Lucas 21

မောက်ဆိုးမရဲ့ လှူငွေကြောန်း

1 ယေရှုဟှာ ပတ်ပတ်လည်ဟှို ကေ့လိုက်ဟှူ ခီမာ ဌေးသားလေဟှာ ဗိမာန်တော်ထဲဟှ လှူခံဗောင်းထဲဟှို သူးနို့ရဲ့ လှူငွေလေ ထဲ့နေဂေ့ဇာဟှို ဗြင်တော်မူဟှယ်။ 2 အယ်ဘီးဟှာ ကိုယ်တော်ဟှာ ရရာတိုင်း ဆင်းရဲဟှူ မောက်ဆိုးမဟှ ကြေးဒန်းဂါး နှေ့ပ္လား ထဲ့နေဇာဟှိုလည်း ဗြင်တော်မူလေဟှယ်။ 3 ကိုယ်တော်ဟှ "အယ်ဆင်းရဲဟှူ မောက်ဆိုးမဟှာ တခြားလူလေ ဂူလောင်းထတ် ဘောင်ဂီးလှူဟှယ် ဆိုဇာဟှို နန်းနို့ဟှို ငါမှန်တိုင်း ပြောဟှယ်။ 4 ဖြားဖြစ်ကြောန့်နူးဆိုဟှာ တခြားလူလေ ဂူလောင်းဟှာ သူးနို့အောက်စာရဲ့ ပိုနေဟှူဇာလေဟှို လှူဂေ့လေဟှယ်။ အယ်ဘေမဲ့ အယ်မောက်ဆိုးမဟှာ သူ့မာရှိမျှ ဂူလောင်းဟှို ပေးလေဟှယ်" ဆိုဘီး မိန့်တော်မူလေဟှယ်။

ဗိမာန်တော်ဖျစ်ဆီးခံရဟှို့ကြောန်း

5 ဗိမာန်တော်ဟှို လှပဟှူ က္လော့-က်တောင်းလေနရော၊ ဘုရားသခင်ဟှို ဆစ်ကပ်ဟှားဟှူ လှူပစ်စီးလေနရော လှဆင်ဟှားဟှယ် ဆိုဘီး တဗဲ့တော်တချို့ဟှာ ပြောနေဂေ့ဟှယ်။ 6 ယေရှုဟှ "နန်းနို့ ဗြင်ဟှားဇာလေ ဂူလောင်းဟှာ က္လော့-က်တတောင်းလည်း ကျန်ရစ်ဘဲအောန် ဖျစ်ဆီးရှင်းခံရဟှို့ ခီရော့-က်လာလေ့မယ်" ဆိုဘီး မိန့်တော်မူလေဟှယ်။

ဆင်းရဲဒေါက်ခန ညှဉ်းဆဲရှင်းကြောန်း

7 သူးနို့လေဟှ "ဆရာ၊ အယ်မူဇာလေဟှ ဖယ်ခီမာ ဖြစ်လာမယ်နူး။ အယ်မူဇာလေ ဖြစ်ခါနီးဟှူ ခီမာ ဖယ်မျိုးနိမိတ်လေ ပေါ်လာဟှို့နူး။" ဆိုဘီး မေးလျှော့-က်ဂေ့ဟှယ်။

8 ယေရှုဟှ "နန်းနို့လေ လှည့်ဇားခံရဘဲအောန် ဒိထားဂေ့။ လူလေဘောင်ဂီးဟှာ ငါ့နာမန ရော့-က်လာဘီးဟှာ ‘ငါဟှာ အယ်လူဘဲ့ ဖြစ်ဟှယ်! ခီရော့-က်လာဘီ!’ ဆိုဘီး ပြောလေ့မယ်။ အယ်ဘေမဲ့ သူးနို့ နော့-က်ဟှို လိုက်ဂေ့န။ 9 နန်းနို့လေဟှာ စစ်ပွဲလေန ပူကန်ရှင်းကြောန်းလေဟှို ကြားရဟှူ ခီမာ ကြော့-က်ဂေ့န။ အယ်မူဇာလေဟှ ရင်ဦးဆောင်း ဖြစ်ရမယ်။ အယ်ဘေမဲ့လည်း ဆောင်းသတ်ခီဟှာ ရော့-က်လာသေးဟှ" ဆိုဘီး မိန့်တော်မူလေဟှယ်။

10 ကိုယ်တော်ဟှ "လူမျိုးလေဟှာ တမျိုးန တမျိုး၊ နိုင်ငံလေဟှာ တနိုင်ငံန တနိုင်ငံ တိုက်ဂေ့လေ့မယ်။ 11 နေရာတိုင်းမာ ကြော့-က်ဘွယ်လန့်ဘွယ် မ္လေဂီးလှောက်ရှင်းလေ၊ စာရေဇာ ရှားပါးရှင်းလေ၊ ကပ်ရောဂါလေ ဖြစ်ဂေ့လေ့မယ်။ ကောန်းဂန်ထတ်ဟှနေ ထူးဆန်းဘီး ကြော့-က်ဇာကောန်းဟှူ နိမိတ်လေ ပေါ်လာဂေ့လေ့မယ်။ 12 အယ်ဘေမဲ့လည်း အယ်မူဇာလေ ဖြစ်လာခန်မာ နန်းနို့လေဟှို ဖမ်းဆီးဘီး ညှည်းဆဲဂေ့လေ့မယ်။ နန်းနို့လေဟှို ဝါလယ်ဇရပ်လေမာရော၊ ထောန်ထဲမာရော လှောန်ဟှားဂေ့လေ့မယ်။ ငါ့နာမကြောန့် နန်းနို့လေဟှို ဗြို့ဝန်မန်းလေန မန်းဂီးလေ ရှေ့မှော့-က်ဟှို ခေါ်ဆောန်ဟှားဂေ့လေ့မယ်။ 13 အယ်နည်းလမ်းအားဖြင့် နန်းနို့ဟှာ ဒန်းကောန်းဟှို သတ်သေခံဟှို့တွပ် ခွမ့်ရေး ဖြစ်လာဂေ့လေ့မယ်။ 14 ✝၂၁.၁၄,၁၅ လု ၁၂.၁၁,၁၂အယ်ကြောန့် ဖယ်မျိုးချေပရမယ် ဆိုဇာဟှို ကြိုတန်ဘီး စိုးရိမ်ဘဲဟှို့တွပ် နန်းနို့ရဲ့ စိနှလောင်းဟှို ဆောင်းဖြတ်ဟှားဂေ့။ 15 ဖြားဖြစ်ကြောန့်နူးဆိုဟှာ နန်းနို့ရန်သူလေဟှာ ပ္လန်ဘီး ခုခံဟန့်တားနိုင်ဘဲနေအောန် နန်းနို့ဟှို နှောက်စွမ်းန ဉာဏ်ပညာဟှို ငါပေးမယ်။ 16 နန်းနို့ရဲ့ မိဖလေရော၊ ညီကိုလေရော၊ ဆွေမျိုးလေရော၊ ငယ်ဂျင်းလေဟှာ နန်းနို့ဟှို အပ်ဂေ့လေ့မယ်။ နန်းနို့ထဲဟှ တချို့ဟှာ သေသတ်ရှင်းဟှို ခံရဂေ့လေ့မယ်။ 17 လူတိုင်းဟှာ ငါ့နာမကြောန့် နန်းနို့ဟှို မူးတီးဂေ့လေ့မယ်။ 18 အယ်ဘေမဲ့ နန်းနို့ခေါန်းဟှ ဆားဗန်တဗန်မျှ ဆောင်းရှောင်းစေဟှ။ 19 နန်းနို့ဟှာ တည်ကြည်ရှင်းအားဖြင့် ကယ်တန်ရှင်းဟှို ခံရဂေ့လေ့မယ်။"

ယေရုရှလင်ဗြို့ ဖျစ်ဆီးခံရဟှို့ကြောန်း

20 "ယေရုရှလင်ဗြို့ဟှို စစ်တပ်လေ ဝိုင်းဟှားဇာဟှို နန်းနို့ ဗြင်ရဟှူ ခီမာ အယ်ဗြို့ဟှာ ကြာခန်မာ ဖျစ်ဆီးရှင်းခံရမယ် ဆိုဇာဟှို နန်းနို့လေ သိဂေ့လေ့မယ်။ 21 အယ်ဆိုဟှာ ယုဒနယ်မာရှိဟှူ သူလေဟှာ တောန်ထတ်ဟှို တတ်ပ္လေးဂေ့စေ။ ဗြို့ထဲမာရှိဟှူ လူလေဟှာ ဗြို့ပ္လန်ဟှို ထွပ်ဂေ့စေ။ အယ်ဘီးဟှာ ကျေးဝါမာရှိဟှူ သူလေဟှိုလည်း ဗြို့ထဲဟှို ဝမ်ဂေ့စေန။ 22 ဖြားဖြစ်ကြောန့်နူးဆိုဟှာ အယ်နေ့ရစ်လေဟှာ ကျမ်းစာဟှ ပြောဟှားတိုင်း ပ္လဲ့ဇောင်ဟှို့တွပ် ‘ပြစ်ဒန်ပေးဟှို့ နေ့ရစ်လေ’ ဖြစ်ဟှယ်။ 23 အယ်နေ့ရစ်လေမာ ဝန်းရှင်မလေန သားရှင်မိလေတွပ် ရရာတိုင်း ဆိုးဝါးဂေ့လေ့မယ်! ဒေါက်ခဆင်းရဲဟှာ အယ်ပြည်ထတ်ဟှို ရော့-က်လာလေ့မယ်။ အယ်ဘီးဟှာ ဘုရားသခင်ရဲ့ မျစ်တော်ဟှာ အယ်သူလေ ထတ်မာလည်း က္လရော့-က်လေ့မယ်။ 24 တချို့လေဟှာ ထားန သတ်ခံရဂေ့လေမယ်။ ကျန်ဟှူ သူလေဟှာ ထောန်သားလေဖြစ်န နိုင်ငံသီးသီးဟှို ဖမ်းဆီးဟှားရှင်း ခံရဂေ့လေ့မယ်။ လူမျိုးခြားလေဟှာ သူးနို့ရဲ့ ခီကူခန်ထိ ယေရုရှလင်ဗြို့ဟှို နန်းချေဂေ့လေ့မယ်။"

လူ့ရဲ့သား ကြွလာတော်မူဟှူကြောန်း

25 ✝ ၂၁.၂၅ ဗျာ ၆.၁၂,၁၃ "နေ၊ လ၊ ကြယ်လေမာ ထူးဆန်းဟှူ နိမိတ်လေ ဖြစ်လေ့မယ်။ မ္လေဂီးထတ်ဟှ လူမျိုးလေ ဂူလောင်းဟှာ ပန်လယ်လှိုင်းတံပိုးသံကြောန့် စိပျစ်ဟှားဘီး ကြော့-က်လန့်ဂေ့လေ့မယ်။ 26 ကောန်းဂန်ဟှ တဂိုးလေဟှာ လှောက်ခါဂေ့ဘီး လူလေဟှာ ကမ္ဘာထတ်ဟှို သတ်ရော့-က်လာဟှို့ ဇာလေတွပ် ကြိုတွီးဘီး ကြော့-က်လန့်လာဟှူကြောန့် မူးလှဲဂေ့လေ့မယ်။ 27 အယ်ခီမာ လူ့ရဲ့သားဟှာ ကီးမားဟှူ ဖောင်းတဂိုးန မိုးတီဟှို စီးဘီး ကြွလာနေဇာဟှို သူးနို့လေ ဗြင်ရဂေ့လေ့မယ်။ 28 အယ်မူဇာလေ စဘီး ဖြစ်လာဟှူ ခီမာ နန်းနို့ဟှို ဝီးကော့-က်ဟှို့ ခီဟှာ နီးလာဘီဖြစ်ဟှူကြောန့် မတ်တပ်ထဘီး နန်းနို့ရဲ့ ခေါန်းလေဟှို မော့ဟှားဂေ့" ဆိုဘီး မိန့်တော်မူလေဟှယ်။

သဖန်းဗန် ပေါင်ဥပမာကြောန်း

29 အယ်ဘီးန ယေရှုဟှာ သူးနို့ဟှို အယ်ပေါင်ဥပမာန "သဖန်းဗန်န တခြားသစ်ပန်လေဟှို ကေ့ကေ့။ 30 နန်းနို့လေဟှာ အယ်ပန်လေမာ ဝပ်နုလေ ထွပ်လာဇာဟှို ဗြင်ဟှူ ခီမာ နွေရာသီ ရော့-က်ခါနီးဘီ ဆိုဇာဟှို နန်းနို့လေ သိဂေ့ဟှယ်။ 31 အယ်မျိုးဘဲ့ အယ်မူဇာလေ ဖြစ်လာဇာဟှို နန်းနို့လေ ဗြင်ဟှူ ခီမာ ဘုရားသခင်ရဲ့ နိုင်ငံတော် တည်ခါနီးဘီ ဆိုဇာဟှို နန်းနို့လေ သိဂေ့ပါ။

32 "ငါ မှန်တိုင်းပြောမယ်၊ အယ်မူဇာလေ ဂူလောင်း ဖြစ်လာခန်မာ အယ်မျိုးဆစ်ဟှာ လောင်းဝ ပျော့-က်ကွယ်ဟှားဟှို့ မှုဟှ။ 33 ကောန်းဂန်န မ္လေဂီးဟှာ ပျော့-က်ကွယ်ဟှားလေ့မယ်။ အယ်ဘေမဲ့ ငါ့စကားလေဟှာ လောင်းဝ ပျော့-က်ကွယ်လေ့မယ် မှုဟှ။

ဒိရှိဟှို့ လိုအပ်ဟှူကြောန်း

34 "ဒိနနေဂေ့။ ပျော်လွန်ကြူးရှင်းလေ၊ သော့-က်စားယစ်မောရှင်းလေ၊ လောကီမှုရေး စိုးရိမ်ရှင်းလေကြောန့် နန်းနို့ရဲ့ စိနှလောင်းလေဟှာ လေးလံထိုင်းမှိုင်းနေဒူးမာ အယ်နေ့ရစ်ဟှာ ထောန်ချော့-က်မျိုးဘဲ နန်းနို့ထတ်ဟှို ရောက်တရစ် ရော့-က်လာလေ့မယ်။ 35 ဖြားဖြစ်ကြောန့်နူးဆိုဟှာ အယ်နေ့ရစ်ဟှာ မ္လေဂီး တဗ္လန်လောင်းမာရှိဟှူ လူလေ ဂူလောင်းထတ်ဟှို က္လရော့-က်လာလေ့မယ်။ 36 အယ်ကြောန့် နန်းနို့ဟှာ ဖြစ်လာဟှို့ဇာလေ ဂူလောင်းဟှနေ လွတ်မြော့-က်ဘီး လူ့သားရဲ့ ရှေ့တော်မာ မတ်တတ်ရပ်နိုင်ဟှို့တွပ် ခီတိုင်း ဒိနနေဘီး ဆုတောန်းဂေ့" ဆိုဘီး မိန့်တော်မူလေဟှယ်။

37 ✝ ၂၁.၃၇ လု ၁၉.၄၇ ယေရှုဟှာ နေ့ခီလေမာ ဗိမာန်တော်မာ သွန်သန်တော်မူဘီး ညဉ့်ခီလေမာ ပ္လန်ဟှို ထွပ်ဟှားဘီး သံလွင်တောန်ထတ်မာ ညဉ့်ဟှို ကူစေတော်မူဟှယ်။ 38 လူလေ ဂူလောင်းဟှာ ဗိမာန်တော်မာ တရားနားထောန်ဟှို့ မိုးလန်းစောစောဂီး ကိုယ်တော်နားဟှို လာဂေ့ဟှယ်။