1 နန်းနွေနေ့ မိုးလန်းစောဂီးမာ အယ်မီးမလေဟှာ သူးနို့ကိုယ်တိုင် ပြင်ဆင်ဟှားဟှူ နံ့သာပေါန်းလေဟှို ယူဆောန်ဘီး သန်းခ္လိုင်းဂူဟှို သွားဂေ့ဟှယ်။ 2 သူးနို့လေဟှာ သန်းခ္လိုင်းဂူဝဟှ က္လော့-က်တောင်းဟှို လှိမ့်ဖယ်ဟှားဇာဟှို တွိဟှားဂေ့ဟှယ်။ 3 အယ်ကြောန့် သူးနို့လေဟှာ သန်းခ္လိုင်းထဲဟှို ဝမ်ဟှားဂေ့ဟှယ်။ အယ်ဘေမဲ့ သခင်ယေရှုရဲ့ လောန်းတော်ဟှို တွိဂေ့ဟှ။ 4 အယ်ကြောန့် သူးနို့လေဟှာ အယ်ကြောန်းရာဟှို စဉ်းစားနိုင်ဘဲဖြစ်နေဒူးမာ တော့-က်ပဟှူ ဝတ်ဟှို ဝတ်စားဟှားဟှူ လူနှေ့ယော့-က်ဟှာ ရောက်တရစ် သူးနို့နားမာ ပေါ်လာလေဟှယ်။ 5 အယ်မီးမလေဟှ ကြော့-က်လန့်ဘီး မ္လေဂီးမာ ပျပ်ဝပ်နေဂေ့ဟှယ်။ အယ်သူနှေ့ယော့-က်ဟှာ "နန်းနို့လေဟှ သေဟှူသူလေထဲမာ သတ်ရှင်ဟှူသူဟှို ဖြားဖြစ်ကြောန့် လာရှာနေဂေ့နူး။ 6 ✝ကိုယ်တော်ဟှာ အယ်နေရာမာ မှေ့ဟှ။ ရှင်ပ္လန်ထမြော့-က်ဟှားဘီ။ ကိုယ်တော်ဟှာ ဂါလိလဲနယ်မာ ရှိနေဒူးဟှ နန်းနို့ဟှို ဖယ်မျိုးမိန့်တော်မူဟှားဟှယ် ဆိုဇာဟှို အော့-က်မေ့ဂေ့။ 7 သူးနို့ဟှို ‘လူ့ရဲ့သားဟှာ ပြစ်သားလေ လတ်ထဲဟှို အပ်ရှင်းဟှို ခံရလေ့မယ်။ ကားစင်တန် ခံရလေ့မယ်။ အယ်ဘီးန သောင်းရစ်မြော့-က်ဟှူ နေ့မာ ထမြော့-က်လေ့မယ်’ ဆိုဘီး မိန့်တော်မူဟှားဟှယ် မှုဟှလော။" ဆိုဘီး ပြောဂေ့ဟှယ်။

8 အယ်ခီမာ မီးမလေဟှာ ကိုယ်တော်ရဲ့ စကားလေဟှို ပ္လန်အော့-က်မေ့လာဘီး 9 သန်းခ္လိုင်းဟှနေ ပ္လန်ဟှားဘီး တဗဲ့တော် ဆယ့်တပါးန ကျန်လူလေ ဂူလောင်းဟှို အယ်မူကြောန်းရာလေ ဂူလောင်းဟှို ပြောပြဂေ့ဟှယ်။ 10 တမန်တော်လေဟှို အယ်မူကြောန်းရာလေဟှို ပြောပြသူလေဟှာ မာဂဒလဝါသူ မာရိ၊ ယောဟန္န၊ ယာကုပ်ရဲ့ မိခင်ဖြစ်ဟှူ မာရိန သူးနို့လေနတူးဒူ ရှိနေဟှူ တခြားမီးမလေ ဖြစ်ဂေ့ဟှယ်။ 11 အယ်ဘေမဲ့ အယ်မီးမလေ ပြောဟှူ စကားလေဟှာ ဓိပါယ်မှေ့ဘဲဟှူကြောန့် တမန်တော်လေဟှ ယောင်ကြည်ဂေ့ဟှ။ 12 အယ်ဘေမဲ့ ပေတရုဟှာ ထဘီး သန်းခ္လိုင်းဂူဟှို ပ္လေးဟှားလေဟှယ်။ ရော့-က်ဟှားဟှူ ခီမာ ငေါက်ကေ့လိုက်ဟှူဇာ ပိဖ္လူစဟှိုဘဲ့ တွိရဟှူကြောန့် အယ်ဖြစ်ပျစ်ဟှို အံ့ဩဟှားဘီး အီဟှို ပ္လန်ဟှားဟှယ်။*

13 အယ်နေ့မာဘဲ့ ယေရှုရဲ့ နော့-က်တော်လိုက် နှေ့ယော့-က်ဟှာ ယေရုရှလင်ဗြို့န ခွန်နစ်မိုင်လောက်ဝီးဟှူ ဧမောက် ဆိုဘီး နာမယ်ရှိဟှူ ဝါဟှို သွားနေဂေ့ဟှယ်။ 14 သူးနို့ဟှာ ဖြစ်ပျစ်ဟှားဘီးဟှူ ကြောန်းရာလေ ဂူလောင်းဟှို ယော့-က်နယော့-က် ပြောနေဂေ့ဟှယ်။ 15 အယ်မျိုးပြောဆို ဆွေးနွေးနေဒူးမာ ယေရှုကိုယ်တိုင် ရော့-က်လာဘီး သူးနို့နတူးဒူ ကြွတော်မူလေဟှယ်။ 16 သူးနို့ဟှာ ကိုယ်တော့်ဟှို ဗြင်ဘေမဲ့လည်း ကိုယ်တော့်ဟှို မှတ်မိဘဲ ဖြစ်နေဂေ့ဟှယ်။ 17 ယေရှုဟှ "နန်းနို့လေ လမ်းရှော့-က်ရင်းန ယော့-က်နယော့-က် ဖြားဇာလေ ပြောနေဂေ့နူး။" ဆိုဘီး သူးနို့ဟှို မေးတော်မူလေဟှယ်။

သူးနို့ဟှာ ဝမ်းနဲဟှူမျစ်နှာန ရပ်နေဂေ့ဟှယ်။ 18 သူးနို့ထဲဟှ ကလောဖ နာမယ်ရှိဟှူသူဟှ "နန်ဟှာ ယေရုရှလင်ဗြို့မာ ဧည့်သည်ဖြစ်န နေထိုင်နေဘေမဲ့ အယ်နေ့ရစ်လေမာ အယ်ဗြို့နှိုက် ဖြစ်ပျစ်ဟှားဟှူ ကြောန်းရာလေဟှို နန့်ယော့-က်ဒဲဘဲ့ သိသေးဟှလော။" ဆိုဘီး ကိုယ်တော့်ဟှို မေးလေဟှယ်။

19 ကိုယ်တော်ဟှ "ဖြားကြောန်းရာလေနူး။" ဆိုဘီး မေးတော်မူလေဟှယ်။

အယ်လူနှေ့ယော့-က်ဟှ "နာဇရက်ဗြို့သားယေရှု ကြောန်းဘဲ့ဖြစ်ဟှယ်။ အယ်သူဟှာ ဘုရားသခင်န လူလေရဲ့ရှေ့မာ လတ်သတ်တိ၊ နှော့-က်သတ်တိန ပ္လဲ့ဇောင်ဟှူ ပရောဖက် ဖြစ်ဟှယ်။ 20 နို့လေရဲ့ ယဇ်ပုရောဟိတ်ဂီးလေန ဘာသာရေးခေါန်းဆောန်လေဟှ သူ့ဟှို သေဒန်စီရင်ရှင်း ခံဟှို့ ဆိုဘီး အပ်ပေးဂေ့ဟှယ်။ အယ်ကြောန့် သူ့ဟှို ကားစင်တန်ဂေ့ဟှယ်။ 21 သူဟှာ ဣသရေလလူမျိုးဟှို လွတ်မြော့-က်စေဟှို့တွပ် လာမယ် ဆိုဘီး နို့လေ မျှော်လင့်ဟှားဂေ့ဟှယ်! အယ်မူဇာလေ ဖြစ်ပျစ်ဟှားဇာဟှ သောင်းရစ်ရှိဟှားဘီး။ 22 နို့လေရဲ့ အောက်စုထဲဟှ မီးမတချို့ဟှာ နို့လေဟှို အံ့ဩဟှားစေဂေ့ဟှယ်။ သူးနို့လေဟှာ မိုးလန်းစောစောဂီးမာ သန်းခ္လိုင်းဂူဟှို သွားဂေ့ဟှယ်။ 23 အယ်ဘေမဲ့ ကိုယ်တော်ရဲ့ လောန်းဟှို တွိဂေ့ဟှ။ သူးနို့လေဟှ ကိုယ်တော်ဟှာ သတ်ရှင်နေဟှယ် ဆိုဘီး ပြောပြဟှူ ကောန်းဂန်တမန်လေဟှို ရူပါရောင်မာ ဗြင်ရဟှယ် ဆိုဇာဟှို ပ္လန်လာဘီး ပြောဂေ့လေဟှယ်။ 24 နို့လေရဲ့ အောက်စုထဲဟှ လူတချို့ဟှာ သန်းခ္လိုင်းဂူဟှို သွားဟှူ ခီမာလည်း မီးမလေ ပ္လန်ပြောပြမျိုးဘဲ့ တိတိက္လက္လ တွိရဂေ့ဘေမဲ့ ကိုယ်တော့်ဟှို တွိဂေ့ဟှ" ဆိုဘီး ပ္လန်ဖြေဂေ့ဟှယ်။

25 အယ်ဘီးန ယေရှုဟှ "ပရောဖက်လေ ဟောဟှားဇာ ဂူလောင်းဟှို နှလောင်းထဲမာ ယောင်ကြည်ဟှို့ ရရာတိုင်း နှေးကွေးဟှူ လူမိုက်လေ! 26 မေရှိယဟှာ အယ်မျိုးဒေါက်ခခံဘီးန သူ့ရဲ့ဖောင်းသရေထဲဟှို့ ဝမ်စားရမယ် မှုဟှလော။" ဆိုဘီး သူးနို့ဟှို မိန့်တော်မူလေဟှယ်။ 27 အယ်ဘီးဟှာ ယေရှုဟှ မောရှေရဲ့ ကျမ်းလေန ပရောဖက်လေရဲ့ ကျမ်းဂူလောင်းမာ ကိုယ်တော်န ပတ်သတ်ဘီး ရေးဟှားဇာလေဟှို သူးနို့လေဟှို ရှင်းပြတော်မူဟှယ်။

28 သူးနို့ သွားနေဟှူ ဝါနားဟှို ရော့-က်ခါနီးမာ ယေရှုဟှာ ရှေ့ဟှို ဆစ်ဘီးသွားဟှူမျိုး လောက်တော်မူဟှူကြောန့်၊ 29 သူးနို့လေဟှ ကိုယ်တော့်ဟှို ပ္လန်ဆွဲဟှားဘီး "နေဒန်ဟှားဟှူကြောန့် ညဉ့်ခန်းဇာရော့-က်နေဘီ။ အယ်ကြောန့် နို့လေနတူးဒူ တည်းခိုပါ" ဆိုဘီး ပြောဂေ့ဟှယ်။ အယ်ကြောန့် ကိုယ်တော်ဟှာ သူးနို့နတူးဒူ တည်းခိုဟှို့ လိုက်ဟှားတော်မူဟှယ်။ 30 ကိုယ်တော်ဟှာ သူးနို့နတူးဒူ ထိုင်တော်မူဟှူ ခီမာ မုဟှို ယူဘီး ကျေးဇူးတော်ဟှို ချီးမွမ်းတော်မူဟှယ်။ အယ်ဘီးန မုဟှို ဖဲ့ဘီး သူးနို့လေဟှို ပေးတော်မူဟှယ်။ 31 အယ်ခီမာ သူးနို့လေရဲ့ မျစ်စိဟှာ ပွမ့်ဟှားဘီး ကိုယ်တော့်ဟှို ပ္လန်မှတ်မိဟှားဂေ့ဟှယ်။ အယ်ဘေမဲ့ ကိုယ်တော်ဟှာ သူးနို့လေရဲ့ မျစ်စိရှေ့မာဘဲ့ ပျော့-က်ကွယ်ဟှားလေဟှယ်။ 32 သူးနို့ဟှာ "လမ်းတရှော့-က်လောင်းမာ ကိုယ်တော်ဟှာ နို့လေဟှို စကားပြောနေဟှူ ခီမာရော၊ ကျမ်းစာလေဟှို ရှင်းပြနေဟှူ ခီမာရော နို့လေရဲ့ စိနှလောင်းထဲမာ မီးလောန်နေမျိုးဘဲ့ ဖြစ်နေဂေ့ဟှယ် မှုဟှလော။" ဆိုဘီး ယော့-က်နယော့-က် မေးနေဂေ့ဟှယ်။

33 သူးနို့ဟှာ ရှစ်ရှင်းထဘီး ယေရုရှလင်ဗြို့ဟှို ပ္လန်ဟှားဂေ့ဟှယ်။ အယ်နေရာမာ တဗဲ့တော် ဆယ့်တပါးဟှာ သူးနို့ရဲ့ ပေါန်းဖော်လေနတူးဒူ စုဝီးနေဇာဟှို တွိရဂေ့ဟှယ်။ 34 အယ်သူလေဟှ "သခင်ဘုရားဟှာ တကယ်ဘဲ့ ထမြော့-က်ဟှားဘီ! ကိုယ်တော်ဟှာ ရှိမုန်ဟှို ကိုယ်ထန်ရှားပြတော်မူဟှယ်!" ဆိုဘီး ပြောလေဟှယ်။

35 အယ်ဘီးန အယ်လူနှေ့ယော့-က်ဟှ လမ်းမာ ဖြစ်ပျစ်ဟှားဇာလေဟှိုရော၊ မုဟှို ဖဲ့လိုက်ဟှူ ခီမာ သခင်ဘုရား ဖြစ်ဟှယ် ဆိုဘီး သိလိုက်ရဟှယ် ဆိုဇာဟှိုရော ပြောပြဂေ့ဟှယ်။

36 သူးနို့နှေ့ယော့-က်ဟှာ အယ်မျိုးပြောနေဒူးမာ သခင်ဘုရားကိုယ်တိုင် သူးနို့လေထဲမာ ရောက်တရစ် ပေါ်လာဘီး "နန်းနို့နတူးဒူ ငြီသတ်ရှင်း ရှိပါစေ" ဆိုဘီး သူးနို့လေဟှို မိန့်တော်မူလေဟှယ်။*

37 သူးနို့လေဟှာ ကသေဟှို ဗြင်ဟှယ် ဆိုဘီး ထန်ဘီးဟှာ ကြော့-က်နေဂေ့ဟှယ်။ 38 အယ်ဘေမဲ့ ကိုယ်တော်ဟှ "ဖြားဖြစ်ကြောန့် ကြော့-က်နေဂေ့ဟှယ်နူး။ ဖြားဖြစ်ကြောန့် နန်းနို့စိထဲမာ သံသယဖြစ်နေဂေ့ဟှယ်နူး။ 39 ငါ့လတ်လေ၊ ငါ့ခေလေဟှို ကေ့ဂေ့ပါ။ ငါကိုယ်တိုင် ဖြစ်ဟှယ်။ ဖြားဖြစ်ကြောန့်နူးဆိုဟှာ ကသေမာ သားလေ၊ ရိုးလေ မှေ့ဟှ။ နန်းနို့ ဗြင်ဟှူတိုင်းဘဲ့ ငါ့မာ သားလေ၊ ရိုးလေရှိဟှယ် ဆိုဇာဟှို ငါ့ဟှို စမ်းကေ့လိုက် နန်းနို့သိလေ့မယ်" ဆိုဘီး သူးနို့ဟှို မိန့်တော်မူလေဟှယ်။

40 ကိုယ်တော်ဟှာ အယ်မျိုးပြောဘီး သူ့ရဲ့လတ်လေန ခေလေဟှို သူးနို့ဟှို ပြလေဟှယ်။* 41 သူးနို့ဟှာ ရရာတိုင်း အံ့ဩဟှားဘီး ဝန်းသာနေဟှူကြောန့် ယောင်ကြည်နိုင်ဘဲ ဖြစ်နေဟှူ ခီမာ ကိုယ်တော်ဟှ "နန်းနို့မာ စားဟှို့ တခုခုရှိလော။" ဆိုဘီး သူးနို့ဟှို မေးတော်မူလေဟှယ်။ 42 သူးနို့ဟှာ ကိုယ်တော့်ဟှို ငါးဂန်တပိုင်း ပေးဂေ့ဟှယ်။ 43 အယ်ငါးဂန်ဟှို ကိုယ်တော်ဟှာ သူးနို့ရှေ့မာဘဲ့ ယူဘီးဟှာ စားတော်မူလေဟှယ်။

44 အယ်ဘီးန ကိုယ်တော်ဟှ "နန်းနို့နတူးဒူ ရှိနေဒူးဟှ ငါပြောဟှားမျိုးဘဲ့ မောရှေရဲ့ ပညတ်တရားကျမ်း၊ ပရောဖက်ကျမ်းလေန ဆာလံကျမ်းမာ ငါ့ကြောန်းဟှို ရေးဟှားဇာလေဟှာ ပ္လဲ့ဇောင်ဟှားဘီ" ဆိုဘီး သူးနို့ဟှို မိန့်တော်မူလေဟှယ်။

45 အယ်ဘီးန ကိုယ်တော်ဟှာ ကျမ်းစာလေဟှို နားလည်ဟှို့တွပ် သူးနို့ရဲ့ သိဉာဏ်ဟှို ဖွမ့်ပေးဘီးဟှာ 46 "ကျမ်းစာလေမာ ရေးဟှားဇာဟှ မေရှိယဟှာ ဝေဒနာခံတော်မူဘီး သောင်းရစ်မြော့-က်ဟှူနေ့မာ သေရာဟှနေ ထမြော့-က်လေ့မယ်။ 47 အယ်ဘီးဟှာ သူ့နာမအားဖြင့် ပြစ်လွှတ်ရှင်းနဆိုင်ဟှူ နောန်ဒတရားဟှို ယေရုရှလင်ဗြို့ဟှစဘီး လူမျိုးဂူလောင်းဟှို ဟောပြောရမယ်။ 48 နန်းနို့ဟှာ အယ်ကြောန်းရာလေရဲ့ မျစ်ဗြင်သတ်သေလေ ဖြစ်ဟှယ်။ 49 ✝အယ်ဘီးဟှာ ငါဟှာ ငါ့ဖရဲ့ ဂဒိဟှို နန်းနို့နားဟှို ငါကိုယ်တိုင် စေလွှတ်မယ်။ အယ်ဘေမဲ့ ထတ်ကောန်းဂန်ဟှနေ တဂိုးဟှာ နန်းနို့ထတ်ဟှို ဆင်းလာခန်ထိ ယေရုရှလင်ဗြို့မာဘဲ့ စောန့်နေရမယ်" ဆိုဘီး သူးနို့ဟှို မိန့်တော်မူလေဟှယ်။

50 ✝အယ်ဘီးန ကိုယ်တော်ဟှာ သူးနို့ဟှို ဗေသနိဝါဟှို ခေါ်ဆောန်ဟှားဘီး ကိုယ်တော်ဟှာ လတ်တော်ဟှို မြှော့-က်ဘီး သူးနို့ဟှို ကောန်းဂျီးပေးတော်မူဟှယ်။ 51 အယ်မျိုး သူးနို့ဟှို ကောန်းဂျီးပေးနေဒူးမာ ကိုယ်တော်ဟှာ သူးနို့နားဟှနေ ထွပ်ခွာဟှားဘီး ကောန်းဂန်ဘောင်ဟှို ယူဆောန်ခံရလေဟှယ်။* 52 သူးနို့ဟှာ ကိုယ်တော့်ဟှို ကိုးကွယ်ဘီးန ရရာတိုင်း ဝန်းသာဘီးဟှာ ယေရုရှလင်ဗြို့ဟှို ပ္လန်ဟှားဂေ့ဘီးဟှာ၊ 53 ဗိမာန်တော်မာ ဘုရားသခင်ရဲ့ ကျေးဇူးတော်ဟှို မြဲဒမ်း ချီးမွမ်းနေဂေ့ဟှယ်။