1 ပသခါပွဲ ဆိုဘီး ခေါ်ဟှူ တဆေးမှေ့ဘဲဟှူ မုပွဲတော် ခီနီးလာလေဟှယ်။ 2 ယဇ်ပုရောဟိတ်ဂီးလေန ကျမ်းတတ်ဆရာလေဟှာ လူလေဟှို ကြော့-က်လန့်ဂေ့ဟှူကြောန့် ယေရှုဟှို တိတိဟှားသတ်ဟှို့တွပ် နည်းလမ်းရှာကြံဂေ့လေဟှယ်။

3 အယ်ဘီးန စာတန်ဟှာ တဗဲ့တော် ဆယ့်နှေ့ပါးထဲဟှ တပါးဖြစ်ဟှူ ဣရှကာရုတ် ဆိုဘီး ခေါ်ဟှူ ယုဒထဲဟှို ဝမ်လေဟှယ်။ 4 အယ်ကြောန့် ယုဒဟှာ ယဇ်ပုရောဟိတ်ဂီးလေန ဗိမာန်တော်စောန့် ကြီးကဲလေနားဟှို သွားဘီး ယေရှုဟှို သူးနို့လတ်ထဲဟှို ဖယ်မျိုး အပ်ရမယ် ဆိုဇာဟှို သူးနို့လေန တိုင်ဗန်ဂေ့လေဟှယ်။ 5 သူးနို့လေဟှာ ဝန်းသာဘီးဟှာ သူ့ဟှို ကပ်ပေးဟှို့ ဘောတူဂေ့ဟှယ်။ 6 ယုဒဟှာလည်း ဘောတူဘီး လူလေဟှို သိစေဘဲန ယေရှုဟှို သူးနို့လတ်ဟှို အပ်ဟှို့တွပ် ခွမ့်ကောန်းဟှို ရှာကြံလေဟှယ်။

7 တဆေးမှေ့ဘဲဟှူ မုပွဲတော် ခီမာ ပသခါသိုးသားဂန်းလေဟှို သတ်ရဟှူနေ့ ရော့-က်လာဟှယ်။ 8 ယေရှုဟှာ ပေတရုန ယောဟန်ဟှို "ပသခါပွဲတော်ဟှို နို့လေစားဟှို့ သွားဘီး ပြင်ဆင်ဂေ့ပါ" ဆိုဘီး မိန့်တော်မူဘီး သူးနို့ဟှို စေလွှတ်လေဟှယ်။

9 သူးနို့ဟှလည်း "ကိုယ်တော်ဟှ ကျွန်တော့်ဟှားလေဟှို ဖယ်နေရာမာ ပြင်ဆင်စေရှင်ဟှယ်နူး။" ဆိုဘီး မေးလျှော့-က်ဂေ့ဟှယ်။

10 ကိုယ်တော်ဟှ "နန်းနို့ဟှာ ဗြို့ထဲဟှို ဝမ်ဟှားဟှူ ခီမာ ရေအိုးထမ်းလာဟှူ လူတယော့-က်ဟှာ နန်းနို့ဟှို လာတွိလေ့မယ်။ အယ်လူ ဝမ်ဟှားဟှူ အီထဲဟှို ဝမ်လိုက်ဟှားဘီးဟှာ၊ 11 အီဇရှင်ဟှို ‘ဆရာဟှ ငါ့တဗဲ့လေနတူးဒူ ပသခါညဉ့်ဇာစားဟှို့ ခန်းဟှ ဖယ်မာနူး။ ဆိုဘီး မေးခိုင်းလိုက်ဟှယ်’ ဆိုဘီး ပြောဂေ့ပါ။ 12 အယ်လူဟှ ပြင်ဆင်ဟှားဟှူ ထတ်ခန်းမဟှို နန်းနို့ဟှို ပြလေ့မယ်။ အယ်ခန်းမာ နန်းနို့ ပြင်ဆင်ဂေ့ပါ" ဆိုဘီး မိန့်တော်မူလေဟှယ်။

13 သူးနို့ဟှာ ထွပ်ဟှားဘီးန ယေရှုဟှ သူးနို့ဟှို မိန့်တော်မူဟှားတိုင်းဘဲ့ ဂူလောင်းဟှို တွိရဟှူကြောန့် ပသခါညဉ့်ဇာဟှို ပြင်ဆင်ဂေ့ဟှယ်။

14 ခီရော့-က်လာဟှူ ခီမာ ယေရှုဟှာ တမန်တော်လေနတူးဒူ စားဗွဲမာ ထိုင်တော်မူဟှယ်။ 15 ကိုယ်တော်ဟှာ "ငါဟှာ ဒေါက်ခဝေဒနာခံရခန်မာ အယ်ပသခါ ညဉ့်ဇာဟှို နန်းနို့နတူးဒူ ရရာတိုင်း စားရှင်ဟှယ်။ 16 နန်းနို့ဟှို ငါပြောမယ်၊ ပသခါပွဲတော်ဟှာ ဘုရားသခင်ရဲ့ နိုင်ငံတော်မာ ပ္လဲ့ဇောင်သေးခန်ထိ အယ်ပွဲတော်ဟှို နော့-က်ထပ်ခါ ငါစားဟှို့မုဟှ" ဆိုဘီး သူးနို့ဟှို မိန့်တော်မူလေဟှယ်။

17 အယ်ဘီးန ယေရှုဟှာ ခွပ်ဟှို ယူဘီး ဘုရားသခင်ရဲ့ ကျေးဇူးတော်ဟှို ချီးမွမ်းဘီးန "အယ်ခွပ်ဟှို ယူဘီး၊ ရှင်းရှင်းဝီမျှဘီး သော့-က်ဂေ့ပါ။ 18 နန်းနို့ဟှို ငါပြောမယ်။ ခုဟှစဘီး ဘုရားသခင်ရဲ့ နိုင်ငံတော် တည်ထောန်ခန်ထိ အယ်စဗျစ်ဝိုင်ဟှို ငါလောင်းဝ သော့-က်လေ့မယ် မုဟှ" ဆိုဘီး မိန့်တော်မူလေဟှယ်။

19 အယ်ဘီးန ကိုယ်တော်ဟှာ မုဟှိုယူဘီး ဘုရားသခင်ရဲ့ ကျေးဇူးတော်ဟှို ချီးမွမ်းဘီးန မုဟှို ဖဲ့ဘီးဟှာ သူးနို့လေဟှို ပေးဘီး "အယ်မုဟှာ နန်းနို့တွပ် စွန့်ဟှူ ငါ့ရဲ့ ကိုယ်ခန္ဓာ ဖြစ်ဟှယ်။ ငါ့ဟှို အော့-က်မေ့ဟှို့ အယ်မျိုးလောက်ဂေ့" ဆိုဘီး မိန့်တော်မူလေဟှယ်။ 20 အယ်မျိုးဘဲ့ ညဉ့်ဇာစားဘီးန ကိုယ်တော်ဟှာ ခွပ်ဟှိုလည်း ယူဘီးဟှာ "အယ်ခွပ်ဟှာ နန်းနို့တွပ် သွန်းလောန်းဟှူ ငါ့ရဲ့ သွီးန ဇိခတ်ဟှားဟှူ ဘုရားသခင်ရဲ့ ပဋိညာဉ်တရားသစ် ဖြစ်ဟှယ်"*

21 "အယ်ဘေမဲ့ ငါ့ဟှို အပ်မယ့်လူရဲ့ လတ်ဟှာ ငါ့နတူးဒူ စားဗွဲထတ်မာ ရှိနေဟှယ်! 22 လူ့ရဲ့သားဟှာ ဘုရားသခင် ခ္လမှတ်ဟှားတိုင်းဘဲ့ သေခံဟှို့ မှန်ဘဲ့သွားရမယ်။ အယ်ဘေမဲ့ လူ့ရဲ့သားဟှို အပ်ဟှူလူဟှာ အမင်္ဂလာရှိဟှယ်!" ဆိုဘီး မိန့်တော်မူလေဟှယ်။

23 အယ်ဘီးန တဗဲ့တော်လေဟှာ နို့လေထဲဟှ ဖယ်သူဟှာ အယ်မျိုးလောက်ဟှို့နူး။ ဆိုဘီး သူးနို့ရှင်းရှင်း မေးဂေ့လေဟှယ်။

24 ✝သူးနို့လေထဲဟှ ဖယ်သူ့ဟှို ကီးမြတ်ဆောင်း ဖြစ်ဟှယ် ဆိုဘီး မှတ်ယူရမယ် ဆိုဇာဟှို သူးနို့ရှင်းရှင်း ဂြင်းခူဂေ့လေဟှယ်။ 25 ✝ယေရှုဟှ သူးနို့လေဟှို "လူမျိုးခြားလေရဲ့ မန်းဂီးလေဟှာ ပြည်သူလေထတ်မာ စိုးတရ လောက်တတ်ဂေ့ဟှယ်။ လူလေထတ်မာ အာဏာရှိဟှူ သူလေဟှိုလည်း သူများကျိုးဆောန်ဝှပ်သူ ဆိုဘီး ခေါ်ခံရဂေ့ဟှယ်။ 26 ✝အယ်ဘေမဲ့ နန်းနို့လေဟှ အယ်မျိုးလောက်ဂေ့န။ နန်းနို့ထဲမာ ကီးမြတ်ဆောင်းဖြစ်ဟှူ သူဟှာ ငယ်ဆောင်းဟှူ သူမျိုး ဖြစ်ရမယ်။ ဦးဆောန်ဟှူ သူဟှာ စေခံမျိုး ဖြစ်ရမယ်။ 27 ✝စားဗွဲမာ ထိုင်နေဟှူသူန စေခံဟှူ သူလေထဲမာ ဖယ်သူဟှ ပိုဘီး ကီးမြတ်နူး။ စားဗွဲမာ ထိုင်နေဟှူသူ မှုဟှလော။ အယ်ဘေမဲ့ ငါဟှာ နန်းနို့ထဲမာ စေခံဟှူသူမျိုး ဖြစ်ဟှယ်။"

28 "စောင်ဇမ်း နှောန့်ယှစ်ရှင်းလေဟှို ငါခံနေရဒူးမာ နန်းနို့ဟှာ ငါ့နတူးဒူ ရပ်တည်ပေးဟှူ လူလေ ဖြစ်ဂေ့ဟှယ်။ 29 အယ်ဘီးဟှာ ငါ့ဖဟှ ငါ့ဟှို နိုင်ငံတော်ဟှို ပေးအပ်ဟှူမျိုးဘဲ့ ငါဟှလည်း နိုင်ငံတော်ဟှို နန်းနို့ဟှို ပေးအပ်မယ်။ 30 ✝နန်းနို့ဟှာ ငါ့ရဲ့ နိုင်ငံတော်မာ ငါ့ရဲ့ စားဗွဲမာ ထိုင်ဘီး စားသော့-က် ရဂေ့လေ့မယ်။ အယ်ဘီးဟှာ ပလ္လင်ထတ်မာ ထိုင်ဘီး ဣသရေလမျိုးနွယ် ဆယ့်နှေ့နွယ်ဟှို တရားစီရင် ရဂေ့လေ့မယ်။

31 "ရှိမုန်၊ ရှိမုန်! နားထောန်ပါ! ဂျောင်ဆန်ဟှို ဇဂါခ္လဟှူမျိုးဘဲ့ စာတန်ဟှ နန်းနို့ဂူလောင်းဟှို ဇဂါခ္လဟှို့တွပ် ခွမ့်တောန်းလေဘီ။ 32 အယ်ဘေမဲ့ နန့်ရဲ့ ယောင်ကြည်ရှင်း ဆောင်းရှောင်းဘဲဟှို့တွပ် ငါဆုတောန်းနေဟှယ်။ နန်ဟှာ ငါဖတ်ဟှို ပ္လန်လှည့်လာဟှူ ခီမာ နန့်ရဲ့ ညီကိုလေဟှို ခိုင်ခံ့စေပါ" ဆိုဘီး မိန့်တော်မူလေဟှယ်။

33 ပေတရုဟှ "သခင်၊ ကျွန်တော်ဟှာ ကိုယ်တော်နတူးဒူ ထောန်ဘဲ့က္လက္လ၊ သေဘဲ့သေသေ ဆင်သင့်ရှိဟှယ်!" ဆိုဘီး လျှော့-က်လေဟှယ်။

34 ယေရှုဟှ "ပေတရု၊ နန့်ဟှို ငါပြောမယ်။ အယ်ညဉ့် ကြစ်တွန်ခန်မာ နန်ဟှာ ငါဟှို သိဟှ ဆိုဘီး သောင်းခါ ငြင်းလေ့မယ်" ဆိုဘီး မိန့်တော်မူလေဟှယ်။

35 ✝အယ်ဘီးန ယေရှုဟှာ "နန်းနို့ဟှို ကပ်အိ၊ လွယ်အိန ခေနပ်မှေ့ဘဲ စေလွှတ်ဟှူ ခီမာ နန်းနို့လေမာ လိုအပ်ဇာလေ ရှိသေးလော။" ဆိုဘီး တဗဲ့တော်လေဟှို မေးလေဟှယ်။

သူးနို့ဟှာ "မှေ့ဟှ" ဆိုဘီး လျှော့-က်လေဟှယ်။

36 ယေရှုဟှ "အယ်ဘေမဲ့ ခု ကပ်အိရှိဟှူ သူဟှာ ယူဟှားစေ။ လွယ်အိရှိဟှူ သူဟှာလည်း ယူဟှားစေ။ ထားမှေ့ဘဲဟှူ သူဟှာ မိမိဝတ်လောင်ဟှို ရောန်းဘီးဟှာ ထားဟှို ဝယ်စေ။ 37 နန်းနို့ဟှို ငါပြောမယ်၊ ‘သူဟှာ တရားမှေ့ဘဲဟှူ သူလေရဲ့ စာရင်းထဲမာ ထဲ့သွမ်းရှင်းခံရမယ်’ ဆိုဘီး ကျမ်းစာမာ ရေးဟှားဟှူဇာဟှာ ငါ့မာ ပ္လဲ့ဇောင်ရမယ်။ ဖြားဖြစ်ကြောန့်နူးဆိုဟှာ ငါ့ကြောန်းဟှို ရေးဟှားဇာဟှာ ပ္လဲ့ဇောင်ရှင်းဟှို ရော့-က်နေဘီ" ဆိုဘီး မိန့်တော်မူလေဟှယ်။

38 တဗဲ့တော်လေဟှ "သခင်! ကေ့တော်မူပါ! အယ်မာ ထားနှေ့ရှောန်း ရှိဟှယ်" ဆိုဘီး လျှော့-က်လေဟှယ်။

ကိုယ်တော်ဟှ "အယ်ဆိုဟှာ ရလော့-က်ဘီ!"* ဆိုဘီး မိန့်တော်မူလေဟှယ်။

39 ယေရှုဟှာ ဗြို့ထဲဟှနေ ထွပ်ဟှားဘီး ခါတိုင်းမျိုးဘဲ့ သံလွင်တောန်ထတ်ဟှို ကြွတော်မူဟှယ်။ တဗဲ့တော်လေလည်း ကိုယ်တော်နတူးဒူ လိုက်ဟှားဂေ့ဟှယ်။ 40 အယ်နေရာဟှို ရော့-က်ဟှူ ခီမာ ကိုယ်တော်ဟှ "နန်းနို့လေဟှာ သွီးဆောန်ရှင်းထဲဟှို က္လဘဲဟှို့တွပ် ဆုတောန်းဂေ့" ဆိုဘီး သူးနို့ဟှို မိန့်တော်မူလေဟှယ်။

41 အယ်ဘီးန ကိုယ်တော်ဟှာ သူးနို့လေန က္လော့-က်ခဲတပစ်ဇာလောက် ဝီးဟှို သွားဘီးဟှာ ဒူးထော့-က်ဘီးန ဆုတောန်းဟှူဇာဟှ 42 ကိုယ်တော်ဟှ "ဖ၊ ဖြစ်နိုင်မယ် ဆိုဟှာ အယ်မူဝေဒနာခွပ်ဟှို ကျွန်တော့်ဟှနေဘီး ယူဟှားပေးပါ။ အယ်ဘေမဲ့ ကျွန်တော့် လိုရှင်တိုင်းဖြစ်စေဘဲန ဖလိုရှင်းတိုင်းဘဲ့ ဖြစ်စေပါ" ဆိုဘီး ဆုတောန်းလေဟှယ်။ 43 အယ်ခီမာ ကောန်းဂန်ဘောင်ဟှ ကောန်းဂန်တမန်တပါးဟှာ ကိုယ်တော်နားမာ ပေါ်လာဘီး ကိုယ်တော့်ဟှို အားပေးတော်မူဟှယ်။ 44 ကိုယ်တော်ဟှာ ပြင်းထန်ဟှူ ဝေဒနာဟှို ခံစားဘီး ပိုဘီး ပြင်းပြင်းထန်ထန် ဆုတောန်းဟှူကြောန့် ကိုယ်တော်ရဲ့ ချွေးဟှာ သွီးစစ်လေမျိုး မ္လေဂီးထတ်ဟှို က္လလေဟှယ်။*

45 ကိုယ်တော်ဟှာ ဆုတောန်းရာဟှနေ ထတော်မူဘီး တဗဲ့တော်လေနားဟှို ပ္လန်လာဟှူ ခီမာ သူးနို့လေဟှာ ဝန်းနဲဘီး အိမွိနေဇာဟှို တွိဟှားလေဟှယ်။ 46 ကိုယ်တော်ဟှာ "နန်းနို့လေ ဖြားဖြစ်ကြောန့် အိမွိနေဂေ့နူး။ သွီးဆောန်ရှင်းထဲဟှို က္လဘဲဟှို့တွပ် ထဒန်ဘီး ဆုတောန်းဂေ့" ဆိုဘီး သူးနို့ဟှို မိန့်တော်မူလေဟှယ်။

47 အယ်မျိုးမိန့်တော်မူနေဒူးမာဘဲ့ တဗဲ့တော် ဆယ့်နှေ့ပါးထဲဟှ တပါးဖြစ်ဟှူ ယုဒဟှာ လူအောက်ဂီးဟှို ဦးဆောန်ဘီး ရော့-က်လာဟှယ်။ သူဟှာ ယေရှုဟှို နမ်းဟှို့တွပ် တိုးဝမ်လာလေဟှယ်။ 48 အယ်ဘေမဲ့ ယေရှုဟှ "ယုဒ၊ လူ့ရဲ့သားဟှို နမ်းရှင်းအားဖြင့် အပ်ဟှို့လော။" ဆိုဘီး မေးတော်မူလေဟှယ်။

49 ယေရှုနတူးဒူ ရှိနေဂေ့ဟှူ တဗဲ့တော်လေဟှာ ဖြစ်လာမယ့်ဇာဟှို သိလိုက်ဟှူ ခီမာ သူးနို့ဟှ "သခင်၊ ကျွန်တော့်ဟှားလေ ထားန ခွတ်ရဟှို့လော။" ဆိုဘီး မေးလျှော့-က်လေဟှယ်။ 50 သူးနို့ထဲဟှ တယော့-က်ဟှာ ယဇ်ပုရောဟိတ်မန်းရဲ့ ကျွန်တယော့-က်ဟှို ခွတ်လိုက်ဇာ အယ်လူရဲ့ ညာဖတ်နားဝှပ်ဟှာ ပြတ်ဟှားလေဟှယ်။

51 အယ်ဘေမဲ့ ယေရှုဟှာ "တော်ဘီ!" ဆိုဘီး မိန့်တော်မူလေဟှယ်။ ကိုယ်တော်ဟှာ အယ်လူရဲ့ နားဝှပ်ဟှို လတ်တော်န ထိလိုက်ဘီး ပ္လန်ကောန်းစေလေဟှယ်။

52 အယ်ဘီးန ယေရှုဟှာ မိမိဟှို ဖမ်းဟှို့ရော့-က်လာဟှူ ယဇ်ပုရောဟိတ်ဂီးလေ၊ ဗိမာန်တော်စောန့် တပ်မှူးလေန သတ်ကီးဝါဂီးလေဟှို "နန်းနို့ဟှာ မ္လဟှို ဖမ်းဟှူမျိုး ထားလေ၊ ဒေါက်လေဟှို ကိုင်ဆောန်ဘီး လာဂေ့ရလော။ 53 ✝ငါဟှာ နေ့တိုင်း နန်းနို့နတူးဒူ ဗိမာန်တော်မာ ရှိနေဒူးမာ နန်းနို့ဟှာ ငါ့ဟှို ဖမ်းဂေ့ဟှ။ အယ်ဘေမဲ့ အယ်မျိုး လောက်ဆောန်ဟှို့တွပ် နန်းနို့ရဲ့ခီ ဖြစ်ဟှယ်။ မှောန်မိုက်တဂိုးလည်း ဖြစ်ဟှယ်" ဆိုဘီး မိန့်တော်မူလေဟှယ်။

54 သူးနိုးလေဟှ ယေရှုဟှို ဖမ်းဘီးဟှာ ယဇ်ပုရောဟိတ်မန်းရဲ့ အီဟှို ခေါ်ဟှားဂေ့ဟှယ်။ ပေတရုဟှာလည်း ခပ်ဝီးဝီးဟှနေ လိုက်ဟှားလေဟှယ်။ 55 အီဝမ်းရဲ့ လယ်မာ မီးဗောင်ဟှို ဝိုင်းဘီးထိုင်နေဟှူ လူလေကြားထဲမာ ပေတရုဟှာ ဝမ်ထိုင်လေဟှယ်။ 56 အယ်မျိုး ပေတရုဟှာ မီးဗောင်းနားမာ ထိုင်နေဇာဟှို စေခံမီးမ တယော့-က်ဟှ ဗြင်ဟှားဟှူုကြောန့် သူ့ဟှို စေ့စေ့ကေ့ဘီး "အယ်လူဟှာလည်း ယေရှုရဲ့ ပေါန်းဖော် ဖြစ်ဟှယ်!" ဆိုဘီး ပြောလေဟှယ်။

57 အယ်ဘေမဲ့ ပေတရုဟှ "ဝှေ့မီးမ၊ အယ်သူဟှို ငါ သိဟှ!" ဆိုဘီး ဂြင်းလေဟှယ်။

58 ရှစ်ဟှားကြာဘီးန လူတယော့-က်ဟှာ ပေတရုဟှို ဗြင်ဟှားဟှူ ခီမာ "နန်လည်း သူးနို့လေထဲဟှ တယော့-က်ဘဲ့ ဖြစ်ဟှယ်!" ဆိုဘီး ပြောလေဟှယ်။

အယ်ဘေမဲ့ ပေတရုဟှာ "ဝှေ့လူ၊ ငါဟှာ သူးနို့ထဲဟှ မှုဟှ!" ဆိုဘီး ပြောလေဟှယ်။

59 တနာရီလော့-က် ကြာဘီးန တခြားတယော့-က်ဟှ "မှန်တိုင်း ပြောရမယ် ဆိုဟှာ အယ်သူဟှာ ဂါလိလဲလူ ဖြစ်ဟှူကြောန့် ယေရှုန ပေါန်းဖော်ဟှူသူ ဖြစ်ဟှယ်!" ဆိုဘီး ခိုင်ခိုင်မာမာ ပြောလေဟှယ်။

60 အယ်ဘေမဲ့ ပေတရုဟှ "ဝှေ့လူ၊ နန်ပြောနေဇာလေဟှို ငါ သိဟှ!" ဆိုဘီး ပ္လန်ပြောလေဟှယ်။

သူအယ်မျိုး ပြောနေဒူးမာဘဲ့ ကြစ်တွန်လေဟှယ်။ 61 အယ်ခီမာ သခင်ဘုရားဟှာ လှည့်ဘီး ပေတရုဟှို စူးစိုက်ဘီး ကေ့တော်မူဟှယ်။ ပေတရုဟှလည်း "အယ်ညဉ့် ကြစ်တွန်ခန်မာ နန်ဟှာ သောင်းခါတိတိ ငြင်းပယ်လေ့မယ်" ဆိုဘီး မိန့်တော်မူဟှားဟှူ သခင်ဘုရားရဲ့ စကားတော်ဟှို ပ္လန်အော့-က်မေ့လာဟှယ်။ 62 အယ်ကြောန့် ပေတရုဟှာ ပ္လန်ဟှို ထွပ်ဟှားဘီး ရရာတိုင်း ငိုလေဟှယ်။

63 ယေရှုဟှို စောန့်ကြပ်နေဟှူ လူလေဟှ ကိုယ်တော့်ဟှို လှောန်ပြောန်ဘီး ရိုက်နှက်ဂေ့ဟှယ်။ 64 သူးနို့လေဟှ ကိုယ်တော်ရဲ့ မျစ်နှာဟှို ဖောင်းဘီးဟှာ "ကိုယ်တော့်ဟှို ဖယ်သူလေ ရိုက်ဂေ့နူး။ ပရောဖက်ပြုဂေ့!" ဆိုဘီး ကိုယ်တော့်ဟှို မေးဂေ့ဟှယ်။ 65 အယ်ဘီးဟှာ သူးနို့လေဟှ တခြားကဲ့ရဲ့ဇာလေ ဘောင်ဂီးန ကိုယ်တော့်ဟှို ပြောဂေ့ဟှယ်။

66 မိုးလန်းဟှားဟှူ ခီမာ သတ်ကီးဝါဂီးလေ၊ ယဇ်ပုရောဟိတ်ဂီးလေန ကျမ်းတတ်ဆရာလေဟှာ စုဝီးဂေ့ဘီး ယေရှုဟှို တရားလွှတ်တော်ရှေ့ဟှို ခေါ်ဆောန်ဟှားဂေ့ဟှယ်။ 67 သူးနို့လေဟှ "နန်ဟှာ မေရှိယဘဲ့လော။ နို့လေဟှို ပြောပါ" ဆိုဘီး မေးဂေ့ဟှယ်။

ကိုယ်တော်ဟှ "နန်းနို့ဟှို ငါပြောမယ် ဆိုဟှာလည်း နန်းနို့ ယောင်ကြည်ဂေ့ဟှို့ မှုဟှ။ 68 နန်းနို့ဟှို ငါ မေးမေးမယ် ဆိုဟှာလည်း နန်းနို့ ဖြေဂေ့ဟှို့ မှုဟှ။ 69 အယ်ဘေမဲ့ ခုဟှနေဘီး လူ့ရဲ့သားဟှာ အနန္တတဂိုးရှင် ဘုရားသခင်ရဲ့ ညာဖတ်မာ ထိုင်တော်မူလေ့မယ်" ဆိုဘီး မိန့်တော်မူလေဟှယ်။

70 သူးနို့လေ ဂူလောင်းဟှာ "အယ်မျိုးဆိုဟှာ နန်ဟှ ဘုရားသခင်ရဲ့သား ဖြစ်ဟှယ်လော။" ဆိုဘီး မေးလျှော့-က်လေဟှယ်။

ကိုယ်တော်ဟှာ "နန်းနို့ မေးဟှူတိုင်းဘဲ့ ငါဖြစ်ဟှယ်" ဆိုဘီး သူးနို့ဟှို မိန့်တော်မူလေဟှယ်။

71 အယ်ဘီးန သူးနို့လေဟှာ "နို့လေကိုယ်တိုင် သူ့ရဲ့နှော့-က်ဟှနေ အယ်စကားလေဟှို ကြားရဘီ ဖြစ်ဟှူကြောန့် နော့-က်ထပ် ဖြားသတ်သေလေ လိုသေးဟှယ်နူး!" ဆိုဘီး ပြောဂေ့ဟှယ်။