဘေမဲ့ ကောန်သားယေရှုဟှာ ယေရုရှလင်ဗြို့မာ နေရစ်ဟှယ်။ အယ်မျိုး နေရစ်ဇာဟှို သူ့မိဖလေ သိဂေ့ဟှ။ 44 သူဟှာ အောက်စုနတူးဒူ ရှိဟှယ် ဆိုဘီး သူးနို့ထန်ကြောန့် သူးနို့ဟှာ တနေ့လောင်း ခရီးသွားဘီးန သူးနို့ရဲ့ ဆွေမျိုးလေန ငယ်ဂျင်းလေကြားထဲမာ သူ့ဟှို လိုက်ရှာဂေ့ဟှယ်။ 45 သူးနို့ဟှာ သူ့ဟှို ရှာတွိဂေ့ဟှ။ အယ်ကြောန့် သူးနို့ဟှာ သူ့ဟှို ရှာဟှို့တွပ် ယေရုရှလင်ဗြို့ဟှို ပ္လန်သွားလိုက်ရဟှယ်။ 46 တတိယနေ့မာ သူးနို့ဟှာ သူ့ဟှို ဗိမာန်တော်ထဲမာ တွိဟှားဘီး၊ ယုဒဆရာလေနတူးဒူ ထိုင်ဘီး၊ သူးနို့ပြောဇာဟှို နားထောန်ဘီး မေးခွန်းလေ မေးနေဟှယ်။ 47 သူ့စကားဟှို ကြားဟှူ လူလေဂူလောင်းဟှာ သူ့ရဲ့ထတ်မြတ်ဟှူ ဖြေဟှို အံ့ဩဂေ့ဟှယ်။ 48 သူ့ရဲ့ မိဖလေဟှာ သူ့ဟှို တွိလိုက်ဟှူ ခီမာ အံ့ဩဟှားဘီး သူ့မိဟှာ "ဖစု၊ နန်ဟှ ဖြားဖြစ်ကြောန့် နို့လေဟှို အယ်မျိုးလောက်ရနူး။ နန့်ဖန ငါဟှာ ရရာတိုင်း စိပူဘီး နန့်ဟှို လိုက်ရှာနေဟှယ်" ဆိုဘီး သူ့ဟှို ပြောလေဟှယ်။
49 ကောန်သားဟှားဟှ "ဖြားဖြစ်ကြောန့် နို့မိဟှ နို့ဟှို လိုက်ရှာနေရနူး။ နို့ဟှ နို့ဖရဲ့ အီမာရှိနေဇာဟှို နို့မိ သိဟှလော။" ဆိုဘီး သူးနို့ဟှို ပ္လန်ပြောလေဟှယ်။ 50 အယ်ဘေမဲ့ သူးနို့ဟှာ ကောန်သားဟှားရဲ့ စကားဟှို နားလည်ဂေ့ဟှ။
51 အယ်ကြောန့် ယေရှုဟှာ သူးနို့နတူးဒူ နာဇရက်ဗြို့ဟှို ပ္လန်လိုက်ဟှားဘီး အယ်နေရာမာ သူဟှာ သူးနို့စကားဟှို နားထောန်ဘီးနေဟှယ်။ ကောန်သားဟှားရဲ့ မိခင်ဟှာ အယ်ဖြစ်ပျစ်ဇာလေ ဂူလောင်းဟှို စိနှလောင်းထဲမာ သီးဟှားဟှယ်။ 52 ယေရှုဟှာ ကာယညာဏ ကီးဒတ်လာဘီး ဘုရားသခင်ရှေ့န လူလေရှေ့မာ မျစ်နှာသာရလေဟှယ်။
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)